1-2. Ndiyani ungakwanisa kubetsera mufundi we Bhaibheri kuti agume pa kubhabhatidzwa?

“NDAIPFARIRA maningi zviya zvandainga ndecifunda pa fundo yangu yo Bhaibheri. Ndaiziya kuti cainga ciri cokwadi. Asi ndakatanga kuita cinjo dzaidikanwa mu upenyu wangu, paya pandakatanga kushamwaridzana no hama uye ndakaguma pa kubhabhatidzwa.” Ndizvona zvakarekethwa na Amy, hanzvadzi inogara ku Fiji. Masoko aya, anobudisa cokwadi cinokosha: Pane mikana yakawanda ye kuti mufundi we Bhaibheri agume pa kubhabhatidzwa, kana akatambira rubetso re hama no hanzvadzi dziri mu ungano.

² Muparidzi umwe na umwe, angakwanisa kubetsera kuti ungano ikure. (Aef. 4:16) Piyoneira unozwi Leilani, unogara ku Vanuatu, unoti: “Pano cierengo cinoti, munhu umwe na umwe ungakwanisa kubetsera pakupangira mwana. Ndinoona kuti izvimwezvoo zvinodikanwa pa kuita afundi. Kajinji kakhona, panotodikanwa ungano yese kamare, pakubetsera mufundi kuti auye mu cokwadi.” Nhengo dziri mu mhuri, madzishamwari uye afundisi e kucikora, ese hawo ano basa re kubetsera mwana kuti abudirire. Awona angaita izvi nge kumukohomedzesa uye nge kumufundisa zviro zvinokosha. Nge mushobo umwewo, aparidzi ese, angakwanisa kupasa mazano, kubambisa uye kupasa muezaniso wakanaka ku afundi e Bhaibheri. Paanoita izvi, angakwanisa kubetsera mufundi dakara pa kubhabhatidzwa.— Zvi. 15:22.

3. Ngazvipi zvamafunda pa masoko akarekethwa na Ana, Dorin uye Leilani?

³ Hama dzese dziri mu ungano, dzingakwanisa kubetsera mufundi we Bhaibheri. Uye muparidzi unonga eciitisa fundo ii, unodikana kutenda ndizvona. Onai zvakarekethwa na Ana, piyoneira kamare unogara ku Moldávia, iyena wakati: “Zvinoshupha maningi  kuti munhu umwe basi, akwanise kuzwisisa zvese zvinodikanwa no mufundi we Bhaibheri paanotanga kubudirira.” Dorin, piyoneira kamare unoseenzerawo ku Moldávia, iyena unoti: “Kajinji kakhona, aparidzi amweni angakwanisa kureketa masoko angabaya mwoyo we mufundi, pamweni paya, zviro zvekuti ndinonga ndisati ndamubvunza.” Leilani, unoreketazve eciti: “Mufundi we Bhaibheri paanozwa rudo re hama dziri mu ungano, iyena ungakwanisa kuzwisisa kamare kuti tiri anhu a Djehovha.”— Ju. 13:35.

4. Ngazvipi zvaticaona mu fundo ino?

⁴ Pamweni imwimwi mungadzibvunzisa: ‘Ndingabetsera kudini mufundi we Bhaibheri kuti abudirire, asi ndisiripi mufundisi wake?’ Mufundo ino, ticada kuona kuti ngazvipi zvatinodikana kuita, kana tikapikwa ku fundo ye Bhaibheri. Uye ticaonawo kuti ngazvipi zvatinodikana kuita kana mufundi we Bhaibheri akatanga kupinda misangano. Pakupedzesera, ticaona kuti akuru, anodikana kuitei kuti abetsere mufundi we Bhaibheri kuti abudirire dakara pa kubhabhatidzwa.

5. Munodikana kuitei pamunopikwa ku fundo ye Bhaibheri?

⁵ Pa fundo yo Bhaibheri, anoubaba we kubetsera mufundi kuti azwisise soko ra Mwari, ndi mufundisi. Kana mufundisi akamupikai kuti muende mwese koitisa fundo yo Bhaibheri, munodikana kudziona hingana mudoni wake. Basa renyu ndere kubetsera. (Mup. 4:9, 10) Asi, ngazvipi zvamunodikana kuita kuti fundo iyona ibetsere?

6. Pamunopikwa ku fundo ye Bhaibheri, mungaseenzesa kudini zano riri pana Zvierengo 20:18?

⁶ Nyasai kugadzirira. Cokutanga, kumbirai mufundisi kuti amubvunze zviro zvinganani zvine cokuita no mufundiwo. (Erengai Zvierengo 20:18.) Mungakwanisa kubvunzisa mibvunzo yakadai hingana ii: “Ngazvipi zvakambosongana no mufundi mu upenyu wake? Ngazvipi zvamucafunda? Ngacipi cinangwa cenyu pa fundo ii? Pano zviro zvandinodikana, uye zvandisikadikani kureketa patinonga tecifunda here? Zvinyi zvingabetsera mufundi kuti abudirire?” Zviri pamhene kuti mufundisi aazoreketi zviro zvakaigika zve mufundi, asi masoko aacamubvunza angakwanisa kumubetsera. Misionariya umweni unozwi Joy unosocedza zvakaringana na izvi, no hanvazdzi dziya dzaanopika kuti dzimuperekedze ku fundo dzake dzo Bhaibheri. Iyona inoti: “Ndinopfarira kureketa izvi no mudoni wangu wandinonga ndabuda naye mu basa re kuparidzira, ngokuti izvona zvicamubetsera kui apfarire mufundi wangu uye aziye zvekureketa paya patinonga tecifunda.”

7. Ngei zvakanaka kugara makagadzirira, kunyazi meciperekedza fundo ye Bhaibheri?

⁷ Kana mukapikwa pa fundo ye Bhaibheri, zvakanaka kuti mugadzirire zviya zvicafundwa pacino nguwa. (Esd. 7:10) Dorin, wamborekethwa ngezvake, unoti: “Inini ndinoda maningi kana mudoni wangu akagadzirira. Paanoita izvi, zvicamubetsera kuti apasewo mazano anokosha.”  Kupinda izvi, kana mufundisi uye no uya anoperekedza akanyasa kugadzirira, mufundi ucakwanisa kunyasa kuzwisisa, uye izvi zvicakwanisa kumupasa muezaniso wakanaka. Kunyazi musikakwanisi kuzogadzirira zvese zvicafundwa, torai nguwa kuti muyase kuziya mafundo makuru acafundwa pa fundo ii.

8. Mungagara kudini no cokwadi cokuti munamato wenyu ucabetsera mufundi we Bhaibheri?

⁸ Munamato unodikanwa maningi pa fundo ye Bhaibheri. Ndiyo ndaa, gadzirirai pacino nguwa zviya zvamucareketa kana mufundisi akamukumbirai kuti muite munamato. Kana mukadaro, munamato wenyu ucabetsera. (Pis. 141:2) Onai zvakaitika no Hanae, unogara ku Japão. Paainga ecifunda Bhaibheri, mufundisi wake, aitora hanzvadzi dzimweni kuti dzimuperekedze pa fundo. Dakara nyamasi uno, Hanae aciri kuedzurira munamato wakaizwa nge hanzvadzi imweni. Iyena unoti: “Ndaikwanisa kuzwisisa kuti iyena ainga ano ushamwari wakabamba na Djehovha, uye ndaidawo kugara hingana iyena. Pese paibatanidza zina rangu paaita munamato, ndaizwa kuti ndinodiwa.”

9. Maererano na Tiyago 1:19, ngazvipi zvamungaita kuti mubetsere mufundisi pamunonga muri pafundo yo Bhaibheri?

⁹ Betserai mufundisi pamunonga muri pa fundo yo Bhaibheri. Piyoneira kamare unogara ku Nigéria, unozwi Omamuyovbi, unoti: “Mudoni wakanaka we kuitisa naye fundo, nde uya unonyasa kuteya nzee. Iyena unopasa maonero akanaka, pamunonga meciitisa fundo, asi aareketi zvakawanda ngekuti unoziya kuti mufundisi ndiyena unodikana kureketa zvakawanda.” Hino, inguwai yamunodikana kureketa? Uye ngazvipi zvamunodikana kureketa? (Zvi. 25:11) Nyasai kuteya nzee, mufundisi uye mufundi paanonga ecireketa. (Erengai Tiyago 1:19.) Kana mukadaro, mucakwanisa kubetsera pa nguwa yakasisira. Asi zviri pamhene kuti, munodikana kuzviita ngo mwazvo. Ngo muezaniso, amudikani kureketa zvakawanda, kana kugurira mufundisi nge pakati paanonga ecireketa kana kucinja makani. Asi mungakwanisa kubudisa fundo inokosha pa zviya zvinonga zvecifundwa, nge masoko asikazi kureba, nge muezaniso kana kuti nge kuita mibvunzo. Pa nguwa dzimweni, mungakwanisa kuzwa hingana kuti amuripi kubetsera pa zviya zvinonga zvecifundwa. Kana zvikaitika, simbai mufundi uye pangidzai kuti munomupfarira. Nge kuita izvi, zvingakwanisa kubetsera maningi mufundi kuti abudirire.

10. Zvakaitika kamuri, zvingabetsera kudini mufundi we Bhaibheri?

¹⁰ Panganidzai zvakaitika kamuri. Panganidzai zvakaitika kamuri, kana zvecidikanwa, mungakwanisa kupanganidza nge kukasika ku mufundi wenyu we Bhaibheri nge zviya zvakaitika kamuri pamakafunda cokwadi, kuti makakunda kudini zvinetso, kana kuti makazwa kudini rubetso ra Djehovha mu upenyu wenyu. (Pis. 78:4, 7) Pamweni zvakaitika mu upenyu wenyu, ndizvona kamare zvinoda mufundi kuzwa. Zvingakwanisa kumubetsera kuti abambise kutenda kake, kana kuti, kumukohomedzesa kuti abudirire  dakara pa kubhabhatidzwa. Pamweni zviya zvakaitika mu upenyu wenyu, zvingamubetsera kukunda muedzo yaari kusongana nawo. (1Pe. 5:9) Gabriel, unogara ku Brasil, uye nyamasi uno uri kuseenza hingana piyoneiro, uciri kuedzurira zviya zvakamubetsera paainga aciri mufundi. Iyena unoti: “Pandaizwa zvakambosongana no hama, ndaikwanisa kuona kuti Djehovha anoona zvinetso zvatinosongana nazvo. Uye kana awona akakwanisa kukunda zvinetso izvi, inini ndaizokwanisawo.”

11-12. Ngei tecidikana kutambira zvakanaka mufundi we Bhaibheri paanotanga kupinda misangano?

¹¹ Kuti mufundi we Bhaibheri agume pa kubhabhatidzwa, unodikana kupinda misangano nguwa dzese uye abetsereke ndiyona. (Ahe. 10:24, 25) Mufundisi wake, ndiyena ucamupika kuti atange kupinda misangano. Paanotanga kupinda misangano, tese hedu, tingakwanisa kumukohomedzesa kuti arumbwe eciipinda. Asi, tingazviita kudini?

¹² Tambirai zvakanaka mufundi we Bhaibheri. (Aro. 15:7) Mufundi we Bhaibheri paanotambirhwa zvakanaka pa misangano, iyena ungakwanisa kugara no cido cekuda kuhwirirazve ku Nyumba yo Umambo. Kuti iyena asazwe hingana ari ega, cungamidzai mufundi we Bhaibheri uye mupangidzei hama dzimweni. Musarangarire kuti pano munhu ari kumubetsera, nge kuti pamweni mufundisi wake anonoka kuguma kana kuti pano basa raari kuita mu ungano. Nyasai kupurutana zvese zvinorekethwa no mufundi uye mupangidzei kuti munomupfarira. Kana mukatambira zvakanaka mufundi we Bhaibheri, iyena ucazwa kudini? Onai zvakamboitika kuna Dmitrii. Iyena akabhabhatidzwa makore manganani adarika uye nyamasi uno, uri kuseenza hingana mubati anoseenzera. Iyena unoti: “Ndainga ndecietsera ndiri kunze ke Nyumba yo Umambo, ndecida kuziya zvicaitika. Hama imweni yakandiona, uye yakandiperekedza mu Nyumba yo Umambo. Hama dzakawanda dzakauya koondicungamidza. Ndakashamisika maningi. Ndakaguma pekutorangarira kuti: Ndaida kuti misangano iizwe mazuwa ese. Ikona, ndaikwanisa kuzwa zviro zvandainga ndisikakwanisi kuzwa ku mbuto imweni.”

13. Muhambiro wenyu, ungabata-bata kudini mufundi we Bhaibheri?

¹³ Garai muezaninso wakanaka. Muhambiro wenyu, ungakwanisa kubetsera mufundi we Bhaibheri agare no rugondo rekuti agumira cokwadi. (Mt. 5:16) Vitalii, parizvino uri kuseenza hingana piyoneiro ku Moldávia, unoti: “Ndaiona mushobo we kurarama, we kurangarira uye zwaiizwa no hama dzainga dziri mu ungano. Izvi zvakaita kuti ndigare no rugondo rekuti Apupuri a Djehovha anohamba na Mwari.”

14. Muezaniso wenyu, ungabetsera kudini kuti mufundi arumbwe ecibudirira?

¹⁴ Asati aguma pa kubhabhatidzwa, mufundi we Bhaibheri unodikana kuseenzesa zviya zvaanonga ecifunda. Izvi, azviripi nyore nguwa  dzese. Asi kana mufundi akaona kuti imwimwi munorarama maererano no mitemo iri mu Bhaibheri uye kuti izvi zvinobetsera, pamweni iyena ungakwanisa kuzwa cido ce kuitawo izvona. (1Ako. 11:1) Onai muezaniso wa Hanae, waamborekethwa nge zvake. Iyena unoti: “Hama dziri mu ungano dzainga dziri muezaniso wakanaka we zviya zvandainga ndecifunda. Ndakafunda kuti ndingapfadza kudini amweni, ndingarekerera kudini uye ndingapangidza kudini rudo. Nguwa dzese, hama dzaireketa zvakanaka nge zve amweni. Inini ndaida kugarawo hingana awona.”

15. Maererano na Zvierengo 27:17, ngei tecidikana kushamwaridzana no afundi?

¹⁵ Shamwaridzanai no afundi. Mufundi paanonga ecipinda misangano nguwa dzese, pangidzai kuti zvezvirokwazvo munomupfarira. (Afi. 2:4) Torai nguwa yekuceda naye. Musikapindiri mu upenyu wake, simbai mufundi nge cinjo dzese dzaakaita. Bvunzisai nge zve kufunda kake Bhaibheri, mhuri yake uye nge zve basa rake. Makani akaita hingana aya, acabetsera imwimwi muri airi kuti mugare shamwari dzakanaka. Uye izvona, zvingakwanisa kubetsera mufundi kuti agare no cido ce kuda kubhabhatidzwa. (Erengai Zvierengo 27:17.) Nyamasi uno Hanae waapiyoneiro we mguwa dzese. Nge zve kutanga kaakaita kupinda misangano, iyena unoti: “Pa nguwa yandaitanga kuita ushamwari mu ungano, ndaigara no cido ce kuenda ku misangano. Uye kunyazi pendainga ndakaremba, ndaiyenda ku Nyumba yo Umambo. Ndaipfarira kutamba no shamwari dzangu dzipsva. Uye izvi, zvakandibetsera kuti ndigure ushamwari no aya ainga asikaseenzeri Djehovha. Ndaida kurumbwa ndiri pa dhuze na Djehovha uye no hama dze mu ungano. Hino, ndakasanangura kubhabhatidzwa.

16. Zvii zvamungaitazve kuti mubetsere mufundi we Bhaibheri kuti azwe akasudzunuka pa misangano?

¹⁶ Mufundi we Bhaibheri paanorumbwa ecibudirira uye eciita cinjo, mubetserei kuti azwe hingana nhengo ye ungano. Mungaita izvi nge kumutambira zvakanaka. (Ahe. 13:2) Ecirangarira pa nguwa yaainga ari mufundi, Denis, unoseenzera ku Moldávia unoti: “Inini no mukadzi wangu, taipikwa kakawanda kumapikiniki no hama. Muzviitiko izvi, aona aireketa kuti akatambira kudini rubetso ra Djehovha, uye izvi zvaindibambisa maningi. Takagara no rugondo rokuda kuseenzera Djehovha, uye kuti taikwanisa kugara no upenyu unopfadza.” Mufundi we Bhaibheri paanogadzwa kuti agare muparidzi asikazi kubhabhatidzwa, mungakwanisa kumupika kuti mubude mwese mubasa re kuparidzira. Diego, muparidzi unogara ku Brasil, unoti: “Hama dzakawanda dzakandipika kuti tiseenze pamwepo mu basa re kuparidzira. Zvakandibetsera kuti ndinyase kuziya umwe na umwe wawo, uye ndakakwanisa kugara shamwari ya Djehovha na Djesu.”

17. Akuru angabetsera kudini afundi e Bhaibheri?

¹⁷ Psvakai nguwa kuti mucedze no afundi e Bhaibheri. Akuru, rudo renyu uye kupangidza  kenyu kupfarira afundi e Bhaibheri, zvingaabetsera kuti abudirire uye agume pa kubhabhatidzwa. Zvakadini kutora nguwa, pa musangano umwe na umwe kuti mucedze no afundi e Bhaibheri? Paanotanga kudaira pa misangano, adaidzei no zina rawo. Kana mukadaro, awona acazwa kuti imwimwi munoapfarira. Zvakadini kumboronga kuperekedza muparidzi paanoenda koitisa fundo yake ye Bhaibheri? Kubetsera kamungaita mufundi, zvingakwanisa kudarika zviya zvamainga mecirangarira. Jackie, piyoneira unogara ku Nigéria, unoti: “Afundi akawanda e Bhaibheri anoshamiswa kana akazwa kuti hama yainga yeciperekedza mufundisi wake i mukuru we ungano.” Mufundi umweni akatondibvunza eciti: “Pastori wangu wainga asikambozviiti. Iyena unondovhakacira basi apfumi, asi kana akapaswa mare!” Parizvino mufundi uu waakutopinda misangano.

18. Akuru, angaseenzesa kudini zano riri pana Zviito 20:28?

¹⁸ Fundisai uye bambisai afundisi. Akuru, munobasa rakakura maningi, rekubetsera aparidzi kuti aite basa ngo mwazvo, aparidzire uye aitise fundo. (Erengai Zviito 20:28.) Muparidzi ungakwanisa kupsveruka kuitisa fundo yo Bhaibheri imwimwi muripo, ngo kudaro dzipirei pa kuitisa fundo iyona. Jackie, wamborekethwa nge zvake, unoti: “Akuru anorumbwa ecindibvunzisa nge zve fundo dzangu. Pandinosongana no zvinetso pa kuitisa fundo, awona anondipasa mazano akanaka.” Akuru ano basa rakakura rekubambisa afundisi uye ne rekuabetsera kuti aenderere mberi. (1Ate. 5:11) Jackie unotizve: “Ndinopfara akuru paanondibambisa uye paanoreketa kuti basa rangu rinokosha kaari. Masoko akaita hingana aya, anonditonhodza hingana kopo ye mvura yakanyasa kutonhorera mu nguwa ye kupisa. Kusimba kaanondiita, kunoita kuti nditunhudzire rugondo rangu uye mupfaro wandiinawo pa kuitisa fundo dze Bhaibheri.”—Zvi. 25:25.

19. Tese tingakwanisa kugara no mupfaro upi?

¹⁹ Kunyazi pa nguwa ino musina fundo yo Bhaibheri yamuri kuitisa, mungakwanisa kubetsera mufundi kuti agume pa kubhabhatidzwa. Pamunopikwa ku fundo yo Bhaibheri, nyasai kugadzirira masoko angabetsera ku mufundisi, mecingwarira kuti musarekete zvakawanda. Itai ushamwari no afundi aya anonga ecitanga kuuya ku Nyumba yo Umambo, uye garai muezaniso wakanaka kaari. Kana muri mukuru, bambisai afundi, nge kutora nguwa ye kureketa nawo. Uye bambisai afundisi, meciarowedza uye meciasimba. Kana mukaita izvi, mucakwanisa kuzwa mupfaro wakakura we kubetsera munhu kuti ade uye aseenzere Baba edu Djehovha.