1. Maererano na Ahebheru 12:1, cinyi catinodikana kuita kuti tigume katiri kuenda pakugogoma katiri kuita kuti tiwine upenyu?

 BHAIBHERI rinoezanisa upenyu we Akristu no kugogoma. Agogomi anogogoma dakara ku mugumo acatambira upenyu usikaperi. (2 Ti. 4:7, 8) Ndiyo ndaa, tinodikana kuita zvatinokwanisa kuti tirumbwe tecigogoma, maka-maka mazuwa ano ngekuti taapadhuze kuti tigume katiri kuenda. Muphostori Pauro wakakwanisa kugogoma dakara awina upenyu uye iyena wakatibvunza zvingatibetsera kuti tizvikwanisewo. Pauro wakatibvunza kuti “tibvise zvese zvinorema uye . . . togogoma nokushingirira pamakwikwi akakandhwa pa mberi pedu.”—Erengai Ahebheru 12:1.

2. Zvinoreyei “kusiya mutoro wese”?

² Muphostori Pauro paakabhuya kuti tinodikana “kusiya mitoro yese,” iyena waida kureya kuti Mukristu aadikani kuthwara kunyazi mushobo umwe we mutoro here? Haiwa. Kusiya izvona, iyena wakabhuya kuti tinodikana kusiya mushobo wese we mutoro usikadikanwi. Mushobo uwona we mutoro ungakwanisa kuita kuti tiwore mwoyo uye toremba. Ndiyo ndaa kana tecida kurumbwa tecishingirira, tinodikana kuona kuti atiripi kuthwara mitoro iyona here uye toithura nokukasika. Asi kuno mishobo imweni ye mutoro yatinodikana kuthwara. Uye tinodikana kuithwara ngekuti tikatama kudaro, zvaizoita hinga tiri kutosiya kugogoma. (2 Ti. 2:5) Asi mitoro iyona ngaipi?

3. (a) Maererano na Agaratiya 6:5, zvinyi zvatinodikana kuthwara? (b) Ticaonei mu fundo ino, uye ngei?

³ Erengai Agaratiya 6:5. Pauro wakabhuya ngezve ciro catinodikana  kuthwara. Iyena wakati “umwe na umwe acathwara mutoro wake.” Pauro wainga ecida kubhuya ngezve mabasa atakapaswa na Djehovha anoetserhwa kuti tese isusu tiite. Mu fundo ino ticaona kuti zvinyi zvinobatanidzwa pakuthwara “mutoro” wedu kamare uye kuti tingazviita kudini. Uye ticaonawo mitoro minganani isikabetserei yekuti pamweni tirikuithwara tisikazvizii uye kuti tingaisiya kudini. Kuthwara mitoro yedu kamare uye kusiya isikakoshi zvicatibetsera kuti tirumbwe tecigogoma dakara taguma pakuwina upenyu.

4. Ngei kudzadzisa mhiko yatakaita patakadzipira kuna Djehovha iciro cisikashuphi? (Onaiwo foto.)

⁴ Kudzipira kedu kuna Djehovha. Patakadzipira kuna Djehovha, isusu takapikira kuti taizomunamata uye taizoita kuda kake nokusikaperi uye tinodikana kudzadzisa cipikirhwa icona. Kuita zvese zvatakapikira kuna Djehovha ubaba wakakura asi azviremi. Uye Djehovha akatisika kuti tiite kuda kake. (Zvak. 4:11) Iyena akatisika no cido cekumuziya, kumunamata uye akatisika no mufanikiso wake. Ndiyo ndaa tinokwanisa kukhwedera dhuze na  Djehovha uye zvinotipfadza patinoita kuda kake. (Pis. 40:8) Kusiya izvona, kana tikaita kuda ka Mwari uye tozwira Mwana wake, isusu “ticazorodzwa.”—Mat. 11:28-30.

5. Cinyi cingamubetserai kuti mudzadzise mhiko yenyu yekudzipira? (1 Juau 5:3)

⁵ Mungathwara kudini mutoro uu? Zviro zviiri zvingabetsera. Cekutanga, rumbwai mecibambisa rudo renyu kuna Djehovha. Imwimwi mungaita izvona ngekunyasa kurangarira zviro zvese zvakanaka zvaakamuitirai uye makomborero ese aacamupasai. Kana rudo renyu kuna Mwari rikarumbwa recikura, zvicaita nyore kuti imwimwi mumuzwire. (Erengai 1 Juau 5:3.) Cecipiri, teedzerai Djesu. Iyena wakakwanisa kuita kuda ka Djehovha ngekuti ainamata kaari ecikumbira rubetso uye akakanda ndangariro dzake pa mubairo wake. (Aheb. 5:7; 12:2) Kuita hingana Djesu, namatai kuna Djehovha mecikumbira simba uye kandai ndangariro dzenyu pa kariro ye upenyu usikaperi. Pamucatunhudzira rudo renyu kuna Djehovha uye moteedzera Djesu, imwimwi mucakwanisa kudzadzisa mhiko yenyu yekudzipira kuna Djehovha.

6. Ngei tinodikana kuita zviya zvatinoetserhwa kuti tiite mu mhuri? (Onaiwo foto.)

⁶ Zvatinodikana kuita mu mhuri. Pakugogoma kedu kuti tiwine upenyu, tinodikana kuda Djehovha na Djesu kudarika madire atinoita anyaukama edu. (Mat. 10:37) Asi izvi azvirei kuti tinodikana kusiya zvatinodikana kuitira anyaukama edu. Kusiya izvona, kana tecida kupfadza Djehovha na Djesu tinodikana kuita zviya zvatinoetserhwa kuti tiite mu mhuri. (1 Ti. 5:4, 8) Kana tikaita izvona ticapfara maningi. Djehovha anozviziya kuti mhuri dzicakwanisa kupfara kana mwamuna no mukadzi akabatana no rudo uye no rureremedzo, kana abereki akada nokupangira ana awo uye kana ana akazwira abereki awo.—Aef. 5:33; 6:1, 4.

7. Imwimwi mungaita kudini zviya zvamunoetserhwa kuti muite mu mhuri?

⁷ Mungathwara kudini mutoro uu? Azvinei kuti imwimwi muri mwamuna, mukadzi kana mwana, cinonyanya kukosha ikuseenzesa mazano e ungwaru ari mu Bhaibheri. Musaite zviya basi zvamunoona kuti zvakanaka kana kuti zviri kuizwa kamunogara. Uyewo musaedze kuita zvese zvinobhuiwa no anhu akafunda kuti munodikana kuzviita. (Zvie. 24:3, 4) Nyasai kuseenzesa mabhuku edu anotsamira mu Bhaibheri. Awona anounzisa mazano akawanda akagondeka ekuti mungaseenzesa kudini zvokwadi zvisikacinji zve Bhaibheri. Ngo muezaniso, mundandanda we fundo ino musoro unoti: “Mazano Ekubatsira Mhuri” uno masoko anocokuita no zvinetso zvinosongana no anhu akawakana, abereki uye madjaha mazuwa ano. b Garai makashinga kuseenzesa zvinobhuiwa no Bhaibheri kunyazi amweni e mu mhuri menyu asikadi kuzviita. Ngo mushobo uwona, mhuri yenyu icabetsereka uye imwimwi mucatambira makomborero a Djehovha.—1 Ped. 3:1, 2.

8. Zvisananguro zvedu zvingatibata-bata kudini?

⁸ Kutendera mugumisiro we zvisananguro zvedu. Djehovha akatipasa rusudzunuko rekuita zviro. Iyena anoda kuti isusu tiite zvisananguro zvakanaka uye topfara nge ndaa yazvo. Asi kana tikaita zvisananguro zvakashata, Djehovha aazotidziiriri pamugumisiro yakhona. (Aga. 6:7, 8) Ndiyo ndaa tinodikana kutendera migumisiro inouya nge zvisananguro zvakashata zvatinoita zve masoko asikazi kurangarirhwa kana kuti kuita zviro nokukasika.  Maererano no zvatinonga taita, tingakwanisa kusara no hana inorema. Asi kuziya kuti tinodikana kutendera mugumisiro ye zvishai zvedu zvingaita kuti isusu tipupure zvishaishi zvedu, togadzirisa zvatinonga taita uye topeta masimba kuti tisaite zvishaishi zvimwezvo. Kuita zviro izvi kungatibetsera kuti tirumbwe tecigogoma kuti tiwine upenyu.

9. Cinyi cingamubetserai kurhwisana no cisananguro cakashata? (Onaiwo foto.)

⁹ Mungathwara kudini mutoro uu? Kana imwimwi maita cisananguro cakashata uye macinyuka, cinyi camunodikana kuita. Tenderai kuti imwimwi amungacinji zvakaitika. Musapedze nguwa no simba meciedza kupanganidza ngezve cisananguro camakaita uye kupasa amweni ndaa ngezve cishaishi cenyu. Pane kudaro, tenderai kuti mashaisha uye petai masimba maererano no mugariro we zviro wamuri zvino. Kana imwimwi mecidzipasa ndaa nge zviro zvamakaita, dzidodosei uye namatai kuna Djehovha mecitendera cishaishi cenyu, uye mokumbira kuti iyena amurekererei. (Pis. 25:11; 51:3, 4) Kumbirai rurekerero kune aya amakashaishira, uye kana zvecidikanwa, psvakai rubetso re akuru. (Tig. 5:14, 15) Fundirai no zvishashi zvenyu uye petai masimba kuti musazviphindezve. Kana mukaita izvona, mungagara no rugondo rekuti Djehovha acamupangidzirai nyasha uye acamupasai rubetso ramunoda.—Pis. 103:8-13.

10. Ngei kurangarira kuti zvatiri kuita azvikwani kungagara mutoro unoshupha kuthwara? (Agaratiya 6:4)

¹⁰ Kurangarira kuti zvatinoita azvikwani. Paya patinodziezanisa no amweni tingakwanisa kuora mwoyo. (Erengai Agaratiya 6:4.) Kana tikagara tecidziezanisa no amweni tingapedzesera tagara no bibvu uye no mwiya we makwikwi. (Aga. 5:26) Kana tikagara teciedza kuita zvinoizwa no amweni asi tisikakwanisi kuzviita, tingadzikuwadza. Uye kana ‘kuetsera ciro cozotama kuitika kunoodza mwoyo,’ cimborangarirai mushobo wazvinoodza mwoyo kuetsera ciro catinoziya kuti atikwanisi kuciita! (Zvie. 13:12) Kana tikaita izvona tingakwanisa kuora mwoyo uye toguma pakutosiya kugogoma kuti tiwine upenyu.—Zvie. 24:10.

11. Cinyi camungaita kuti musaetsere zviro zvisikazoitiki?

¹¹ Mungasiya kudini mutoro uu? Musaetsere kuita zviro zvakawanda kudarika zviya zvamunokumbirhwa na Djehovha. Iyena aazoetseri kuti imwimwi mupase zviya zvamusina. (2 Ako. 8:12) Uye garai no rugondo rekuti Djehovha aaezanisi zvamunoita no zvinoizwa no amweni. (Mat. 25:20-23) Djehovha anokoshesa maningi basa ramunomuitira no mwiya wese, kutenda kamunako uye kushingirira kamuri kupangidza. Garai no maonero ari pakati no pakati uye tenderai kuti pamweni imwimwi amungakwanisi kuita zvese zvamaizoda kuita nge ndaa ye thunga, uthongo uye mugariro wenyu. Kuitawo hingana Bhazirai, pamweni paya, rambai mabasa amunoona kuti amungakwanisi kuwaita, pamweni nge ndaa ye uthogo kana thunga. (2 Sam. 19:35, 36) Uye kuitawo hingana Mozesi, kumbirai rubetso uye pasaiwo amweni mabasa kana zveciita. (Eki. 18:21, 22) Maonero ari pakati no pakati acamubetserai kuti imwimwi musagare no zvinangwa zvamusikazokwanisi kudzadzisa zvaizoita kuti imwimwi mugare makaremba pakugogoma kenyu kuti muwine upenyu.

12. Tingadzipasa ndaa nge zvishaishi zvakaizwa no amweni here? Panganidzai.

¹² Kudzipasa ndaa nge zvisananguro zvakashata zvaizwa no amweni. Isusu atingaitiri amweni zvisananguro uye atikwanisi kuadziirira pamugumisiro we zvisananguro zvakashata zvaanonga aita. Ngo muezaniso, pamweni mwana we mwanakadzi kana kuti we  mwanarume angapedzesera asanangura kuima kuseenzera Djehovha. Icona cisananguro cingarhwadzisa maningi abereki. Asi abereki akadzipasa ndaa nge cisananguro ce mwana wawo, zvicaita kuti awona apedzesere aakuremerhwa maningi uye uu ndi mutoro wekuti Djehovha aadi kuti awona authware.—Aro. 14:12.

13. Abereki angarhwisana kudini no zvisananguro zvakashata zve ana awo?

¹³ Mungasiya kudini mutoro uu? Edzurirai kuti Djehovha akapasa tese isusu rusununguko rekusanangura. Iyena anosiya kuti munhu umwe na umwe aite zvisananguro zvake. Uye izvona zvinobatanidzawo kusanangura kumuseenzera kana kuti haiwa. Djehovha anozviziya kuti imwimwi hingana baba kana mai amuripi munhu wakakwana, iyena anoda basi kuti imwimwi munyase kuita dii renyu. Cisananguro cinoizwa no mwana wenyu imutoro wake haiwa wenyu. (Zvie. 20:11) Kunyazi zvakadaro, pamweni mungagara mecirangarira ngezve zvishaishi zvenyu hingana baba kana mai. Hino, namatai kuna Djehovha mecimubvunza mazwiro enyu uye mukumbirei rurekerero. Djehovha anozviziya kuti imwimwi amungakwanisi kuhwirira sure uye moita zvakasiyana. Asi nge dii rimweni Djehovha aaetseri kuti imwimwi mudziirire mwana wenyu pa mugumisiro ye zvishaishi zvake. Kana mwana wenyu akapeta masimba ohwirira kuna Djehovha, edzurirai kuti Iyena anonga ecietsera kumutambira.—Ruka 15:18-20.

14. Ngei kudzipasa ndaa nguwa dzese mutoro watinodikana kusiya sure?

¹⁴ Kugara mecidzipasa ndaa nguwa dzese. Kana tikaita citema zvakadjairika kudzipasa ndaa. Asi Djehovha aadi kuti isusu tirumbwe tecidzipasa ndaa. Uu ndi mutoro watinodikana kusiya sure. Asi tingazviziya kudini kuti mazwiro edu ekudzipasa ndaa arikunyanyisa? Kana isusu tapupura zvitema zvedu, tacinyuka uye taita zvese zvatinokwanisa kuti tisaphindezve kuita cishaishi cimweco, tingagara no rugondo rekuti Djehovha atirekerera. (Zvii. 3:19) Mumasure mekuita zvese izvi, Djehovha aadi kuti  tirumbwe tecindodzipasa ndaa. Iyena anozviziya kuti mazwiro aya angatikuwadza. (Pis. 31:10) Kana tikagara teciremerhwa nokutsukwara kakaura, tingapedzesera tasiya kugogoma kuti tiwine upenyu.—2 Ako. 2:7.

15. Cinyi cicamubetserai kuti murhwisane nokudzipasa ndaa kakanyanyisa? (1 Juau 3:19, 20) (Onaiwo foto.)

¹⁵ Mungasiya kudini mutoro uu? Kana imwimwi muri kurumbwa mecidzipasa ndaa, kandai ndangariro dzenyu pa “rurekerero re zvirokwazvo” ra Djehovha. (Pis. 130:4) Djehovha anoti ku aya anocinyuka zvezvirokwazvo: “Andizoedzuririzve zvishaishi zvako.” (Djer. 31:34) Izvi zvinoreya kuti Djehovha aazoseenzesi zvishaishi zvenyu zvekare kuti amuitirei zviro zvakashata. Hino kana mecisongana no migumisiro ye zvishaishi zvenyu, musarangarire kuti izvona zviri kuitika ngekuti Djehovha aazi kumurekererai. Musagare mecidzipasa ndaa kana zvishaishi zvenyu zve kare zvakaita kuti muruze ubaba wamainga munawo mu ungano. Djehovha aagari ecindorangarira zvishaishi zvenyu uye imwimwi amudikani kuzviitawo.—Erengai 1 Juau 3:19, 20.

16. Hingana agogomi tinodikana kugara teciziyei?

¹⁶ Ngekuti tiri kugogoma kuti tiwine upenyu, tinodikana ‘kugogoma nge mushobo unoita kuti tikwanise kuwina.’ (1 Ako. 9:24) Isusu ticakwanisa kuzviita kana tikazwisisa musiyano pakati pe mutoro dzatinodikana kuthwara no mutoro dzatinodikana kusiya sure. Mu fundo ino, taona zviro zvinganani basi zvatinodikana kuthwara uye zvatinodikana kusiya sure. Asi kuno zviro zvimweni. Djesu akabhuya kuti taizokwanisa ‘kuremerhwa nge ndaa ye kurhyisa, kumwisa no kudzirhya mwoyo nge ndaa yo zvinetso zve upenyu.’ (Ruka 21:34) Tsamba ii no dzimweni dze mu Bhaibheri dzingamubetserai kuona pamunodikana kugadzirisa kuitira kuti murumbwe mecigogoma kuti muwine upenyu.

17. Ngei tingagara no rugondo rekuti ticawina upenyu pa kugogoma uku?

¹⁷ Isusu tingagara no rugondo rekuti ticawina upenyu pakugogoma uku ngekuti Djehovha acatipasa simba ratinoda. (Isa. 40:29-31) Asi atidikani kuremba! Itai hingana muphostori Pauro, wakapeta masimba ari ese kuti akwanise kutambira mubairo. (Afi. 3:13, 14) Pakugogoma uku apana munhu ungaita dii renyu, asi no rubetso ra Djehovha imwimwi munozvikwanisa. Djehovha angamubetserai pakuthwara mutoro inodikanwa uye pakusiya iya isikadikani, kana kuti ingamukuwadzai. (Pis. 68:19) Na Djehovha kudii renyu, imwimwi mucakwanisa kupedza uye kuwina upenyu pakugogoma uku!