1. Ngei tisikashamisiki kuti anhu mu nyika ino aagondani?

 MU NYIKA ino ya Sathani anhu anoona kuti zvinoshupha maningi kugonda amweni. Zvinoizwa no mapatrau e empreza, atungamiriri e zvematongerhwo e nyika uye no atungamiriri e magereja zvinoita kuti anhu akawanda asagonde amweni. Uye akawanda anorangarira kuti aadikani kugonda shamwari, anyacigarisano uye kutobatanidzawo no mhuri yawo. Asi izvona azvitishamisi. Bhaibheri rakabhuya kare kuti: “Mumazuwa ekupedzesera . . . , anhu aizogara asikazi . . . kugondeka, . . . anyepi, . . . acengedzi.” Awona ainga asikazombogondekizve hinga Sathani, mwari we migariro ino ye zviro.—2 Ti. 3:1-4; 2 Ako. 4:4.

2. (a) Ndiani watinganyasa kugonda? (b) Anhu amweni angadzibvunzisei?

² Asi isusu Akristu tinonyasa kugonda Djehovha. (Djer. 17:7, 8) Isusu tino rugondo rekuti ayena anotida uye ‘aazombotisii.’ (Pis. 9:10) Isusu tinogondawo Djesu ngekuti akapira upenyu wake nge ndaa yedu. (1 Ped. 3:18) Uyezve tinoziya nge eshiperiyensiya yedu kamare kuti Bhaibheri rino nhungamiriro dzakagondeka. (2 Ti. 3:16, 17) Zvezvirokwazvo tingakwanisa kugonda Djehovha, Djesu uye Bhaibheri kunyazi takatofunga madziso. Asi anhu amweni pamweni angadzibvunzisa kuti: Ndinodikana kugonda no hama uye hanzvadzi dze mu ungano nguwa dzese here? Honde. Asi cinyi cingatibetsera kuti tigare norugondo nazvo?

3. Makomborero api akakura atinawo? (Marko 10:29, 30)

³ Isusu tino makomborero akakura. Djehovha akatisanangura kuti tiite dii re mhuri ye mu nyika yese. Aya makomborero akakura! (Erengai Marko 10:29, 30.) Isusu tinohama no hanzwadzi mu nyika yese, kuita hingana isusu aona anoda Djehovha uye anopeta masimba kuti ararame nge mushobo unomupfadza. Pamweni mureketero wedu, tsika uye mushobo wekupfeka wakasiyana, asi isusu tinoda maningi hama dzedu, kutobatanidzawo no aya atabva kuziya. Zvakanakawo maningi kugara pamwepo no  hama idzi nyanye-nyanye patinoungana kuti tinamate Baba edu e kudenga.—Pis. 133:1.

4. Ngei isusu tecida hama no hanzvadzi dzedu?

⁴ Isusu tinodikana kugara takabatana no hama uye hanzvadzi dzedu kunyanya mazuwa ano. Kakawanda kakhona, awona anotibetsera kuti tikurire matambudziko edu. (Aro. 15:1; Aga. 6:2) Awona anotibetserawo kuti tirumbwe tecipasa Djehovha zvakanakisisa zvedu uye tigare takabamba pakunamata. (1 Ate. 5:11; Aheb. 10:23-25) Cimborangarirai kuti zvaizoshupha kudini kurhwisana na Sathani uye no nyika yake tisina rubetso uye rudziiriro re ungano. Zvakanaka kuedzurira kuti nokuhamba ke nguwa, Sathani no aya aanoonerera acarhwisana no aseenzi a Mwari. Kana izvona zvikaitika, zvinonga zvakanaka kuti tigare no hama uye no hanzvadzi dzedu ku dii redu!

5. Ngei zvecishuphira amweni kugonda hama dze mu ungano?

⁵ Asi, anhu amweni anoona kuti zvinoshupha kugonda no hama dze mu ungano, pamweni izvi zvingaitika ngekuti munhu wakareketa masoko akaigika ngezve munhu kuno amweni kana kuti aazi kudzadzisa ciro caakagondesa. Kana kuti pamweni munhu wakatsukwara nge ndaa yo ciro cakaizwa uye cakarekethwa no mudoni wake. Zviro hingana izvi pazvinoitika zvinoshupha maningi kuti tigonde amweni. Asi cinyi cicatibetsera kuti tigonde no hama dze mu ungano?

6. Rudo rinotibetsera kudini kuti tigonde no hama dzedu? (1 Akorinti 13:4-8)

⁶ Rugondo ratinaro ku hama dzedu rinotsamira pa rudo. 1 Akorinti kapituro 13 inopanganidza kuti rudo ringakwanisa kutibetsera kuti tigonde no amweni uye tigondezve amweni kunyazi akambotitsukwarisa. (Erengai 1 Akorinti 13:4-8.) Nge muezaniso, vhersikuro 4 inobhuya kuti “rudo rino mwoyo unononoka kutsamwa uye rino unyasha.” Djehovha  anononoka kutsamwa kunyazi patinonga tashaisha. Ndiyo ndaa, isusuwo tinodikana kugara no mwoyo unononoka kutsamwa no hama dzedu kunyazi awona paanoita ciro cinotitsukwarisa kana kuti cinotikuwadza. Vhersikuro 5 inobhuyawo kuti: “[Rudo] arikasiki kutsamwa. Aricengeti bundu.” Isusu atidikani kukanda ndangariro dzedu pa “zviya zvatinonga taizirhwa” kana kuti atidikani kurumbwa tecindoedzurira ciro cimwe na cimwe cakashata cinonga caizwa no hama. Muparidzi 7:9 inobhuya kuti “isusu atidikani kukasika kutsamwa.” Pane kutsamwa no ciro cipi haco cinonga caitika tinodikana kuita zvinobhuiwa pana Aefeso 4:26: “Musasiye zuwa recibira mucakatsamwa”!

7. Maererano na Mateu 7:1-5 cinyi cingatibetsera kuti tinyase kugonda hama dzedu?

⁷ Ciro cingatibetsera kugonda hama dzedu ikuwaona nge maonero aanoizwa na Djehovha. Ayena anoda hama dzedu uye aandogari eciringisa zvitema zvawo. Uye isusuwo atidikani kuita izvona. (Pis. 130:3) Pane kukanda nzero dzedu pazvishaishi zvinoizwa no hama dzedu, isusu tinodikana kuona mawara akanaka aanawo uye no zvese zvakanaka zvaanokwanisa kuita. (Erengai Mateu 7:1-5.) Rudo rinotendera “zviro zvese” ndiyo ndaa tinodikana kutendera kuti hama dzedu dzinoda kuita zviro zvakanaka uye kuti idzona adziiti zviro zvakashata dzecizviziya. (1 Ako. 13:7) Izvi azvirei kuti tinondodikana kugonda anhu ese, asi kuti tinodikana kugonda aya anopangidza kuti anogondeka. *

8. Mungatunhudzira kudini kunyasa kugonda hama dzenyu?

⁸ Rugondo rinodikana kusakurirhwa, kuitawo hingana rureremedzo asi kuti zvidaro zvinotora nguwa. Asi mungatunhudzira kudini kunyasa kugonda hama dzenyu? Cekutanga, nyasai kugonda hama dzenyu. Mungacedza nawo pa misangano kana kutobuda nawo mu basa rekuparidzira. Garai no mwoyo unononoka kutsamwa uye apasei mukana wekuti apangidze kuti anogondeka. Pamweni imwimwi amuzwi makasudzunuka kureketa nge zve zviro zvenyu no munhu wamunobva kuziya. Asi pamunorubwa mecishamwaridzana naye, imwimwi mucazwa makasudzunuka kureketa nge zve zviro zvenyu. (Ruka 16:10) Asi mungaitei kana hama yamakabvunza zviro zvenyu yakaenda koobvunzawo amweni? Musagure ushamwari wenyu no hameyo uye musasiye kuti maitiro e munhu umwe aite kuti musagonde hama dzimweni. Kuti tikwanise kuita izvona, ngatione miezaniso dze aseenzi akawanda a Djehovha e kare e kuti kunyazi aiwodzwa mwoyo no anhu amweni, awona akarumbwa ecigonda no amweni.

9. (a) Kunyazi no zvishaishi zve amweni, Ana wakapangidza kudini kuti waigonda Djehovha? (b) Muezaniso wa Ana unotifundisa kudini kuti tigonde mushobo wa Djehovha wekuita zviro? (Onai foto.)

⁹ Makambonyangadzwa nge maitiro e hama yainga no ubaba mu ungano here? Kana zvakaitika, onai muezaniso wa Ana. Eri, Mupristi Mukuru, ndiyena wainga ecitungamirira kunamathwa ka Djehovha pa nguwa iyona ku Israeri. Asi ana ake ainga asina muezaniso wakanaka. Awona ainga ari apristi, asi aiita useki uye no zvitema zvimweni zvakakura. Asi baba awo Eri ainga asikanyasi kuapangira. Kunyazi zvakadaro, Djehovha ainga asati abvisa Eri pa mupando wake we upristi mukuru. Uye Ana aazi kusiya kunamata Djehovha mu tabhernakuro kunyazi eciziya kuti Eri ndiyena wainga ari mupristi mukuru. Eri paakaona Ana ecinamata uye ecirhwadziwa maningi, wakarangarira kuti Ana wainga akararadza. Iyena wakashora Ana asikatombodi kuziya kuti cinyi caiitika naye. (1 Sam. 1:12-16) Kunyazi zvakadaro, Ana wakapika kuti kudai  waizogara no mwana we mwanarume, waizomupasa kuti aseenze mutabhernakuro kunyazi ecitoziya kuti Eri ndiyena waizocengeta mwanewo. (1 Sam. 1:11) Uye ana a Eri ainga aciri kudikana kupangira here? Honde, uye Djehovha akaita izvona pa nguwa yakasisira. (1 Sam. 4:17) Panguwa doko iyona, Mwari akakomborera Ana no mwana wake Samueri.—1 Sam. 1:17-20.

10. Kunyazi nokusama kugondeka ke amweni Mambo Dhavhidhi aazi kusiya kuitei?

¹⁰ Makambogara no shamwari isikazi kugondeka? Kana zviri izvona, onai zvakaitika na Mambo Dhavhidhi. Iyena wainga ano shamwari inozwi Aitoferi. Asi panguwa yekuti mwana wa Dhavhidhi, Absaromi waida kutorera baba ake mupando, Aitoferi wakamubetsera pakupandukira Dhavhidhi. Pamweni Dhavhidhi wakanetseka maningi ngekusama kugondeka kakaita mwana wake kamare uye no shamwari yake! Asi kusama kugondeka uku akuzi kuita kuti Dhavhidhi asame kugonda anhu amweni. Iyena wakarumbwa ecigonda Usai, shamwari yake yainga yakagondeka uye isikazi kutsigira kupanduka uku kakaita Absaromi na Aitoferi. Uye Dhavhidhi wainga ano zvikonzero zvakanaka kuti arumbwe ecigonda Usai. Iyena wainga apangidza kuti ishamwari yakanaka uye wakatokanda upenyu wake pangozi kuti abetsere Dhavhidhi.—2 Sam. 17:1-16.

11. Umwe we museenzi wa Nabhari wakapangidza kudini kuti waigonda Abhigairi?

¹¹ Onaiwo zvakaitika no umwe we museenzi wa Nabhari. Dhavhidhi no anarume ake akadziirira aseenzi e muisraeri umweni wakapfuma unozwi Nabhari. Nokuhamba ke nguwa, Dhavhidhi wakabvunzisa Nabhari kuti zvaiita here kuti iyena amupase cekurhya cipi haco caainga anaco. Cikumbiro ici cainga ciri nyore, asi Nabhari wakaramba kumubetsera. Hino Dhavhidhi wakanyangadzwa maningi uye wakarangarira kuuraya anarume ese e pa nyumba ya Nabhari. Umwe we museenzi wa Nabhari wakabvunza nyaya ii Abhigairi mukadzi wa Nabhari. Ngekuti iyena wainga ari museenzi wa Nabhari upenyu wake wainga utoriwo pangozi uye iyena waizviziya kuti Abhigairi waizokwanisa kubetsera. Pano kutiza, iyena wakagonda kuti Abhigairi waizokwanisa kugadzirisa nyaya iyona. Iyena wainga ano rugondo irona ngekuti waizviziya kuti Abhigairi waiziikanwa hinga mwanakadzi uno uzii. Zvakazoitika zvakapangidza kuti iyena wainga ano zvikonzero zvakanaka kuti agonde Abhigairi. Abhigairi wakagara no ushingi ngekuita kuti Dhavhidhi asaite  zviro zvaairangarira kuita. (1 Sam. 25:2-35) Abhigairi wakagonda kuti Dhavidhi waizoita ciro cakanaka.

12. Djesu akapangidza kudini kuti aigonda afundi ake kunyazi no zvishaishi zvawo?

¹² Djesu akagonda afundi ake kunyazi ainga ari anhu asikazi kukwana. (Juau 15:15, 16) Tiyago na Juau paakakumbira Djesu cigaro cinokosha mu Umambo, Djesu aazi kushora cido cawo cekuda kuseenzera Djehovha uye aatozi kuaramba hinga aphostori. (Mark. 10:35-40) Nokuhamba ke nguwa, aseenzi ake ese akamusiya pausiku waakasungwa. (Mat. 26:56) Kunyazi zvakadaro, Djesu akarumbwa eciagonda. Djesu aizviziya kuti awona ainga asikazi kukwana kunyazi zvakadaro ayena “akaada dakara pakupedzesera.” (Juau 13:1) Mumasure mekumutswa, Djesu akapasa aphostori ake akagondeka anokwana kuita 11 ubaba unokosha wekutungamirira basa rekuparidzira uye wekuonerera mabira ake anokosha. (Mat. 28:19, 20; Juau 21:15-17) Kugonda kaiita Djesu anarume aya asikazi kukwana kainga kuno musoro ngekuti awona akarumbwa akagondeka dakara pakufa kawo. Apana mubvunzo kuti Ana, Dhavhidhi, museenzi wa Nabhari, Abhigairi uye Djesu akasiya muezaniso wakanaka wekugonda anhu asikazi kukwana.

13. Cinyi cingaita kuti zvitishuphire kugonda amweni?

¹³ Zvakamboitikawo here kamuri, kubvunza hama kana hanzvadzi yenyu zviro zvisikadikani kuziikanawa no amweni, asi mozoziya kuti hameyo kana kuti hanzvadziyo yakabvunzawo amweni? Zvezvirokwazvo zvinorhwadza. Zuwa rimweni, hanzvadzi imweni yakacedza no mukuru we mu ungano nge zve masoko anocokuita nge zvayo uye mukuru iyena akagondesa hanzvadziyo kuti ainga asikazobvunzi munhu umweni. Asi zuwa rakazoteera mukadzi we mukuru uya wakakweera bote hanzvadzi iya kuti aibambise. Zviri pamhene kuti mukuru uya wainga areketa zviro zvainga zvisikadikani kuziikanwa. Zvinozwisisika kuti ngei hanzvadzi ii yakagara no cinetso cekugondazve mukuru uu. Zvinopfadza kuti hanzvadzi ii yakakumbirazve rubetso kuno mukuru umweni we mu ungano. Iyona yakabhuya kutsukwara kayainga yakaita uye mukuru iyena wakabetsera hanzvadzi ii kuti igondezve akuru.

14. Cinyi cakabetsera hama imweni kuti igondezve akuru airi e mu ungano?

¹⁴ Hama imweni yakagumbukira akuru airi e mu ungano ngecinguwa cakareba ngekuti yairangarira kuti zvainga zvisikaiti kuagonda. Hino zuwa rimweni, hameyo yakanyasa kurangarira nge zve ciro cakarekethwa no hama imweni yaaireremedza maningi yakabhuya masoko arinyore asi akamubaya mwoyo anoti: “Muzondi wedu ndi Sathani haiwa hama dzedu.” Hama iya yakarangarira maningi nge zvazvo uye nge zve zviro zvayaidikana kuita. Mumasure mekuita munamato kuna Djehovha ecikumbira rubetso, hameyo yakakwanisa kugara murunyararo no akuru airi aya.

15. Ngei kuhwirira kugonda munhu kungatora nguwa yakareba? Pasai muezaniso.

¹⁵ Imwimwi makamboruza ubaba wamainga nawo mu ungano here? Kana zviri izvona, pamweni zvakamurhwadza maningi. Grete na mai ake ainga ari Apupuri a Djehovha akagondeka ku Alemanha nazista mumakore 1930 basa redu parakarambidzwa. Grete wakapaswa cikomborero cekuitira hama dzimweni makopiya e Murindiri. Asi hama padzakaziya kuti baba a Grete ainga ari muphikisi akamutorera makomborero aainga anawo ngekuti aithyira kuti baba ake aizobvunza anyautongi masoko akaringana no ungano. Andizvopi basi. Hondo Yecipiri ye mu nyika dzese payaiitika, hama dzainga dzisikapasi Grete na mai ake makopiya e mabhuku ngekuti ainga asikaagondi uye dzainga dzisikatoacungamidzi paaiyaona mugwanza. Grete  wakarhwadziwa maningi zvekuti zvakatora nguwa kuti iyena arekerere hama no hanzvadzi uye kuti aagondezve. Nokuhamba ke nguwa, hazvadzi Grete yakakwanisa kuona kuti Djehovha akarekerera hama idzi, ndiyo ndaa iyona yaidikana kuitawo zvimwezvo. *

16. Ngei tecidikana kufundira kugonda hama dzedu?

¹⁶ Kana zviro zvakaita hingana izvi zvakaitikawo kamuri, petai masimba ari ese kuti mugondezve amweni. Pamweni zvicatora nguwa yakareba kuti mukwanise kuita izvona, asi kana mukadaro, munonga maita zvakanaka. Rangarirai nge zve muezansio unoteera. Kana mukarhya cekurhya musikazvizii kuti cakaora here kana kuti haiwa uye morhwara nge daa yaco, zvezvirokwazvo mucangwarira pamunonga moosanangura cekurhya cimweni. Asi zviri pamhene kuti cekurhya cakaora camunonga marhya acimuitisi kuti imwimwi musarhye zviro zvimweni ke upenyu wenyu wese. Ngo mushobo umwewo, atidikani kusiya kuti eshiperiyesiya yakashata ye hama imwe iite kuti tisagonde hama dzimweni. Tese isusu tinozviziya kuti tiri anhu asikazi kukwana. Patinogondazve hama dzedu tinopfara maningi. Kusiya izvona, isusu tingakanda nzero dzedu pa zviya zvatinokwanisa kuita kuti tibambise rugondo redu mu ungano.

17. Ngei rugondo iciro cinokosha maningi, uye ticaonei mu fundo inoteera?

¹⁷ Mu nyika ino ya Sathani kugonda anhu iciro cinoshupha maningi, asi isusu tingagonda hama dzedu ngekuti tinodzida maningi uye idzona dzinotidawo. Rugondo iri rinoita kuti tibatane, tipfare zvino, uye ricaseenza hinga cidziiriro pa zvinetso zvicateera. Asi zvakadini kana pano munhu wakabhuya zvamainga musikadi kuti zviziikanwe no amweni uye imwimwi amucakwanisi kumugondazve? Edzai kuona nyayeyo nge maonero a Djehovha, moseenzesa mazano ari mu Bhaibheri, sakurirai rudo renyu ku hama dzenyu uye fundai no miezaniso dziri mu Bhaibheri. Tingagondazve amweni kunyazi takashaishirhwa. Kana tikaseenzesa mazano aya, ticapfara ngekugara no shamwari dzakawanda ‘dze padhuze kudarika hama.’ (Zvie. 18:24) Asi isusu tinodikana kuitawo dii redu. Hama dzinodikana kuziya kuti dzingagonda na isusu. Mu fundo inoteera, ticaona kuti tingaitei kuti tigondhwe no hama dzedu.