1. Ngei tecipasa mhinduro pa misangano?

 NGEI tecipinda misangano? Cikonzero cikuru, nge cekukudza Djehovha. (Pis. 26:12; 111:1) Cikonzero cimweni, nge cekubambisana mukati me nguwa ino inoshupha yatiri kurarama. (1 Ate. 5:11) Patinomutsa nyara uye topasa mhinduro, tiri kuita zviro zviiri izvi.

2. Mukana upi watinawo wekuti tidaire pa misangano?

² Masumana ese, isusu tino mukana we kupasa mhinduro pa misangano. Hinga muezaniso, pa mapeto e sumana, isusu tino mukana we kupasa mhinduro pa Fundo ye Murindiri. Pa misangano ye pakati pe sumana, isusu tingakwanisa kudaira pa Upfumi Watinogumira mu Bhaibheri, Fundo ye Bhaibheri ye Ungano, kana kuti matii amweni.

3. Zvitsinzwa zvipi zvatingasongana nazvo, uye masoko ari pana Ahebheru 10:24, 25 anotibetsera kudini?

³ Tese isusu tinoda maningi kukudza Djehovha uye kubambisa hama dzedu. Asi patinonga tecida kupasa mhinduro, pamweni tingasongana no zvinetso. Tingakwanisa kuzwa kuthya patinonga tecida kupasa mhinduro. Pamweni tingatoda kudaira asi atipaswi mukana patinomutsa nyara. Tingarhwisana kudini no zvinetso izvi? Mhinduro yakhona tinoigumira mu tsamba yakatumirhwa ndi Pauro ku Ahebheru. Paaibhuya ngezve kukosha ke kuungana, Pauro wakabhuya kuti awona aidikana kukanda ndangariro dzawo pa “kubambisana.” (Erengai Ahebheru 10:24, 25.) Hino patinozwisisa kuti hama dzimweni dzingazwa kubambiswa nge mhinduro doko dzatinopasa, isusu tinozwa takasudzunuka kuti tipase mhinduro. Kunyazi tisikazi kupaswa mukana kakawanda hingana zvataida, tinopfara nge kuziya kuti hama dzimweni dzaonawo mukana we kupasa mhinduro.—1 Ped. 3:8.

4. Zviro zvipi zvitatu zvaticaona mu fundo ino?

⁴ Mu fundo ino, ticaona kuti tingabambisana kudini mu  ungano doko mekuti anhu anopasa mhinduro akashomanika. Pedzepo, ticaona kuti tingabambisana kudini mu ungano yakakura mekuti muno anhu akawanda anomutsa nyara kuti apase mhinduro. Pakupedzesera, ticaona kuti tingaita kudini kuti zvatinoreketa pa mhinduro dzedu zvibambise hama dzedu.

5. Tingabambisana kudini mu ungano doko?

⁵ Mu ungano dzidoko dzakawanda kana kuti grupu, kakawanda kakhona amuoneki anhu akawanda anomutsa nyara kuti apase mhinduro. Pamweni paya, muitisi unotodikana kuetsera padoko asati aona unoda kupasa mhinduro. Nge mushobo uwona musangano ungaita hingana kuti uri kunonoka kupera uye izvona zvingamuitisai kuti muore mwoyo. Cinyi camungaita? Mutsai nyara kakawanda. Kana mukadaro, munopasa simba amweni kuti amutsewo.

6-7. Ciro cipi camungaita kuti musagare no shungu pamunonga mecipasa mhinduro?

⁶ Asi zvakadini kana mecizwa kuthya ngekundorangarira basi kupasa mhinduro? Akawanda anozwa kudaro. Asi imwimwi mungaita kudini kuti musagare no shungu pamunonga mecipasa mhinduro uye kuti mukwanise kubambisa hama no hanzvadzi?

⁷ Imwimwi mungaerengazve zvimweni zvakabuda mu fundo ye Murindiri. b Ngo muezaniso, imwe yakhona nge yekuti, nyasai kugadzirira. (Zvie. 21:5) Pamucanyasa kuziya zvamucafunda ku misangano, zvicamuitai nyore kuti mupase mhinduro. Cimweni camungaita, nge cekupasa mhinduro dzisikazi kureba. (Zvie. 15:23; 17:27) Imwimwi pamweni amuzogari no shungu kana mukapasa mhinduro isikazi kureba. Kusiya izvona, hama no hanzvadzi dzinonyasa kuzwisisa mhinduro yakhona yakafupika, mutsetse umwe kana kuti miiri pane kupasa mhinduro yakareba ino masoko akawanda. Pa munopasa mhinduro yakafupika nge masoko enyu kamare, imwimwi mucanyasa kupangidza kuti makanyasa kugadzirira uye kuti mazwisisa kamare zviri kurekethwa ipona.

8. Djehovha anokoshesa kudini kupeta masimba katinoita no mwoyo wese?

⁸ Hino ngatimboti maedza kuseenzesa mazano manganani aya, asi kunyazi zvakadaro imwimwi munogara no shungu pamunonga mecipasa mhinduro! Imwimwi mungagonda kuti Djehovha anokoshesa kupeta masimba kamunoita ke kuita zviya zvamunokwanisa kuita. (Ruka 21:1-4) Kupeta masimba kamunoita azvirei kupasa zvinopindiridza zviya zvamunokwanisa kuita. (Afi. 4:5) Hino itai zvinangwa zvamunokwanisa kudzadzisa uye itai munamato kuna Djehovha mecikumbira mwoyo wakaterama. Pakutanga, cinangwa camunaco pamweni nge cekupasa mhinduro isikazi kureba.

9. Zvinetso zvipi zvinomuka mu ungano yakakura?

⁹ Mugariro ungakwanisa kusiyana, kana imwimwi muri mu ungano ino aparidzi akawanda. Zvingaita kuti hama no hanzvadzi dzakawanda dzingamutsa nyara kuti dzipase mhinduro, asi kakawanda uya unonga eciitisa ungatama kumupasai mukana wekuti mudaire. Ngo muezaniso, hanzvadzi imweni inozwi Danielle kakawanda yaida kupasa mhinduro pa misangano. c Kairi, kupasa mhinduro itori dii ye kunamata kayo Djehovha, mushobo we kubambisa amweni uye mushobo we  kubambisa kutenda kayo mu zvinofundiswa no Bhaibheri. Asi hanzvadzi ii payakacinjwa kwenda ku ungano yakakura, iyona yaipaswa mikana padoko yekuti apase mhinduro uye nguwa dzimweni yaitopedza musangano wese asikazi kupasa mhinduro. Danielle unoti: “Inini ndaigara ndakanyangadzwa maningi, zvaiita hingana kuti ndiri kuruza makomborero. Mumasure mekupedza nguwa yakareba usikaoni mukana we kupasa mhinduro zvinoita hingana kuti muitisi uri kuita kuda kake.”

10. Tingatunhudzira kudini mikana yedu yekupasa mhinduro pa misangano?

¹⁰ Imwimwi makambozwawo hingana Danielle? Pakadaro, imwimwi mungakwanisa kuramwa kupasa mhinduro uye moetsera kuzwa basi. Asi musaime kuedza kudaira. Hino ngazvipi zvamunodikana kuita? Imwimwi mungagadzirira mhinduro dzakawanda pa musangano umwe na umwe. Kana mukasama kudainzwa pakutanga ke fundo, imwimwi munonga mucino mukana we kupasazve mhinduro. Pamunogadzirira Fundo ye Murindiri, onai kuti ndima imwe na imwe iri kubatana kudini no musoro we fundo. Nge kuita kudaro, imwimwi mucakwanisa kupasa mhinduro dzakanaka pa fundo yese. Kusiya izvona, imwimwi mungakwanisa kunyasa kugadzirira kuti mukwanise kudaira mu mandima anoreketa ngezve zviro zvakadzika, e kuti kajinji kakhona anoshupha kupanganidza. (1 Ako. 2:10) Ngei? Ngekuti pamweni anhu akawanda aamutsi nyara pa mandima awona. Asi kana mukaedza kuita zvese izvi uye mokonerhwa kupasa mhinduro, mumasure me kuedza pa misangano dzakawanda, mungaitei? Imwimwi mungakwanisa kucedza no muitisi musangano usati watanga, momubvunza kuti ndaizopfarira kupasa mhinduro pa ndima yakati.

11. Afiripi 2:4 inotikohomedzesa kuitei?

¹¹ Erengai Afiripi 2:4. Muphostori Pauro akakohomedzesa Akristu kuti akande zvido zve amweni pa mbuto yekutanga. Tingaseenzesa kudini mazano aya patinonga tiri pa misangano? Nge kuedzurira kuti hingana isusu, amweni arikudawo kudaira.

12. Mushobo upi umweni wakanaka we kubambisa amweni pa misangano? (Onai mufanikiso.)

 ¹² Cimborangarirai ngezve muezaniso unoteera. Kana imwimwi mecicedza no shamwari yenyu, munondoreketa musikaipasiwo mukana we kureketa? Zvezvirokwazvo haiwa! Imwimwi munomubatanidzawo pamunonga mecireketa. Ngo mushobo umwewo, isusu tinoda kuti hama dzakawanda dzipase mhinduro pa misangano. Zvezvirokwazvo, umwe mushobo unokosha we kupangidza rudo ku hama no hanzvadzi dzedu nge we kuapasa mukana we kureketa ngezve kutenda kawo. (1 Ako. 10:24) Ngatione kuti tingazviita kudini.

13. Tingaitei kuti anhu akawanda agare no mukana we kupasa mhinduro?

¹³ Ciro cekutanga catingaita, nge cekupasa mhinduro isikazi kureba, nge kuita kudaro, anhu amweni akawanda acagara no mukana we kupasawo mhinduro. Akuru no aparidzi aano nguwa yakareba ari musangano angakwanisa kupasa muezaniso. Kunyazi imwimwi mecipasa mhinduro isikazi kureba, edzai kuita kuti musapase mafundo akawanda pa nguwa imwewo. Kana imwimwi mukadaira ndima yese, mucasira amweni mukana mudoko wekuti akwanise kupasa mhinduro. Hinga muezaniso, mu ndima ino mabhuiwa ngezve mazano mairi—kusama kupasa mhinduro yakareba uye kusama kupanganidza mafundo akawanda pa nguwa imwewo. Hino kana imwimwi mukagara no mukana we kutanga kudaira ndima ino, madini kudaira zano rimwe basi pa mairi aya?

14. Cinyi cingatibetsera kuti tiziye kuti tingamutsa kangana nyara yedu? (Onai mufanikiso.)

¹⁴ Garai munhu anozwisisa pamunonga mecisanangura kuti mucadaira kangana. Kana imwimwi mukamutsa nyara kakawanda, izvona zvingakwanisa kuita kuti muitisi azwe kubambidzirhwa kupasa mukana imwimwi kuti mudaire kunyazi amweni asati adaira. Izvi zvingapedzesera zvaakurembesa amweni kumutsa nyara.—Mup. 3:7.

15. (a) Tinodikana kuitei kana muitisi akasama kutipasa mukana we kupasa mhinduro? (b) Aitisi angapangidza kudini kuti anokoshesa umwe na umwe? (Onai bhokisi rakazwi: “ Kana Imwimwi Meciitisa Dii.”)

¹⁵ Kana hama dzakawanda dzikamutsa nyara pa nguwa inonga yeciizwa fundo, zvingaita  kuti pamweni tisadaire kakawanda hinga zvataida. Nguwa dzimweni muitisi angakonerhwa kutipasa mukana kunyazi kamwe hako. Izvona zvingakwanisa kuita kuti tiore mwoyo, asi atidikani kunyangadzwa ngokuti atizi kupaswa mukana.—Mup. 7:9.

16. Tingabambisa kudini aya anopasa mhinduro pa misangano?

¹⁶ Kana imwimwi mukasama kudaira kakawanda hingana zvamaida, zvakadini kunyasa kupurutana mhinduro dzinopaswa no amweni uye mumasure me misangano moatenda nge zvaanonga aita? Pamweni hama no hanzvadzi dzingazwa kubambiswa ngekudzisimba kamunodziita kuita hingana kubambiswa kaaizoizwa nge mhinduro yenyu iya yamaida kupasa. (Zvie. 10:21) Kutenda ndi umweni mushobo we kubambisa amweni.

17. (a) Abereki angabetsera kudini ana awo kuti apase mhinduro dzinoenderana no thunga rawo? (b) Maererano no vhidhiyo, zviro zvipi zvirongomuna zvingakwanisa kuizwa pamunonga mecigadzirira mhinduro? (Onai masoko e pasi.)

¹⁷ Ndi mushobo upi watingabambisana nawo pa misangano? Kana imwimwi muno ana, abetserei kuti agadzirire mhinduro maererano no thunga rawo. (Mat. 21:16) Nguwa dzimweni, nyaya dzinokosha, dzakaita hinga dze mucato kana kuti dze pamaponde, dzingakwanisa kupanganidzwa panonga peciizwa fundo. Kunyazi zvakadaro, pangaoneka mandima mairi kana matatu ekuti ana enyu  angadaira. Kusiya izvona, betserai mwana wenyu kuzwisisa kuti apesepi paanomutsa nyara paangapaswa mukana. Nge kuita kudaro, amweni paanozopaswa mukana we kudaira, iyena aazogari no shungu.—1 Ti. 6:18. d

18. Tingaita kudini kuti tisadzionese patinonga tecidaira pa misangano? (Zvierengo 27:2)

¹⁸ Tese isusu tingakwanisa kugadzirira mhinduro dzinobambisa, dzekuti dzinokudza Djehovha uye dzinobambisa hama no hanzvadzi dzedu. (Zvie. 25:11) Nguwa dzimweni, tingakwanisa kupasa mhinduro inopanganidza ngezve esperiensiya yatakambosongana nayo kamare, asi atidikani kupanganidza zvakawanda nge zvedu kamare. (Erengai Zvierengo 27:2; 2 Ako. 10:18) Kusiya izvona, mhinduro dzedu dzinodikana kuenderana no zva Djehovha, Soko rake, uye no sangano rake rese. (Zvak. 4:11) Zviri pamhene kuti, kana mubvunzo we mundima ukakumbira kuti tipanganidze zvatiri, tingaita izvona. Muezaniso wakadjeka unobhuya izvona ucaoneka mu ndima inoteera.

19. (a) Tinogara no mugumisiro upi kana tikakoshesa munhu umwe na umwe unonga ari pa misangano? (Aroma 1:11, 12) (b) Ngei mecipfarira kudaira pa misangano?

¹⁹ Izvirokwazvo kuti apana zvimutemo zvinopanganidza mushobo watinodikana kudaira. Asi tese isusu tingakwanisa kupeta masimba kuti timbabise hama no hanzvadzi dzedu patinodaira pa misangano. Mushobo umweni we kuita izvona nge we kupeta masimba kuti tidaire kakawanda, nguwa dzimweni zvinoda kuti tigutsikane no mukana watinawo we kupasa mhinduro uye topfara patinoona amweni ecidairawo pa misangano. Kana tikakanda zvido zve amweni pa mbuto ye kutanga pa misangano, tinokwanisa “kubambisana kakawanda.”—Erengai Aroma 1:11, 12.