1. Madjaha ano mawara api?

MADJAHA, imwimwi munokosha maningi ku sangano ra Djehovha. Imwimwi makabamba uye makadzara nge simba. (Zvie. 20:29) Imwimwi muri cikomborero ku ungano yenyu. Pamweni imwimwi amuoni nguwa yokuzogara hingana mubati anoseenzera. Asi imwimwi mungadziona kuti hama dze ungano yenyu, pamweni acamuona hingana kuti amusati magadzirira kuti mutambire cikomborero ici. Asi imwimwi mungatora matanho kubvira zvino kuti musakurire ruremedzo uye kugondhwa nge hama dze ungano yenyu.

2. Ticaonei mu fundo ino?

² Mu fundo ino ticada kuongorora nge zve muezaniso wa Mambo Dhavhidhi. Uye ticada kuedzurirawo zvakaitika mu upenyu we madzimambo mairi e Djuda—Aza na Djeosafati. Ticada kuona zvimhingamupini zvakasongana no anarume atatu aya, toonazve kuti akaita kudini uye tozoona kuti madjaha anofundei pa miezaniso yawo.

3. Madjaha angaitei kuti abetsere hama dzakura dziri mu ungano?

³ Dhavhidhi painga aciri djaha, iyena wakasakurira zviro zvaireremedzwa nge anhu amweni. Zvainga zviri nyore kuona kuti iyena, wainga ari djaha raida zviro zvekunamata. Ayena wainga ari muembi wakanaka uye waiseenzesa zviro zvaaikwanisa kuita kuti abetsere Sauro, mambo wakagadzwa na Mwari. (1Sa. 16:16, 23) Imwimwi madjaha, muno zviro zvamunokwanisa kuita kuti mubetserewo amweni ari mu ungano yenyu here? Nge muezaniso, pamweni mungaona kuti hama imweni yacembera ye mu ungano menyu inoneseka kuti iseenzese thabreti kana thurufunu pa fundo ye munhu  ega kana kuti pa misangano. Zvakadini kuseenzesa ruziyo renyu kuti muibetsere. Zvezvirokwazvo hama ii icapfara maningi.

4. Eciteedzera Dhavhidhi, madjaha anodikana kusakurira mawara api? (Onai mufanikiso uri pa kapa.)

⁴ Mu zuwa no zuwa, Dhavhidhi waipangidza kuti wainga ari munhu wakagondeka. Nge muezaniso iyena paainga ari djaha, wakanyasa kucengeta mabira a baba ake. Uye onai kuti basa iri rainga rino ngozi. Onai zvakazopanganidzwa ndi Dhavhidhi kuna Mambo Sauro: “Mussenzi wenyu waiusha mabira a baba ake, uye pakauya mhondoro yotora bira, pa nguwa imweni, pakauyawo ursu rikaitawo zvimwezvo. Asi ndakabuda ndikazviteera ndikazviuraya, ndikanunura mabira akhona pa miromo yazvo.” (1Sa. 17:34, 35) Dhavhidhi waizwa ano ubaba no mabira, uye no ushingi akarhwa kuti amacengetedze. Imwimwi madjaha, mungateedzerawo muezaniso wake nge kuita basa ripi haro ramunonga mapaswa.

5. Maererano na Pisarema 25:14, ciro cipi cinonyanya kukosha cingaizwa nge madjaha?

⁵ Paainga aciri djaha, Dhavhidhi wakasakurira ushamwari wakabamba na Djehovha. Uye apana cainyanya kukosha kuna Dhavhidhi kudarika ushamwari iwona. Kunyazi pa ushingi wake, kunyazi nekukwanisa kake kuemba kuna Dhavhidhi, Djehovha wainga asiripi basi Mwari, asi Shamwari—Shamwari yake ye pa mwoyo. (Erengai Pisarema 25:14.) Madjaha, ciro cinonyanya kukosha camunodikana kuita, nge ce kubambisa ushamwari wenyu na Baba enyu e kudenga, kana mukadaro, imwimwi mucatambira makomborero akawanda.

6. Anhu amweni aiwona kudini Dhavhidhi?

⁶ Dhavhidhi wakasongana no cineso cekusama kuonekwa zvakanaka nge anhu amweni. Ngo muezaniso Dhavhidhi paakadzipira kuti arhwisane na Goriyati, Mambo Sauro wakaedza kuti Dhavhidhi asazviite, iyena wakati: “Undoriwo hako kamufana.” (1Sa. 17:31-33) Pa nguwa imweni sureyo, hama yake Dhavhidhi, yakareketa yeciti Dhavhidhi wainga ari munhu asikakwanisi kuita basa. (1Sa. 17:26-30) Asi Djehovha ainga asikamuoni kudaroko. Djehovha ainyasa kuziya zvakanaka Dhavhidhi. Uye ecigonda rubetso re Shamwari yake, Djehovha, Dhavhidhi wakakwanisa kukunda Goriyati.—1Sa. 17:45, 48-51.

7. Mungafundei pa zviro zvakaitika kuna Dhavhidhi?

 ⁷ Imwimwi mungafundei pa zviro zvakaitika kuna Dhavhidhi? Tinodikana kugara no mwoyo unononoka kutsamwa. Aya anomuziya kubvira pemainga muciri mwana mudoko, anganonoka kutendera kuti imwimwi makura. Asi gondai henyu kuti Djehovha anoona zviri mukati me mwoyo. Ayena anoziya kuti imwimwi ndimwi ani, uye anoziya zviro zvamunokwanisa kuita. (1Sa. 16:7) Bambisai ukama wenyu na Djehovha. Dhavhidhi wakaita izvona nge kuona zvisikwa zva Djehovha. Iyena waiedza kuona kuti zvisikwa zvingamufundisei nge zve Musiki. (Pis. 8:3, 4; 139:14; Aro. 1:20) Cimwenizve camungakwanisa kuita nge ce kukumbira Djehovha kuti amupase simba ramunoda. Ngo muezaniso, shamwari dzenyu dze ku cikora, dzinomuseka ngekuti imwimwi muri Mupupuri wa Djehovha here? Kana izvi zvikaitika namatai kuna Djehovha mecikumbira kuti mukwanisane no cinetso icona. Uye seenzesai zvamunofunda kubva mu Bhaibheri, mu mabhuku edu no mu mavhidhiyo edu. Pese pamunoona mushobo wakamubetsa ndiwo Djehovha kuti mukwanisane no cinetso, rugondo renyu kaari ricakura. Kupinda izvi pamunorumbwa mecigonda Djehovha, anhu ajinji acamugondawo.

8-9. Cinyi cakabetsera Dhavhidhi kuti aimire ne mwoyo unononoka kutsamwa kuti azogare mambo, madjaha angafundei pa muezaniso wake?

⁸ Onai cineso cimweni cakasongana na Dhavhidhi. Mu masure mekusangurhwa kuti azogare mambo we Djudha, Dhavhidhi waidikana kuetsera ke makore akawanda kuti azotange kutonga. (1Sa. 16:13; 2Sa. 2:3, 4) Pa nguwa ii yaietsera, cinyi cakamubetsera kuti agare no mwoyo unononoka kutsamwa? Pano kuti adzirhye mwoyo, Dhavhidhi wakaita zviro zvaaikwanisa kuita. Ngo muezaniso, paairumbwa ecitiza mu nyika yo Firistiya, Dhavhidhi wakakhorovhera mukana uu kuti arhwisane no azondi a Israeri. Nge kuita izvi, iyena wakakwanisa kudziirira cinyamugano ce nyika ye a Djuda.—1Sa. 27:1-12.

⁹ Madjaha angafundei pa muezaniso wa Dhavhidhi? Khorovherai mikana iri yese kuti mubetsere hama dzenyu. Onai zvakaitika ku hama imweni inozwi Ricardo. * Paainga aciri djaha, iyena waida maningi kugara mupionero we nguwa dzese. Asi akuru aimuona hingana kuti iyena wainga asati agadzirira. Pane kuti azvisiye zvakadaro uye ogara no shungu, Ricardo wakapeta masimba kuti aite zvakawanda mu basa rake rokuparidzira. Iyena unoti: “Ndikaringira sure, ndinoona kuti zvakandibetsera maningi kuita cinjo dzaidikanwa. Inini ndaibatikana pakuhwirira ku anhu aya aipangidza kupfarira uye ndainyasa kugadzirira kuti ndihwirirezve. Uye ndakakwanisa kufungura fundo yangu ye Bhaibheri yokutanga. Pendairumbwa ndeciparidzira ndainyasa kugara no rugondo.” Zvino Ricardo urikuseenza hingana mupioneiro we nguwa dzese uye waa mubati anoseenzera.

10. Dhavhidhi wakaitei asati aita cisananguro cinokosha?

¹⁰ Onai ciro cimweni cakaitika kuna Dhavhidhi. Iyena no anarume ake, paairarama hingana atizi, awona akasiya mhuri dzawo oenda koorhwa. Paakaenda koorhwa, azondi akapinda mu nyumba otora mhuri dzawo. Ngekuti Dhavhidhi wainga ari musurudado waikwanisa kurhwa, iyena waikwanisa kuranagrira kuti, ndinokwanisa kutsetsa mazano kuti ndigadzirirse shwiro ii. Asi pane kuti adaro, Dhavhidhi wakapsvaka kutungamirirhwa ndi Djehovha. Ecibetserhwa ndi  Abiatari, Dhavhidhi wakabvunzisa Djehovha kuti: “Ndopurutana anhu aya here?” Djehovha akati, honde uye akagondesa kuti Dhavhidhi waizobudirira. (1Sa. 30:7-10) Mungafundei pa ciitiko ici?

11. Imwimwi mungaitei musati maita zvisananguro?

¹¹ Psvakai nhungamiriro musati maita zvisananguro. Kumbirai rubetso re abereki enyu. Uyewo kumbirai rubetso re akuru agara no basa. Djehovha anogonda anarume aya akagadzwa. Uye imwimwiwo mungagondawo nawo. Djehovha anoona akuru hingana “zvipo” zve ungano. (Aef. 4:8) Zvaizopfadza kana imwimwi mukateedzera kutenda ke anarume aya, uye kupurutana mazano akanaka amucapaswa. Parizvino, ngatimbofunde nge muezaniso wa Mambo Aza.

12. Mawara api akapangidzwa ndi Mambo Aza paakagara mambo?

¹² Paainga aciri djaha, Mambo Aza waidzidodosa uye wainga ano ushingi. Ngo muezaniso, mu masure mekufa ka baba ake, Abhias, Aza wakagara mambo, uye wakatanga kuita gwitikwiti rokupedza kunamata zvidhori. Uyezve “wakabvunzawo a Djudha kuti apsvake Djehovha Mwari we madzitsekuru awo uye kuti acengete Mutemo ne nhungamiriro.” (2 Mak. 14:1-7) Uye Zera mu Etoyopi, paakapinda mu Djudha no ma surudado anokwana kuita 1 000 000 Aza no ungwaru wakapsvaka kubetswa ndi Djehovha eciti: “Haiwa Djehovha, kamuri azvina basa kuti amurikubetsera akawanda here kana kuti aana simba. Haiwa Djehovha Mwari wedu, tibetserei ngekuti tinogonda nemwi.” Masoko aya anopangidza kuti Aza, waithemba kuti Djehovha waikwanisa kuponesa Aza pamwepo no anhu ake. Aza wakathemba na Baba ake e kudenga, uye “Djehovha akakunda a Etiyopiya.”—2 Mak. 14:8-12.

13. Cinyi cakazoitika kuna Aza, uye ngei?

¹³ Imwimwi munozvigondawo, kuti kurhwisana no masurudado anokwana kuita 1 000 000 cineso cakakura maningi, asi Aza wakabudirira. Asi zvinosiririsa nge zve kuti, nokuhamba ke nguwa, Aza paakasongana no cineso cidoko aazi kupsvaka rubetso ra Djehovha. Paakashushwa ndi Mambo we Israeri Bhaasa, Aza wakapsvaka rubetso ra mambo we a Siriya. Cisanaguro ici cakaunzisa marhwadzo! Eciseenzesa muprofita Hanani, Djehovha akati kuna Aza: “Ngekuti makagonda na mambo we Siriya,  mukasama kugonda na Djehovha Mwari wako, anyahondo a mambo we a Siriya apukunyuka mu nyara dzako.” Zvezvirokwazvo kubvira apona Aza wairarama mu hondo ecirhwisana na Bhaaza. (2 Mak. 16:7, 9; 1Mad. 15:32) Tinofundei?

14. Imwimwi mungapangidza kudini kuti munogonda Djehovha, uye kana mukaita izvi, cinyi cicaitika maererano na 1 Timoti 4:12?

¹⁴ Musafe makasiya kudzidodosa uye kurumbwa mecigonda Djehovha. Pemakabhabhatidzwa, imwimwi makapangidza kuti munokutenda kakakura uye maigonda Djehovha. Uye Djehovha akapfara maningi, nge kugara nhengo ye mhuri yake. Hino cinodikana nge cekurumbwa mecigonda Djehovha. Zvingaita nyore kugonda Djehovha pamunonga mecida kuita cisananguro cinocinja upenyu wenyu, asi zvakadini kana mecida kuita cinanaguro cidoko? Zvinokosha kugonda Djehovha pakuita zvisananguro, zvingaita zvidoko zvakaita hingana kusanangura cokudziwaraidza naco kana zvakakura zvakaita hingana kusanagura basa uye cinangwa camunoda kugumira! Musathembe no uzii wenyu. Pane kuita kudaro, psvakai nhungamiriro dze Bhaibheri, uye dziseenzesei, zvaa zvadaro seenzesai zviya zvamunonga mafunda. (Zvie. 3:5, 6) Kana mukazviita Djehovha acapfara maningi uye imwimwi mucaita kuti hama dziri mu ungano dzimugonde.—Erengai 1 Timoti 4:12.

15. Hingana zvetaona pana 2 Makoronika 18:1-3; 19:2, zvishaishi zvipi zvakaizwa ndi Mambo Djeosafati?

¹⁵ Zviri pamhene kuti kuitawo hingana munhu wese, imwimwi amuzi kukwana, uye mucashaishawo no kuhamba ke nguwa. Asi zviro izvona, azvidikani kumupingidza kuti muite zvamunokwanisa kuna Djehovha. Onai muezaniso wa Mambo Djeosafati. Iyena wainga ano mawara akawanda. Paainga ari djaha, “iyena wakapsvaka Mwari wa baba ake uye waipurutana mitemo yake.” Kusiya izvona, iyena wakabvunza macinda kuti ahambe thaundi re Djudha kuti afundise anhu nge zva Djehovha. (2 Mak. 17:4, 7) Kunyazi hake wainga ari munhu wakanaka, nguwa dzimweni Djeosafati wakaita zvisananguro zvakashata. Uye nge kuita zvisananguro zvakadaro, Djeosafati wakapangwa nge muemereri wa Djehovha. (Erengai 2 Makoronika 18:1-3; 19:2.) Tingafundei pa ciitiko ici?

16. Imwimwi mungafundei no zvakaitika na Rajeev?

 ¹⁶ Tenderai uye seenzesai mazano amunotambira. Kuita hingana madjaha akawanda, pamweni zvingamushuphira kusanangura ciro cinokosha mu upenyu wenyu. Asi musaore mwoyo. Onai zvakaitika no hama imweni inozwi Rajeev. Paaireketa nge zve uwana udoko wake, iyena unoti: “Nguwa imweni, inini ndainga ndisikazii zvendaida mu upenyu wangu. Kuita hingana madjaha amweni, inini ndainyanya kupfarira maningi mitambo, kudziwaraidza pane kuenda ku misangano ne mu basa rekuparidzira.” Cinyi cakabetsera Rajeev? Rajeev wakabetserhwa nge zano raakapaswa nge mukuru unorudo. Rajeev unoti: “Iyena wakandibetsera kurangarira nge zve zvano riri pana 1 Timoti 4:8.” Rajeev wakadzidodosa uye wakapurutana zano iri, uye wakarangarira nge zviro zvaidikana kugara pa mbuto yekutanga mu upenyu wake. Iyena unoti: “Ndakasanangura kukanda zvinangwa zvekunamata pa mbuto yekutanga.” Zvinyi zvakazoitika? Rajeev unopanganidza, “mu masure me makore mashoma ndaa ndatambira zano iri, ndakazogara mubati anoseenzera.”

17. Hama dzakura dzinoona kudini madjaha?

¹⁷ Hama dzakura dzinoreremedza maningi imwimwi madjaha munoseenzera Djehovha “makabatana” nawo! (Zef. 3:9) Awona anopfara paanomuona imwimwi meciita no simba renyu rese zviro zviya zvamunopaswa kuti muite.—1Ju. 2:14.

18. Maererano na Zvierengo 27:11, Djehovha anoona kudini madjaha anomuseenzera?

¹⁸ Madjaha, musakanganwe kuti Djehovha anomuda uye anogonda nemwi. Djehovha akati, pa mazuwa e kupedzesera paizooneka madjaha aizodzipira kaari asikabambidzirhwi. (Pis. 110:1-3) Ayena anoziya rudo renyu kaari uye anoziya kuti imwimwi munoda kuita zvese zvamunokwanisa. Hino garai no mwoyo unononoka kutsamwa no amweni, uye nonokai kutsamwa pacenyu mwega. Pamunoshaisha, tenderai kuroedzwa uye mupango wamunopaswa. Zvionei hingana rubetso rinobva kuna Djehovha. (Ahe. 12:6) Itai no simba rese zviro zvesezvamunopaswa kuti muite. Uye cinonyanya kukosha, pa zviro zvese zvamunoita, itai kuti Baba enyu e kudenga adade nemwi.—Erengai Zvierengo 27:11.