MUSORO WE KUFUNDA 40
“Akawanda Arikubetserhwa Pakugara Anatsi”
“Aya arikuita kuti anhu ajinji agare anatsi [acanyetukira] hingana nyeredzi kwenda no kwenda.”—DHAN. 12:3.
NGOMA 151 Acadainza
ZVATICAFUNDA *
1. Zviro zvipi zvinopfadza zvicaitika Pakutonga ka Kristu ke Makore Ciuru?
IMWIMWI makamborangaridza here kuti zvinonga zvakadini anhu paanonga ecimutswa pa nyika pano Pakutonga ka Kristu ke Makore Ciuru? Zvezvirokwazvo rinonga riri zuwa remupfaro kamare, anhu ese akafirhwa anozwa cisuwo cakakura uye anodazve maningi kuona aakafirhwa nawo. Uye Djehovha anozwawo kudaro kamare. (Djobo 14:15) Cimborangaridzai padoko mupfaro ucazwa anhu nge kugarazve pamwepo no hama uye no shamwari dzainga dzakafa. Hingana zvatakaona mu fundo yakadarika, “anatsi” aya aano zina rawo mu buku re upenyu “acamutsirhwa upenyu.” (Juau 5:29; Zvii. 24:15) Zvingatoita kuti aya atakafirhwa nawo ndiwo angamutswa pa nguwa doko yokuti Amagedhoni yadarika. * Kusiya izvona grupu rimweni ricamutswawo, ndi anhu “asina unatsi.” Grupu iri rinoumbwa no aya asikazi kugara no mukana wakakwana kuti aziye Djehovha uye kumuseenzera no mwoyo wese asati afa. Grupu irona iri “ricamutsirhwa kutongwa.”
2-3. (a) Maererano na Isaya 11:9, 10, urongwa uu wekufundisa ucaizwa mu nyika ipsva uye unobatanidza nyika yese ucaizwa kudini? (b) Ticaonei mu fundo ino?
2 Anhu ese acamutswa acadikana kufundiswa. (Isa. 26:9; 61:11) Awona acabatanidzwawo pa urongwa wakakura kupinda wese wakambooneka pa nyika. (Erengai Isaya 11:9, 10.) Ngei? Ngekuti anhu asina unatsi acamutswa acadikana kufundira ngezva Djesu, Umambo wa Mwari, rusudzunuro, ngezve zina ra Djehovha uye zviro zvese zvinobatanidzwa paucangamire wa Mwari. Kutobatanidzawo anatsi acadikana kunyasa kupanganidzirhwa ngezve masoko a Djehovha aakareketa padoko no padoko anocokuita no cinangwa cake pa nyika. Anhu akawanda akagondeka uye akaseenzera Djehovha, akatofa Bhaibheri risati rapedzeswa kutarhwa. Anhu asina unatsi kutobatanidzawo no anatsi acadikana kufundira zviro zvakawanda.
3 Mu fundo ino ticaona mhinduro dze mibvunzo dzinoteera: Urongwa uu wekufundisa ucabatanidza nyika yese ucagara wakadini? Urongwa uu wakabatana kudini nokutarhwa ke mazina e anhu mu buku re upenyu? Mhinduro dze mibvunzo idzi dzinokosha maningi katiri. Hingana zvaticaona, uphorofita unganani unokosha watinogumira mu bhuku ra Dhanyeri uye Zvakapangidzwa ucatibetsera kunyasa kuzwisisa zvicaitika mumasure me kumutswa ke akafa. Asi ngatitange kuona zviro zvinganani zvinopfadza zvicaitika zvatinogumira mu bhuku ra Dhanyeri 12:1, 2.
“ARIKUWATA MUMATAKA . . . ACAMUKA”
4-5. Bhuku ra Dhanyeri 12:1 rinobhuyei nge zve zviro zvicaitika mu nguwa ye kupedzesera?
4 Erengai Dhanyeri 12:1. Bhuku ra Dhanyeri rinotipangidza mushobo ucaitika zviro mu nguwa yokupedzesera. Ngo muezaniso, pana Dhanyeri 12:1 panobuya kuti Migeri kana kuti Djesu “akaima kuti arhwire anhu” a Mwari. Dii iri re uphorofita rakatanga kudzadzika muna 1914 Djesu paakagara Mambo.
5 Dhanyeri wakabhuyawo kuti Djesu “acamuka” pakati pe “nguwa yekutambudzika kukuru kusati kamboitika kubvira pakatanga kusikwa anhu dakara nguwa iyona.” Pa “nguwa iyona ii yekutambudzika,” i “dambudziko guru” rinorekethwa pana Mateu 24:21. Djesu acamuka, zvecida kureya kuti acaita ciito kuti adziirire anhu a Mwari. Ayena acaita izvona pa nguwa yokupedzesera ye dambudziko iri, kana kuti pa Amagedoni. Bhuku ra Zvakapangidzwa rinoreketa nge zve anhu a Mwari hingana grupu guru “rinobuda kudambudziko guru.”—Zvak. 7:9, 14.
6. Tinoziya kudini kuti kumutswa kunorekethwa pana Dhanyeri 12:2 kunonga kuri kumutswa ke anhu akafa kamare? (Kana mecida kuziya zvakawanda ngezve kumutswa kucaitika pasi pano, onai “Mibvunzo Inobva ku Aerengi iri mu Murindiri uno.”)
6 Erengai Dhanyeri 12:2. Mumasure mekuti grupu guru radarika dambudziko guru, cinyi cicaitika? Uphorofita uu auripi kureketa nge zve kumutswa kekufananidzira kana kekumwiya kunoitika zvino uno mumazuwa edu ano hingana mushobo wataizwisisa. * Zvezvirokwazvo uphorofita uu wa Dhanyeri uri kureketa nge zve kumutswa kucaitika mu nyika ipsva. Asi ngei tingabuya izvona? Soko rekuti “mataka” rinoseenzeswawo pana Djobo 17:16 zvecida kureya “Guwa.” Izvona zvinopangidza kuti Dhanyeri 12:2 irikureketa ngezve kumutswa kucaitika mu nguwa doko mekuti Amagedhoni yadarika.
7. (a) Zvinoda kureyei kuti anhu amweni acamutsirhwa “upenyu usikaperi”? (b) Ngei rumuko iri rinonga “rakanaka” kupinda rakamboitika?
7 Bhuku ra Dhanyeri 12:2 rinonga recireyei parinobuya kuti amweni acamutsirhwa “upenyu usikaperi”? Izvona zvinoda kureya kuti aya anonga amutswa anodikana kuti afunde ngezva Djehovha na Djesu uye oazwira kuti agare no upenyu usikaperi. Ndiyo ndaa kutobatanidzawo anatsi anonga amutswa anodikanawo kupeta masimba kuti agare ne upenyu usikaperi. (Juau 17:3) Rumuko iri rinonga “rakanaka” kudarika riya rakaitika kare. (Aheb. 11:35) Ngei? Ngekuti anhu aya asikazi kukwana ainga amutswa akazofazve.
8. Zvinoda kureyei kuti amweni acamutsirhwa kutama “kureremedzwa uye kushorhwa nokusikaperi”?
8 Aesepi acamutswa acada kufundiswa na Djehovha. Uphorofita uri pana Dhanyeri unoreketa kuti amweni acamutsirhwa kuti “asareremedzwe uye kuti ashorhwe nokusikaperi.” Nge ndaa ye maitiro awo ekupanduka, anhu awona aazogari no mazina awo akatarhwa mu bhuku re upenyu uye aazogari no upenyu usikaperi. Kusiya izvona, awona “acashorhwa nokusikaperi,” kana kuti kutsakatiswa. Dhanyeri 12:2 irikubhuya nge zve zviya zvicaitika no aya anonga amutswa maererano no zviya zvaanonga aita mumasure mekumutswa. * (Zvak. 20:12) Amweni acagara no upenyu usikaperi, asi amweni haiwa.
“AKAWANDA ACABETSERHWA KUGARA ANATSI”
9-10. Ndiani “ucanyetukira zvakadjeka hingana zuwa,” uye izvona zvicaitika rini?
9 Erengai Dhanyeri 12:3. Cinyi cicaitikazve mumasure me “nguwa yekutambudzika”? Kusiya zvataona pana Dhanyeri 12:2, vhersikuro 3 inoreketawo zviro zvimweni zvicaitika mumasure me dambudziko guru.
10 Anhu api “acanyetukira hinga ruvheneko rekudenga”? Mateu 13:43 inotibetsera kugumira mhinduro. Iyona inoti: “Panguwa iyona anatsi acanyetukira zvakadjeka hingana zuwa mu Umambo wa Baba awo.” No masoko aya tinokwanisa kuona kuti Djesu aireketa ngezve “ana e Umambo,” Akristu akadzodzwa acaseenza naye ku Umambo wake. (Mat. 13:38) Hino Dhanyeri 12:3 irikureketa ngezve akadzodzwa uye basa raacaita Pakutonga ke Makore Ciuru.
Akadzodzwa acaseenza pamwepo na Djesu Kristu kuti abetsere kutungamirira urongwa wekufundisa ucaizwa pa makore 1000 (Onai ndima 11)
11-12. Akadzodzwa acaitei pakutonga ke makore 1000?
11 Akadzodzwa acaita kudini kuti abetsere “akawanda kuti agare anatsi”? Akadzodzwa acaita kudini kuti abetsere akawanda kuti agare anatsi? Akadzodzwa acaseenza pamwepo na Djesu kuti abetsere pakutungamirira urongwa uu wekufundisa ucaizwa mu makore 1000. Akadzodzwa anokwana kuita 144 000 aazoseenzi basi hinga madzimambo, asi acaseenzawo hinga aphristi. (Zvak. 1:6; 5:10; 20:6) Nge kuseenza hinga aphristi, awona acakwanisa kubetsera “pakuraphwa ke madzinza”—kana kuti acabetsera anhu padoko no padoko kuti agare akakwana. (Zvak. 22:1, 2; Ezek. 47:12) Zvezvirokwazvo unonga uri mupfaro wakakura ku aya akadzodzwa!
12 Kodi “akawanda” aya acabetserhwa pakugara anatsi ndiani? Ndi aya anonga amutswa uye aya acakwanisa kupona pa Amagedhoni uyewo no mwana upi hake ungabarhwa mu nyika ipsva. Mumasure me makore 1000, anhu ese anonga arikurarama mu nyika anonga akakwana. Hino mazina e anhu aya acatarhwa rini mu bhuku re upenyu zvacose?
MUEDZO WEKUPEDZESERA
13-14. Anhu ese akakwana anonga ari pa nyika acadikana kuitei kuti agare no upenyu usikaperi?
13 Tinodikana kuedzurira kuti kugara munhu wakakwana andicopi cinoitisa kuti munhu agare ne upenyu usikaperi. Rangaridzai ngezva Adhamu na Evha. Awona ainga akakwana, asi kuti agare ne upenyu usikaperi awona aidikana kupangidza kuti anozwira Djehovha. Asi zvinotsukwarisa kuti andizvopi zvaakaita.—Aro. 5:12.
14 Mumasure mekutonga ke makore 1000, anhu ese e mu nyika anonga akakwana. Hino anhu ese paanonga akakwana acarumbwa here ecizwira Djehovha? Kana kuti pamweni, amweni acagara hinga Adhamu na Evha—asikazi kurumbwa akagondeka? Mibvunzo idzi dzinodikana kuti dzidairhwe. Asi dzicadairhwa kudini?
15-16. (a) Anhu acagara no mukana wekupangidza kuti akagondeka kuna Djehovha rini? (b) Ngaupi mugumisiro ucaoneka pamuedzo wekupedzesera?
15 Pakutongwa ke makore 1000, Sathani unonga wakasungwa pamakore ese aya. Iyena aazokwanisi kupausa munhu upi hake. Asi kumapeto ke makore 1000, Sathani ucasunungurhwa uye iyena ucaedza kupausa anhu pa nyika pano. Uye panguwa iyona anhu ese anonga akakwana. Pa muedzo uu wekupedzesera, anhu ese akakwana anonga ari pa nyika acagara no mukana wekunyasa kupangidza kuti anoreremedza here zina ra Djehovha kana kuti haiwa uye kuti anotsigira here ucangamire wake. (Zvak. 20:7-10) Zvicaizwa na umwe na umwe wedu pa muedzo uu wekupedzesera ndizvo zvicapangidza kuti zina rawo ricatarhwa here zvacose mu bhuku re upenyu.
16 Bhaibheri rinoreketa kuti anhu anganani, asi atizii hedu kuti angana acatama kugondeka hingana Adhamu na Evha uye acaramba ucangamire wa Djehovha. Cinyi cicaitika nawo? Zvakapangidzwa 20:15 inoti: “Aya ainga asikazi kutarhwa mu bhuku re upenyu akakhandirhwa murindi re muriro.” Ese aya acapanduka acatsakatiswa zvacose. Asi akawanda akhona acakwanisa kushingirira muedzo uu wekupedzesera. Mazina awo acatarhwa zvacose mu bhuku re upenyu.
“MU NGUWA YEKUPEDZESERA”
17. Ngirozi yakabvunzei Dhanyeri ngezve zviro zvaizoitika mu mazuwa edu ano? (Dhanyeri 12:4, 8-10)
17 Zvinopfadza maningi kurangarira ngezve zviro zvicaitika mune ramangwana, asi tingakwanisa kurarama nge mushobo unopfadza kubvira zvino! Dhanyeri wakabvunzwa no ngirozi masoko anokosha akaringana no mazuwa edu kana kuti mu “nguwa yekupedzesera.” (Erengai Dhanyeri 12:4, 8-10; 2 Ti. 3:1-5) Ngiroziyo yakabvunza Dhanyeri kuti: “Ruziyo re cokwadi ricawanda.” Kana kuti anhu a Mwari aizonyasa kuzwisisa uphorofiti uri mu bhuku ra Dhanyeri. Ngirozi iyona yakabhuyawo kuti “akashata acarumbwa [eciita] zvakashata, uye apana kana umwe wawo waizokwanisa” kuzvizwisisa.
18. Cinyi cicaitika no anhu akashata mwoyo mbai-mbai pano?
18 Zvingaita hingana kuti anhu arikuita zvakashata aaripi kuphanicwa. (Mara. 3:14, 15) Mbai-mbai pano Djesu acatonga aya anorarama hingana mbudzi uye oasiyanisa no aya anorarama hingana mabira. (Mat. 25:31-33) Akashata mwoyo aazoponeswi pakutambudzika kukuru uye aazomutswi mu nyika ipsva. Mazina awo anonga asiripi mu “bhuku re ciedzuriro” rinobuyiwa pana Marakiya 3:16.
19. Nguwa yatiri kurarama ino i nguwa yokuitei uye ngei? (Marakiya 3:16-18)
19 Ii ndiyo nguwa yekupangidza kuti isusu atiripi anhu akashata. (Erengai Marakiya 3:16-18.) Djehovha ari kuunganidza aya akaita hingana pfuma inokosha kaari, kana kuti anhu “anokosha” kaari. Zvezvirokwazvo tinoda kugara pakati pe anhu aya.
Zvezvirokwazvo zvicapfadza maningi kuona Dhanyeri, anyaukama edu, shamwari dzedu “ecimutswa” kuti atambire mubairo wawo! (Onai ndima 20)
20. Djehovha akapikira cinyi Dhanyeri, uye ngei mecida kuona kudzadzika kecipikirhwa ici?
20 Isusu tiri kurarama kamare mu nguwa inoshamisa. Asi zviro zvicanyasa kushamisa zvicaitika mu nguwa ye mberi. Mbai-mbai pano ticaona kupera ke matambudziko ese. Mumasure mazvo ticaona kudzadzika kecipikirhwa cakaitira Djehovha kuna Dhanyeri. Pana Dhanyeri panoti: “Ucaprumuka kuti utambire mubairo wako.” (Dha. 12:13) Zvezvirokwazvo imwimwi murikuda maningi kuti rigume zuwa “ricamutswa” hama dzenyu, shamwari dzenyu, kutobatanidzawo na Dhanyeri andizvopi? Hino petai masimba zvino uno kuti mugare museenzi wa Djehovha wakagondeka, kana mukadaro zvezvirokwazvo zina renyu rinonga rakatarhwa mu bhuku re upenyu ra Djehovha.
NGOMA 80 “Rairai Muone Kuti Djehovha Akanaka”
^ Mu fundo ino ticaona kugadziriswa ke mazwisisiro edu pana Dhanyeri 12:2, 3 panoreketa ngezve urongwa wakakura we kufundisa. Ticafundawo kuti izvona zvicaitika rini uye ndiani ucabatanidzwa pa urongwa uwona wekufundisa. Pakupedzesera ticaonawo kuti urongwa uu wekufundisa uca
^ Zvingaita kuti acatanga kumutswa ndi aya akafa akagondeka kumazuwa ekupedzesera uye pedzepo ozomutswawo aya akafa awona asati afa, madzinza no madzinza. Kana rumuko rikaitika nge mushobo uu dzinza rimwe na rimwe ricakwanisa kuti mauya mauya ku aya aakashamwaridzana nawo. Hazvinei kuti zvicaitika nge mushobo upi, Bhaibheri rinoreketa kuti aya acamutswa kuti ararame kudenga, umwe na umwe ucamutswa panguwa yake kana kuti “nge mushobo wakarongeka.” Nge ndaa yazvo tingareketawo kuti aya acamutswa kuti ararame pa nyika acamutswa nge mushobo wakarongeka.—1 Ako. 14:33; 15:23.
^ Kupanganidzwa uku kunogadzirisa mazwisisire edu atinogumira mu bhuku rakazwi Fungisisa Uprofita hwaDhanieri! fundo 17, uye Murindiri wa 1 ya Julho wa 1987, mapaji. 21-25, mu ciPutukezi.
^ Masoko ekuti “anatsi” no anhu “asina unatsi” anorekethwa pana Zviito 24:15 uye masoko ekuti “akaita zviro zvakanaka” no “akaita zviro zvakashata” anorekethwa pana Juau 5:29 ano cokuita no zviya zvakaizwa no anhu aya asati afa.
