1. Cinyi cingatipasa mupfaro wezvirokwazvo?

 DJEHOVHA anoda kuti isusu tipfare, isusu tinozviziya ngekuti mupfaro unobatanidzwa pa zvibereko zve mwiya mucena wake. (Aga. 5:22) Uye isusu tinozviziya kuti kupa kuno mupfaro mukuru kudarika kupaswa, ndiyo ndaa tinopfara patinoita zvakawanda mu basa rekuparidzira uye patinobetsera hama dzedu.—Zvi. 20:35.

2-3. (a) Maererano na Agaratiya 6:4, zviro zvipi zviiri zvingatibetsera kuti tirumbwe tecipfara mu basa ra Djehovha? (b) Ticaonei mu fundo ino?

² Pana Agaratiya 6:4, muphostori Pauro anobhuya kuti pano zviro zviiri zvingatibetsera kuti tirumbwe tecipfara. (Erengai.) Ciro cekutanga, nge ce kugara no cinangwa cekupasa Djehovha zvakanakisisa zvedu. Kana zviri izvona zvatiri kuita, isusu ticapfara maningi. (Mat. 22:36-38) Uye ciro cecipiri ngecekusama kudziezanisa no anhu amweni. Tinodikana kutenda Djehovha nge zviro zvatinokwanisa kuita pasinei no migariro yedu ye uthongo, rowedzo yatinayo kana kuti zviro zvatakabarhwa tecikwanisa kuita, ngekuti zviro zvese zvatinazvo i zvipo zvatakapaswa na Djehovha. Pa nguwa imweyo, kana munhu ecikwanisa kuita zvakawanda mu basa rekuparidzira kupinda isusu, tinodikana kupfara kuti munhuwo urikuseenzesa cipo caanaco kuti akudze Djehovha, haiwa kuti adzionese. Kana tikarangarira kudaro, atizokwikwidzani nawo, asi ticafunda zvakawanda no miezaniso yawo.

³ Mu fundo ino ticaona zviro zvatingaita patinonga takaora mwoyo ngekusama kukwanisa kuita zvese zvataizoda kuitira Djehovha. Ticaonawo kuti tingaseenzesa kudini cipo catakapaswa na Djehovha mu basa rake uye kuti miezaniso ye amweni ingatibetsera kudini.

4. Cinyi cingaita kuti amweni edu aore mwoyo? Pasai muezaniso.

⁴ Ku amweni edu, zvingaashuphira kutendera kuti aangakwanisi  kuitira Djehovha zviro zvese zvaanoda nge ndaa ye nhenda kana kuti nge ndaa ye kucembera. Ndizvona zvakaitika na Carol. Ke makore akawanda, iyena wakaona makomborero ekuseenzera ku mbuto inodiwa aparidzi akawanda. Pa nguwa iyona, iyena wakaona mukana wekufundisa Bhaibheri anhu anokwana kuita 35 uye kubetsera anhu akawanda kuti adzipire uye abhabhatidzwe. Carol wakaseenzera maningi Djehovha! Asi iyena wakarhwara maningi uye wainga asikacakwanisi kubuda pa nyumba nguwa dzese. Carol unoti: “Ndinozviziya kuti nge ndaa ye uthongo wangu, inini andicakwanisi kuita zviro zvakawanda hingana zvinoizwa no anhu amweni, kunyazi zvakadaro andidzione hingana muKristu wakanaka kupinda amweni. Ii itori hondo pakati pe zviro zvandaizoda kuita no zviro zvandinokwanisa kuita, uye zvinoshupha maningi kushingirira zviro zvese izvi.” Carol unoda kuita zviri zvese kuna Djehovha. Izvona zvinosimbwa maningi! Tingagonda hedu kuti Djehovha anokoshesa maningi zviro zvese zvaanokwanisa kuita.

5. (a) Tinodikana kuedzurirei kana tikaora mwoyo nge ndaa ye zviro zvatisikacakwanisi kuita? (b) Hingana zvinopangidzwa pa mifanikiso, hama ii yakarumbwa kudini yecipasa zvakanakisisa zvayo mu basa ra Djehovha?

⁵ Kana imwimwi makaora mwoyo nge ndaa yekuti amukwanisi kuita zviro zvese zvamaizoda kuita, dzibvunzisei kuti, ‘Ngazvipi zvinoimirhwa na Djehovha kuti inini ndiite?’ Djehovha anoda kuti imwimwi mumupase zvakanakisisa zvenyu. Cimborangarirai zvinoteera: Hanzvadzi ino makore 80 yakaora mwoyo ngekuti aicakwanisi kuita zviro zvakawanda mu basa rekuparidzira hingana zvayaiita payainga ino makore 40. Kunyazi yeciita zviri zvese, iyona inorangarira kuti Djehovha aaripi kupfara nge zvese zvairi kuita. Asi izvirokwazvodi here? Cimborangarirai basi. Kana hanzvadzi iyona yakakwanisa kuita zviro zvakawanda payainga ino makore 40 uye icirikuzviita no makore 80, iyona aizi kumbosiya kupasa Djehovha zvakanakisisa zvayo. Kana tikatanga kurangarira kuti zviro zvatirikuitira Djehovha azvikwani, tinodikana kuedzurira kuti Djehovha ndiyena anosanangura kuti ngazvipi zviro zvinomupfadza. Kana tikaita nopatinokwanisa napo, tingagonda hedu kuti Djehovha: “Acapfara maningi!”—Ezanisirai na Mateu 25:20-23.

6. Tingafundei kubva pa muezaniso wa Mariya?

⁶ Zviri nyore maningi kupfara patinokanda ndangariro dzedu pa zviro zvatinokwanisa kuita pane kukanda ndangariro dzedu pa zviro zviya zvatisikakwanisi kuita. Cimborangarirai nge zve migariro ye hanzvadzi inozwi Mariya. Iyona ino nhenda inoipingaidza kuita zviro zvakawanda mu basa rekuparidzira. Pakutanga iyona yakaora mwoyo uye yakazwa hingana isikabetseri. Asi iyona yakazoedzurira nge zve hanzvadzi imweni ye mu ungano yainga yakabhashari mucipitari, uye Mariya akasanangura kuibetsera. Mariya unoti: “Inini ndakaita urongwa wekuparidzira nayo teciseenzesa thurufunu uye karta. Pese pataisenza tese, ndaihwirira kumba ndakapfara maningi ngekukwanisa kubetsera hanzvadzi yangu.” Isusu ticapfarawo maningi kana tikakanda ndangariro dzedu pa zviro zvatinokwanisa kuita haiwa pa zviro zvatisikakwanisi. Asi zvakadini kana imwimwi mecikwanisa kuita zvakawanda kana kuti mune ciro camungaseenzesa pakuitira Djehovha zviro zvakawanda?

7. Izano ripi rakapaswa Akristu ndi muphostori Pedru?

⁷ Mu tsamba yake yekutanga, muphostori Pedru akakohomedzesa hama kuti dziseenzese zvipo zvawo, uye zviro zvaaikwanisa kuita kuti abambise amweni. Pedru wakatara kuti: “Ngekuti makapaswa cipo, umwe na umwe ngaaciseenzese pakuseenzera amweni hingana muonereri wakanaka we nyasha dzisikazi  kusisira dza Mwari.” (1 Pe. 4:10) Isusu atidikani kusiya kuseenzesa zvipo zvedu uye zviro zvatinokwanisa kuita ngekurangarira kuti amweni acaora mwoyo kana kuti acagara no bibvu. Pakadaropo, isusu tinonga tisikapasi Djehovha zvakanakisisa zvedu.

8. Maererano na 1 Akorinti 4:6, 7, ngei tisikadikani kudzionesa nge ndaa ye zviro zvatinokwanisa kuita?

⁸ Izvirokwazvo kuti tinodikana kunyasa kuseenzesa zviro zvatinokwanisa kuita kuti tiseenzere Djehovha, asi atidikani kudzionesa. (Erengai 1 Akorinti 4:6, 7.) Ngo muezaniso, pamweni imwimwi munokwanisa kutangisa fundo ye Bhaibheri nokukasika. Uye zvezvirokwazvo imwimwi munodikana kuseenzesa cipo icona! Asi kuseenzesa cipo icona kakasiyana nokugaya. Ngatimboti imwimwi makwanisa kutangisa fundo ye Bhaibheri mu basa rekuparidzira. Uye imwimwi munoda maningi kuzvibhuya ku hama dze mugrupo renyu. Asi pamunosongana nawo, panonga pano hanzvadzi yakatopfara yecibhuya kuti yakwanisa kusiira samuzi revhista imwe. Iyona yasiya revhista imwe; uye imwimwi makwanisa kutangisa fundo ye Bhaibheri. Maizoita kudini pakadaropo? Imwimwi munoziya kuti hama idzona dzicabambiswa maningi no eshiperiensiya iyona, asi pamweni zviri nani kuzobhuya eshiperiensiya iyona zuwa rimweni ngekuti mungazopedzesera mabvisa mupfaro we hanzvadzi yakwanisa kusiya revhista imwe. Kana mukaita izvona zvinonga zvakanaka maningi. Asi imwimwi amudikani kusiya kutangisa fundo dze Bhaibheri nge ndaa yazvo. Imwimwi muno cipo—ciseenzesei!

9. Tinodikana kuseenzesa kudini zvipo zvatinazvo?

⁹ Tinodikana kuedzurira kuti zvipo zvatinazvo takazvipaswa na Mwari. Ndiyo ndaa, tinodikana kuzviseenzesa kuti tibambise hama dzedu haiwa kuti tidzionese. (Afi. 2:3) Patinoseenzesa simba redu uye zviro zvatinokwanisa kuita kuti tiseenzere Djehovha, ticaona zvikonzero zvekuti tipfare—haiwa ngekuti tiri kuedza kugara ari nani kupinda amweni, asi ngekuti tiri kuseenzesa cipo catinaco kuti tikudze Djehovha.

10. Ngei zvisikazi kunaka kudziezanisa no anhu amweni?

¹⁰ Kana tikasama kungwarira, tingapedzesera tawira pa murau wekuezanisa zviro zvatinokwanisa kuita, no zviro zvisikakwanisi kuizwa no munhu umweni. Ngo muezaniso, pamweni hama imweni ingakwanisa kuita zvakanaka mharidzo ye Bhaibheri. Izvi ndizvona zvaanotokwanisa kuita. Asi pamweni mu mwoyo mayo, hameyo inotonga hama imweni isikakwanisi kuita zvakanaka mharidzo ye Bhaibheri.  Asi kunyazi isikaiti mharidzo zvakanaka, hameyo inotambira arendo zvakanaka, inonyasa kufundisa ana ayo uye inobambisira pa basa rekuparidzira. Isusu tinodikana kutenda ngekuti hama no hanzvadzi dzinoseenzesa zvipo zvaanazvo kuti aseenzere Djehovha uye abetsere amweni!

11. Ngei tecidikana kuteedzera muezaniso wa Djesu?

¹¹ Izvirokwazvo kuti atidikani kudziezanisa no anhu amweni, asi tingafunda zvakawanda no miezaniso ye hama dzedu. Uye muezaniso wakanakisisa watingafundira nawo, ngewa Djesu. Isusu atidikani kudziezanisa na Djesu ngekuti ayena ainga akakwana. Tingafunda zvakawanda nge zve mawara akanaka aainga anawo uye nge mushobo waairarama upenyu wake. (1 Pe. 2:21) Patinopeta masimba kuti tinyase kuteedzera muezaniso wa Djesu, tinogara aseenzi a Djehovha akanaka uye tinobudirira mu basa rekuparidzira.

12-13. Tingafundei no muezaniso wa Mambo Dhavhidhi?

¹² Mu Bhaibheri, tinogumira miezaniso yakawanda yatingateedzera ye anarume no anakadzi akagondeka. (Ahe. 6:12) Rangarirai nge zva Mambo Dhavhidhi. Djehovha akabhuya nge zva Mambo Dhavhidhi kuti iyena ndi “munhu unopfadza mwoyo wangu” kana kuti, hingana zvinorekethwa no turukiro imweni ye Bhaibheri kuti, “mushobo we munhu wandinoda.” (Zvi. 13:22) Asi Dhavhidhi wainga ari munhu usikazi kukwana. Iyena wakaita zvitema zvakakura, asi kunyazi zvakadaro, iyena ndi muezaniso wakanaka katiri. Ngei? Ngekuti paakasumururhwa, iyena aazi kuedza kupasa zvikonzero. Iyena wakatendera zano raakapaswa uye wakacinyukadi zvezvirokwazvo. Ndiyo ndaa Djehovha akamurekerera.—Pis. 51:3, 4, 10-12.

¹³ Pamunonga mecifunda nge zve muezaniso wa Mambo Dhavhidhi, dzibvunzisei mibvunzo dzinoteera: ‘Ngazvipi zvandinoita pandinopaswa zano? Ndinotendera zvishaishi zvangu here, kana kuti ndinoedza kupasa zvikonzero? Ndinotendera migumisiro ye zvishaishi zvangu here kana kuti ndinopasa ndaa amweni? Ndinopeta masimba kuti ndisaphinde kuita zvishaishi zvimwe-zvimwezvo here?’ Pamunonga mecifunda Bhaibheri, imwimwi mungarangarirawo nge zve mibvunzo dzakaita hingana idzi. Kodi awona akasonganawo no matambudziko akatodzana no angu here? Mawara api aakapangidza andinodikana kuteedzera? Pa ciitiko cimwe na cimwe, dzibvunzisei kuti: ‘Ndingagara kudini hingana museenzi uu wakagondeka wa Djehovha?’

14. Tingafundei no miezaniso ye hama dze mu ungano yedu?

 ¹⁴ Isusu tingafundawo zvakawanda no miezaniso ye hama no hanzvadzi dzedu dze mu ungano, kubatanidza madjaha no hama dzakura. Ngo muezaniso, rangarirai nge zve hama ye mu ungano yenyu iri kubatana no miyedzo. Pamweni iyona iri kubambidzirhwa kuita zviro zvakashata ku cikora, no wemumhuri yake, kana kuti pamweni iri kutosongana no cinetso cakakura ce uthongo. Mawara api ari kupangidzwa no hama ii amaizoda kuteedzera? Zvezvirokwazvo, miezaniso ye hama no hanzvadzi dzedu, dzingatibetsera maningi, uye tingaseenzesa zviro zvatinofunda kubva kaari kuti tikwanisane no zvinetso zvedu. Zvezvirokwazvo, tinopfara maningi ngekuti tino hama no hanzvadzi idzi dzino miezaniso yekutenda yatingateedzera!—Ahe. 13:7; Tg. 1:2, 3.

15. I zano ripi rakapaswa ndi muphostori Pauro ringatibetsera kuti tiseenzere Djehovha tecipfara?

¹⁵ Umwe na umwe wedu unodikana kuita zviri zvese kuti ungano irumbwe ino runyararo uye yakabatana. Tingarangarira nge zve muezaniso we Akristu e kutanga. Awona ainga ano zvipo uye mabasa akasiyana-siyana. (1Ako. 12:4, 7-11) Asi awona ainga asikakwikwidzani uye ainga asikaumbi zvigrupu. Pauro wakakohomedzesa hama dzese dze mu ungano kuti dziite zvinodikanwa kuti “awake muiri wa Kristu.” Pauro wakatarira Aefeso kuti: “Kana nhengo imwe na imwe yeciseenza zvakanaka, zvinobetsera kuti muiri ukure paunonga wecidziwaka mu rudo.” (Aef. 4:1-3, 11, 12, 16) Akristu akateerera zano ra Pauro, akaita zviri zvese kuti ungano irumbwe ino runyararo uye yakabatana, uye ndizvona zvirikuizwawo no Akristu e zvirokwazvo e mazuwa ano.

16. Tinodikana kushinga kuitei? (Ahebheru 6:10)

¹⁶ Musadziezanise no anhu amweni. Pane kudaro, petai masimba kuti muteedzere muezaniso wa Djesu uye we aseenzi amweni akagondeka a Djehovha e kare uye e mazuwa ano. Itai no pamunokwanisa napo uye gondai henyu kuti Djehovha “amunhupi asina unatsi kuti akanganwe mabasa enyu.” (Erengai Ahebheru 6:10.) Seenzerai Djehovha mecipfara, meciziya kuti tinopfadza mwoyo wake patinomupasa zvakanakisisa zvedu.