• “Inini ndaizwa hingana mwamuna wangu urikunditrairi kakawanda.”

• “Inini ndakazwa kupsveruka, kushata uye ndisikakoshi.”

• “Inini ndainga ndisikadi kureketa izvona no amweni. Asi ndairumbwa ndakanyarara.”

• “Inini ndakazwa hinga kuti Djehovha ainga asikandikoshesi.”

Panganidzo idzi dzinopangidza mushobo unozwa mukadzi mwamuna wake paanoona pornografiya. Kana iyena ecizviita mucifise-fise, pamwedzi kana kuti gore, pamweni iyena ungaona kuti azvicaiti kumugonda. Ndizvona zvakabhuiwawo no mwanakadzi umweni paakati: “Inini ndaidzibvunzisa kuti, ‘Mwanarume uu wandakawakana naye ndiani? Kodi iyena urikundifisira zviro zvimweni?’”

Fundo ino yakaizwa pecirangarirhwa ngezve akadzi ano amuna anoona pornografiya. a Ticaona mazano manganani e Bhaibheri angakwanisa kunyaradza akadzi. Mazano aya anopangidzawo kuti Djehovha anokoshesa akadzi zvakadini, uye acabetserawo akadzi kuti agare no runyararo uye kuti agare dhuze na Djehovha. b

Izvirokwazvo kuti imwimwi amungaonereri zvese zvinoizwa ngo mwamuna wenyu, asi zviripo zviro zvimweni zvamungaita kuti muone runyararo rakawanda. Onai miezaniso minganani.

Musadzipase ndaa. Pamweni mukadzi ungarangarira kuti kana mwamuna eciita izvona i ndaa ye mukadziwo. Alice c wairangarira kuti wainga asikazi kurungama ku mwamuna wake. Iyena wakadzibvunzisa kuti: ‘Ngei mwamuna wangu unoda maningi kuringira akadzi amweni pane kuringira inini?’ Anakadzi amweni anorangarira kuti zviro zvese zvirikuitika mumucato wawo, awona ndiwo ano ndaa. Danielle unobhuya kuti: “Inini ndakagara no shungu uye bundu rakakura maningi, ndakazwawo hinga kuti inini ndini ndaiita kuti zviro zvibambirire.”

Kana imwimwi mecizwa kudaro, ziyai kuti Djehovha aarangariri kuti ndimwi muno ndaa nge zviito zvo mwamuna wenyu. Tiyago 1:14 inoti: “Umwe na umwe anoedzwa paanotorhwa mwoyo uye opauswa ngo cido cake.” (Aro. 14:12; Afi. 2:12) Pane kumupasai ndaa Djehovha anokoshesa maningi kugondeka kamunoita kaari.—2 Mak. 16:9.

 Zvinobetserawo kuziya kuti kana mwamuna eciona pornografiya, izvona azvireyi kuti mukadzi wenyu aazi kurungama. Apsvakisisi e nyaya ii anoti kuona pornografiya kunomutsa cido ce pamaponde cekuti apana mwanakadzi ungakwanisa kucigutsa.

Edzai kusama kuzvirangarira maningi. Catherine unoti iyena waikwanisa kuona mwamuna wake eciona pornografiya. Frances unoti: “Inini ndinonetseka maningi kana ndisikazii kuno mwamuna wangu. Inini ndinonetseka maningi zuwa rese.” Akadzi amweni akabhuya kuti anozwa kupsveruka maningi kana pano hama no hanzvadzi dzimweni dzekuti pamweni dzinoziya ngezve cinetso ce mwamuna wawo. Uye amweni akabhuyawo kuti anozwa maningi ari ega ngekuti anorangarira kuti apana munhu unozwisisa migariro yawo.

Zvakadjairika kuzwa kudaro. Asi kupedza nguwa yakawanda mecirangarira ngezve cinetso icona zvingaita kuti mubambirire kunetseka. Pane kudaro, edzai kukanda ndangariro dzenyu pa ushamwari wenyu na Djehovha. Kuita kudaro, kucamubetsera kuti mushingirire.—Pis. 62:2; Aef. 6:10.

Ciro cingamubetserai i kuerenga uye kunyasa kurangarira ngezve miezaniso dziri mu Bhaibheri dze anakadzi amweni akazwawo kunetseka maningi, asi nge kuita munamato kuna Djehovha akanyaradzwa. Ainguwapi dzese dzekuti Djehovha aigadzirisa zvinetso zvawo, asi akaapasa runyararo raaida. Ngo muezaniso, Ana “wainetseka maningi” ngo cinetso cake. Asi mumasure “mekuita munamato wakareba kuna Djehovha,” wakazwa runyararo, asikatozii kuti cinetso cake caizogadziriswa kudini.—1 Sam. 1:10, 12, 18; 2 Ako. 1:3, 4.

Hino kumbirai rubetso ku akuru e ungano. Awona angakwanisa kugara hinga “mbuto yekufindarira mhepo uye mbuto yekufindarira dutu.” (Isa. 32:2, masoko e pasi) Pamweni akuru angamupangidzai hanzvadzi yekuti imwimwi mungazwa makasudzunuka kubhuya mazwiro enyu uye kuzwa runyararo rakawanda.—Zvie. 17:17.

Kodi pano ciro camungaita kuti mubetsere mwamuna wenyu kuti akurire musambo we kuona pornografiya here? Pamweni. Bhaibheri rinoti: Kuti pagadziriswe dambudziko rinoshupha kana kukurira muzondi ano simba, “zvirinani airi pane umwe.” (Mup. 4:9-12) Kwarakwatiso dzinopangidza kuti kakawanda kakhona mwamuna no mukadzi paanopeta masimba ari pamwepo, zvinobvira kukurira musambo we kuona pornografiya uye kuhwirira kugondanazve mu mucato.

 Zviri pamhene kuti zvinonga zviri ku mwamuna wenyu kuti wakagadzirira kusiya kuona pornografiya here. Kodi iyena wakanamata kuna Djehovha no mwoyo wese ecikumbira simba uye wakapsvaka rubetso re akuru here? (2 Ako. 4:7; Tig. 5:14, 15) Mwamuna wenyu pano zvaari kuita kuti agare kure no muedzo we kuona pornografiya here? Ngo muezaniso, iyena unothurudza nguwa yaanopedza no zvigadzirhwa zve magetsi kana no zviro zvingamuedza here? (Zvie. 27:12) Iyena wakagadzirira kutendera rubetso renyu uye kugondeka kamuri here? Kana mwamuna wenyu akatenda izvona, imwimwi mungakwanisa kumubetsera.

Mungazviita kudini? Onai muezaniso unoteera. Felicia wakawakana na Ethan wainga aano musambo wekuona pornografiya kubvira aciri mudoko. Felicia unosiya Ethan akasudzunuka kuti acedze naye pese paanogara no cido cokuona pornografiya. Ethan unoti: “Mukadzi wangu ndinomubvunza zvese. No rudo iyena unondibetsera kuti ndidzidziirire pamiedzo uye nguwa dzese iyena unondibvunzisa kuti ndiri kubudirira zvakadini. Iyena unondibetsera kuthurudza museenzesere wandinoita Internet.” Izvirokwazvo kuti azviripi nyore kuna Felicia kuona mwamuna wake Ethan ecirhwisa musambo we kuona pornografiya. Iyena unoti: “Kugara no shungu uye kunyangadzwa azvibetseri mwamuna wangu kusiya musambo iwona. Pese patinocedza ngezve kurhwisa kake iyena unogara akashinga kundibetsera pakukurira marhwadzo angu.”

Kucedza kakadai kungakwanisa kubetsera mwamuna kudzidziirira kuti asaone pornografiya uye mukadzi kuhwirirazve kumugonda. Kana mwamuna wakagadzirira kucedza akagondeka ngezve zvaari kusongana nazvo, ecibhuya ngezve kuti uri kuendepi uye kooitei, zvicagara nyore kumugonda ngokuti mukadzi ucaziya kuti mwamuna wake aaripi kumufisira ciro.

Imwimwi munorangarira kuti mucabetsera mwamuna wenyu pamugariro wakadai here? Hino, mungaerenga mwese fundo ino uye mocedza ngezvayo. Cinangwa cake ngece kusiya kuona pornografiya uye kubudirira pakumugonda. Pane kunyangadzwa ngezve kuti imwimwi murikuda kucedza naye ngezve cinetso icona, iyena unodikana kupsvaka kuzwisisa kuti cinetso icona ciri kumubata-batawo kudini. Imwimwi dii renyu ngere kubetsera kupeta masimba ke mwamuna wenyu pakukurira muitiro wakashata uye kumupasa mukana wekuhwirirazve kumugonda. Zvinokosha kuti imwimwi muri airi muziye kuti cinyi cinoita kuti munhu ade kuona pornografiya uye kuti ciro icona cingakundhwa kudini. d

Kana imwimwi mecirangarira kuti kucedza kamungaita no mwamuna wenyu mungapedzesera  maakureketedzana, pamweni mungadainzawo mukuru wamunogonda kuti azwewo masoko amucacedza. Uye edzurirai kuti kunyazi mumasure mekuti mwamuna wenyu wakunda muitiro wakashata we kuona pornografiya, pamweni zvingatora nguwa kuti imwimwi muhwirirezve kumugonda. Asi musarembe. Ngekuti mucato wenyu urikubudirira padoko no padoko, musaruze kariro kuti nokuhamba ke nguwa uye no kunonoka kutsamwa, mucato wenyu ungakwanisa kuhwirirazve pakubamba.—Mup. 7:8; 1 Ako. 13:4.

Hino kana mwamuna wenyu akaphindazve kuzviita, izvona zvinoda kureya kuti iyena aazi kucinyuka kana kuti aabetseri here? Haiwa. Kana mwamuna wenyu ano musambo we kuona pornografiya, zvingaita kuti iyena ungagara ecirhwisana no muitiro uu ke upenyu wake wese. Kunyazi aano makore akawanda asikaoni pornografiya, iyena ungakwanisazve kuhwirira pakuonazve. Kuti izvona zvisaitike kaari iyena unodikana kurumbwa ecidzidziirira, kunyazi pa nguwa ingaita hingana kuti cinetso icona capera. (Zvie. 28:14; Mat. 5:29; 1 Ako. 10:12) Iyena ucadikana “kucinja mushobo wake we kurangarira” uye kufundira “kuzonda zvakashata”—zvinobatanidza pornografiya uye no zviro zvimweni zvakashata zvakaita hingana bonyora. (Aef. 4:23; Pis. 97:10; Aro. 12:9) Kodi iyena wakagadzirira here kusiya miitiro ii? Kana iyena akaita izvona zvingaita kuti no kuhamba ke nguwa pamweni ungasiya miitiro ii. e

Asi zvakadini kana mwamuna wenyu asikadi kusiya kuona pornografiya? Pamweni imwimwi mucazwa kugumbuka, kuora mwoyo uye kutrairhwi. Pakadaro, siyai nyayeyo munyara dza Djehovha uye imwimwi mucazwa runyararo. (1 Ped. 5:7) Rumbwai mecikhwedera kuna Djehovha nge kufunda, kuita munamato uye kunyasa kurangarira. Uye garai no rugondo rekuti, kana imwimwi mukaita izvona Djehovha acakhwederawo kamuri. Hinga zvinobhuiwa pana Isaya 57:15, iyena anogara no aya “anodzwinyirirhwa uye no anodzidodosa.” Djehovha anoda kuti imwimwi muzwezve mupfaro. Rumbwai meciseenzera Djehovha nge mushobo wamunokwanisa, psvakai rubetso re akuru uye garai no rugondo rekuti pamweni zuwa rimweni mwamuna wenyu ungakwanisa kuita cinjo dzakakura.—Aro. 2:4; 2 Ped. 3:9.