Mibvunzo Inobva ku Aerengi
Kana muKristu akarambana no mukadzi wake pasina cikonzero cinotenderhwa ne Bhaibheri, oenda kocata no munhu umweni, ungano inodikana kuona kudini mucato wekare uye mucato upsva?
Panyaya ii, ungano inodikana kuona mucato wekare hingana kuti wakapera, uye mucato upsva anodikana kuuona hingana mucato unotenderhwa. Kuti tinyase kuzwisisa nyaya ii, tinodikana kuona zviro zvakarekethwa na Djesu pa nyaya ye kurambana uye kuwakazve.
Pana Mateu 19:9, Djesu akapanganidza cikonzero cimwe basi cinoita kuti anhu arambane. Ayena wakati: “Munhu wese anoramba mukadzi wake pasina uhure waizwa, akawaka umweni, anonga atoita uhure.” Ngekudaro tinofunda kuti, (1) kuita uhure, ndico basi cikonzero cinotenderhwa ne Bhaibheri kuti anhu arambane (2) mwanarume anorambana no mukadzi wake pasina cikonzero cinotenderhwa no Bhaibheri, owaka mukadzi umweni ari kuita uhure. *
Masoko akarekethwa na Djesu, ari kuda kureya kuti mwanarume anoita uhure uye orambana no mukadzi wake wakasudzunuka kuti acatezve no mukadzi umweni here? Handizvopi. Kana mwanarume akaita uhure, mukadzi wake asina ndaa angasanangura kumurekerera kana kuti kurambana naye. Kana iyena akasanangura kutama kumurekerera uye orambana, ese ari airi akasudzunuka kucatazve, mumasure mekuti mucato wekutanga wapfudzwa ku atongi.
Asi zvingaitawo kuti mukadziwo asina ndaa, angasanangura kurumbwa ari no mwamuna wake uye omubvunza kuti akagadzirira kumurekerera. Hino kunyazi zvakadaro, mwamuna akatama kutenderana naye uye osanangura kurambana naye? Ngekuti mwanakadziwo ainga akagadzirira kumurekerera uye kuti arumbwe ari ase, mwamunewo aazi kusudzunuka maererano no Bhaibheri kuti acatezve. Kana iyena akasanangura kuwaka mukadzi umweni kunyazi asikazi kusudzunuka kuti azviite, iyena anonga aciitazve uhure, kana zvakadaro, akuru e mu ungano anodikana kurongazve dare re kutanga kuti agadzirise ndaa ii.—1Ako. 5:1, 2; 6:9, 10.
Kana mwanarume ecida kucatazve asikatsigiri zvinorekethwa no Bhaibheri, ungano inodikana kuona kudini mucato we kare uye mucato upsva? Mucato wekare uciri kutenderhwa no Bhaibheri? Mwanakadzi asina ndaa, akasudzunuka kuti arambe kana kuti ahwiriranezve no mwamuna wake here? Zvinoreya here kuti ungano inodikana kuona mucato upsva hingana uhure?
Kareko, isusu taizwisisa kuti kana mwanakadzi asina ndaa, akarumbwa ari mupenyu, asikazi kuwakwa, uye asikazi kuita uhure, mucato mupsva we mwamunewo unodikana kuoneka hingana useki. Kunyazi zvakadaro, Djesu aazi kubhuya nge zve mwanakadzi asina ndaa paakareketa nge zve kurambana uye kuwakazve. Kusiya izvona, ayena akabhuya kuti mwamuna unorambana no mukadzi wake pasina cikonzero cinotenderhwa no Bhaibheri owaka umweni, anonga eciita uhure. Ngekudaro, kurambana uye mucato mupsva, zvinoita kuti mucato wekare upere.
“Munhu wese anoramba mukadzi wake pasina uhure waizwa, akawaka umweni, anonga atoita uhure.” —Mat. 19:9
Kana mwanarume akarambana no mukadzi wake uye ocata no umweni, azvicaiti kuti mukadzi wekare asina ndaa amurekerere kana kuti amurambe. Ngekudaro, mwanakadziwo aadikani kunetseka ecirangarira kuti anodikana kumurekerera here kana kumuramba. Kunyazi zvakadaro, mushobo unobata ungano mucato upsva, azvinei kuti mukadzi asina ndaa afa, acatazve kana kuti aita uhure. *
Pa muezaniso wataona pakutanga, mwamuna wakaita uhure, uye awona akarambana. Asi zvakadini kana mwamunewo asikazi kuita uhure, kunyazi zvakadaro osanangura kurambana no mukadzi wake uye osanangura kucata no mukadzi umweni? Hino zvakadini kana mwamuna aazi kuita uhure asati arambana, asi ozopedzesera azviita? Pasure paizvona owaka mukadzi umweni, kunyazi mukadzi okutanga amurekerera? Pa migarire miiri ii, kurambana uye kuwakazve, kunooneka hingana kuita uhure, zveciita kuti mucato wekutanga upere. Mucato mupsva unotenderhwa pamaonero e atongi. Murindiri wa 1 ya Fevrero wa 1980, pa pajina 32 mu ciPutukezi, wakapanganidza nyaya ii weciti, “iyena zvino wabatanidzwa ne mwanakadzi umweni, ndiyo ndaa, azviiti kuti andomusiye akadaro kuti ahwirire kumucato wake we kare; mucato wekare wakapera nge ndaa ye kurambana, kuita uhure uye mucato mupsva.”
Mazwisisiro aya mapsva, aadi kureya kuti muKristu unodikana kuona mucato hingana ciro cisikakoshi uye kuita uhure hingana citema cisikazi kukura. Kana mwamuna akarambana no mukadzi pasina ciro cinotenderhwa no Bhaibheri uye ocata no mukadzi umweni asikazi kusudzunuka kuita izvona, akuru anodikana kuronga dare re kutonga kuti agadzirise nyaya ii ye uhure. (Kana mukadzi mupsva ndi muKristu, iyena unodikanawo kutongwa no dare re kutonga, ngekuti anonga aitawo uhure.) Kunyazi mucato upsva usikadikani kuoneka hingana uhure, nge ndaa yazvo, mwanarume uu aakwaniriswi kuti agare no ubaba we kuita mabasa mu ungano ke makore akawanda dakara hama dze muungano dzaakumuona nge mwazvo uye dzaakumureremedzazve. Asati agadzwa kuti atambire ubaba, akuru anodikana kuongorarazve migariro ye mwanakadzi uya we kare uye ana anonga asiiwa no mwanarume uu usikazi kugondeka.—Mar. 2:14-16.
Tecirangarira nge zve migumisiro yakashata ye kurambana uye kucatazve pasina cikonzero cinotenderhwa no Bhaibheri, aKristu anodikana kupangidza uzii nge kuteedzera Djehovha uye oona mucato hinga ciro cinokosha uye cakacena.—Mup. 5:4, 5; Ahe. 13:4.
^ par. 2 Mufundo ii kuti zviite nyore kuzwisisa, ticabhuya kuti mwamuna ndiye wakaita uhure, uye mukadzi ndiye asina ndaa. Kunyazi zvakadaro, masoko ari pana Marko 10:11, 12, Djesu akapangidza pamhene kuti zano rake rakaringana no nyaya ii rinobatanidza anarume no anakadzai.
^ par. 1 Uku kugadziriswa kekuzwisisa kataiita kare, kekuti mucato upsva waidikana kuonekwa hingana useki dakara pakuti mukadzi asina ndaa, acatazve, aita uhure kana kuti afa.
