“Apupuri a Djehovha anhu ano unaki, haiwa basi ku anhu, asi aipangidzawo unaki ku zvimbwa zvangu. Zuwa rimweni mwanakadzi umweni unozwi Elaine, wakapasa zvimbwa zvangu mabhiskoito. Nguwa dzese pandaipinda na ipona zvimbwa zvangu zvaienda apona kuti zviende koorhya ‘mabhiskoito.’

“Mwedzi dzakadarika, asi zvimbwa zvangu zvaida mainingi kurhya mabhiskoito uye inini ndaipfarira maningi kucedza ne Apupuri a Djehovha ke nguwa doko basi. Asi ndainga ndisikadi kupedza nguwa yakawanda ndecicedza nawo. Inini ndainga ndino makore anodarika 70, uye ndainga ndisikazii kuti Apupuri a Djehovha anotendei kamare, ngekuti ndainga ndisikagondi magereja akawanda. Hino ndakasanangura kufunda ndega Bhaibheri.

“Pa nguwa iyona mu mbuto dzimweni, ndakaona Apupuri a Djehovha eciparidzira ne zvingoro. Awona ainga ari anhu akanaka uye aidaira mibvunzo dzangu dzese eciseenzesa Bhaibheri. Izvi zvakaita kuti ndinyase kuagonda kamare.

“Zuwa rimweni Elaine wakandibvunzisa kuti, ‘Imwimwi munotendera kuti zvinyama i zvipo zvetakapaswa na Mwari here?’ Inini ndakadaira ndeciti ‘zvirokwazvo kamare!’ Elaine wakaerenga neni mu bhuku ra Isaya 11:6-9. Ndizvona zvakaita kuti ndide kufunda zvakawanda nge zve Bhaibheri. Asi ndainga ndisati ndada kutora mabhuku e Apupuri a Djehovha.

“Nokuhamba ke nguwa, ndairumbwa ndecicedza na Elaine ne mwamuna wake Brent. Awona akandikohomedzesa kuti ndierenge Mateu dakara Zviito, izvona zvaizondibetsera kuti ndione zvinodikana kuti ndigare muKristu we zvirokwazvo. Ndizvona kamare zvandakazoita. Azvisi kutora nguwa ndakatendera kufunda Bhaibheri na Elaine ne mwamuna wake Brent. Izvona izvi zvakaitika mu 2016.

“Ndaipfarira maningi kufunda Bhaibheri uye kupinda misangano masumana ese. Ndaipfara maningi ne zviro zvandaifunda kubva mu Bhaibheri. Azvizi kutora nguwa yakareba ndakagara Mupupuri wa Djehovha wakabhabhatidzwa. Nyamasi uno ndino makore 79, uye ndiri kupfara maningi ngekuti ndakagumira cokwadi. Djehovha akandikomborera ne kundipasa mukana wakanakisisa we kugara nhengo ye mhuri yake yakagondeka.”