Izvirokwazvo kuti afundi 70 ainga asiripopi Djesu paakaita Kurarira ka Tenzi, asi izvi azvirei kuti awona ainga asiya Djesu kana kuti Djesu ainga asikaatenderizve. Djesu aida basi kugara no aphostori ake pa nguwa iyona.

Kunyazi 12 kutobatanidzawo no 70, ainga ari afundi a Djesu. Pakutanga Djesu akasangura anarume 12 pa afundi aainga anawo uye 12 aya akaadainza kuti aphostori. (Ruka 6:12-16) Paainga ari ku Garireya “iyena akadainza afundi ake 12” uye “Akaatuma kuti aparidze ngezve Umambo wa Mwari no kuporesa.” (Ruka 9:1-6) No kuhamba ke nguwa, paainga aa ku Djudhiya, Djesu “akasanangura afundi amweni 70 uye akaatuma mberi kake ari airi-airi.” (Ruka 9:51; 10:1) Zvecireya kuti Djesu ainga ano ateeri akasiyana-siyana ku mbuto dzaiparidzirhwa masoko ake.

Adjudha ainga agara afundi a Djesu, aidikana kupemberera Paskwa ye gore uye pamweni aiita izvona pamwepo no mhuri dzawo. (Eki. 12:6-11, 17-20) Nguwa doko asati afa, Djesu no aphostori ake akaenda ku Djerusarema. Asi Djesu aazi kudainza afundi ake ese e ku Djudhiya, e ku Garireya uye e ku Pereya kuti aite Paskwa yakakura. Zviri pamhene kuti Djesu aida basi kugara no aphostori ake paciitiko ici. Iyena akabvunza aphostori ake 12 kuti: “Ndaida maningi kurhya na imwimwi Paskwa ii ndisati ndatambudzika.”—Ruka 22:15.

Djesu ainga ano zvikonzero zvakanaka kuti aite kudaro. Pasikadariki nguwa yakareba, iyena waizofa hinga “Bira ra Mwari rinobvisa zvitema zve nyika.” (Juau 1:29) Djesu aizofa ku Djerusarema ku mbuto yekuti ke nguwa yakareba kainga kecipirhwa Mwari zvibairo. Paskwa yaiedzurira Aisraeri zvainga zvakaizwa na Djehovha kuti aasudzunure ku Edjipitu. Asi cibairo ca Djesu cainga cakakura maningi ngokuti caisudzunura anhu ese pa citema uye rufu. (1 Ako. 5:7, 8) Rufu ra Djesu rakatendera aphostori 12 kuti agare fundasau ye ungano ye Cikristu. (Aef. 2:20-22) Zvinopfadza kuti Djerusarema re kudenga rino “mapuwe 12 e fundasau” makatarhwa “mazina 12 e aphostori 12 e Bira.” (Zvak. 21:10-14) Izvi zvinopangidza kuti aphostori akatendeka aizogara no basa rinokosha maningi pakudzadzika ke cinangwa ca Mwari. Ndiyo ndaa, zvino musoro kuti Djesu aida maningi kugara nawo pa Paskwa ye kupedzesera uye pa Cirangaridzo cakazoteera caakaita—Kurarira ka Tenzi.

Afundi a Djesu 70 uye no afundi ake amweni ainga asiripi pamwepo naye pa kurarira ke kupedzesera. Kunyazi zvakadaro, afundi ese ainga akatendeka aidikana kukhorovhera kukosha ke Kurarira ka Tenzi. Afundi ese ekuti no kuhamba ke nguwa akazogara Akristu akadzodzwa aidikanawo kupinda mucitenderano ce Umambo cakabhuiwa na Djesu ku aphostori pa usiku uwona wekupedzesera.—Ruka 22:29, 30.