MUSORO WE KUFUNDA 38
NGOMA 25 Ana a Mwari
Muri Kuteya Nzee Here pa Ngwadzo?
“Umwe ucatorhwa umweni ucasiiwa.”—MAT. 24:40.
CINANGWA
Ticaona miezaniso mitatu yakarekethwa na Djesu uye kuzwisisa kuti ngei iyona ino cokuita no nguwa ye kutongwa kucaitika mu kupera ke mugariro uno we zviro.
1. Kutongwa kupi kucaitika nokukasika?
NGUWA yatiri kurarama ino inokosha maningi! Nokukasika kucaitika cinjo dzakakura maningi. Mbai-mbai pano, Djesu acatonga munhu umwe na umwe pa nyika. Djesu kamare akareketa ngezve zviro zvaizoitika mu nyika kutongwa uku kusati kaguma paakapasa afundi ake “cipangidzo” ce uphorofita “cekuoneka kake cokuti nyika yaakuda kupera.” (Mat. 24:3) Cipangidzo ici ce uphorofita, cakatarhwa pana Mateu kapituro 24 uye 25 uyewo mu tsamba dzino masoko akaezana ari pana Marko kapituro 13 uye Ruka kapituro 21.
2. Ticaonei mu fundo ino uye ngei izvona zvicatibetsera?
2 Djesu akapasa ngwadzo dzinoseenza maningi eciseenzesa miezaniso mitatu. Muezaniso we mabira no mbudzi, mhandwe dzakangwara no dzakapusa uye we matarento. Muezaniso umwe na umwe unotibetsera kuzwisisa kuti maitiro uye muhambiro we munhu zvicabata-bata kudini matongerhwe aacaizwa. Paticaedzurira muezaniso idzi, ticaona mafundo atingafunda uye kuona kuti tingadziseenzesa kudini. Muezaniso wekutanga waticaona ngewe mabira no mbudzi.
MABIRA UYE MBUDZI
3. Djesu acatonga rini anhu?
3 Pa muezaniso we mabira uye mbudzi, Djesu akareketa ngezve kutongwa ke anhu ano mukana wekuzwa masoko akanaka osanangura kuti acatenda here kutsigira hama dzakadzodzwa kana kuti haiwa. (Mat. 25:31-46) Djesu acatonga mabira uye mbudzi “pakutambudzika kukuru” Amagedhoni isati yatanga. (Mat. 24:21) Kuitawo hingana muushi anoparadzanisa mabira no mbudzi, Djesu acaparadzanisawo anhu anotsigira hama dzake dzakadzodzwa no aya asikadzitsigiri.
4. Maererano na Isaya 11:3, 4, ngei tinodikana kugara no rugondo rekuti Djesu acatonga anhu no unatsi? (Onaiwo foto ye pa .)
4 Djehovha akagadza Djesu hinga Mutongi uye uphorofita we Bhaibheri unopangidza kuti Djesu acatonga no unatsi. (Erengai Isaya 11:3, 4.) Iyena anoona zviya zvinoizwa, zvinorekethwa kana kurangarirhwa no munhu umwe na umwe—kutobatanidzawo mushobo watinobata hama dzake, akadzodzwa. (Mat. 12:36, 37; 25:40) Ngokudaro, Djesu acanyasa kuziya kamare aya akatsigira hama dzake dzakadzodzwa uye basa radzinoita. a Umwe we mushobo unokosha maningi unoezaniswa anhu no mabira ecitsigira hama dza Kristu, i kuita basa re kuparidzira. Anhu awona acatongwa hinga “anatsi” uye acagara no kariro yo kutambira “upenyu usikaperi” pa nyika. (Mat. 25:46; Zvak. 7:16, 17) Ii icagara kariro yakanaka maningi ku aya acarumbwa akagondeka! Nge kurumbwa akatendeka pa kutambudzika kukuru uye mumasure me kutambudzika kukuru, zina rawo ricarumbwa rakatarhwa “mu bhuku re upenyu.”—Zvak. 20:15.
Mbai-mbai pano Djesu acatonga anhu hinga mabira uye mbudzi (Onai ndima 4)
5. Tinofundei kubva pa muezaniso we mabira no mbudzi uye ndiani anodikana kupurutana muezaniso uu?
5 Pangidzai kuti imwimwi makatendeka uye makagondeka. Muezaniso wa Djesu we mabira uye mbudzi unoseenza maka-maka ku aya ano kariro ye kurarama pa nyika. Anhu awona anopangidza kutenda kawo nge kutsigira hama dza Kristu mu basa re kuparidzira uyewo nge kurumbwa akagondeka ku cikwata cidoko ce akadzodzwa akagadzwa na Djesu hinga muranda akatendeka uye akangwara. (Mat. 24:45) Awona anodikanawo kuteya nzee pa ngwadzo yatinogumira pa muezaniso. Asi ngei? Ngokuti Djesu anoongororawo muhambiro, maitiro uye masoko awo. Awona anodikanawo kupangidza kuti akatendeka. Ndiyo ndaa, Djesu akabhuyawo miezaniso miiri inopasa ngwadzo yakananga ku akadzodzwa. Isusu tinogumira miezaniso idzona pana Mateu kapituro 25. Ngatione zvino muezaniso we mhandwe dzakangwara uye dzakapusa.
MHANDWE DZAKANGWARA UYE DZAKAPUSA
6. Mhandwe shanu dzakapangidza kudini kuti dzainga dzakangwara? (Mateu 25:6-10)
6 Pa muezaniso we mhadwe, Djesu akabhuya ngezve mhandwe gumi dzakabuda kuti dziende koona mwanarume ari kuda kucata. (Mat. 25:1-4) Ese awona aida kuperekedza mwanarume ari kuda kucata pa mabiko e mucato. Djesu akabhuya ngezve mhandwe shanu “dzakangwara” uye shanu “dzakapusa.” Mhandwe dzakangwara dzainga dzakagadzirira uye dzakarinda. Idzona dzainga dzakagadzirira kuetsera mwanarume ari kuda kucata dakara pa nguwa yaidikanwa, kunyazi iyena aizononoka kuguma. Hino idzona dzakaunzisa mafuta kuitira kuti zvibani zvadzo zvirumbwe zvecibaka pa mbuto ii yainga ino cidima. Idzona dzakaunzisa mafuta amweni pa muceto kuitira kuti dzizoseenzese kana mwanarume ari kuda kucata akazononoka. Hino idzona dzainga dzakagadzirira kuitira kuti zvibani zvadzo zvisadzime. (Erengai Mateu 25:6-10.) Mwanarume ari kuda kucata paakaguma, mhandwe dzakangwara dzakaenda naye ku mabiko e mucato. Nge mushobo umwewo, Akristu akadzodzwa anonga akagadzirira kurumbwa akangwarira uye akatendeka dakara Kristu aguma, acatongwa kuti akasisira kubatanidzwa pamwepo no Mwanarume ari Kuda Kucata, Djesu, mu Umambo wake we kudenga. b (Zvak. 7:1-3) Asi zvinyi zvakaitika no mhandwe dzakapusa?
7. Zvinyi zvakaitika no mhandwe shanu dzainga dzakapusa uye ngei?
7 Kusiyana no mhandwe dzakangwara, mhandwe shanu dzakapusa dzainga dzisikazi kugadzirira mwanarume ari kuda kucata paakaguma. Zvibani zvadzo zvaida kutodzima uye awona ainga asikazi kuunzisa mafuta pamuceto. Awona paakaziya kuti mwanarume ari kuda kucata waiguma, akabuda kuti aende kootenga mafuta. Mwanarume ari kuda kucata paakazoguma, awona ainga asati ahwirira. Ndiyo ndaa, “mhandwe dzainga dzakagadzirira dzakapinda naye mu mabiko e mucato uye musuwo wakafungwa.” (Mat. 25:10) Paa padarika cinguwa, mhandwe dzakapusa padzakazohwirira kuti dzipinde mu mabiko e mucato, mwanarumewo waicata wakaabvunza kuti: “Andimuzii.” (Mat. 25:11, 12) Mhandwe dziya dzainga dzisikazi kugadzirira kuti dzietsere mwanarume ari kuda kucata ke nguwa yaidikanwa. Akristu akadzodzwa anofundei no muezaniso uu?
8-9. Akadzodzwa angafundei pa muezaniso we mhandwe? (Onaiwo foto.)
8 Pangidzai kuti makagadzirira uye makarinda. Djesu ainga asikareketi kuti kaizooneka zvikwata zviiri zve akadzodzwa—cimwe caizogara cakagadzirira kuetsera dakara ku mugumo we mugariro we zviro uye cimweni haiwa. Iyena aipanganidza basi zvaizoitika no akadzodzwa kana awona akatama kurumbwa akagadzirira kuti ashingirire akatendeka dakara ku mugumo. Pa mugariro wakadaro, awona ainga asikazotambiri mubairo wawo. (Juau 14:3, 4) Ii i nyaya inokosha maningi! Azvinei nokuti tino kariro ye kurarama kudenga kana pa nyika, tese isusu atidikani kukanganwa ngwadzo ye muezaniso we mhandwe. Umwe na umwe wedu unodikana kugara akangwarira uye akagadzirira kuti akwanise kushingirira dakara ku mugumo.—Mat. 24:13.
9 Mumasure mekuseenzesa muezaniso we mhandwe kuti apangidze kukosha ke kugara takagadzirira uye takangwarira, Djesu akapanganidza muezaniso we matarento. Muezaniso uona unopangidza kukosha kekuti tigare anhu anoseenza no simba uye toita zvese zvatinokwanisa.
Zvinokosha maningi kuti tese isusu tipurutane ngwadzo dze muezaniso we mhandwe kuti tigare takagadzirira uye takarinda, takagadzirira kuti tishingirire dakara ku mugumo (Onai mandima 8-9)
MATARENTO
10. Aranda airi akapangidza kudini kuti ainga ari anhu akatendeka? (Mateu 25:19-23)
10 Pa muezaniso we matarento, Djesu akabhuya ngezve aranda airi akatendeka kuna tenzi wawo uye umwe asikazi kutendeka. (Mat. 25:14-18) Aranda airi akapangidza kuti ainga akatendeka, ngokuti aiseenza no simba kuti atunhudzire upfumi wa tenzi wawo. Asati aita rhwendo, mwanarumewo wakapasa aranda ake matarento manganani kana kuti mare yakawanda maningi. Aranda airi aya akatendeka akaseenza no simba uye akaseenzesa mare no ungwaru. Ndi upi wakazogara mugumisiro wakhona? Mwanarumewo paakahwirira, awona ainga aano mare yakapethwa pa mare iya yaakapaswa. Hino tenzi wawo wakaasimba uye awona ‘akapfara pamwepo na tenzi wawo.’ (Erengai Mateu 25:19-23.) Asi cinyi cakazoitika no muranda wecitatu? Iyena wakaitei no mare iya yaakapaswa na tenzi wake?
11. Zvinyi zvakaitika no muranda wainga ano “nungo” uye ngei?
11 Muranda wecitatu wakatambira tarento imwe uye iyena wakagara no “nungo.” Tenzi wake waida kuti iyena aseenzese tarento iya no ungwaru. Asi pano kudaro, iyena wakaifushira. Tenzi wake paakazohwirira, muranda uya wainga asina ciro kuti apase tenzi wake. Muranda uu aazi kupangidza maitiro akanaka. Pane kuti akumbire rurekerero nge kutama kake kuedza kutunhudzira upfumi wa tenzi wake, nge mushobo usina unatsi, muranda uu unodainza tenzi wake kuti “munhu wakaoma mwoyo.” Zvakaizwa no muranda uu azvizi kupfadza tenzi wake. Ndiyo ndaa, wakatorerhwa tarento iya yaainga anayo uye iyena wakadzingirhwa pa nyumba pa tenzi wake.—Mat. 25:24, 26-30.
12. Aranda airi aya akatendeka anoimirira ani nyamasi uno?
12 Aranda airi akatendeka anoimirira Akristu akadzodzwa akatendeka. Tenzi Djesu anoapika eciti ‘pfarai pamwepo na tenzi wenyu’ kana kuti awona anotambira makomborero awo e kudenga, kumutswa ke kutanga. (Mat. 25:21, 23; Zvak. 20:5b) Nge dii rimweni, muezaniso we muranda wakashata uno nungo unopasa ngwadzo ku Akristu akadzodzwa. Kuita kudini?
13-14. Akadzodzwa anofundei pa muezaniso we matarento? (Onaiwo foto.)
13 Pangidzai kuti imwimwi munoseenza no simba uye munoita zvamunokwanisa. Pa muezaniso we matarento kunyazi pa muezaniso we mhandwe, Djesu ainga asikaphorofiti kuti akadzodzwa anganani aizogara anhu ano nungo. Nge dii rimweni, iyena ainga ecipanganidza kuti zvinyi zvaizoitika kana awona akasiya kushingaira. Awona aizoruza “kudainzwa no kusanangurhwa kaakaizwa,” uyewo aizoruza mukana we kutenderhwa mu Umambo we kudenga.—2 Ped. 1:10.
14 Muezaniso wa Djesu we mhandwe uye we matarento unopangidza pamhene kuti Akristu ese akadzodzwa anodikana kugara akagadzirira uye kungwarira uyewo anodikana kuseenza no simba pakuita zvese zvaanokwanisa. Asi Djesu akareketazve zviro zvimweni zvinocokuita no ngwadzo ku akadzodzwa here? Honde, zvakarekethwa na Djesu zviri pana Mateu 24:40, 41 zvinoseenzawo pa kutongwa ke kupedzesera ku akadzodzwa.
Djesu ari kuda maningi kuti akadzodzwa aseenze no simba uye agare akangwarira (Onai mandima 13-14) d
NDIANI “ACATORHWA”?
15-16. Tsamba ya Mateu 24:40, 41 ingabetsera kudini akadzodzwa kuti aone kukosha ke kurumbwa akarinda?
15 Asati areketa ngezve miezaniso mitatu, Djesu akapanganidza ngezve kutongwa ke kupedzesera kuti apangidze kuti ndiapi akadzodzwa aizotenderhwa. Iyena akareketa ngezve anarume airi aiseenza mu munda uye ngezve anakadzi airi aikwiya pa gwiyo. Pa migariro miiri ii zvinoita hingana kuti ese aiita basa rimwero, asi Djesu akati: “Umwe ucatorhwa umweni ucasiiwa.” (Erengai Mateu 24:40, 41.) Mumasure mazvo Djesu akati ku afundi ake: “Rumbwai makarinda, ngokuti amurizii zuwa ricauya Tenzi wenyu.” (Mat. 24:42) Djesu paakareketa ngezve muezaniso we mhandwe, iyena akareketa ngezve zviro zvakaezana. (Mat. 25:13) Kodi nyaya idzi dzakabatana here? Zvinoita hingana kuti honde. Aya basi akadzodzwa zvezirokwazvo uye orumbwa akatendeka ndiwona “aizotorhwa” kana kuti Djesu aizoatambira mu Umambo we kudenga.—Juau 14:3.
16 Pangidzai kuti makarinda. Wakadzodzwa upi hake usikarumbwi akarinda kana akangwarira aazobatanidzwi “no akasanangurhwa.” (Mat. 24:31) Asi zvezvirokwazvo, ese aya anoseenzera Djehovha azvinei no kariro yawo, anodikana kuona masoko a Djesu hinga ngwadzo yekuti arumbwe akarinda uye akagondeka.
17. Ngei atidikani kukana-kana Djehovha paanosanangura kudzodza Akristu anganani mu nguwa yedu ino?
17 Isusu takaguma pakunyasa kuziya Djehovha uye tinoziya kuti mushobo wake we kutonga nguwa dzese ngewe unatsi. Isusu atiripi kunetseka ngokuti Djehovha akasanangura kudzodza Akristu anganani akatendeka mu nguwa yedu ino. c Isusu tinoedzurira muezaniso wakarekethwa na Djesu ngezve anarume akatanga kurima mu munda we uvha pa nguwa dza 11 dze madekoni. (Mat. 20:1-16) Aya akatanga kuseenza mu munda we uvha pakupera ke zuwa akatambira mare imweyo no aya akataga kuseenza pa kutanga ke zuwa. Nge mushobo umwewo, azvinei no nguwa inodzodzwa aya akasanangurhwa, awona acatambira mubairo we upenyu kudenga kana akarumbwa akatendeka.
TEYAI NZEE PA NGWADZO
18-19. I fundo uye ngwadzo dzipi dzatafunda?
18 Zvinyi zvataona? Kuno aya ano kariro ye kurarama nokusikaperi pa nyika, muezaniso we mabira uye mbudzi unopangidza kukosha ke kurumbwa takatendeka uye takagondeka kuna Djehovha zvino uye pakutambudzika kukuru kaa padhuze. Mune ramangwana, Djesu acatonga aya acarumbwa akatendeka hinga “akasisira upenyu usikaperi.”—Mat. 25:46.
19 Isusu tafundawo ngezve miezaniso miiri yakapasa ngwadzo aya akadzodzwa. Pa muezaniso wa Djesu waakareketa ngezve mhandwe dzakangwara uye dzakapusa, shanu ndidzo dzainga dzino ungwaru. Idzona dzainga dzakagadzirira uye dzakangwarira, dzainga dzakagadzirira kuetsera mwanarume waida kucata ke nguwa yaidikanwa. Asi mhandwe dziya dzainga dzakapusa, dzainga dzisikazi kugadzirira. Ndiyo ndaa, mwanarume ari kuda kucata aazi kudzisiya kuti dzipinde pa mabiko e mucato. Isusuwo tinodikana kugara takagadzirira uye toetsera nguwa inodikanwa dakara Djesu aunzisa mugumo we mugariro uno we zviro. Kusiya izvona, pa muezaniso wa Djesu we matarento, takwanisa kuona kuti aranda airi akatendeka ainga ari anhu anoseenza no simba uye akangwara. Awona akaseenza no simba pa zviro zvinodiwa na tenzi wawo, ndiyo ndaa tenzi wawo akaatendera. Asi muranda ano nungo wakarambwa. Tinofundei? Isusu tinodikana kurumbwa takabatikana pa basa ra Djehovha dakara ku mugumo. Pakupedzesera, takwanisa kuona zvinodikanwa no akadzodzwa kuti arumbwe akarinda dakara “atorhwa” na Djesu kuti atambire mubairo we kudenga. Akadzodzwa ano cidaka-daka “cekubatanidzwa” na Djesu kudenga. Mumasure me hondo ye Amagedhoni, awona acagara anhu ari kuda kucata na Djesu pa mucato we Bira.—2 Ate. 2:1; Zvak. 19:9.
20. Djehovha acaitei ku aya acateerera ngwadzo dzake?
20 Nguwa yekuti Djesu atonge anhu yaa padhuze. Asi isusu atithyi, kana tikarumbwa takatendeka Baba edu e kudenga acatipasa “simba rakakura rinodarika re anhu” kuti tikwanise “kuima pamberi pe Mwana we munhu.” (2 Ako. 4:7; Ruka 21:36) Azvinei kuti kariro yedu nge ye kudenga kana kuti ye pasi pano, isusu ticapfadza Baba edu e kudega kana tikateya nzee pa ngwadzo dzatinogumira pa miezaniso dzakarekethwa na Djesu. Nge ndaa ye nyasha dza Djehovha, mazina edu “acatarhwa mu bhuku” re upenyu.—Dha. 12:1; Zvak. 3:5.
NGOMA 26 Zvamakaitira Hama Dzangu Makazviitirawo Inini
a Onai fundo yakazwi: “Tinoziyei ngezve Mushobo Ucatonga Djehovha Anhu Mune Ramangwana?” mu Murindiri wa Mayo wa 2024.
b Kuti muziye zvakawanda, onai fundo yakazwi: ‘Ucharamba Wakarinda’ Here? Mu Murindiri wa 15 ya Marso ya 2015, mu ciShona.
d KUPANGANIDZWA KE MAFOTO E PA : Hanzvadzi yakadzodzwa yeciitisa fundo ye Bhaibheri ku mwanakadzi wayaona mu basa re kuparidzira.
