Onai kuti Bhaibheri rinodaira kudini mibvunzo idzi.

Zviito 24: 15 inobhuya kuti kucaoneka “kumuka ke anhu anatsi no asiripi anatsi.” Anatsi ndiwo aya akateerera Djehovha asati afa. Ndiyo ndaa, mazina awo akatarhwa mu bhuku re upenyu. (Mara. 3:16) Asina unatsi ndiwo aya akafa asikazi kuona mukana wakakura kuti afunde nge zva Djehovha, ndiyo ndaa mazina awo asikazi kutarhwa mu bhuku re upenyu.

Juau 5: 28, 29 inobhuyawo nge zve magrupu amwewo mairi akatarhwa pana Zviito 24:​15. Djesu akabhuya kuti “aya akaita zviro zvakanaka acamutsirhwa upenyu, uye aya akaita zviro zvakashata acamutswa kuti atongwe.” Anatsi akaita zviro zvakanaka asati afa acamutsirhwa upenyu ngekuti mazina awo akatarhwa kare mu bhuku re upenyu. Hino asina unatsi aya akaita zviro zvakashata asati afa, ndiyo ndaa acamutswa kuti atongwe. Mazina awo aasati atarhwa mu bhuku re upenyu uye acapinda pa nguwa yokutongwa kana kuti yokuongororhwa. Pa nguwa iyona, awona acagara no mukana wekufunda nge zva Djehovha uye ogara no mazina awo akatarhwa mu bhuku re upenyu.

Zvakapangidzwa 20:​12, 13 inopanganidza kuti anhu ese acamutswa acadikana kuzwira “zviro zvinonga zvakatarhwa mu mipumburu.” Mipumburu ii, mitemo mipsva yaticapaswa ndi Djehovha munyika ipsva. Djehovha acatsakatisa wese wiya usikadi kumuzwira.—Isa. 65:20.

Dhanyeri 12:2 inobhuya kuti anhu amweni akawata mu rufu acamutsirhwa “upenyu usikaperi uye amweni acamutsirhwa kuti asareremedzwe uye kuti ashorhwe nokusikaperi.” Vhersikuro ii inobhuya zviro zvicaitika mukupera kemakore 1000, amweni— “acararama nokusikaperi” uye amweni “acashorhwa nokusikaperi.” Kana kuti amweni acatambira upenyu usikaperi uye amweni acaparadzwa nokusikaperi.—Zvak. 20:15; 21:3, 4.

Cimborangarirai basi. Migariro ye magrupu mairi aya acamutswa, akaezana no anhu anoda koorarama ku nyika imweni. Anatsi aya akaita hingana aya anopaswa citendero ce basa kana kuti kekugara, anopedzesera ooreremedza uye ogara no rusununguko. Hino aya asina unatsi akaita hingana anhu e nyika dzimweni anotenderhwa kugara basi nguwa padoko. Anhu aya e nyika dzimweni anodikana kupangidza kuti akagondeka kana ecida kurumbwa ecirarama mu nyika iyona. Ngo mushobo umwewo, anhu aya asina unatsi akamutswa, anodikana kutondowedza mitemo ya Djehovha uye opangidza kuti ano unatsi kana ecida kurumbwa ecirarama mu Paraizo. Asi kunyazi hawo akatenderhwa kugara nokusikaperi kana kuti kugara ke nguwa padoko, amweni anopedzesera aakutenderhwa kugara mu nyikemo uye kana kuhwirinzwa ku nyika yawo. Zvese zvicatsamira pa mushobo waacararama mu nyika iyona ipsva. Ndizvo-ndizvoo ku aya acamutswa kuti ararame nokusikaperi kana kuti kuparadzwa nokusikaperi. Zvese zvicatsamira pa mushobo waacaseenzesa upenyu wawo mu nyika ipsva.

Djehovha ndi Mwari ane rudo uyewo ndi Mwari ane unatsi. (Dhe. 32:4; Pis. 33:5) Rudo raanaro ricanyasa kuoneka paacamutsa ano unatsi uye no asina unatsi. Djehovha kubvira no kare anoetsera kuti aya acamutswa ateerere mitemo yake ye zviro zvakashata no zviro zvakanaka. Aya basi acada Mwari uye orarama maererano no mitemo yake acarumbwa ecirarama mu nyika ipsva.