1. Zvinoda kureyei kugara munhu wakagondeka?

 MUNHU wakagondeka, anopeta masimba ari ese kuti adzadzise zviya zvaiinga apika uye ecireketa cokwadi. (Pis. 15:4) Isusu tinozviziya kuti nguwa dzese tingamugonda munhuwo. Isusu tinoda kugara anhu akadaro ku hama dzedu. Cinyi catingaita kuti idzona dzitigonde?

2. Ticaonei mu fundo ino?

² Atidi kubambidzira amweni kuti atigonde. Tinodikana kupangidza kuti tiri anhu akagondeka. Amweni anobhuya kuti kugondeka kakaita hingana mare. Zvinoshupha maningi kuiona, asi zviri nyorewo maningi kuiruza. Atina mubvunzo kuti nguwa dzese tinoda kugonda na Djehovha, ngekuti “zviro zvese zvaanoita zvakagondeka.” (Pis. 33:4) Uye Djehovha anoda kuti isusu titeedzere muezaniso wake. (Aef. 5:1) Ngatimboone miezaniso minganani ye aseenzi a Djehovha akagondeka e kare akateedzera muezaniso wake uye akapangidza kuti ainga ari anhu akagondeka. Uye ticaonawo mawara mashanu angatibetsera kuti tigare anhu akagondeka.

3-4. Muphorofita Dhanyeri wakapangidza kudini kuti wainga wakagondeka, uye tinodikana kudziita mibvunzo dzipi?

³ Muphorofita Dhanyeri akasiya muezaniso wakanaka we kugondeka. Kunyazi wakatorhwa kuti aende ku Bhabhironi, iyena wakapangidza ku anhu akawanda kuti wainga ari munhu wakagondeka. Asi anhu akanyasa kumugonda, kunyanya paakabetserhwa na Djehovha kuti apanganidza hope dza Mambo we Bhabhironi, Nabhukodhonozori. Mumasure mazwo, Dhanyeri  aidikana kubvunza mambo kuti iyena wainga asikazi kupfadza Djehovha. Uye izvi zvainga zvisiripi nyore kuita, ngekuti mambo waiziikanwa hingana munhu unoita zvecisimba uye wainga asikazotopfariri masoko awona! (Dha. 2:12; 4:20-22, 25) Mumasure me makore akawanda adarika, Dhanyeri wakapangidzazve kuti wainga ari munhu wakagondeka. Iyena wakapanganidza masoko ainga asikaziikanwi akabudira pa ukutira we nyumba ya mambo we Bhabhironi. (Dha. 5:5, 25-29) Pedzepo, Dhariyo mu Medho pamwepo no akuru-akuru ake akazoziya kuti Dhanyeri wainga ano “nzero.” Anhu ese akaona kuti Dhanyeri “wainga akagondeka, waiita basa rake ngo mwazvo uye wainga asikadyekerhwi.” (Dha. 6:3, 4) Kunyazi no akuru ainga asikaseenzeri Djehovha, akazviziya kuti Dhanyeri wainga ari munhu wakagondeka!

⁴ Mecirangarira muezaniso wa Dhanyeri, dzibvunzisei kuti: ‘Ndinoziikanwa kudini kunza ke ungano? Anhu anondiziya hingana munhu wakagondeka uye unoita zvakanaka mabasa here?’ Ngei zvecikosha kudziita mibvunzo idzi? Ngekuti kana tikagara anhu akagondeka, ticakudza baba edu Djehovha.

5. Cinyi cakabetsera Ananiya kuti agare munhu wakagondeka?

⁵ Mu gore ra 455 K.A.A., mumasure mekuti Govhernadhori Neemiya wawakisazve muru we Djerusarema, iyena wakapsvaka anarume ainga akagondeka kuti akwanise kutungamirira zvakanaka thaundi re Djerusarema. Pakati pe anhu ainga aripo, Neemiya wakasanangura Ananiya kuti agare mukuru we Fortareza. Bhaibheri rakabhuya kuti Ananiya wainga “munhu waiita kugonda naye kudarika anhu amweni  ese uye iyena [waithya] Mwari wecokwadi kudarika anhu akawanda.” (Nee. 7:2) Ananiya wakaita zvakanaka matii ese aainga apaswa. Iyena wakaita izvona, ngekuti waida Djehovha uye wainga asikadi kumutsamwisa. Kuteedzera muezaniso wakanaka wa Ananiya, kucatibetsera kuti tigare anhu akagondeka mu basa redu kuna Djehovha.

6. Tikiko wakapangidza kudini kuna Pauro kuti wainga wakagondeka?

⁶ Onai muezaniso wa Tikiko, Mukristu wekuti muphostori Pauro waimugonda maningi. Muphostori Pauro paainga ari musungwa, iyena waigonda no rubetso ra Tikiko, ecibhuya kuti iyena wainga ari “museenzi wakagondeka.” (Aef. 6:21, 22) Pauro wakakumbira Tikiko kuti aende koosiya tsamba dzaainga atara ku hama dze ku Efeso, uye ku Korosi uyewo kuti adzibambise uye adzinyaradze. Pauro waizviziya kuti Tikiko waizoita zvakanaka basa iri. Muezaniso wa Tikiko unotiedzurira nge zve anarume akawanda akagondeka e mu ungano anotipasa zvatinoda pa kunamata.—Ako. 4:7-9.

7. Tingafundei nge zve kugondeka ke akuru, uye ke abati anoseenzera?

⁷ Nyamasi uno tinotenda maningi ngekugara no akuru uye no abati anoseenzera atingakwanisa kugonda nawo. Kuita hingana Dhanyeri, Ananias uye Tikiko, awona anobata zvakanaka ubaba waanawo. Ngo muezaniso, isusu tino rugondo rekuti matii ese e pakati pe sumana anonga apera kupaswa ku hama. Uye akuru anotenda maningi hama no hanzvadzi padzinyasa kugadzirira matii aanonga apaswa uye oaita! Patinopika afundi edu e Bhaibheri kuti apinde misangano ye kupera ke sumana, isusu tino rugondo rekuti pano hama icaita mharidzo ye Bhaibheri. Uye isusu tino rugondo rekuti ticagara tino mabhuku nguwa dzese kuti tiseenzese mu basa rekuparidzira. Zvezvirokwazvo, hama dzino ubaba mu ungano anonyasa kuticengeta uye isusu tinotenda maningi Djehovha nge zvazvo! Asi umwe na umwe wedu ungaitei kuti apangidze kuti wakagondeka?

8. Tinodikana kungwarirei patinobhuya nge zve anhu amweni? (Zvierengo 11:13)

⁸ Isusu tinoda hama no hanzvadzi dzedu, ndiyo ndaa tinodzirangarira. Asi tinodikana kungwarira kuti tisadarike mugano uye topedzesera tisikacareremedzi zvakaigika zvawo. Mu nguwa ye muphostori Pauro, anhu amweni ainga ano “mapsveda uye aipindira mu nyaya dze anhu amweni, ecireketa zviro zvaainga asikadikani kureketa.” (1 Ti. 5:13) Apana na umwe wedu unoda kuita hingana awona. Asi ngatimboti munhu otibvunza zviro zvakaringana naye uye otikumbira kuti tisabvunze munhu umweni. Ngo muezaniso, ngatimboti hanzvadzi yotibvunza nge zve cinetso ce uthongo cairikubatana naco, kana kuti dambudziko rimweniwo haro rairikubatana naro, uye yotikumbira kuti tisabvunze munhu umweni. Kana izvona zvikaitika, isusu tinodikana kuita zviya zvainonga yatikumbira. * (Erengai Zvierengo 11:13.) Zvino ngatione zviitiko zvinganani zvinokosha kuti tisabhuye zviro zvakaigika.

9. Umwe na umwe mu mhuri ungapangidza kudini kuti wakagondeka?

⁹ Mu mhuri. Zviitiko zvimweni zvinodikana kugara basi mukati me mhuri. Ngo muezaniso, pamweni mwamuna ungaona kuti mukadzi wake uno musambo wekuita zviro zvinosekesa. Asi iyena ungazobvunzawo amweni nge zvazvo uye osiya mukadzi wake ecipsveruka? Zviri pamhene kuti haiwa! Iyena unoda mukadzi wake uye aadi kumurhwadzisa. (Aef. 5:33) Madjaha  anodawo kubathwa norureremedzo. Uye abereki e Cikristu anodikana kuedzurira izvona. Awona aadikani kupsverudza ana awo pamweni ngekubvunza anhu amweni zviro zvisikakwanisi kuizwa no ana awo. (Ako. 3:21) Ana anodikanawo kungwarira kuti asabvunze anhu amweni zviro zvaizoita kuti umwe we mhuri yawo apsveruke. (Dhe. 5:16) Kana umwe na umwe we mu mhuri akaita dii rake kuti asabvunze amweni nge zve zviro zvinocokuita no mhuri yawo, mhuri iyona inogara yakabatana.

10. Cinyi cinobatanidzwa pakugara shamwari yecokwadi? (Zvierengo 17:17)

¹⁰ No shamwari dzedu. Nguwa dzimweni, patinonga takaremerhwa nge matambudziko e upenyu, tingada kucedza no shamwari kuti timubvunze zvirikuitika nesu. Asi nguwa dzimweni zvingatishuphira kureketa zviya zvatiri kuzwa. Pamweni atisati tadjaira kucedza no munhu nge zve mazwiro uye marangariro edu. Zviri pamhene kuti taizorhwadziwa maningi kana tikazwa kuti shamwari yedu yabararisa masoko akaringana nesu ainga asikadikani kuziikanwa no anhu amweni. Asi zvinopfadza kugara no shamwari dzatinganyasa kugonda! Anhu anoziya kucengeta zviro zvakaigika i “shamwari dzecokwadi.”—Erengai Zvierengo 17:17.

11. (a) Akuru e mu ungano pamwepo no akadzi awo angapangidza kudini kuti akagondeka? (b) Maererano no muezaniso uu, tingafundei nge zve mukuru waigadzirisa nyaya yakaigika ye mu ungano uye pedzepo paanonga ari pamwepo no mhuri yake? (Onai foto.)

¹¹ Mu ungano. Akuru asikabararisi masoko akaigika akaita hingana “mbuto yekufindara dutu uye mbuto yekufindara mvura ino duto” ku ungano. (Isa. 32:2) Isusu tingareketa no anarume aya ciro cipi haco tisikathyi kuti awona acabararisa masoko awona ku anhu amweni. Isusu atibambidziriwo hama idzi kuti dzitibvunze masoko atisikadikani kuzwa. Kupinda izvona, isusu tinotendawo maningi akadzi e akuru ngekuti awona aaedzi kuita kuti amuna awo aabvunze masoko akaigika. Zvezvirokwazvo, zvakanaka maningi akadzi e akuru paanonga asikazii nge zve masoko akaringana no hama uye hanzvadzi dze mu ungano. Onai zvakarekethwa no mukadzi we mukuru we ungano: “Inini ndinotenda maningi mwamuna  wangu ngekusama kundibvunza zviro zvakaringana no hama dze mu ungano dzinoda rubetso pakunamata. Iyena aambondibvunzi kuti hama idzona ngadzipi. Ndinoona kuti zvakanaka maningi kuti ndisathware mutoro wekuziya matambudziko awona ndeciziya kuti apana candingaita kuti ndiabetsere. Ngekudaro, inini ndinokwanisa kugara ndakasudzunuka ku hama dzese dze mu ungano. Uye ndikagonda kuti kana tikabvunza mwamuna wangu ciro cisikadikani kuziikanwa no amweni, iyena aazocibararisi ku anhu amweni.” Zvirokwazvo kuti tese isusu tinoda kuziikanwa hinga anhu akagondeka. Asi mawara api atinodikana kugara nawo kuti tigare anhu akagondeka? Ngatione mawara mashanu angatibetsera kugara anhu akagondeka.

12. Ngei tingabhuya kuti rudo iciro cinokosha kuti tigare anhu akagondeka?

¹² Rudo iciro cinokosha kuti tigare anhu akagondeka. Djesu akabhuya kuti mitemo miiri yakakura ngeye kuda Djehovha uye kuda mudoni wako. (Mat. 22:37-39) Isusu tinoda Djehovha, ndiyo ndaa tinoda kuteedzera muezaniso wake uye togara anhu akagondeka. Ngo muezaniso, kana tikada hama dzedu, atizobararisi masoko akaringana nawo ku anhu amweni ngekuti tinoziya kuti zvicazoapsverudza uye zvicazoarhwadza.—Juau 15:12.

13. Kudzidodosa kucatibetsera kudini kuti tigare anhu akagondeka?

¹³ Kudzidodosa kucatibetserawo kuti tigare anhu akagondeka. Munhu unodzidodosa aadzionesi ku anhu amweni ngekugara ecibvunza anhu amweni zviro zvekuti apana munhu umweni unozviziya. (Afi. 2:3) Iyena aaedziwo kudzipangidzira ku amweni kuti unoziya zviro zvakaigika asi kuti aadikani kuzvibvunza anhu amweni. Kana tikagara anhu anodzidodosa, atizobhuiwo maonero edu ku anhu akawanda nge zve zviro zvisikarekethwi no Bhaibheri kana kuti mumabhuku edu.

14. Ungwaru ungatibetsera kudini kuti tigare anhu akagondeka?

¹⁴ Ungwaru unoita kuti munhu aziye kuti pano “nguwa yekunyarara uye nguwa yekureketa.” (Mup. 3:7) Kuno cierengo cimweni cinoziikanwa maningi ku nyika dzimweni cinoti “kureketa iprata, asi kunyarara i oro.” Izvi zvinoda kureya kuti nguwa dzimweni zvakanaka maningi kunyarara pane kureketa. Ndiyo ndaa Zvierengo 11:12 inoti: “Munhu unonyasa kuzwisisa unorumbwa akanyarara.” Onai muezaniso we hama imweni. Iyona yaano makore akawanda iri mukuru we ungano. Nge ndaa yekuti yagara no basa, iyona inopikwa no ungano dzimweni kuti iyende koogadzirisa nyaya dzinoshupha. Mukuru umweni unoseenza nawo wakati: “Iyena unogara akangwarira kuti asabararise nyaya dzakaigika dze ungano dzimweni.” Zvarekethwa no hama ii zvinopangidza kuti ungwaru we mukuru uya kakaita kuti iyena areremedzwe no aanoseenza nawo mu dare re akuru. Awona anoziya kuti angamugonda.

15. Kuthembeka kunotibetsera kudini kugara anhu akagondeka? Pasai muezaniso.

¹⁵ Kuthembeka i wara rimweni ratinoda kuti tigare anhu anogondhwa. Isusu tinothemba munhu wakagondeka ngekuti unoreketa cokwadi nguwa dzese. (Aef. 4:25; Ahe. 13:18) Rangarirai zvinoteera. Ngatimboti imwimwi murikuda kutunhudzira mushobo wenyu wekufundisa Bhaibheri anhu amweni. Pedzepo mokumbira munhu umweni kuti amubetsere kuwona pamunodikana kugadzirisa. Maizodei, munhu wakagondeka unomubvunza cokwadi here, kana kuti munhu unondobhuya basi zviro kuti amupfadze? Kana imwimwi mecida kuziya paya pamunodikana kugadzirisa, mhinduro iri pamhene. Bhaibheri rinoti: “Kusumururhwa kurinani pano rudo rakaigika. Zvironda  zvinokonzerhwa no shamwari zvakagondeka.” (Zvie. 27:5, 6) Zvingatishuphira kuzwa mhinduro yecokwadi yatingabvunzwa no shamwari yedu, asi nokuhamba ke nguwa izvona zvicadakadza.

16. Maererano na Zvierengo 10:19, ngei tecidikana kugara anhu anodzibata?

¹⁶ Kudzibata kunoita kuti anhu atigonde. Wara iri ricatibetsera kuti tikunde miedzo yekubararisa zviro zvakaigika. (Erengai Zvierengo 10:19.) Zvingatishuphira kugara anhu anodzibata patinoseenzesa interneti. Tikatama kungwarira, tingapedzesera taakubararisa zviro zvakaigika ku anhu akawanda. Uye mumasure mekuti tapedza kubararisa masoko akaigika mu interneti, tinonga tisikacazii maseenzeserhwe aacaizwa uye makuwadzire aacaita. Kudzibata kunotibetserawo aphikisi paanoedza kuita kuti isusu tirekete masoko angaita kuti hama dzedu dzigare pangozi. Ngo muezaniso, izvona zvingaitikawo mu nyika irikurambidzwa basa redu uye hama dzinobvunziswa no mapurisiya. Pamigariro yakadaro, tingaseenzesa zano riri pana Pisarema 39:1 rinoti: “Ndicarinda muromo wangu no cinofukidza muromo.” Isusu tinodikana kugara anhu akagondeka nguwa dzese ku mhuri yedu, shamwari dzedu, hama uye hanzvadzi dzedu uye no munhu upi hake. Uye kuti tigare anhu akagondeka tinodikana kugara anhu anodzibata.

17. Tingabetsera kudini ungano kuti igare mbuto yakagondeka?

¹⁷ Tinotenda maningi Djehovha ngekutikweera ku mhuri ye nyika dzese yakadzara no anhu ano rudo uye akagondeka! Tese isusu tino ubaba wekupangidza kuti tiri anhu akagondeka. Kana tikapeta masimba kuti tipangidze rudo, kudzidodosa, ungwaru, kuthembeka uye kudzibata, ticagondhwa no anhu amweni. Tinodikana kupeta masimba kuti tigare anhu akagondeka nguwa dzese. Hino ngatiteedzere Mwari wedu Djehovha uye togara tecipangidza kuti tiri anhu akagondeka.