Mu fundo iyona takafunda kuti pano nyaya inokosha inobata-bata anhu ese uye ngirozi: kuceneswa ke zina ra Mwari. Nyaya yakaringana no ucangamire kana kuti mushobo wekutonga ka Djehovha kana wakanaka, iciro cakaringana nokuceneswa ke zina ra Djehovha. Ngo mushobo umwewo, nyaya yekuperera ke anhu kuna Djehovha yakaringanawo nokuceneswa ke zina rake.

Ngei zvino taakunyanya kukoshesa nyaya yakakura yakaringana no zina ra Djehovha uye kuceneswa karo? Ngatione zvikonzero zvitatu.

Cekutanga, Sathani wakashora zina ra Djehovha kana kuti kurisvipisa, mu munda we Edheni. Mubvunzo wakaita Sathani kuna Adhamu na Evha wakaita kuti awona arangarire kuti Djehovha aana rupo uye kuti aipasa zvimutemo zvinoshupha. Sathani wakabhuya zviro zvainga zvakasiyana no zvakabhuiwa na Djehovha. Zvaiita hinga kuti iyena waidaidza Djehovha hinga munyepi. Iyena wakasvipisa zina ra Djehovha. Iyena wakagara “Dhiyabhurosi,” zvinoda kureya “mucengedzi.” (Juau 8:44) Ngokuti Evha wakatenda manyepo a Sathani, iyena aazi kupurutana Mwari uye opandukira ucangamire wake. (Gen. 3:1-6) Dakara zvino, Sathani uciri kurumbwa ecireketa manyepo ngezve zina ra Djehovha. Zviri pamhene kuti aya ese anotenda manyepo a Sathani aapurutani Djehovha. Hino ku anhu a Mwari, manyepo ngezve zina cena ra Djehovha cishaishi cikuru. Uku ndiko kutanga ke matambudziko nokushuphika katiri kuona mu nyika mazuwa ano.

Cecipiri, kuti zvinakire zvisikwa zvake, Djehovha akashinga kudziirira zina rake uye kuricenesa. Izvi zviro zvinokosha maningi kuna Djehovha. Ndiyo ndaa iyena anoti: “Zvezvirokwazvo inini ndicacenesa zina rangu guru.” (Ezek. 36:23) Uye Djesu akapangidza pamhene cikonzero cinokosha ce munamato ku aseenzi ese akagondeka a Djehovha paakabhuya kuti: “Zina renyu ngariceneswe.” (Mat. 6:9) Bhaibheri rinobhuya kakawanda kese kukosha ke kukudza zina ra Mwari. Onai miezaniso inoteera: “Ipai Djehovha kukudzwa kunosisira zina rake.” (1 Mak. 16:29; Pis. 96:8) “Embai ngoma mecikudza zina rake.” (Pis. 66:2) “Ndicakudza zina renyu nokusikaperi.” (Pis. 86:12) Nguwa imweni yekuti Djehovha pacake akareketa ari kudenga yainga iri mhinduro kuno zvakarekethwa na Djesu mu tempro ku Djerusarema. Iyena akati: “Baba, kudzai zina renyu.” Pedzepo Djehovha akadaira kuti: “Ndakarikudza uye ndicarikudzazve.”—Juau 12:28. a

Cecitatu, cinangwa ca Djehovha nguwa dzese cicaenderana no zina rake. Onai zvinoteera: Cinyi cicaitika mumasure me muedzo wekupedzesera uye mumasure Mekutonga ka Kristu ke Makore Ciuru? Kodi ngirozi no anhu acarumbwa akaparadzana ngezve nyaya yekuceneswa nge zina ra Djehovha here? Kuti tidaire mibvunzo  ii, ngatiedzurire zviro zviiri zvinobatanidzwa pakuperera ke anhu uye ucangamire we zviro zvese. Mumasure me makore ciuru, anhu anonga ecidikanazve kupangidza kuperera kawo here? Haiwa. Awona anonga aedzwa, acagara anhu akakwana uye acatambira upenyu usikaperi. Kana nguwa ii ikaguma, ucangamire icarumbwa iri nyaya yekureketedzana kana kuparadzana here? Haiwa. Ese ari kudenga no pa nyika acabatana ecigutsikana ngekuti mushobo wekutonga ka Djehovha wakanaka uye ngewe unatsi. Kodi zina ra Djehovha ricarumbwa recikosha ku anhu ake here?

Mumasure me makore ciuru, ese acaziya cokwadi ngezva Djehovha uye zina rake ricaceneswa. Asi zina ra Djehovha ricarumbwa riri ciro cinokosha ku aseenzi ake kudenga no pa nyika. Ngei? Ngekuti ese acaona kuti Djehovha acarumbwa eciita zviro zvinoshamisa. Cimborangarirai zvinoteera: Mumasure mekuti Djesu nokudzidodosa ahwirinza kutonga kake kuna Djehovha, Mwari acagara “zviro zvese ku anhu ese.” (1 Ako. 15:28) Mumasure mazvo, anhu acakwanisa kukhorovhera “rusununguko rikuru re ana a Mwari.” (Aro. 8:21) Uye pakupedzesera Djehovha acadzadzisa cinangwa cake cekubatanidza zvisikwa zvake zvakangwara zvekudenga uye pa nyika hinga mhuri yakakura uye yakabatana.—Aef. 1:10.

Mumasure mekuti zviro zvese izvi zvaitika, mhuri ya Djehovha yekudenga no pa nyika icazwa kudini? Ese acazwa cido cakakura cekuda kurumbwa ecikudza Djehovha. Mutari we pisarema Dhavhidhi wakafemerhwa kutara kuti: “Djehovha Mwari ngaakudzwe . . . Zina rake guru ngarikudzwe nokusikaperi.” (Pis. 72:18, 19) Nokusikaperi, ticarumbwa tino zvikonzero zvipsva uye zvinoshamisa zvekurumbwa tecikudza Djehovha.

Zviri pamhene kuti zina ra Djehovha rinopangidza zvaari. Patinorangarira zina rake, tinobva tarangaridza rudo rake. (1 Juau 4:8) Isusu ticagara teciedzurira kuti Djehovha akatisika nge rudo, akatipasa cibairo nge rudo uye kuti anotonga nge mushobo we unatsi uye we rudo. Uye ticarumbwa teciona rudo rina Djehovha ku zvisikwa zvake. Nokusikaperi, ticarumbwa tino zvikonzero zvakakura zvekurumbwa tecikhwedera dhuze na Djehovha uye tecikudza zina rake guru.—Pis. 73:28.