MUSORO WE KUFUNDA 39
Zina Renyu Ririmo mu “Bhuku re Upenyu” Here?
“Bhuku rekuedzurira rakatarhwa pamberi pake kuitira aya anothya Djehovha.”—MAR. 3:16.
NGOMA 61 Shingai Imwimwi Apupuri!
ZVATICAFUNDA *
Kubvira kuna Abheri dakara nyamasi uno, Djehovha arikutunhudzira mazina mu “bhuku re upenyu” (Onai mandima 1-2)
1. Maererano na Marakiya 3:16, ibhuku ripi ririkutarhwa na Djehovha uye mukati maro munei?
DJEHOVHA ari kutara bhuku rinokosha maningi, ayena akatanga kuita izvona mumazana e makore e kare. Zvezvirokwazvo bhuku iri mundandanda we mazina, rinotanga no zina re musenzi wakagondeka wa Djehovha we kare Abheri. * (Ruka 11:50, 51) Kubvira ipona Djehovha ari kutunhudzira mazina amweni, uye nyamasi uno bhuku irona raano mamirionji e mazina. Mu Bhaibheri bhuku iri rinozwi “bhuku re ciedzuriro,” “bhuku re upenyu” uye “mupumburu we upenyu.” Mu fundo ino ticareketa ngezve buku iri hinga “bhuku re upenyu.”—Erengai Marakiya 3:16; Zvak. 3:5; 17:8.
2. Bhuku re upenyu rino mazina ani, uye cinyi catinodikana kuita kuti zina redu rionekewo mu bhuku re upenyu?
2 Bhuku iri rinokosha, rinomazina e aya ese anonamata Djehovha no mwoyo wese uye anoreremedza zina rake. Aya anokariro yekutambira upenyu usikaperi, isusuwo tingagara no mazina edu akatarhwa mu bhuku re upenyu, kuti zvidaro tinodikana kugara no ushamwari wakabamba na Djehovha uyewo totenda mucibairo ce Mwana wake Djesu Kristu. (Juau 3:16, 36) Kunyazi kariro yedu ngeye kurarama kudenga kana pasi pano—tese isusu tinoda kuti zina redu ritarhwe mu bhuku irona.
3-4. (a) Kana zina redu rakatarhwa mu bhuku re upenyu zvinoreya kuti ticatambira upenyu usikaperi here? Panganidzai. (b) Ticaonei mu fundo ino no mu fundo inoteera?
3 Kodi aya ano zina mu bhuku re upenyu, zvinoda kureya kuti zvatokwana kuti atambire upenyu usikaperi here? Tingagumira mhinduro pazviya zvakabhuyiwa na Djehovha kuna Mozesi pana Ekisodho 32:33. Djehovha akati: “Ndicapfudza mu bhuku rangu zina re uya unonga andishaishira.” Izvi zvinoreya kuti mazina ari mu bhuku re upenyu angapfudzwa, zvinoita hingana kuti Djehovha akaseenzesa rapshi pakutara mazina aya. (Zvak. 3:5, masoko e pasi) Tinodikana kupeta masimba kuti zina redu rirumbwe riri mubhuku re upenyu dakara irona ratarhwa no rapizera risikapfudziki.
4 Pamweni izvona zvingatisiya no mibvunzo. Ngo muezaniso, Bhaibheri rinobhuyeizve ngezve aya ano mazina awo mubhuku re upenyu? Uye ngezve aya asina mazina awo akatarhwa imona? Aya ano mazina mu bhuku re upenyu acatambira upenyu usikaperi. Hino aya akafa asikazi kuziya Djehovha awona angagara no zina rawo mu bhuku re upenyu here? Ngatione mhinduro dze mibvunzo idzi mu fundo ino ne mu fundo inoteera.
MAZINA API ARI MU BHUKU RE UPENYU?
5-6. (a) Hingana zvinopangidzwa pana Afiripi 4:3, ndiani uno zina rakatarhwa mu bhuku re upenyu? (b) Anozogara no mazina akatarhwa zvacose rini mu bhuku irona?
5 Ndiani uno zina rakatarhwa mu bhuku re upenyu? Kuti tidaire mubvunzo uu, ticareketa ngezve magrupu mashanu. Uye toona kuti magrupu api akatarhwa mazina awo mu bhuku re upenyu.
6 Grupu re kutanga rinobatanidza aya akasanangurhwa kuti aende kootonga na Djesu kudenga. Kodi mazina awo aa mu bhuku re upenyu? Honde aamo. Maererano no zviya zvakabhuya Pauro ku “hama” dze ku Firipi, mazina e akadzodzwa akapikwa kuti atonge na Djesu aa mu bhuku re upenyu. (Erengai Afiripi 4:3.) Asi awona anodikana kurumbwa akagondeka kuti asapfudzwe mu bhuku irona. Akadzodzwa aya acagara basi no mazina awo akatarhwa mu bhuku re upenyu zvacose mumasure mekutambira cisimbiso cokupedzesera, cisimbiso icona cinoitika pasara mazuwa padoko asati afa kana kuti dambudziko guru risati ratanga.—Zvak. 7:3.
7. Mazina e anhu anoita dii re grupu rakakura ro mabira amweni acatarhwa zvacose mu bhuku re upenyu rini? (Zvakapangidzwa 7:16, 17.)
7 Grupu ro cipiri i grupu rakakura re mabira amweni. Asi anhu o grupu irona anomazina awo akatarhwa mu bhuku re upenyu here? Honde. Hino mumasure me Amagedhoni mazina awo anonga aciri imona? Honde. (Zvak. 7:14) Djesu akati anhu awona akaita hinga mabira “acazotambira upenyu usikaperi.” (Mat. 25:46) Asi awona aatambiri upenyu usikaperi mumasure me Amagedhoni. Ngekuti zina rawo rinonga riciri mu bhuku re upenyu, irona rinonga ricaita kupfudza. Pakutonga ke Makore Ciuru, Djesu “acaariritira uye acaatungamirira dakara ku mvura ye upenyu.” Ese aya anonga ateerera nhungamiriro dza Djesu ooneka ndi Djehovha kuti akagondeka, mazina awo anozooneka akatarhwa zvacose mu bhuku re upenyu.—Erengai Zvakapangidzwa 7:16, 17.
8. Anhu api asina mazina awo mu bhuku re upenyu, uye cinyi cicaitika kaari?
8 Grupu recitatu rinoumbwa no mbudzi dzicatsakatiswa pa Amagedhoni. Mazina awo aaripi mu bhuku re upenyu. Djesu akabhuya kuti awona “acaenda kootsakatiswa nokusikaperi.” (Mat. 25:46) Pauro akafemerhwa kureketa kuti “aya akatongerhwa kutsakatiswa nokusikaperi.” (2 Ate. 1:9; 2 Ped. 2:9) Izvi zvingaitikawo ku aya ekuti mu upenyu wawo akashaishira mweya mucena wa Mwari ecitoziya kamare. Zviri pamhene kuti aya aazomutswi, caanozowina ikutsakatiswa no kusikaperi haiwa upenyu usikaperi. (Mat. 12:32; Mark. 3:28, 29; Aheb. 6:4-6) Parizvino ngatione magrupu mairi acamutswa kuti ararame panyika pano.
NDIANI ACAMUTSWA
9. Maererano na Zviito 24:15, magrupu api mairi acamutswa kuti ararame pano pa nyika, uye musiyano upi uripo pakati pe magrupu aya mairi?
9 Bhaibheri rinobhuya ngezve magrupu mairi acamutswa kuti ararame nokusikaperi panyika “anatsi” no “asina unatsi.” (Erengai Zviito 24:15.) “Anatsi” ndi aya akaseenzera Djehovha akagondeka asati afa. Tecibhuya ngezve “asina unatsi” ndi aya asikazi kuseenzera Djehovha akagondeka. Zvezvirokwazvo, kakawanda kakhona anhu aya asina unatsi akagara no mararamiro ari kure kamare no zvinodiwa na Djehovha. Asi ngekuti magrupu mairi aya acamutswa, tingabhuya kuti mazina awo akatarhwa mu bhuku re upenyu here? Kuti tidaire mubvunzo uu ngatitange kufunda ngezve grupu rimwe.
10. Ngei Djehovha acamutsa anhu “anatsi” uye anganani akhona acagara no ubaba upi? (Onai “Mibvunzo Inobva ku Aerengi” kana mecida kuziya zvakawanda zvinocokuita no rumuko pa nyika.)
10 “Anatsi” i grupo recirongomuna. Mazina awo akatarhwa mu bhuku re upenyu awona asati afa. Kodi awona paakafa zina rawo rakapfudzwa mu bhuku iri here? Haiwa ngekuti awona aciri “apenyu” mu ndangariro dza Djehovha. Ayena “andi Mwaripi we akafa, asi we apenyu, ngekuti kaari ese aciri apenyu.” (Ruka 20:38) Izvona zviri kuda kubhuya kuti kana anatsi akamutswa mazina awo anonga akatarhwa mu bhuku re upenyu, asi pakutanga anonga akaita hingana kuti akatarhwa “no rapishi.” (Ruka 14:14) Zvezvirokwazvo, amweni e anhu aya anonga amutswa acatambira ubaba wekuseenza hinga “macinda mu nyika yese.”—Pis. 45:16.
11. Anhu “asina unatsi” acadikana kufundira kuitei kuti mazina awo atarhwe mu bhuku re upnyu?
11 Pakupedzesera ngatione grupu recishanu, anhu “asina unatsi.” Pamweni awona aazi kuziya mitemo ya Djehovha uye nge ndaa yazvo aazi kurarama maererano nayo. Ndiyo ndaa zina rawo arizi kutarhwa mu bhuku re upenyu. Asi Djehovha acamutsa anhu aya kuti awona agare no mukana wekutarhwa mazina awo mu bhuku irona. Anhu aya “asina unatsi” acada rubetso rakakura. Amweni akhona ainga ano utsinye uye akaita zviro zvakashata maningi asati afa. Awona acadikana kufundira kurarama maererano no mitemo ye unatsi ya Djehovha. Ndiyo ndaa Umambo wa Mwari ucaita urongwa wakakura maningi wekufundisa kupinda wese wakamboitika mu nyika.
12. (a) Ndiani acafundisa anhu asina unatsi? (b) Cinyi cicaitika no aya asikazoseenzesi zviya zvaanonga ecifunda?
12 Asi ndiani acafundisa anhu asina unatsi? Grupu guru no anatsi anonga abva kumutswa, ndiwo acafundisa anhu aya asina unatsi. Kuti anhu asina unatsi agare no mazina awo akatarhwa mu bhuku re upenyu, awona anodikana kusakurira ushamwari wawo na Djehovha uye odzipira kaari. Djesu no akadzodzwa acanyasa kuteya nzee anhu aya asina unatsi nge mushobo waanonga ecitambira zviya zvaanonga ecifunda. (Zvak. 20:4) Munhu upi hake unoramba kurarama maererano no mitemo ya Djehovha, ucaruza mukana wekurarama nokusikaperi—kunyazi waano makore 100. (Isa. 65:20) Djehovha na Djesu anokwanisa kuona zviri mu mwoyo uye aazosii kana munhu umwe hake aite zviro zvakashata mu nyika ipsva.—Isa. 11:9; 60:18; 65:25; Juau 2:25.
RUMUKO RE UPENYU UYE REKUTONGWA
13-14. (a) Kareko tairangarirei nge zve masoko a Djesu ari pana Juau 5:29? (b) Ifundo ipi inokosha yatinodikana kuona pa masoko a Djesu?
13 Djesu akabhuyawo nge zve aya acamutswa kuti ararame pa nyika pano. Ngo muezaniso, ayena akati: “Icakwana nguwa yekuti ese aya ari mu makuwa e anorangarirhwa acazwa izwi rake uye obuda, aya akaita zvakanaka acamutsirhwa upenyu, uye aya akaita zvakashata acamutsirhwa kutongwa.” (Juau 5:28, 29) Djesu aida kubhuyei no masoko aya?
14 Kareko tairangarira kuti masoko a Djesu ainga ano cokuita no zviito zve aya anonga amutswa mumasure me rumuko, kana kuti, tairangarira kuti amweni aizomutswa oita zviro zvakanaka uye amweni oita zviro zvakashata. Asi Djesu aazi kubhuya kuti aya anonga amutswa aizoita ciro cakanaka kana kuti aizoita ciro cakashata. Asi pamasoko ake, Djesu aireketa nge zve zviito zvawo zvekare haiwa nge zve zviito zvawo zve mberi. Ayena akabhuya nge zve aya “akaita zviro zvakanaka” uye nge zve aya “akaita zviro zvakashata.” Kana kuti, anhu aya akaita zviro izvi asati afa haiwa mumasure mekumutswa. Izvona zvino musoro andizvopi? Ngekuti mu nyika ipsva amuzotenderhwi kuti munhu upi hake aite ciro cakashata. Ngekudaro, anhu asina unatsi akaita zviro izvi zvakashata asati afa. Hino Djesu aida kureyei paakabhuya nge zve “kumutsirhwa upenyu” uye “kumutsirhwa kutongwa”?
15. Ndiani “acamutsirhwa upenyu,” uye ngei?
15 Anhu anatsi akaita zviro zvakanaka asati afa “acamutsirhwa upenyu” ngekuti mazina awo anonga atotarhwa mu bhuku re upenyu. Izvona zvirikuda kureya kuti rumuko re “aya akaita zviro zvakanaka” anorekethwa pana Juau 5:29 ndi rumuko rimwero re “anatsi” anorekethwa mu bhuku ra Zviito 24:15. Kupanganidzwa uku kunoenderana no zvinorekethwa mu bhuku ra Aroma 6:7, rinoti: “Ngekuti uya unonga wafa wasunungurhwa pa citema cake.” Nge masoko amweni zvirikuda kureya kuti Djehovha arekerera zvishaishi zve anatsi aya, asi anorumbwa eciedzurira zviro zvese zvaakaita zvekugondeka paainga aciri apenyu. (Aheb. 6:10) Zvirokwazvo kuti mumasure mekuti anhu anatsi amutswa, awona anodikana kurumbwa akagondeka kana ecida kuti zina rawo rirumbwe riri mu bhuku re upenyu.
16. Zvinoda kureyei “kumutsirhwa kutongwa”?
16 Asi zvakadini no aya akaita zviro zvakashata asati afa? Kunyazi zvitema zvawo zvakapfudzwa paakafa, awona aazi kuseenzera Djehovha akagondeka mu upenyu wawo. Zina rawo ariripi mu bhuku re upenyu. Rumuko re “aya akaita zviro zvakashata” ndi rumuko rimwero re anhu “asina unatsi” rinorekethwa mu bhuku ra Zviito 24:15. Anhu awona aya “acamutsirhwa kutongwa.” * Izvona zvirikuda kureya kuti acanyasa kuoniwa uye kuongororhwa na Djesu. (Ruka 22:30) Mumasure mecinguwa, Djesu acaziya kuti zina rawo rinodikana kutarhwa here mu bhuku re upenyu. Kuti izvona zviitike, awona anodikana kusiya kamare upenyu waaitora kare uye odzipira kuna Djehovha.
17-18. (a) Anhu aya anonga amutswa acazodikana kuitei? (b) Maererano na Zvakapangidzwa 20:12, 13, aya anonga amutswa acatongwa maererano “nei”?
17 Mumasure me rumuko, anhu anatsi, kutobatanidzawo no aya asina unatsi acadikana kuzwira mipumburu mipsva icafunungurhwa mukati memakore 1000. Muphostori Juau wakapanganidza nge zve ciono caakaona eciti: “Ndakaona akafa, akuru ne adoko, akaima pamberi pe cigaro ce umambo, uye mipumburu yakafunungurhwa. Asi pano mupumburu umweni wakafunungurhwa; irona imupumburu we upenyu. Akafa akatongwa peciseenzeswa zviya zvainga zvakatarhwa mu mipumburu iyona maererano no mabasa awo.”—Zvak. 20:12, 13.
18 Anhu aya anonga amutswa acatongwa maererano no “cinyi”? Kodi acatongwa maererano no zviya zvaakaita asati afa here? Haiwa! Edzurirai kuti munhu unorekererhwa zvitema zvake paanofa. Ndiyo ndaa, aya anonga amutswa aazotongwi maererano “no zviya” zvaakaita asati afa. Awona acaongororhwa maererano no maitiro awo kubva pakufundiswa kaacaizwa mu nyika ipsva. Izvona zvinobatanidzawo anarume akagondeka e kare hingana Nowa, Samueri, Dhavhidhi, uye Dhanyeri, awona acadikana kufunda nge zva Djesu uye opangidza kutenda maari. Kana anarume aya ecidikana kufunda zvakawanda nge zva Djehovha uye na Djesu, aya asina unatsi anozodikana kufunda zvakawanda kupinda awona!
19. Cinyi cicazoitika no aya anoramba mukana wekuseenzera Djehovha?
19 Asi cinyi cicaitika no aya arikuramba mukana wakanakisisa wekuseenzera Djehovha? Zvakapangidzwa 20:15 inoti: “Aya ainga asikazi kutarhwa mazina awo mu bhuku re upenyu akakhandirhwa mu rindi re muriro.” Ndizvona kamare, awona aya acatsakatiswa nokusikaperi. Ndiyo ndaa, zvakanaka maningi kuti tese isusu tipete masimba kuti zina redu ritarhwe mu bhuku re upenyu uye rirumbwe riri imona!
Hama yecipanganidza urongwa wakakura wekufundisa ucaizwa mu nguwa ye Ciuru ce Makore (Onai mandima 20)
20. Ibasa ripi rinopfadza ricaizwa Pakutonga ke Makore Ciuru? (Onai foto ye pa kapa.)
20 Pakutonga ka Djesu ke Makore Ciuru kucagara nguwa inopfadza maningi! Kucaitika zviro zvakawanda zvakanaka. Zviro izvi pazvinonga zveciitika, pacagara no urongwa wakakurisisa wekufundisa unodarika wese wakamboitika. Asi kucagarawo nguwa yekuongororhwa zviito zve anatsi no aya asiripi anatsi. (Isa. 26:9; Zvii. 17:31) Asi urongwa uu wekufundisa ucaizwa kudini? Mu fundo inoteera, ticafundazve zvimweni zvakaringana no basa iri rinopfadza.
NGOMA 147 Upenyu Usikaperi Wakapikirhwa
^ Mu fundo ino ticafunda kugadziriswa ke kuzwisisa kedu pa masoko a Djesu atinogumira pana Juau 5:28, 29 akarekethwa na Djesu ngezve “kumutsirhwa upenhu” uye “kumutsirhwa kutongwa.” Ticafundawo ngezve masoko mairi aya.
^ Bhuku iri rakatanga kutarhwa kubvira “pakutanga ke nyika,” kubvira anhu paakagara no mukana wekuponeswa no rusudzunuro. (Mat. 25:34; Zvak. 17:8) Abheri, pamweni zina rake ndiro rakatanga kutarhwa mubhuku re upenyu.
^ Kareko, taipanganidza soko rekuti “kutongwa” teciti raireya kutongwa kakashata kana kuti kuphanicwa. Zvezvirokwazvo, soko rekuti “kutonga” ringareyawo izvona kamare. Asi pana Juau 5:28, 29, zvingaita kuti Djesu akada kuseenzesa soko rekuti “kutonga” ecida kureya zviro zvakawanda, zvecida kubhuya kunyasa kuringira munhu kana kuti, hinga zvinorekethwa no Dicionário rimweni re Bhaibheri rinoti “kunyasa kuongorora.”
