1. Ndiyani akatipasa cipo cekureketa?

 KUKWANISA kureketa i cipo catakapaswa na Baba edu Djehovha. Munhu wekutanga Adhamu paakasikwa, wakatotanga kucedza na Baba ake e kudenga. Iyena wakakwanisa kutunhudzira zviro zvekureketa nge kufundira masoko amweni. Iyena wakazviita paakapasa mazina zvinyama zvese. (Gen. 2:19) Rangarirai kupfara kaakaita paakareketa kekutanga no munhu umweni —mukadzi wake wakarungama, Evha!—Gen. 2:22, 23.

2. Anhu anososeenzesa kudini cipo cekureketa?

² Cipo cekureketa cakashaishwa kuseenzeswa pakutanga kamare. Sathani Dhiyabhorosi wakanyepera Evha, uye manyepo aya akaita kuti paoneke citema uye nokusama kukwana. (Gen. 3:1-4) Adhamu wakashaisha kuseenzesa cipo cekureketa paakapumha Evha—uye na Djehovha wene—nge zvishaishi zvake. (Gen. 3:12) Kaini wakanyepera Djehovha mu masure mekuuraya munun’una wake Abheri. (Gen. 4:9) Nokuhamba ke nguwa, mubarirhwana wa Kaini waizwi Rameki wakareketa masoko aipangidza mararamiro e cisimba aiizwa mu nguwa yake. (Gen. 4:23, 24) Mugariro upi watinawo mazuwa ano? Anyautongi nguwa dzimweni anotoreketawo masoko anopsverusa. Zvinoshupha kuona firme isikareketi masoko anopsverusa. Afundi anozwa masoko anopsverusa ku cikora uye anhu akuru anoazwa ku basa. Kubararika kaita masoko anopsverusa nyamasi uno, zvinopangidza mushobo washata nyika.

3. Tinodikana kungwarirei, uye ticaonei mu fundo ino?

³ Kana tikasama kungwarira, tingadjaira kuzwa masoko anopsverusa zvekuti tinopedzesera taakutoaseenzesawo. Zvirokwazvo kuti hingana Akristu, tinoda maningi kupfadza Djehovha uye atidi kuseenzesa masoko awona. Tinoda kuseenzesa  cipo cekureketa nge mushobo wakanaka kuti tikudze Mwari wedu. Mu fundo ino, ticaona kuti tingazviita kudini (1) mu basa rekuparidzira, (2) pa misangano ye ungano, uye (3) mu upenyu wedu we zuwa no zuwa. Asi ngatitange ngekuona kuti ngei Djehovha ano basa no mushobo watinoreketa.

4. Maererano na Marakiya 3:16, ngei Djehovha ano basa no zvatinoreketa?

⁴ Erengai Marakiya 3:16. Bhaibheri rinobhuya kuti Djehovha ano “bhuku rekuedzurira” rino mazina e anhu anopangidza no zvaanoreketa kuti anothya Djehovha uye anonyasa kurangarira nge zve zina rake. Mu maonero enyu, ngei ayena ano bhuku iri? Zvatinoreketa zvinopangidza zviro zviri mu mwoyo medu. Ndiyo ndaa Djesu akati: “Muromo unoreketa pa zvijinji zvinobva mu mwoyo.” (Mat. 12:34) Kuda katinoita Djehovha kunooneka pazviro zvatinosanangura kureketa. Uye Djehovha anoda kuti aya anomuda apfadzwe no upenyu usikaperi mu nyika ipsva.

5. (a) Zvatinoreketa zvakabatana kudini no kunamata kedu Djehovha? (b) Tinodikana kuedzurirei patinonga tecida kureketa?

⁵ Mareketero atinoita ndiwona anoita kuti Djehovha atendere kunamata kedu. (Tg. 1:26) Anhu amweni asikadi Djehovha anoreketa no hasha, nge mushobo wakashata uye ecidzikudza. (2 Tim 3:1-5) Zvezvirokwazvo atidi kugara hingana anhu akadaro. Tinoda kuita zviri zvese kuti tipfadze Djehovha. Asi azvibetseri ciro kuedza kupfadza Djehovha nge kureketa zvakanaka no hama dze mu ungano uye mu basa rekuparidzira, asi patinonga tiri kumba no mhuri dzedu tosama kureketa nawo zvakanaka.—1 Pe. 3:7.

6. Kureketa zvakanaka ka Kimberly kakabetsera kudini?

⁶ Patinoseenzesa zvakanaka cipo cedu cekureketa, tinonga tecipangidzira amweni kuti tinoseenzera Djehovha. Ngekudaro, tinobetsera anhu kuti aone musiyano uripo “pakati pe munhu unoseenzera Djehovha no uya usikamuseenzeri.” (Mar. 3:18) Ndizvona zvakaitika no hanzvadzi inozwi Kimberly. * Iyena  wakaita basa rekucikora no mudoni wake. Mu masure mazvo, mudoni wa Kimberly wakaona kuti iyena wainga akasiyana no afundi amweni. Iyena wainga asikashaishi kureketa anhu amweni, wainga ano unaki uye wainga asikarekete masoko anopsverusa. Pakupedzesera, mudoni wa Kimberly wakatenda kufunda Bhaibheri naye. Rangarirai kuti Djehovha anopfara kudini patinoreketa nge mushobo unoita kuti anhu amweni ade kufunda cokwadi!

7. Isusu tese tinoda kuitei no cipo catinaco cekureketa?

⁷ Tese hedu tinoda kureketa nge mishobo inokudza Djehovha uye inoita kuti tikhwedere dhuze no hama dzedu. Ndiyo ndaa ngatione mishobo minganani inobetsera yatingarumbwa tino “miezaniso yakanaka . . . pakureketa.”

8. Djesu akatisira muezaniso upi pakureketa kaaita mu basa rekuparidzira?

⁸ Reketai zvakanaka uye no rureremedzo kunyazi pamunoambirhwa. Paaiparidzira, Djesu akapumhwa kuti airhyisa uye aimwisa maningi, ainga ari muimiriri wa Dhiyabhorosi, ainga asikateereri Mutemo we Sabudu uye kuti aitotuka zina ra Mwari. (Mat. 11:19; 26:65; Ruka 11:15; Juau 9:16) Kunyazi zvakadaro Djesu aazi kuhwirinzira no masoko akashata. Kuita hingana Djesu, isusuwo atidikani kuhwirinzira cakashata no cakashata munhu paanoreketa na isusu no hasha. (1 Pe. 2:21-23) Zvirokwazvo kuti azviripi nyore kuita izvona nguwa dzese. (Tg. 3:2) Asi cinyi cingatibetsera?

9. Cinyi cingatibetsera kuti tionerere zvatinoreketa mu basa rekuparidzira?

⁹ Kana munhu akamudairai no hasha mu basa rekuparidzira, musanyangadzwe. Hama imweni inozwi Sam yakati, “Ndinokanda ndangariro dzangu pakukosha kunoita kuti samuziwo azwe cokwadi, uye ndoedza kurangarira kuti iyena ungacinja.” Nguwa dzimweni samuzi unodaira no hasha ngekuti taguma pa nguwa isikazi kumunakira. Kana tikagumira munhu wakashatirhwa mu basa rekuparidzira, tingaita zvinoizwa no hanzvadzi inozwi Lucia. Nokukasika, tingaita munamato tecikumbira Djehovha kuti tirumbwe takaterama uye tisarekete masoko akashata.

10. Maererano na 1 Timoti 4:13, ngacipi cinodikana kugara cinangwa cedu?

¹⁰ Tunhudzirai mushobo wenyu wekufundisa. Timoti wainga aano eshiperiensiya yakakura mu basa rekuparidzira, kunyazi zvakadaro, iyena waidikana kutunhudzira mushobo wake wekufundisa. (Erengai 1 Timoti 4:13.) Isusu tingatunhudzira kudini mushobo wedu wekufundisa mu basa rekuparidzira? Tinodikana kunyasa kugadzirira. Uye isusu tino maferamenta akawanda angatibetsera pakuita izvona. Imwimwi mungafunda zvakawanda no  bhuroshura rinozwi Shingairira Kuverenga Nekudzidzisa uye “Senzai no Simba mu Basa re Kuparidzira” pa dii re Basa Redu uye Kurarama Kedu ke CiKristu—Urongwa we Musangano. Imwimwi murikukhorovhera maferamenta aya kuti mutunhudzire mushobo wenyu wekufundisa here? Kana tikanyasa kugadzirira, isusu ticagara takaterama uye ticareketa no rugondo rese.

11. Hama dzimweni dzakakwanisa kudini kutunhudzira mushobo wawo wekuparidzira?

¹¹ Isusu tingatunhudzirawo mushobo wedu wekufundisa ngekuona miezaniso ye hama dze mu ungano. Ndizvona zvinoizwa ndi Sam, watamboreketa nge zvake. Iyena unonyasa kuona hama dzinoita mharidzo zvakanaka oedza kuteedzera muezaniso wadzo. Hanzvadzi imweni inozwi Talia inonyasa kupurutana mishobo inoizwa mharidzo no aiti e mharidzo agara no basa. Ngekuita kudaro, iyona yakafundira kureketa uye kunyasa kurangarira nge zve nyaya dzinonyanya kurekethwa mu basa rekuparidzira.

12. Anhu amweni arikusongana no zvinetso zvipi?

¹² Tese isusu tingapangidza kuti tinokoshesa misangano ngekuemba ngoma uye kupasa mhinduro dzakanyasa kugadzirirhwa. (Pis. 22:22) Amweni anoona hingana kuti zvinoshupha kuemba uye kupasa mhinduro pa misangano. Kana imwimwi mecizwawo kudaro, mucapfara ngekuziya zvakabetsera anhu amweni kuti akunde mazwiro aya.

13. Cinyi cingamubetserai kuti muembe no mwoyo wese pa misangano?

¹³ Embai no mwoyo wese. Patinoemba mu Nyumba ye Umambo, cinangwa cedu cikuru nge cekukudza Djehovha. Hanzvadzi imweni inozwi Sara inodziona hingana isikaembi zvakanaka. Asi iyona inoda kukudza Djehovha nge kuemba ngoma. Cinobetsera hanzvadzi Sara, ndikugadzirira kuemba aciri kumba hingana mushobo waanogadzirira matii amweni e misangano. Awona anogadzirira nge kuemba uye opsvaka kuona kubatana kakaita ngomeyo no zviro zvicafundwa pa misangano. Awona anoti “Izvi zvinondibetsera kuti ndikande ndangariro dzangu pa masoko ari kurekethwa nge ngomeyo haiwa pa mushobo wandiri kuemba.”

14. Kana imwimwi muri munhu wakanyararisa, cinyi cingamubetsera kuti mupase mhinduro pamisangano?

¹⁴ Petai masimba kuti mupase mhinduro pa misangano. Izvirokwazvo kuti izvi zvingashuphira anhu amweni. Talia watamboreketa nge zvake unoti: “Anhu akawanda aazwisisi kuti ngei inini ndecireketa nge mushobo wakaterama, asi inini ndinotetemera pandinoreketa pakadzara anhu. Ndiyo ndaa, kupasa mhinduro pa misangano zvinondishuphira maningi.”  Kunyazi zvakadaro, Talia aazi kuima kupasa mhinduro pa misangano. Paanogadzirira misangano, iyena unoedzurira kuti mhinduro yekutanga ye pa ndima inodikana kugara yakadodoka asi yakananga. Iyena unoti: “Izvi zvinoreya kuti mhinduro yangu ingagara yakadodoka asi yakananga uye ndizvona zvinodiwa no muitisi we murindiri.”

15. Cinyi catinodikana kuedzurira nge zve kupasa mhinduro pamisangano?

¹⁵ Kunyazi aya asikazi kunyararisa, angaima kupasa mhinduro pamisangano. Ngei? Hanzvadzi imweni inozwi Juliet inoti, “Pamweni paya, ndinopedzesera ndisikacapasi mhinduro ngekuti ndinothya kuti mhinduro yangu yakareruka maningi uye aitobetseri.” Kana imwimwi mecizwa kudaro, edzurirai kuti Djehovha aadi kuti imwimwi mupase mhinduro yakanaka kudarika iya yamunokwanisa. * Ayena anopfara maningi patinopeta masimba kuti tipase mhinduro pamisangano kunyazi patinonga tecitetemera.

16. Makani api asikadikani kurekethwa ndi muKristu?

¹⁶ Musarekete “masoko anogumbura.” (Aef. 4:31) Hingana zvataona, muKristu aadikani kureketa masoko anopsverusa. Asi kuno zvimweniwo zvinogumbura zvisikadikani kurekethwa no muKristu. Ngo muezaniso, tinodikana kungwarira kuti tisaezanise ngo mushobo wakashata patinoreketa nge zve anhu, dzinza, tsika uye nyika dzimweni. Uyewo atidikani kureketa masoko ekupsvinyira angakuwadza munhu. Hama imweni inotendera yeciti: “Pandaireketa masoko ekupsvinyira, ndairangarira kuti anosekesa uye apana cakashata. Asi zvezvirokwazvo aikuwadza anhu. Asi mukadzi wangu unosondibetsera maningi, uye pese pandinoreketa masoko asikazi kunaka, iyena unosondibetsera patinonga tiri tega kuti ndione kuti masoko aya akuwadza kudini munhu umweni kana kuti iyena kamare.”

17. Maererano na Aefeso 4:29, tingaita kudini kuti tipfadze amweni?

¹⁷ Reketai nge mushobo unopfadza amweni. Pane kutonga nokugunun’una sanangurai kusimba. (Erengai Aefeso 4:29.) Aisraeri ainga ano zvikonzero zvakawanda zvekuti atende, asi awona aindopsvaka zvikonzero zvekuti agunun’une. Kana munhu ano musambo wekugunun’una, amweni acapedzesera aakutozviitawo. Pamweni muciri kuedzurira kuti Avhevhi gumi paakareketa zvakashata nge zve nyika yakapikirhwa “Aisraeri akawanda . . . akatanga kugunun’unira Mozesi.” (Num. 13:31–14:4) Kusimba kungaita kuti anhu apfare. Ngo muezaniso, tingagonda hedu kuti kusimbwa  kakaizwa mwana wa Djefitee nge shamwari dzake kakaita kuti iyena arumbwe eciita basa rake. (Ato. 11:40) Sara watamboreketa nge zvake unoti: “Patinosimba anhu, tinoita kuti awona azwe kuti anodiwa na Djehovha uye no hama dzimweni dze mu ungano.” Ndiyo ndaa khorovherai mikana iri yese kuti musimbe anhu zvecibva pa mwoyo.

18. Maererano na Pisarema 15:1, 2, ngei tinodikana kureketa cokwadi, uye zvinyi zvinobatanidzwepo?

¹⁸ Reketai cokwadi. Isusu atingapfadzi Djehovha tisikareketi cokwadi, ngekuti ayena anozonda manyepo ese. (Zvie. 6:16, 17) Zvinotsukwarisa kuti anhu akawanda anorangarira kuti kunyepa iciro cisikazi kunyanya kushata uye cinoizwa no anhu ese, asi isusu tinoona manyepo nge mushobo unooniwa na Djehovha. (Erengai Pisarema 15:1, 2.) Zviri pamhene kuti isusu atidikani kunyepa, asi isusu atidikaniwo kureketa masoko asikazi kudzara teciita kuti anhu amweni agume pa mugumisiro usikazi kunaka.

19. Tinodikana kungwarira makani api?

¹⁹ Musarekete zvakashata nge zve anhu amweni. (Zvie. 25:23; 2 Ate. 3:11) Juliet watamboreketa nge zvake, unobhuya mazwiro aanoita paanozwa anhu ecireketa zvakashata nge zve anhu amweni. Iyena unoti: “Kuzwa masoko akashata ecirekethwa nge zve munhu umweni, zvinoita kuti ndisazwe zvakanaka uye kuti ndisagonde munhu unonga ecireketewo. Ndinorangarira kuti, ndingaziya kudini kuti munhu uu aazoreketiwo zvakashata nge zvangu no anhu amweni?” Pamunonga mecicedza, mukaona kuti imwimwi kana kuti munhu umweni uri kureketa zvakashata nge zve munhu, cinjai makani uye edzai kureketa zviro zvakanaka.—Ako. 4:6.

20. Tinodikana kugara takashinga kuitei?

²⁰ Isusu tirikurarama mu nyika yekuti anhu akawanda anoshaisha kuseenzesa cipo ce kureketa, ndiyo ndaa tinodikana kupeta masimba kuti tirekete zviro zvinopfadza Djehovha. Edzurirai kuti kukwanisa kureketa i cipo catakapaswa na Djehovha, uye ayena ano basa no mushobo watinoseenzesa cipo icona. Tinogara no rugondo rekuti Djehovha acatikomborera tikaseenzesa zvakanaka cipo cekureketa mu basa rekuparidzira, pa misangano uye pa makani edu e zuwa no zuwa. Nyika ino yakashata ikapera, zvicaita nyore kukudza Djehovha nge zvatinoreketa. (Djudha 15) Dakara zuwa irona raguma, garai makashinga kupfadza Djehovha “no zvamunoreketa.”—Pis. 19:14.