MUSORO WE KUFUNDA 36
NGOMA 89 Purutanai, Mozviita Kuti Mukomborerhwe
“Garai Anhu Anoita Zvinorekethwa no Soko”
“Garai anhu anoita zvinorekethwa no soko, haiwa azwi basi.” —TIG. 1:22.
CINANGWA
Fundo ino icatibetsera kutunhudzira cido cedu haiwa basi ce kuerenga Soko ra Mwari mazuwa ese, asiwo ce kunyasa kurangarira zvarinoreketa uye kuzviseenzesa mu upenyu wedu.
1-2. Zvinyi zvinoita kuti aseenzi a Mwari agare anhu anopfara? (Tiyago 1:22-25)
Djehovha no Mwana wake anodiwa anoda kuti isusu tipfare. Mutari we Pisarema 119:2 anobhuya kuti: “Anopfara aya anozwira zviedzuriro zvake, aya anomupsvaka no mwoyo wese.” Uye Djesu akagondesazve kuti: “Anopfara ndi uya anozwa soko ra Mwari uye oriseenzesa!”—Ruka 11:28.
2 Isusu hinga aseenzi a Djehovha, tiri anhu anopfara maningi. Ngei? Zvezvirokwazvo tino zvikonzero zvakawanda, asi cikonzero cimwe cinokosha maningi nge cekuti isusu tinoerenga Soko ra Mwari nguwa dzese, uye tinoita zviri zvese kuti tiseenzese zviya zvatinofunda.—Erengai Tiyago 1:22-25.
3. Ngei zvakanaka katiri kana tikaseenzesa zvatinoerenga mu Soko ra Mwari?
3 Pano makomborero akawanda nge “kugara anhu anoita zvinorekethwa no soko.” Pakutanga, isusu tinozviziya kuti izvona zvinokosha kuti tipfadze Djehovha. Kuziya izvona zvinoita kuti tipfare. (Mup. 12:13) Patinorarama maererano no zvinorekethwa no Soko rakafemerhwa ra Mwari, upenyu wedu mu mhuri unogara uri nani uye tinogara no ushamwari wakabamba no hama dzedu. Pamweni izvi zvakatomboitika mu upenyu wenyu kamare. Kusiya izvona, isusu tinonzvenga matambudziko akawanda anosongana no anhu asikaseenzeri Djehovha. Zvezvirokwazvo isusu tinotenderanawo no masoko a Mambo Dhavhidhi, wekuti mumasure me kuemba ngezve mutemo, mipango uye kutonga ka Djehovha, wakati: “Kuno mubairo wakakura nge kuzvicengeta.”—Pis. 19:7-11.
4. Ngei i cinetso katiri kuerenga uye kuseenzesa zvatinofunda mu Bhaibheri?
4 Asi zvezvirokwazvo anguwa dzesepi zviri nyore kuti isusu tierenge Bhaibheri uye tiseenzese zviya zvatinofunda imona. Kunyazi takabatikana pa zuwa no zuwa, isusu tinodikana kupsvaka nguwa kuti tierenge uye tifunde Bhaibheri, ngokudaro ticakwanisa kuzwisisa zvinoda Djehovha kuti tiite. Hino mufundo ino, ticaona mazano manganani angatibetsera kuti tierenge Bhaibheri mazuwa ese. Ticaonawo zvicatibetsera kuti tinyase kurangarira kana kuti kurangarira zviya zvataerenga uye toona kuti tingaseenzesa kudini mu upenyu wedu zviya zvatafunda.
PSVAKAI NGUWA KUTI MUERENGE SOKO RA MWARI
5. Zvinyi zvinoita kuti upenyu wedu ugare wakabatikana maningi?
5 Akawanda anoseenzera Djehovha ano upenyu wakabatikana. Tinodikana kugara no nguwa yakawanda kuti tiite zviro zvinokosha zvinorekethwa no Bhaibheri kuti tiite. Ngo muezaniso, akawanda edu tinodikana kuseenza kuti tidziriritire pacedu uye mhuri. (1 Ti. 5:8) Hama dzakawanda dzinodikana kucengeta anyaukama awo ekuti acembera kana kuti ari kurhwara. Uye tese isusu tinodikana kucengeta uthongo wedu kamare zvekuti zvinodawo nguwa. Kusiya ubaba uu wakakura, isusu tino mabasawo amweni anokosha mu ungano. Cimwe ce zviro zvatinodikana kuita nge ce kubatikana mu basa re kuparidzira. No zviro zvese zvamunazvo uye no mabasa ese amunodikana kuita, imwimwi mungaona kudini nguwa ye kuerenga Bhaibheri mazuwa ese, kunyasa kurangarira zvamaerenga uye kuseenzesa zviya zvamafunda?
6. Imwimwi mungaita kudini kuti kuerenga Bhaibheri kugare ciro cinokosha maningi mu upenyu wenyu? (Onaiwo foto.)
6 Kuerenga Bhaibheri ndi cimwe ce “zviro zvinonyanya kukosha” ku Akristu, ndiyo ndaa kunodikana kugara pa mbuto yekutanga. (Afi. 1:10) Yecibhuya ngezve munhu unopfara, Pisarema yekutanga inoti: “Anopfarira mutemo wa Djehovha uye anoerenga mutemo uwona no izwi riri pasi usiku no masikati.” (Pis. 1:1, 2) Zvinogara pamhene kuti iri i zano rokuti tipsvake nguwa yokuti tierenge Bhaibheri. Asi ngaipi nguwa yakanaka ye kuerenga Bhaibheri? Izvona zvinoenderana no mugariro we munhu umwe na umwe. Asi kakawanda kakhona, nguwa yakanaka ye kuerenga Bhaibheri ndi iya yamucakwanisa kurierenga mazuwa ese. Hama imweni inozwi Victor inoti: “Inini ndinopfarira kuerenga Bhaibheri ce macibesi. Kubhuya zvirokwazvo, inini andipfariri kufumira kumuka, asi pa nguwa iyona panonga pasina zvakawanda zvinondipingaidza, musoro wangu unonga ucakatonhorera uye ndinokwanisa kukanda ndangariro dzangu pa mbuto.” Pamweni uu ndiwo mugariro wenyuwo. Hino cimboimai modzibvunzisa kuti: ‘Ngaipi nguwa yakandinakira ye kuerenga Bhaibheri?’
Ngaipi nguwa yakanakisisa kuti muerenge Bhaibheri? Imwimwi mungakwanisa kuerenga Bhaibheri mazuwa ese mu nguwa iyona here? (Onai ndima 6)
NYASAI KURANGARIRA ZVIYA ZVAMAERENGA
7-8. Cinyi cingatipingaidza patinonga tecierenga Bhaibheri? Panganidzai.
7 Pamweni paya tingaerenga zvakawanda, asi topedzesera pasina catazwisisa. Imwimwi makamboerenga ciro uye mumasure me nguwa doko mopedzesera musikacaedzuriri zvamaerenga? Izvona zvakamboitikawo na isusu tese. Zvinotsukwarisa kuti zvinokwanisawo kuitika patinoerenga Bhaibheri. Pamweni imwimwi mungagara no cinagwa ce kuerenga makapituro manganani e Bhaibheri mazuwa ese. Izvona zvakanaka. Zvezvirokwazvo tinodikana kugara no cinangwa uye topeta masimba kuti ticidzadzise. (1 Ako. 9:26) Kuerenga Bhaibheri kakanaka, asi i danho rokutanga. Isusu tinodikana kuita zviro zvimweni kana tecida kunyasa kubetsereka.
8 Cimborangarirai ngezve muezaniso unoteera: Mvura painonga yecinaya inokosha kuitira upenyu we pa nyika. Asi kana mvura ikarumbwa yecinaya, iyona inonga isikacaseenzi ngokuti mataka anoda nguwa kuti amwirire mvura painonga yecinaya kuti anyase kukhorovherhwa no zviro zvicada kumera. Nge mushobo umwewo, atidikani kuerenga Bhaibheri tecikasika kana kuti tecigogomeka maningi zvekuti tinopedzesera tisikaoni ciro kunyazi kutoedzurira zviya zvataerenga.—Tig. 1:24.
Hinga mushobo unoda mataka nguwa kuti mvura inyase kumwirira uye anyase kukhorovhera zvakanaka mvura painonaya, isusu tinoda nguwa kuti tinyase kurangarira uye tikwanise kuseenzesa zviya zvatinoerenga mu Bhaibheri. (Onai ndima 8)
9. Cinyi catingaita kana tikaona kuti tiri kuerenga Bhaibheri tecigogomeka?
9 Zvakamboitikawo kamuri here kuerenga Bhaibheri uye mozwisisa kuti murikuerenga mecikasika maningi? Pamugariro uwona zvinyi zvamunodikana kuita? Erengai musikagogomeki kuitira kuti mugare no mukana we kunyasa kurangarira zviya zvamaerenga. Uye izvona azvidikani kushupha. Kana kuima kuti munyase kurangarira zviya zvamuri kuerenga zveciita hingana kuti zvirikushupha kamuri, imwimwi munodikana basi kuima kuti munyase kurangarira zviya zvamuri kuerenga. Pamweni imwimwi mucadikana kuerenga mavhersikuro manganani uye moseenzesa nguwa inosareyo kuti murangarire zviya zvamaerenga. Victor unoti. “Pakuerenga kangu ke Bhaibheri, kakawanda kakhona inini ndinoerenga kapituro imwe basi. Ngokuti ndinosofumira kuerenga, ndinokwanisa kurangarira zuwa rese ngezve zviya zvandaerenga.” Azvinei no mushobo wamucasanangura kuti muerenge Bhaibheri, cinokosha kamare nge cekuti imwimwi muite izvona nge mushobo unomubetserai kuti munyase kukhorovhera zviya zvamaerenga.—Pis. 119:97; onai bhokisi rakazwi: “ Rangarirai Ngezve Mibvunzo Idzi.”
10. Pasai muezaniso wekuti mungaseenzesa kudini zvamunoerenga. (1 Atesaronika 5:17, 18)
10 Pasinei no nguwa yamasanangura kuti muerenge Bhaibheri kana kuti nguwa yamucapedza mecirierenga, rangarirai kuti mungaseenzesa kudini zvamaerenga. Pamunonga mecierenga masoko manganani e Soko ra Mwari, dzibvunzisei kuti: ‘Ndingaseenzesa kudini masoko aya zvino kana kuti muneramangwana?’ Ngo muezaniso, cimborangarirai kuti pa kuerenga kenyu ke Bhaibheri imwimwi maerenga tsamba ya 1 Atesaronika 5:17, 18. (Erengai.) Mumasure me kuerenga mavhersikuro mairi aya, imwimwi mungakwanisa kuima monyasa kurangarira ngezve kuti munosoita minamato yakadzika kudini uye kangana. Imwimwi mungaimawo kuti munyase kurangarira ngezve zviro zvekuti imwimwi munotenda maningi. Pamweni imwimwi mungasanangurawo kuda kutenda Djehovha nge zviro zvitatu zvakananga. Kana imwimwi mukapedza zvimiseswa zvinganani mecirangarira ngezve mafundo amafunda mu Bhaibheri, izvona zvicamubetserai kuti muzwisise Soko ra Mwari uye kuseenzesa zviya zvarinobhuya. Cimborangarirai ngezve kubetsereka kamaizoita kana mukaita izvona mazuwa ese no mavhersikuro amweni e mu Bhaibheri amungaerenga! Honde, imwimwi mucagara munhu anoita zvinorekethwa no Soko ra Mwari. Asi zvinyi zvamunodikana kuita kana mukagumira zviro zvakawanda zvamunodikana kugadzirisa mu upenyu wenyu?
GARAI NO ZVINANGWA ZVAMUNGAKWANISA KUDZADZISA
11. Ngei nguwa dzimweni mungazwa makaora moyo? Pasai muezaniso.
11 Zvingaitika kuti imwimwi pamweni mungapera simba padoko pamucada kutanga kuerenga Bhaibheri, uye moona zviro zvinganani zvamunodikana kugadzirisa mu upenyu wenyu. Cimborangarirai ngezve nyaya ii: Rangaridzai kuti imwimwi muri kuerenga bhuku ra Tiyago kapituro imwe pa zuwa. Pedzepo, imwimwi munoerenga ngezve kungwarira kuita rusananguro. (Tig. 2:1-8) Imwimwi munozwisisa kuti munodikana kugadzirisa mushobo wamunobata amweni, hino munosanangura kuita cinjo dzinganani. Izvona zvakanaka! Pedzepo, pa zuwa rinozoteera imwimwi munoerenga mavhersikuro amweni anocokuita ngezve kukosha ke kuonerera zviya zvamunoreketa. (Tig. 3:1-12) Imwimwi munoedzurira kuti zuwa rimweni, makareketa zviro zvimweni zvainga zvisikazi kunaka. Hino munosanangura kureketa zviro zvakanaka uye moreketa zviro zvinopfadza. Pazuwa rimwenizve, pamunonga mecierenga Bhaibheri imwimwi munoerenga ngezve ngwadzo inocokuita ngezve ngozi ye kushamwaridzana no nyika. (Tig. 4:4-12) Zvino, imwimwi maakuzviziya kuti munodikana kusanangura zvakanaka zviro zvamunodikana kudziwaraidza nazvo. Onai, padarika mazuwa manganani basi uye imwimwi magumira zviro zvakawanda zvamunodikana kugadzirisa mu upenyu wenyu.
12. Ngei imwimwi amudikani kuora moyo kana mukaerenga Bhaibheri uye moona kuti munodikana kuita cinjo? (Onaiwo masoko o pasi)
12 Kana imwimwi mukaona kuti muno zviro zvakawanda zvamunodikana kugadzirisa, musanetseke henyu. Izvona zvinonyasa kupangidza kuti imwimwi munodzidodosa uye muno cido ce kuzvigadzirisa. Munhu unodzidodosa uye unoziya paakarembera, iyena unoerenga Bhaibheri no cinangwa ce kuda kugumira paacada kugadzirisa. a Amudikani kukanganwa kuti “kupfeka unhu upsva” ndi ciro catinodikana kurumbwa teciita, ngokuti nguwa dzese isusu tino zviro zvatinodikana kugadzirisa. (Ako. 3:10; Onaiwo masoko e kufunda mu Ciputukezi “sendo renovada.”) Hino zvinyi zvingamubetserai kuti murumbwe mecigara munhu anoita zvinorekethwa no Soko ra Mwari?
13. Mungagadza kudini cinangwa ce kuseenzesa zviya zvamunofunda mu Bhaibheri? (Onai foto.)
13 Pane kuedza kuita cinjo dzese pa nguwa imwe basi, edzai kuseenzesa ciro cimwe kana zviiri pa zviya zvamafunda. (Zvie. 11:2) Edzai kuita zvinoteera: Itai mundandanda we zviro zvamunodikana kugadzirisa mu upenyu wenyu, uye pedzepo sanangurai ciro cimwe kana zviiri zvamunodikana kutanga magadzirisa nge zvazvo, uye mosiira mberi cinjo dzimweni pa mundandanda. Asi kana mundandanda ukagara wakakura, cinjo ipi yamunodikana kutanga kuita?
Pane kuedza kuita cinjo dzakawanda pa nguwa imweyo patinoerenga Bhaibheri, zvakadini kusanangura cinjo imwe kuti titange kuiita? Pamweni imwimwi mungakanda ndangariro dzenyu pa nyaya imwe kana kuti mbiri (Onai mandima 13-14)
14. Mungatanga no zvinangwa zvipi?
14 Imwimwi mungatanga kusanangura cinangwa cisikamushuphiri kudzadzisa. Pamweni imwimwi mungasanangura kutanga kugadzirisa cinjo iya yekuti inodikana kugadziriswa nokukasika. Mumasure me kuziya kuti cinangwa cenyu nga cipi, psvakisisai mu mabhuku edu ngezvazvo, imwimwi mungaseenzesa RAIBHURARI YEPAINDANETI yeWatchtower kana Bhuku Rinobatsira Zvapupu zvaJehovha Pakutsvakurudza Ra2019. Namatai ngezve cinangwa cenyu, uye kumbirai Djehovha kuti amupasei “cido ce kuita zviro no simba re kuzviita.” (Afi. 2:13) Pedzepo tangai kuseenzesa zvamafunda. Kana imwimwi mukabudirira pa cinangwa cekutanga, imwimwi mucagara no cidaka-daka kuti murumbwe mecipeta masimba kuitira zvinangwa zvimweni. Kana imwimwi mukaona kuti makwanisa kuita cinjo kana kugadzirisa wara rimwe re Cikristu, mucapfara maningi nge kurumbwa meciita cinjo mu upenyu wenyu, uye zvicamuitirai nyore kuti mugumire zvinangwa zvinozoteera.
SIYAI KUTI SOKO RA MWARI “RISEENZE MAMURI”
15. Ngei anhu a Djehovha akasiyana no anhu amweni akawanda anoerenga Bhaibheri? (1 Atesaronika 2:13)
15 Anhu anganani anobhuya kuti akamboerenga Bhaibheri kakawanda. Asi awona zvezvirokwazvo anotendera zvarinoreya here? Awona anoseenzesa zvaanofunda uye anorarama maererano no zvinofundiswa no Bhaibheri here? Zvinotsukwarisa kuti awona aazviiti. Asi zvakasiyana maningi panocokuita no aseenzi a Djehovha! Kuitawo hinga Akristu e mu zana re makore re kutanga, isusu tinotenda Bhaibheri “hinga mushobo wariri kamare, soko ra Mwari.” Uye kupinda zvese, isusu tinoita zviri zvese kuti tiseenzese mazano e mu Bhaibheri mu upenyu wedu.—Erengai 1 Atesaronika 2:13.
16. Cinyi cingatibetsera kuti tigare muiti we Soko ra Mwari?
16 Anguwa yesepi yekuti zviri nyore kuerenga uye kuseenzesa Soko ra Mwari. Zvingaitika kuti cinetso cedu ngece kuona nguwa kuti tierenge, kana kuti tino musambo we kuerenga tecigogomeka uye tisikaoni zvakawanda pa zviya zvataerenga. Kana kuti tingazwa takaremba nge kuzwa kuti tino zviro zvakawanda zvatinodikana kugadzirisa mu upenyu wedu. Pasinei no cinetso cipi haco, imwimwi mungakwanisa kucikunda no rubetso ra Djehovha. Garai makashinga kutendera rubetso rake uye ‘kugara haiwa basi muzwi we soko unokanganwa nokukasika, asi muiti we Soko ra Mwari.’ Apana mubvunzo kuti pese paya patinoerenga Bhaibheri uye toseenzesa mu upenyu wedu zvatinoerenga, isusu ticazopfara pa zviro zvese zvatinoita.—Tig. 1:25.
NGOMA 94 Kutenda Soko ra Mwari
a Onai vhidhiyo yakazwi Zvinorekethwawo no e Thunga Renyu—Kuerenga Bhaibheri, mu jw.org.
