1. Maererano na Mateu 24:9, ngei kuzondwa no nyika kusikatishamisi?

DJEHOVHA akatisika kuti tide uye tidiweo. Ndiyo ndaa patinozondwa, tinozwa kurhwadziwa uye tinoguma pakutotya. Ngo muezaniso, Georgina, hanzvadzi inogara ku Europa, iyona inoti: “Pendainga ndino makore 14, mai angu aindizonda nge ndaa ye kuseenzera kangu Djehovha. Ndaizwa hingana kuti ndarambwa uye ndakatoguma pakurangarira kuti ndiri munhu asikabetseri.” * Hama imweni inozwi Danylo, yakatarawo yeciti: “Masurudado paakandiponda, paakandituka uye paakandityisidzira nge ndaa ye kugara kangu Mupupuri wa Djehovha, ndakatanga kutya uye ndaizwa hingana ndisikabetseri.” Uzondi wakaita hingana uu unoita kuti tirhwadziwe, asi azviro zvipsvapi katiri. Djesu ainga atoreketa kare kuti taizozondwa.—Erengai Mateu 24:9.

2-3. Ngei ateeri a Djesu ecizondwa?

² Nyika inozonda ateeri a Djesu. Ngei? Ngekuti kuita hingana Djesu, isusu “atiiti dii re nyika.” (Ju. 15:17-19) Kunyazi tecireremedza atongi e anhu, atianamati, kana kutonamatawo mifananidzo yawo. Isusu tinonamata Djehovha basi. Tinotendera kuti Mwari ndiye ano citenderhwa ce kutonga anhu—citenderhwa cekuti Sathani no ateeri ake anorumbwa eciciphikisa. (Ge. 3:1-5, 15) Isusu tinoparidzira nge zve Umambo wa Mwari kuti ndiwona basi kariro ye anhu ese uye kuti Umambo uu, mbai-mbai pano ucatsakatisa ese aya anouphikisa. (Dha. 2:44; Zva. 19:19-21) Masoko aya i masoko akanaka kuno anhu anatsi asi masoko asikapfadzi kuno anhu akashata.—Pis. 37:10, 11.

³ Cimwenizve cinoita kuti tizondwe, nge cekuti tinorarama maererano no mitemo ye unatsi ya Mwari. Kana tikada kuezanisa mitemo ii ya Mwari no mitemo ye nyika ino, zviri pamhene kuti yakasiyana. Ngo muezaniso, kare Mwari akaparadza Sodhoma  no Gomora nge ndaa ye miitiro yawo yakashata uye youseki. Asi ndizvona zviri kuizwawo no anhu nyamasi uno! (Dju. 7) Ngekuti isusu tinorarama maererano no mitemo ii ye Bhaibheri nge nda ye miitiro ii yakashata, anhu akawanda anotiseka uye anotipumha kuti isusu tino rusananguro.—1Pe. 4:3, 4.

4. Mawara api angatipasa simba re kushingirira kuzondwa?

⁴ Cinyi cingatibetsera kuti tishingirire kuzondwa uye kutukwa no anhu? Tinodikana kugara no kutenda kakabamba kekuti Djehovha acatibetsera. Kutenda kakaita hingana civhikhiro cinotibetsera “kudzima mipasha yese inobaka inokhandirhwa ne akashata.” (Aef. 6:16) Asi pano ciro cimwenizve catinodikana kugara naco. Tinodikanawo kugara no rudo. Ngei? Ngekuti rudo “runoita kuti tisakasike kutsamwa.” Irona rinoshingirira zviro zvese uye rinondorumbwa rakadzimikidza pa zviro zvese. (1Ako. 13:4-7, 13) Parizvino, ngationei kuti rudo redu kuna Djehovha, rudo ku hama dzedu mukutenda, uye kune aya anotizonda, ringatibetsera kudini kushingirira patinozondwa.

5. Djesu akabambiswa kudini no rudo raainga anaro kuna Baba ake?

⁵ Mumasure mekuti asati auraiwa no azondi ake, Djesu akareketa kune ateeri ake akagondeka eciti: “Ndinoda Baba, [hino,] ndinoita zviro maererano no zvandakabvunzwa na Baba.” (Ju. 14:31) Rudo rainga rina Djesu kuna Djehovha rakamupasa simba rinodikanwa kuti akwanise kushingirira zvinetso zvaizosongana nazvo. Rudo redu kuna Djehovha ricakwanisa kutibetserawo kuti tiite zvimwezvo.

6. Maererano na Aroma 5:3-5, aseenzi a Djehovha anozwa kudini nge kuzondwa ne nyika ino?

⁶ Rudo rawo kuna Mwari, rakarumbwa recibetsera aseenzi a Djehovha kuti ashingirire kuteererwa. Ngo muezaniso, pa nguwa imweni anhu anomasimba akakura eciDjudha, akarambidza aphostori kuti asaparidzire, asi aphostori ainga ano rudo rakabamba na Mwari. Ndiyo ndaa, akasanangura “kuzwira Mwari hingana mambo, pane kuzwira anhu.” (Zvi. 5:29; 1Ju. 5:3) Ndizvona zviri kuitikawo no hama dzedu nyamasi uno, akawanda anobatana no kuphikiswa no anyautongi anomasimba uye anotyisa. Asi rudo rakakura rino hama dzedu kuna Djehovha, rinoapasa simba kuti ashingirire, ndiyo ndaa kana nyika ikatanga kutizonda isusu atiori mwoyo, asi kusiyana na izvi tinoona izvona hingana ropapfadzo.—Zvi. 5:41; erengai Aroma 5:3-5.

7. Tinodikana kuitei kana tikaphikiswa no we mu mhuri?

⁷ Pamweni paya muedzo mukuru ungakwanisa kubuda mu mhuri medu kamare. Paya patinotanga kupfarira cokwadi, amweni e mu mhuri medu angakwanisa kurangarira kuti tiri kutsotswa. Amweni angakwanisa kuguma pakutorangarira kuti taakupenga. (Ezanisai na Marko 3:21.) Awona angakwanisa kutiphikisa eciseenzesa simba. Muitiro uu wakashata autishamisi. Djesu akati: “Azondi e munhu acazogara anhu e mu nyumba make kamare.” (Mt. 10:36) Zviri pamhene kuti, pasinei no kubathwa katinoithwa no we mu mhuri medu, isusu atigumi pakuwaona hingana azondi. Kusiyana na izvona, rudo redu kuna Djehovha parinonga recikura, rudo redu ku anhu rinodikana kukurawo. (Mt. 22:37-39) Asi atidikani kusiya kurarama maererano no mitemo iri mu Bhaibheri nge ndaa ye kuda kupfadza anhu.

8-9. Cinyi cakabetsera hanzvadzi imweni kuti irumbwe yakashinga kunyazi no kuphikiswa kakakura?

⁸ Georgina, wamborekethwa nge zvake, wakarumbwa akashinga kunyazi eciphikiswa na mai ake. Georgina unopanganidza eciti: “Mai angu na inini takatanga kufunda Bhaibheri no Apupuri a Djehovha. Asi mumasure me mwedzi mitanhatu pandakasanangura kupinda  misangano, muitiro wa mai angu wakacinja ndisikakariri. Ndakazoziya kuti awona aireketa no anhu akasiya cokwadi, uye awona aiseenzesa masoko aiizwa ku anhu aya paaireketa na inini. Awona aindituka, aindikweya bvudzi, aindipsvikinya mukuro uye aipsveta mabhuku angu. Pangainga ndaano makore 15, ndakasanangura kubhabhatidzwa. Kuti aedze kundirambidza kuseenzera Djehovha, mai angu akandiendesa ku mbuto inocengeterhwa madjaha ano cinetso ce mundangariro. Imona ndaitodikana kugara no madjaha amweni aiseenzesa mitombo inoraradzisa, uye aiita zve ubhunya. Zvinoshupha kushingirira uzondi, kana teciziya kuti uzondi wakhona uri kubuda ku munhu uya wataikarira kuti atide uye atiriritire.”

⁹ Georgina wakaita kudini no kuphikiswa uku? Iyena unoti: “Mai angu paakatanga kundiphikisa, inini ndainga ndatopedza kuerenga Bhaibheri rese. Uye ndainga ndino rugondo rekuti ndainga ndagumira cokwadi, uyewo ndaizwa kuti ndiri pa dhuze na Djehovha. Inini ndainamata nguwa dzese uye ayena aindizwa. Panguwa yandaigara ikona kunocengeterhwa madjaha ano cinetso ce mundangariro, hanzvadzi imweni yairumbwa yecindipika kuti tiende kumba kayo, uye taifunda pamwepo Bhaibheri. Panguwa yese ii, ndakabambiswa no hama ne hanzvadzi dze mu ungano. Awona aindiona hingana nhengo ye mhuri. Ndakazvionera ndega kuti Djehovha munhu ano simba, kudarika munhu upi hake ungatiphikisa.”

10. Rugondo ripi ratingagara naro nge zva Djehovha Mwari wedu?

¹⁰ Muphostori Pauro wakatara eciti apana cingakwanisa “kutiparadzanisa ne rudo ra Mwari, riri muna Kristu Djesu Tenzi wedu.” (Aro. 8:38, 39) Kunyazi tecishuphika ke nguwa doko, tingakwanisa kugara no rugondo rekuti Djehovha acarumbwa ari ku dii redu uye acatipasa simba no runyaradzo ratinoda. Hingana zvinopangidzwa mu esperiensiya ya Georgina, Djehovha acarumbwa ecitibetsera eciseenzesa mhuri yedu ye ku mwiya.

11. Rudo rakarekethwa na Djesu ratinogumira pana Juau 15:12, 13 raizokwanisa kubetsera kudini afundi ake? Pasai muezaniso.

¹¹ Usiku wekuti asati afa, Djesu akabhuya kuti afundi ake aidikana kudanana. (Erengai Juau 15:12, 13.) Ayena aiziya kuti rudo iri raizoabetsera kuti arumbwe akabatana uye azokwanise kushingirira uzondi we nyika ino. Onai muezaniso we ungano ye Atesaronika. Kubvira  peyakaambwa, hama dze ungano ii airumbwa eciteererhwa. Kunyazi zvakadaro, awona akagara muezaniso wakanaka we kugondeka uye we rudo. (1Ate. 1:3, 6, 7) Pauro wakakohomedzesa hama dze ku Atesaronika kuti dzipangidze rudo, uye awona aidikana kurumbwa eciita izvona “ecitunhudzira.” (1Ate. 4:9, 10) Rudo raizoakohomedzesawo kuti anyaradze aya akaora mwoyo uye abetsere aya asina simba. (1Ate. 5:14) Hama dze ku Atesaronika dzakapurutana nhungamirio ii ya Pauro, kutobatanidawo tsamba yake ye cipiri yaakazotara mu gore rakazoteera, Pauro wakatara eciti: “Kudanana kenyu kuri kutunhudzira.” (2Ate. 1:3-5) Rudo rainga rino hama dze ku Atesaronika rakaabetsera kuti ashingirire matambudziko uye kuteererhwa.

12. Mu nguwa ye hondo hama dze nyika imweni, dzakapangidzirana kudini rudo?

¹² Onai zvakaitika kuna Danylo, wamborekethwa nge zvake uye no mukadzi wake. Thaundi rawo rakatanga kuitika hondo, kunyazi zvakadaro Danylo ne mukadzi wake akarumbwa ecipinda misangano, eciparidzira uye ecipasawo zvekurhya hama dzimweni. Pa zuwa rimweni masurudado ainga ano pfuti, akakhwedera padhuze na Danylo, iyena unopanganidza eciti. “Masurudado akandibambidzira kuti ndisiye kutenda kangu. Pandakaramba awona akandiponda uye akanyepedzera kuti aizondiuraya. Asati aenda, awona akandityisidzira kuti aizohwirira kuti adzipe mukadzi wangu”. Asi nokukasika hama dzakatibetsera kutibudisa mu thaundi irona. Andimbofi ndakakanganwa rudo randakapangidzirhwa no hama idzi dzinodiwa. Pandakaguma mu thaundi iri ripsva, hama dzemo dzakandibetsera no kundipasa zvekurhya uye dzakaita kuti ndikwanise kuona basa ne nyumba! No kuhamba ke nguwa, takakwanisa kubetserawo hama dzimwni dzaitiza nge ndaa ye hondo.” Maesperiensiya akaita hingana aya anopangidza kuti rudo re ciKristu ringakwanisa kutibetsera kuti tishingirire uzondi.

13. Mwiya mucena ungatibetsera kudini kuti tishingirire pa basa ratinoitira Djehovha kunyazi tecizondwa nge anhu?

¹³ Djesu wakareketa kuti ateeri ake aidikana kuda azondi awo. (Mt. 5:44, 45) Izvona zviri nyore here? Haiwa! Asi zvinobvira nge rubetso re mwiya mucena wa Mwari. Kupinda rudo, cibereko ce mwiya mucena wa Mwari, cinobatanidza kunonoka kutsamwa, usisi, upfawi, kudzibata. (Aga. 5:22, 23) Mawara ese aya angakwanisa kutibetsera kuti tishingirire kuzondwa. Anhu akawanda aitizonda akazocinja  paakaona kuti amuna, akadzi, ana uye anyacigarisano awo ecipangidza mawara aya. Akawanda awo akazoguma pa kugara hama dzedu dzinodiwa. Ndiyo ndaa kana zvecimushuphira kupangidza rudo kune anhu aya anomuzonda nge ndaa yekuti munoseenzera Djehovha, namatai mecikumbira mwiya mucena. (Ru. 11:13) Uye garai no rugondo rekuti maitire anoita Mwari zviro akanaka nguwa dzese.—Zvi. 3:5-7.

14-15. Aroma 12:17-21 yakabetsera kudini Yasmeen kuti apangidze rudo ku mwamuna wake kunyazi ecimuzonda?

¹⁴ Onai muezaniso wa Yasmeen, unogara ku Oriente Médio. Paakagara Mupupuri wa Djehovha, mwamuna wake wairangarira kuti iyena wainga ecitsotswa, uye akaedza kumurambidza kuseenzera Mwari. Iyena wakamutuka uye wakakumbira we mu mhuri, pastori we gereja uye wakatokumbirawo muroi kuti amutyisidzire uye amupumhe kuti waiparadzanisa mhuri. Pa nguwa imweni, mwamuna wake akatoenda ku Nyumba yo Umambo kuti atuke hama pa nguwa ye misangano. Yasmeen waicema kakawanda nge ndaa ye kubathwa uku kusina unatsi.

¹⁵ Paaiyenda ku Nyumba yo Umambo, Yasmeen wainyaradzwa uye waibambiswa no hama dzake. Akuru akamukohomedzesa kuti aseenzese mazano atinogumira pana Aroma 12:17-21. (Erengai.) Yasmeen unoti: “Zvainetsa, asi ndaikumbira Djehovha kuti andibetsere, uye ndaiita zviri zvese kuti ndiseenzese mazano andaigumira mu Bhaibheri. Hino mwamuna wangu paaisvipisa kuzinya nge ndaa ye uzondi, inini ndaicenesa. Paaindituka, ndaimudaira no upfawi. Uye paairhwara, ndaimubata zvakanaka.”

16-17. Mafundei pa zviya zvakaitika na Yasmeen?

¹⁶ Yasmeen wakakomborerhwa nge kupangidza rudo ku mwamuna wake. Iyena unoti: “Mwamuna wangu wakatanga kundigonda nge ndaa yekuti ndaireketa cokwadi nguwa dzese. Wakatanga kundipurutana no rureremedzo pese pataicedza nge zve citendero, uye iyena wakatendera kuti pa nyumba pedu parumbwe pano runyararo. Parizvino, iyena unotondikohomedzesa kuti ndiende kumisangano. Upenyu wedu we mhuri waakupfadza uye pa nyumba pedu paano runyararo re zvirokwazvo. Kariro yangu ngeye kuti mwamuna wangu atendere cokwadi uye atange kuseenzera Djehovha pamwepo na inini.”

¹⁷ Zvakaitika kuna Yasmeen zvinopangidza kuti rudo “rinoshingirira zviro zvese, rinotenda zviro zvese, rinondorumbwa rakadzimikidza pa zviro zvese.” (1Ako. 13:4, 7) Zviri pamhene kuti  uzondi ungakwanisa kugara no simba kana kuti ungakwanisa kuita kuti tirhwadziwe, asi rudo ndirona rinosimba kupinda zvese. Irona rinopfawisa mwoyo. Kupinda zvese rinoita kuti Djehovha apfare. Kunyazi azondi edu asikazosii kutizonda, tingakwanisa kurumbwa tecipfara. Tingazviita kudini?

18. Ngei tecikwanisa kupfara kunyazi tecizondwa?

¹⁸ Djesu akati: “Munopfara imwimwi pese pamunozondwa nge anhu.” (Ru. 6:22) Isusu atisananguri kuzondwa. Atipfariri kushuphika nge ndaa ye kutenda kedu. Hino ngei tecikwanisa kupfara kunyazi tecizondwa? Nge zvikonzero zvitatu. Cokutanga, patinoshingirira, tinotenderhwa na Mwari. (1Pe. 4:13, 14) Cecipiri, kutenda kedu kunorowedzwa uye kunogara kakabamba. (1Pe. 1:7) Uye cecitatu, tinogara no mukana we kutambira cikomborero cinoshamisa—upenyu usikaperi.—Aro. 2:6, 7.

19. Ngei aphostori akazwa mupfaro mumasure me kubvengwa?

¹⁹ Mumasure mekuti Djesu Kristu amutswa, aphostori akazwa mupfaro uya wainga warekethwa na Djesu. Mumasure me kubvengwa akarambidzwa kuparidzira, asi awona akapfara. Ngei? “Ngekuti ainga azwi akasisira kutambudzwa nge zve zina ra [Djesu].” (Zvi. 5:40-42) Rudo rainga rina aphostori kuna Tenzi wawo rainga rakakura kupinda kutya azondi awo. Uye awona akapangidza rudo iri nge kuparidzira masoko akanaka “asikaimi.” Uye nyamasi uno, hama dzedu dzinorumbwa dzeciseenza dzakagondeka kunyazi no zvinetso. Awona anoziya kuti Djehovha aazokangwani basa uye rudo raakapangidza kuzina rake.—Ahe. 6:10.

20. Ticaonei mu fundo inoteera?

²⁰ Dakara pacaguma migarire ye zviro ye nyika ino ticarumbwa tecizondwa. (Ju. 15:19) Asi atidikani kutya. Hingana zvaticaona mu fundo inoteera, Djehovha “acabambisa uye acadziirira” aseenzi ake akagondeka. (2Ate. 3:3) Ndiyo ndaa rumbwai mecida Djehovha, mecida hama dzenyu, mecida kunyazi azondi enyu. Kana tikatondoedza mazano aya, ticarumbwa takabatana uye takabamba ku mwiya, tecikudza zina ra Djehovha, uye tecipangidza kuti rudo redu rakabamba kupinda uzondi.