KUDZIRHYA mwoyo kakaita hingana mutoro uri mukati me mwoyo. (Zvie. 12:25) Imwiwmwi munozwawo kudaro pamunodzirhya mwoyo here? Makamborangarira here kuti inini andicazvikwanisi? Kana izvi zvakamboitika kamuri, edzurirai kuti amuripi mwega. Anhu akawanda anozwa akaremba ecidzirhya mwoyo uye akatsukwara nge ndaa yemigarire ye zviro yakasiyana-siyana. Nge muezaniso, amweni anodikana kuriritira munhu we mumhuri ari kurhwara uye amweni akaruza nhengo ye mumhuri mu rufu, uye amweniwo akabatana no njodzi dzinoitika dzega. Asi ngazvipi zvamungaita kuti musanyanye kudzirhya mwoyo? *

Kuongorora nge zve muezaniso wa Mambo Dhavhidhi, kunotibetsera kuti tisanyanye kudzirya mwoyo. Iyena wakabatana no migariro ye zviro inoshupha, zvekutoti upenyu wake wainga uri pa ngozi. (1 Sam. 17:34, 35; 18:10, 11) Asi cinyi cakabetsera Dhavhidhi kuti asanyanye kudzirhya mwoyo? Isusu tingateedzera kudini muezaniso wake?

Dhavhidhi wakabatana no matambudziko akawanda pa nguwa imweyo. Onai mugarire umwe we zviro wakaitika kuna Dhavhidhi pa nguwa yekuti iyena waitiza Mambo Sauro waida kumuuraya. Mumasure mekurhwisana no azondi ake Dhavhidhi no masurudado ake akahwirira kumusasa, asi paakaguma ikona akatsukwara maningi paakaona kuti azondi awo ainga atora zviro zvawo, ainga apisa nyumba dzawo uye akatorazve akadzi no ana awo. Dhavhidhi wakaitei pa zvese izvi? “Dhavhidhi no anarume aainga nawo akatanga kucema eciita zvekukakarara, zvekutoti ainga asisina simba re kucema.” Kupinda izvona, anarume aigondhwa na Dhavhidhi aireketa kuti “aida kumufura no mapuwe.” (1 Sam. 30:1-6) Dhavhidhi waibatana no matambudziko matatu pa nguwa imweyo: Mhuri yake yainga iri pangozi, iyena waityha kuti annhu ake aizomuuraya uye wainga aciri kupsvakiwa na Mambo Sauro. Mungakwanisa kurangarira kuti kudzirhya mwoyo kakadini kainga kuna Dhavhidhi!

Hino, Dhavhidhi wakaitei? Nokukasika, Dhavhidhi “wakadzibambisa muna Djehovha Mwari wake.” Iyena wakazozviitisa kudini izvona? Dhavhidhi wainga uno musambo wekunamata kuna Djehovha ecikumbira rubetso uye wainyasa kurangarira nge zve mushobo waakambobetswa na Djehovha kareko. (1 Sam. 17:37; Pis. 18:2, 6) Dhavhidhi waiziya kuti iyena waida kutungamirirhwa na Djehovha, ndiyo ndaa wakabvunzisa Djehovha zviro zvaaidikana kuita. Mumasure mekutambira nhungamiriro ya Djehovha, iyena wakaseenzesa nhungamiriroyo ciriporipoco. Ndiyo ndaa, Dhavhidhi pamwepo no anarume aaihamba nawo akakomborerhwa na Djehovha, awona akakwanisa kugarazve no zviro zvainga zvatorhwa uye no mhuri dzawo. (1 Sam. 30:7-9, 18, 19) Zviro zvipi zvitatu zvakaizwa na Dhavhidhi? Iyena wakanamata ecikumbira kuti Djehovha amubetsere, wakanyasa kurangarira nge zve kubetserhwa kaainga aizwa na Djehovha munguwa dzakadarika, uye wakaita ciito nge kuseenzesa nhungamiriro ya Djehovha ciriporipoco. Tingateedzera kudini muezaniso wa Dhavhidhi? Ngationei mishobo mitatu yatingamuteedzera ndiyona.

1. Kuita munamato. Pese paya patinonga tecizwa kudzirhya mwoyo, tinodikana kunamata kuna Djehovha tecikumbira rubetso rake, uye no ruziyo. Kunamata kuna Djehovha tisikaiti zvekugogomeka uye tecinyasa kureketa zviro zvese zviri mu mwoyo medu, zvinotibetsera kuti tisanyanye kunetseka. Asi kana tikatama kukwanisa kuita izvona, tingakwanisa kuita minamato cimwoyo-mwoyo. Pese patinopsvaka Djehovha kuti atibetsere, tinonga teciita hinga zvakaita Dhavhidhi, iyena akati: “Djehovha ndiye buwe rangu rekutizira uye Mununuri wangu. Mwari wangu ndiye bako rangu randinotizira.” (Pis.  18:2) Asi munamato ungakwanisadi kutibetsera here? Piyonera umweni unozwi Kahlia akati: “Mumasure mekuti ndaita munamato, ndinozwa runyararo. Munamato unondibetsera kuti ndigare no maonero a Djehovha uye ndinyase kumugonda.” Zvezvirokwazvo, munamato i cipo cino simba ca Djehovha uye cinotibetsera kuti tisanyanye kudzirhya mwoyo.

2. Kunyasa kurangarira. Munokwanisa kurangarira here mugariro we zviro unoshupha wamakambosongana nawo mu upenyu wenyu, asi makakwanisa kuukunda nge rubetso ra Djehovha here? Kana tikanyasa kurangarira kubetsera kakaita Djehovha aseenzi ake mu nguwa dzekare uyewo kubetserhwa katakamboizwa, tinogara no runyararo re zvirokwazvo uye rugondo redu kaari rinotunhudzirika. (Pis. 18:17-19) Mukuru umweni unozwi Djoshuwa wakati: “Ndino mundandanda we minamato yandakadairhwa na Djehovha. Izvona zvinondibetsera panguwa yekuti ndakakumbira Djehovha ciro candaida uye ayena akandipasa icona kamare.” Zvezvirokwazvo, kana tikanyasa kurangarira mabetserhwe atakaizwa na Djehovha, zvinotipasa simba rekuti tirhwisane no marangariro anoita kuti tidzirhye mwoyo.

3. Kuita ciito. Patinonga tecida kuita cisananguro mu upenyu wedu, tinodikana tatanga tapsvaka nhungamiriro dza Djehovha dzatinogumira mu Bhaibheri. (Pis. 19:7, 11) Anhu akawanda akaona kuti kunyasa kupsvakisisa vhersikuro imwe basi ye mu Bhaibheri, kunoabetsera kuti awona anyase kuizwisisa uye akwanise kuiseenzesa mu upenyu wawo. Mukuru umweni unozwi Jarrod unopanganidza eciti: “Kunyasa kupsvakisisa, kunondibetsera kuona kuti vhersikuro imwe basi ye mu Bhaibheri inonga yecida kunyasa kureyei uye kuti Djehovha ari kundifundisei nge zvayo. Izvona zvinondibetsera kuti ndikwanise kucengeta mu mwoyo mangu zviya zvandinonga ndafunda uye kuti ndikwanise kuita zvisananguro maererano no nhungamiriro iyona.” Kana tikapsvaka nhungamiriro dza Djehovha mu Bhaibheri uye todziseenzesa mu upenyu wedu, zvicagara nyore kuti tikwanise kushingirira kudzirhya mwoyo.

Dhavhidhi waiziya, kuti akwanise kuwina pa hondo iyona ii ye kudzirhya mwoyo, iyena waidikana kubetserhwa na Djehovha. Iyena waikoshesa maningi zvese zviya zvaainga eciizirhwa na Djehovha, zvekutoti akati: “No simba ra Mwari, ndinokwanisa kukwira ukutira. Mwari we cokwadi ndiye anondipasa simba.” (Pis. 18:29, 32) Pamweni paya, matambudziko edu akakura maningi zvekutoti isusu tinoaona hingana kuti atikwanisi kuashingirira. Asi nge rubetso ra Djehovha, tinokwanisa kushingirira dambudziko ripi haro kunyazi reciita hingana kuti rakakura maningi zvekutoti atikwanisi kurishingirira! Hino kuti tikwanise kushingirira kudzirhya mwoyo, tinodikana kunamata kuna Djehovha tecikumbira rubetso, kunyasa kurangarira kuti Djehovha akambotibetsera kudini mu upenyu wedu, uye kuita ciito maererano no nhungamiriro dzake, kana tikaita izvona tingakwanisa kugara no rugondo rekuti ayena acatipasa simba uye uzii watinoda kuti tikwanise kushingirira kudzirhya mwoyo!