1. Ngei Djesu akakumbira Baba ake kuti acengetedze afundi ake?

PA USIKU wake wekupedzesera ari pa nyika, Djesu airangarira nge zve zvineso zvaizosongana no afundi ake. Rudo raaizwa ku shamwari dzake, rakaita kuti Djesu akumbire Baba ake eciti “acengetedzei pane akashata.” (Ju. 17:14, 15) Djesu aiziya kuti nokukasika aizohwirira kudenga, uye Sathani waizorumbwa ecirwhisa aya aizoda kuseenzera Djehovha. Ndiyo ndaa anhu a Djehovha aizoda kudziirirhwa.

2. Ngei tecigara no rugondo rokuti Djehovha acadaira minamato yedu?

² Nge ndaa ye rudo raanozwa ku Mwana wake, Djehovha akaita zvakakumbirhwa ndi Djesu. Kana tikaitawo pese patinokwanisa napo kuti tizwire Djehovha, ayena acatidawo, uye patinonamata tecikumbira kubetserhwa uye kudziirirhwa ayena acatidaira. Djehovha akaita hingana baba anoda mhuri yawo. Iyena aazombosiyi kuriritira no rudo ana ake!

3. Ngei tecida kudziirirhwa na Djehovha nyamasi uno?

³ Mazuwa atiri ano taakunyanya kuda kudziirirhwa ndi Djehovha. Sathani wakadzingirhwa kudenga, uye wakacita pasi pano “no kutsamwa kukuru.” (Zva. 12:12) Iyena wakaita kuti anhu amweni arangarire kuti, kuteerera anhu a Djehovha kunonga kuri kuitira “Mwari basa dzvene.” (Ju. 16:2) Anhu amweni asikatendi muna Mwari, anotiteerera ngokuti isusu takasiyana no anhu e mu nyika yese. Kunyazi anhu angatiteerera nge cikonzero cipi haco, atidikani kutya. Ngei? Ngekuti Soko ra Mwari rinoti: “Tenzi akagondeka, uye ayena acamubambisai omudziirirai pane akashata.” (2Ate. 3:3) Djehovha anotidziirira kudini? Ngatione mishobo yaanozviita.

4. Maererano na Aefeso 6:13-17, Djehovha akatipei kuti tidzidziirire?

⁴ Djehovha akatipasa zvivhikhiro kuitira kuti tidzidziirire pakurhwisa ka Sathani. (Erengai Aefeso 6:13-17.) Asi zviro izvi zvicatidziirira kana isusu tikaseenzesa ciro cimwe na cimwe—uye kana tikasama kuzvibvisa. Ciro cimwe na cimwe ce zvivhikhiro zvakakwana, cinoimirirei? Ngatione.

5. Cinyi cinozwi bhande re cokwadi, uye ngei tecidikana kuriseenzesa?

⁵ Bhande recokwadi rinoimirira cokwadi catinogumira mu Soko ra Mwari Bhaibheri. Ngei tecidikana kuriseenzesa? Ngekuti Sathani ndi “baba we manyepo.” (Ju. 8:44) Iyena waanomakore akawanda ecinyepera no kupausa anhu “mu nyika yese inogarhwa”! (Zva. 12:9) Asi cokwadi ciri mu Bhaibheri, cinotibetsera kuti isusu tisanyeperhwe ndiye. Tingaseenzesa kudini bhande iri? Ngekufunda cokwadi cakaringana nge zva Djehovha, kunamata ayena no “mwiya we cokwadi,” uye nokuita zviro zvese takagondeka.—Ju. 4:24; Aef. 4:25; Ahe. 13:18.

6. Cinyi cinozwi cifukidzo ce paditi ce unatsi, uye ngei tecidikana kucipfeka?

⁶ Cifukidzo ce paditi ce unatsi cinoimirira mitemo ye unatsi ya Djehovha. Ngei tecidikana kucipfeka? Mu nguwa dzekare, cifukidzo ce paditi ce unatsi, caidziirira mwoyo we mu surudado kuti ayena asafurhwe nge banga kana mipasha. Zvimwezvimwezvoo, cifukidzo ce paditi ce unatsi, cinodziirira mwoyo wedu kana kuti zvatiri ngece mukati. Cifukidzo ici, acitenderi kuti isusu tibatanidzwewo pa mishobo yakashata ye nyika ino. (Zvie. 4:23) Djehovha anoda kuti timude uye timuseenzere ne mwoyo wese. (Mt. 22:36, 37) Ndiyo ndaa, Sathani unoedza kuparadzanisa mwoyo wedu kuitira kuti tide zviro zviri mu nyika—zviro zvinozondwa na Djehovha. (Tg. 4:4; 1Ju. 2:15, 16) Uye kana murau uu ukasama kuseenza, iyena unoedza kutityisidzira kuti tiedze kusazwira mitemo ya Djehovha.

7. Tingapfeka kudini cifukidzo ce paditi ce unatsi?

⁷ Isusu tinopfeka cifukidzo ce paditi ce unatsi ngekutendera mitemo ya Djehovha yakaringana nge zvakanaka ne zvakashata, uye kurarama maererano nayo. (Pis. 97:10) Anhu amweni anoti mitemo ya Djehovha aina rudo. Asi museenzi wa Djehovha anosiya kuseenzesa mazano e Bhaibheri mu upenyu wake, unoezaniswa no musuradado unobvisa cifukidzo cake ce paditi ari pakati pe hondo, ngekuti iyena unorangarira kuti zvirikumuremera. Kuita izvi kaizogara upenzi! Munhu unoda Djehovha, aawone mitemo yake hingana “inorema,” asi hingana ciro cinokwanisa kuponesa upenyu wake.—1Ju. 5:3.

8. Zvinoreyei tsoka dzakagadzirira kooparidzira masoko akanaka?

⁸ Pauro wakatikohomedzesa kugara ne tsoka dzakagadzirira kooparidzira masoko akanaka e runyararo. Nge masoko amweni, tinodikana kurumbwa takagadzirira kuparidzira masoko akanaka e Umambo. Patinobvunza amweni masoko e Bhaibheri, kutenda kedu kunobamba. Zvinopfadza maningi kuona kuti anhu a Djehovha mu nyika yese, anopsvaka mikana kuti ange eciparidzira masoko aya—kungaita kubasa, kucikora, mu mbuto dzinotengeserhwana, pakuparidzira pa nyumba ne nyumba, pakutenga, pakuvhakacira abereki asikatendi, pakucedza ne anhu atinoziya, uye kunyazi patisikakwanisi kubuda pa nyumba. Kana tikatya uye toima kuparidzira, zvinoita hingana musurudado unobvisa bhutsu dzake pa nguwa ye kurhwa. Kana musurudado akaita izvi,  iyena waizokasika kukuwara mu tsoka. Uye pakupedzesera waizokwanisa kubaiwa uye waingasikazokwanisizve kupurutana mitemo ye mutungamiriri wake.

9. Ngei tecidikana kupfeka civhikhiro cikuru ce kutenda?

⁹ Civhikhiro cikuru ce kutenda cinoimirira kutenda kedu muna Djehovha. Isusu tinorugondo rokuti Djehovha, acadzadzisa zvipikirhwa zvake zvese. Kutenda uku, kunotibetsera “kudzima mipasha yese inobaka inokhandirhwa ne akashata.” Ngei tecidikana kupfeka civhikhiro cikuru ce kutenda? Ngekuti icona cinotidziirira kuti tisanyeperhwe nge fundiso dze anhu akasiya kutenda, uye kuti tisatyisidzirhwe nge anhu aya asikatendi zviro zvatinotenda. Tisina kutenda, atizooni simba rokuenderera mberi, kana anhu akaedza kutiita kuti tisazwire mitemo ya Djehovha. Pese patinoramba kuita zviro zvinozondwa na Djehovha, kunyazi ku basa, kucikora, tinonga tecipfeka civhikhiro cikuru ce kutenda. (1Pe. 3:15) Pese patinosiya basa rinopa mare yakawanda ngekuziya kuti ricatikuwadza pakunamata, tinonga teciseenzesa civhikhiro cedu ce kutenda. (Ahe. 13:5, 6) Uye pese patinoseenzera Djehovha kunyazi tecizondwa, tinonga tecidziirirhwa nge civhikhiro cikuru ce kutenda.—1Ate. 2:2.

10. Cinyi cinozwi kapaseti yo ruponeso, uye ngei tecidikana kuiseenzesa?

 ¹⁰ Kapaseti yo ruponeso ikariro yatinopaswa na Djehovha—kariro yokuti ayena acatinunura pa rufu uye acakomborera anhu ese anoita kuda kake. (1Ate. 5:8; 1Ti. 4:10; Tit. 1:1, 2) Kuita hingana kapaseti yaidziirira musoro we musurudado, kapaseti yo ruponeso inodziirirawo ndangariro dzedu. Nge gwanza ripi? Kariro yatinopaswa na Djehovha, inoita kuti isusu tirumbwe tecirangarira zvipikirhwa zvake uye inotiita kuti isusu tione zviri nani matambudziko anonga eciuya. Tingaseenzesa kudini kapaseti yedu? Tingazviita tecirangarira nge mushobo unorangairhwa na Djehovha. Ngo muezaniso, atikandi kariro yedu pa upfumi ucada kupera, asi tinoikanda muna Mwari.—Pis. 26:2; 104:34; 1Ti. 6:17.

11. Cinyi cinozwi banga re kumwiya, uye ngei tecidikana kuriseenzesa?

¹¹ Banga re kumwiya iSoko ra Mwari Bhaibheri. Banga iri rinosimba rokubudisa pamhene manyepo ese uye kusudzunura anhu pa mafundisiro ese ekunyepa, kutobatanidzawo ne miitiro yakashata. (2Ako. 10:4, 5; 2Ti. 3:16, 17; Ahe. 4:12) Tinofundira kunyasa kuseenzesa zvakanaka banga iri, ngekuita fundo ye munhu ega uye no rowedzo yatinotambira kubva ku sangano ra Mwari. (2Ti. 2:15) Pane kutipasa basi zvivhikhiro zvekumwiya, cidziiriro cipizve catinopaswa na Djehovha?

12. Cinyizve catinoda, uye ngei?

¹² Musurudado wagara no basa, unoziya kuti aakwanisi kukunda anyahondo akawanda ari ega, iyena unoda rubetso re masurudado amweni. Zvimwezvimwezvoo, atikwanisi kukunda Sathani ne ateeri ake tiri tega, tinoda rubetso re hama ne hanzvadzi dzedu. Ndiyo ndaa Djehovha anotipasa “sangano rese re hama” rakagadzirira kuti ritibetse.—1Pe. 2:17.

13. Maererano na Ahebheru 10:24, 25, misangano ingatibetsera kudini?

¹³ Mushobo umweni watingatambira rubetso ratinoda, ngewe kupinda misangano. (Erengai Ahebheru 10:24, 25.) Tese nguwa dzimweni tingakwanisa kuora mwoyo—zviro izvi pazvinoitika—misangano ingakwanisa kutibambisa. Mhinduro dzepamwoyo dzinopaswa nge hama ne hanzvadzi dzedu dzinotibambisa. Mharidzo dzakawakirhwa mu Bhaibheri uye miezaniso dzinotikohomedzesa kuti tirumbwe teciseenzera Djehovha. Uye kucedza nawo misangano isati yatanga uye yapera zvinotipfadza. (1Ate. 5:14) Kusiya izvona, tinozwa mipfaro mukuru pakubetsera amweni pa misangano. (Zvi. 20:35; Aro. 1:11, 12) Misangano inotibetserazve nge mishobo dzimweni. Iyona inoita kuti titunhudzire maparidzire uye mafundisire edu. Nge muezaniso, kumisangano katinonyasa kufunda kuseenzesa Bhokisi re Mafaramenta e Kufundisa. Hino nyasai kugadzirira pamunoenda ku misangano. Muri pamisangano, nyasai kupurutana. Misangano painopera, seenzesai zviya zvamunonga mafunda. Ngekuita kudaro, imwimwi mucagara “musurudado wa Kristu wakanaka.”—2Ti. 2:3.

14. Rubetso ripizve ratinaro?

¹⁴ Isusu tinorubetso re mamirionji e ngirozi dzinosimba. Rangarirai zvingakwanisa kuizwa nge ngirozi imwe! (Isa. 37:36) Zvino cimborangarirai zvingakwanisa kuizwa nge ngirozi dzakawanda. Akuna dhimoni kana munhu angaezaniswa no ngirozi idzi dza Djehovha dzinosimba. Anhu amweni akati kunyazi kuno anhu akawanda maningi angatirhwisa, munhu umwe basi ari kudii ra Djehovha anhu aya akawanda maningi (Ato. 6:16) Ici icokwadi! Hino, patinozwa takaora mwoyo  nge ciro cinonga caizwa nge shamwari uye kana abereki asikatendi, rangarirai kuti ndiyani ari kudii renyu. Edzurirai kuti imwimwi amurimwegapi pa hondo. Djehovha ari pamberi penyu ecimutungamirira.

15. Maererano na Isaya 54:15, 17, ngei kusina munhu acakwanisa kuimisa anhu a Djehovha?

¹⁵ Nyika ino ya Sathani ino zvikonzero zvakawanda zvekuti itizonde. Isusu atibatanidzwi pane zvematongerhwo e nyika, kunyazi kupindira mu hondo. Isusu tinoziisa zina ra Mwari, tinoparidzira kuti Umambo wake basi ndiwona ucaunzisa runyararo ku anhu uye tinopurutana mitemo yake. Isusu tinoparidzira kuti mutongi we nyika ino, munyepi mukuru uye muurayi. (Ju. 8:44) Uye isusu tinoparidzira kuti nokukasika, nyika ya Sathani icaparadzwa. Asi Sathani no ateeri ake, aazombokwanisi kutiimisa. Kusiyana na izvona, ticarumbwa teciita zvese kuti tipase mbiri Djehovha! Kunyazi Sathani ano simba rakadini, aakwanisi kuita kuti masoko e Umambo asagume ku munhu wese. Uye zvese zvinobvira ngekuti tinorudziiriro ra Djehovha.—Erengai Isaya 54:15, 17.

16. Djehovha acaponesa kudini anhu ake pakutambudzika kukuru?

¹⁶ Cinyi cicaitika mbai-mbai pano? Pakutambudzika kukuru, Djehovha acatiponesa eciseenzesa makwanza mairi anoshamisa. Rokutanga, ayena acaponesa aseenzi ake akagondeka, paacaita kuti madzimambo e nyika aparadze Bhabhironi Guru, muzinda mukuru we citendero cekunyepa. (Zva. 17:16-18; 18:2, 4) Hino, ayena acaponesazve anhu ake paacaparadza nyika ya Sathani pa Amagedhoni.—Zva. 7:9, 10; 16:14, 16.

17. Ngei tecidikana kurumbwa tiri pa dhuze na Djehovha?

¹⁷ Kana tikarumbwa tiri padhuze na Djehovha, Sathani aazokwanisi kuzoita zviro zvinotikuwadza nokusikaperi. Zvezvirokwazvo, iyena ndiyena acaparadzwa nokusikaperi. (Aro. 16:20) Ndiyo ndaa pfekai—uye musambofe makadusa civhikhiro cenyu cakakwana! Musaedze kurhwa muri mwega. Betserai hama ne hanzvadzi dzenyu. Uye purutanai nhungamiriro dza Djehovha. Kana mukadaro, garai henyu no rugondo rokuti Baba enyu e kudenga ano rudo acamubambisai uye acamudziirirai.—Isa. 41:10.