1-2. (a) Mugariro we Adjudha wainga wakadini Pauro paakatarira tsamba Ahebheru? (b) Ngei tecidikana kubhuya kuti tsamba ii yakafemerhwa yakaguma pa nguwa yakasisira?

 AKRISTU e Cihebheru airarama ku Djerusarema uye ku Djudhiya, akabatana no mugariro unoshupha mumasure mekuti Djesu afa. Mumasure me nguwa doko ungano yabva kuumbwa, awona akabatana no kuteererhwa kakakura maningi. (Zvii. 8:1) Pedzepo mu makore 20 akazoteera, Akristu akabatana no cinetso cakakura ce kukonerhwa mare, pamweni nge ndaa yo nzara yainga yabata-bata nyikeyo. (Zvii. 11:27-30) Ngokudaro, pamweni mu gore ra 61 K.A., Akristu akapinda mu runyararo zveciezaniswa no zviya zvaizouya. Mu nguwa iyona, awona akatambira tsamba yakafemerhwa ya muphostori Pauro uye zvaigara pamhene kuti tsamba iyona yakauya pa nguwa kwayo.

² Tsamba ku Ahebheru yakauya pa nguwa kwayo, ngokuti nguwa ye runyararo ku Akristu yainga isikazotori nguwa yakareba. Pauro wakapasa mazano aizobetsera Akristu kushingirira dambudziko raaizobatana naro. Kutsakatiswa ke mugariro we zviro we pa nguwa ye Adjudha, kainga kaphorofithwa na Djesu kuti kainga kaa padhuze. (Ruka 21:20) Izvirokwazvo kuti Pauro uye Akristu e ku Djudhiya, ainga asikanyasi kuziya kamare nguwa yazvaizoitika. Asi Akristu aya, aikwanisa kuseenzesa nguwa ii yainga yasara pa kugadzirira nge kusakurira mawara akaita hinga kutenda uye kushingirira.—Aheb. 10:25; 12:1, 2.

3. Ngei bhuku ra Ahebheru recikosha maningi ku Akristu nyamasi uno?

 ³ Mbai-mbai pano, ticasongana no kutambudzika kakakura kupinda kakabatana no Akristu e Cihebheru. (Mat. 24:21; Zvak. 16:14, 16) Ndiyo ndaa, ticafunda mazano manganani anobetsera akapaswa Akristu na Djehovha uye awona angakwanisawo kutibetsera.

“NGATISEENZE NO SIMBA KUTI TIKURE”

4. Zvitsinzwa zvipi zvakabatana no Adjudha akagara Akristu? (Onaiwo mufanikiso.)

⁴ Adjudha ainga agara Akristu, aidikana kuita cinjo dzakakura uye izvona zvainga zvisiripi nyore. Kareko, Adjudha ainga ari anhu akasanangurhwa na Djehovha. Djerusarema yainga iri sedhi ye Umambo wa Mwari pa nyika uye tempro yainga iri mbuto ye kunamata kakacena. Adjudha ese akatendeka aizwira Mutemo wa Mozesi uye mitemo yaifundiswa no atungamiriri e magereja. Fundiso idzona dzainga dzinocokuita no zviro zvaairhya, maonero awo ngezve kuizwa ucekeri uye kutobatanidzawo kushamwaridzana kaaita no anhu e madzinza amweni. Ngokudaro, Djehovha akasiya kutendera zvibairo zvaiizwa no Adjudha mumasure me kufa ka Djesu. Izvi zvakagara cinetso ku Adjudha ainga agara Akristu uye ainga adjaira kuzwira Mutemo. (Aheb. 10:1, 4, 10) Kutobatanidzawo Akristu akakura pakunamata, hinga muphostori Pedru, wakagarawo no cinetso ce kudjairana no cinjo idzi. (Zvii. 10:9-14; Aga. 2:11-14) Nge ndaa ye zviro zvipsva zvaaitenda, Akristu aya akateererhwa nge atungamiriri e magereja e Cidjudha.

5. Akristu aidikana kudzidziirira pa ngozi dzipi?

⁵ Akristu e ku Djudhiya aibatana no kuteererhwa ke zvikwata zviiri zve anhu. Kainga kuno atungamiriri e magereja aiaona hingana kuti akapauka pa kunamata uye ainga asiya kunamata ke Cidjudha. Kusiya izvona, anganani aidziti Akristu aiabambidzira kuti arumbwe eciita zviro zviri mu Mutemo wa Mozesi, pamweni awona aiita izvona ngokuti ainga asikadi kuteererhwa. (Aga. 6:12) Zvinyi zvaizobetsera Akristu kuti arumbwe akagondeka kuna Djehovha?

6. Pauro wakakohomedzesa hama dzake kuti dziitei? (Ahebheru 5:14–6:1)

 ⁶ Pa tsamba ku Ahebheru, Pauro wakakohomedzesa hama dzake kuti dzinyase kufunda Soko ra Mwari. (Erengai Ahebheru 5:14–6:1.) Pauro wakareketa ngezve Matarhwa e Cihebheru uye wakapanganidza kuti ngei mushobo wainamata Akristu wainga wakanaka kudarika mushobo wainamata Adjudha Djehovha kare. a Pauro waizviziya kuti kudai Akristu akafunda uye ozwisisa zvakanaka cokwadi, awona aizokwanisa kuziya fundiso dze kunyepa uye odziramba.

7. Zvitsinzwa zvipi zvatinobatana nazvo nyamasi uno?

⁷ Kuitawo hingana Akristu e Cihebheru, isusu nyamasi uno tiri kurarama mu nyika ino anhu anobararisa masoko uye marangariro asikareremedzi mitemo ya Djehovha ye zviro zvakanaka uye zvakashata. Amweni aatenderani no Apupuri a Djehovha, ngokuti anozwira mitemo yo Bhaibheri inocokuita no zvepamaponde. Amweniwo anoti isusu takaoma mwoyo, ngokuti aya akasiya kutondowedza mitemo ya Djehovha aadikanizve kugara Apupuri a Djehovha. Mushobo we kurangarira we nyika ino, uri kurumbwa wecisiyana maningi no mushobo we kurangarira ka Djehovha. (Zvie. 17:15) Ndiyo ndaa, zvinokosha maningi kuti tiziye marangariro aya akashata uye toaramba. Isusu atidikani kusiya kuti munhu upi hake atiodze mwoyo uye oita kuti tisiye kuseenzera Djehovha.—Aheb. 13:9.

8. Tingarumbwa kudini tecikura pa kunamata?

⁸ Pauro wakakohomedzesa Ahebheru kuti agare Akristu akakura pa kunamata, uye isusu tinodikanawo kutondowedza zano irona. Izvona zvinobatanidza kunyasa kuita fundo ye Bhaibheri kuti tiziye zvakanaka Djehovha uye mushobo wake we kurangarira. Uye tinodikana kuita izvona kunyazi mumasure me kudzipira uye kubhabhatidzwa. Azvinei nokuti taano nguwa yakadini tiri Mupupuri wa Djehovha, tese tinodikana kuerenga uye kufunda mazuwa ese Soko ra Mwari. (Pis. 1:2) Urongwa wakanaka we fundo ye munhu ega, ucatibetsera kubambisa wara rakarekethwa ndi Pauro mu tsamba yake ku Ahebheru: Kutenda.—Aheb. 11:1, 6.

“GARAI NO KUTENDA KUTI MUCENGETEDZE UPENYU”

9. Ngei zvainga zvecikosha kuti Akristu e Cihebheru agare no kutenda kakabamba?

⁹ Akristu aidikana kugara no kutenda kakabamba kaizoabetsera kuti apone paizoitika kutambudzika mu Djudhiya. (Aheb. 10:37-39) Djesu ainga angwadza ateeri ake kuti Djerusarema paraizotenderedzwa no masurudado, awona aidikana kutiza. Akristu airarama mu thaundi uyewo Akristu airarama ku mutanha, aidikana kutondowedza zano irona. (Ruka 21:20-24) Pa nguwa iyona, masurudado paaiedza kuarhwisa, anhu aigara ku mutanha kakawanda kakhona aipsvaka kudziirirhwa mukati me thaundi nge ndaa ye muru wainga uriyo. Hino kutiza kuenda mu matunhu zvaiita hingana zvisina musoro, ndiyo ndaa, zvaidikana kutenda kakabamba.

10. Zvinyi zvaizoizwa no Akristu kudai ainga ano kutenda kakabamba? (Ahebheru 13:17)

¹⁰ Akristu e Cihebheru aidikanawo kugonda aya ainga eciseenzeswa na Djesu kuti atungamirire ungano. Aya ainga ecitungamirira pamweni akapasa nhungamiriro dzakananga nge zvekuti aizotiza kudini uye rini. (Erengai Ahebheru 13:17.) Soko re Cigrego rakaseenzeswa pana Ahebheru 13:17 rokuti “purutanai” rinoda kureya kuti munhu anozwira ngokuti anogonda uya ari kumupasa nhungamiriro, kana kuti akuzwirapi basi ngokuti munhu uya uri kumupasa  nhungamiriro ano ubaba wekuita izvona. Ndiyo ndaa, Akristu e Cihebheru aidikana kugonda aya aiapasa nhungamiriro kutambudzika kusati katanga. Kudai pa nguwa ye runyararo Akristu ainyasa kuzwira nhungamiriro dzaaipaswa no aya aiatungamirira, zvaizogara nyore kuti atondowedze pa nguwa dzinoshupha.

11. Ngei zvecikosha ku Akristu kuti agare no kutenda kakabamba nyamasi uno?

¹¹ Kuitawo hingana Akristu e Cihebheru, isusu tinodikanawo kugara no kutenda. Isusu tiri kurarama pa nguwa yekuti anhu akawanda aatendi kuti mugumo we mugariro we zviro we nyika ino waa padhuze. Awona anotishora ngokuti tinotendera izvona. (2 Ped. 3:3, 4) Kusiya izvona, kunyazi Bhaibheri recitipasa masoko manganani ngezve zviya zvicaitika pa nguwa yekutambudzika kukuru, pano zviro zvakawanda zvatisikazii. Tinodikana kugara no rugondo rekuti mugumo ucauya pa nguwa kwayo uye kuti kana izvona zvikaitika Djehovha acaticengeta.—Aheb. 2:3.

12. Zvinyi zvicatibetsera kuti tipone pa kutambudzika kukuru?

¹² Isusu tinodikana kubambisa kutenda kedu kuti Djehovha ari kuseenzesa “muranda akatendeka uye akangwara” kuti atitungamirire nyamasi uno. (Mat. 24:45) Dambudziko guru rikatanga, pamweni ticapaswa nhungamiriro dzakananga dzicaponesa upenyu wedu, kuitawo hingana nhungamiriro dzakapaswa Akristu e Cihebheru masurudado e Ciroma paakatenderedza Djerusarema. Hino, ino ndiyo nguwa ye kufundira kugonda aya anoseenzeswa na Djehovha kuti atitungamirire. Kana tikatama kugonda uye kuzwira nhungamiriro dzaanotipasa zvino, zvezvirokwazvo zvicatishuphira kuzwira nhungamiriro dzaticapaswa pa nguwa yekutambudzika kukuru.

13. Ngei zano ra Pauro rinooneka pana Ahebheru 13:5 rainga rakasisira?

¹³ Paaietsera ciziiso cekuti atize, Akristu e Cihebheru aidikana kusiya “kuda maningi mare” uye ogara no upenyu usina zvakawanda, okanda ndangariro dzawo pa kuseenzera Djehovha. (Erengai Ahebheru 13:5.) Anganani akhona ainga akabatana no cinetso co nzara uye urombo kareko. (Aheb. 10:32-34) Kunyazi akatenda no mupfaro kubatana no zvitsinzwa izvi nge ndaa ye masoko akanaka, anganani pamweni akatanga kukanda ndangariro dzawo pa kugara no mare yakawanda kuti adzidziirire pa ngozi ipi hayo kana urombo. Asi mare yainga isikazoponesi upenyu wawo Djerusarema paraizotsakatiswa. (Tig. 5:3) Zvezvirokwazvo, ese aya aizoda maningi zviro zvekurarama nazvo, pamweni zvaizoashuphira maningi kutiza uye osiya sure nyumba dzawo uye zviro zvawo zve kurarama nazvo.

14. Kutenda kakabamba kucatibetsera kudini kuti tiite zvisananguro zvakanaka panocokuita no zviro zvekurarama nazvo?

¹⁴ Kana tikagara no kutenda kuti Djehovha acatsakatisa nyika ino yakashata nokukasika, atizorangariri kuti kugara no mare yakawanda kana zviro i ciro cinokosha maningi. Pa nguwa ye kutambudzika kukuru, mare aizobetseri ciro. Bhaibheri rinoti: “Anhu acapsveta prata yawo mu makwanza” ngokuti acaona kuti “kunyazi prata yawo uye oro yawo azvizokwanisi kuaponesa pa zuwa re shungu dza Djehovha.” (Ezek. 7:19) Pane kukanda ndangariro dzedu pa kuunganidza mare yakawandisisa, tinodikana kuita zvisananguro zvicatibetsera kudzicengeta, kucengeta mhuri yedu uye zvinotitendera kuseenzera Djehovha. Waizonga usiripi ungwaru kuseenzesa mare yakawanda kudarika iya yatinayo kana kupedza nguwa yakawanda tecicengeta zviro zvedu zve kurarama nazvo. Uyewo tinodikana kungwarira kuti tisanyanye kubatisisa zviro zvatinazvo. (Mat. 6:19, 24) Pa nguwa yekuti mugumo uri kukhwedera, isusu ticadikana kusanangura  kuti togonda Djehovha here kana zviro zvedu zve kurarama nazvo.

“IMWIMWI MUNODIKANA KUSHINGIRIRA”

15. Ngei Akristu e Cihebheru aidikana kushingirira?

¹⁵ Akristu e Cihebheru aidikana kushingirira kuti akunde miedzo yo kutenda yaizouya. (Aheb. 10:36) Kunyazi anganani akhona akabatana no kuteererhwa kareko, akawanda akhona akagara Akristu pa nguwa ye runyararo. Hino Pauro wakaaedzurira kuti aidikana kugara akagadzirira kuti akunde kuteererhwa uye agare akatendeka dakara pa kufa hinga zvakaizwa ndi Djesu. (Aheb. 12:4) Nge ndaa ye kuwanda ke Cikristu, Adjudha akawanda aitunhudzira kugara no shungu uye aibambirira kuita zvecisimba, nge ndaa ye Adjudha ainga agara Akristu. Pa makore manganani adarika, anhu akawanda akarhwisa Pauro paainga eciparidzira ku Djerusarema. Adjudha anodarika 40 “akaita mhiko yekuti aizotukwa, kana akarhya kana kumwa asati auraya Pauro.” (Zvii. 22:22; 23:12-14) Kunyazi aizondwa uye kuteererhwa, Akristu aidikana kurumbwa eciungana kuti anamate, aparidzire masoko akanaka uye arumbwe ano kutenda kakabamba.

16. Tsamba ku Ahebheru ingatibetsera kudini kuti tione makomborero e kushingirira kuteererhwa? (Ahebheru 12:7)

¹⁶ Cinyi caizobetsera Akristu e Cihebheru kuti ashingirire kunyazi no kuphikiswa? Pauro waida kuabetsera kuti aone makomborero ekukunda muedzo. Hino iyena wakapanganidza kuti Akristu paanobatana no muedzo we kutenda, Mwari aizokwanisa kuseenzesa izvona kuti aarowedze. (Erengai Ahebheru 12:7.) Rowedzo iyona yaikwanisa kuabetsera kuti asakurire uye atunhudzire mawara e Cikristu anodikanwa. Kudai aikanda ndangariro dzawo pa zviro zvakanaka zve zvitsinzwa, Akristu awona e Cihebheru aizoona kuti zviri nyore kushingirira.—Aheb. 12:11.

17. Pauro waiziyei ngezve kushingirira kuteererhwa?

¹⁷ Muphostori Pauro wakakohomedzesa Akristu e Cihebheru kuti agare akashinga uye  kuti asarembe paanonga ecibatana no kuphikiswa. Kareko, iyena wainga akamboteerera Akristu, hino wainyasa kuziya zvaaibatana nazvo. Uye mumasure me kugara Mukristu, iyena kamare wakabatana no kuteererhwa kakasiyana-siyana. (2 Ako. 11:23-25) Hino, Pauro wainyasa kuzviziya kuti zvinyi zvinodikanwa kuti ashingirire. Iyena wakaedzurira Akristu kuti paaizobatana no zvitsinzwa, awona ainga asikadikani kudzigonda, asi aidikana kugonda Djehovha. Awona aizokwanisa kugara no ushingi kudai umwe na umwe wawo akaedzurira kuti: “Djehovha ndiye mubetseri wangu; Andizothyi.”—Aheb. 13:6.

18. Cinyi cingatibetsera kuti tishingirire kuteererhwa?

¹⁸ Mazuwa ano, hama dzedu dzinganani dzaakutobatana no kuteererhwa. Isusu tingaabetsera nge kuatira munamato uye nguwa dzimweni tingaabetserazve nge kuaitirawo zviro zvimweni. (Aheb. 10:33) Asi Bhaibheri rinonyasa kubhuya pamhene kuti: “Ese aya anoda kurarama upenyu we kudzipira no mwoyo wese kuna Mwari mu rubatano na Kristu Djesu acateererhwawo.” (2 Ti. 3:12) Ndiyo ndaa, tese isusu tinodikana kugara takagadzirira kuitira nguwa dzinoshupha dzaticabatana nadzo. Hino, tinodikana kurumbwa tecigonda Djehovha uye kugara no rugondo rekuti iyena acatibetsera kushingirira mushobo upi hawo we dambudziko. Pa nguwa yakasisira, iyena acazorodza ese aya anomunamata akatendeka.—2 Ate. 1:7, 8.

19. Cinyi catinodikana kuita kuti tidzigadzirire kuitira pa kutambudzika kukuru? (Onaiwo mufanikiso.)

¹⁹ Tsamba ya Pauro ku Ahebheru, zvezvirokwazvo yakabetsera Akristu e muzana re makore e kutanga kuti adzigadzirire pa dambudziko raaizobatana naro. Pauro wakaakohomedzesa kuti anyase kufunda Soko ra Mwari uye kunyasa kurizwisisa. Nge kuita izvona, awona aizokwanisa kuona fundiso dzekunyepa dzaizorembesa kutenda kawo uye odziramba. Iyena wakaakohomedzesa kuti abambise kutenda kawo kuti akwanise kuzwira nhungamiriro dza Djesu uye dze aya aitungamirira mu ungano asikazi kurangarira kakawanda. Uye iyena wakaabetsera kukwanisa kushingirira nge kuona zvitsinzwa zvaaibatana nazvo hinga mukana we kurowedzwa na Baba awo ano rudo. Isusu tinodikanawo kuteerera mazano aya. Kana tikadaro ticakwanisa kurumbwa takatendeka dakara kumugumo.—Aheb. 3:14.