1. Matthew wakapangidza kudini kuti zvezvirokwazvo waitenda mu kariro ye rumuko?

 MUDJAHA umweni unozwi Matthew uno nhenda yakakura zvekuti wakaizwa operasau kakawanda. Zuwa rimweni, paainga ano makore 7, iyena no mhuri yake aiwona urongwa we JW Broadcasting^®. Urongwa uu pawainga woopera, awona akaona vhidhiyo yaipangidza anhu ecitambira aya ainga ecimutswa mu paraizo. b Mumasure mekuona urongwa iwona, Matthew wakakhwedera padhuze no abereki ake uye wakabata nyara dzawo, oabvunza kuti: “Baba, Mai, mazviwona here? Kunyazi ndikafa, zvese Zvicanaka, ndietserei basi.” Munokwanisa kurangaridza kuti abereki aya akazwa kudini paakaona kuti kariro ye rumuko ye mwana wawo yainga yezvirokwazvo?

2-3. Ngei zvakanaka kuti tinyase kurangarira ngezve cipikirhwa ce rumuko?

² Kurangarira ngezve rumuko, i ciro catinodikana kuita nguwa dzimweni. (Juau 5:28, 29) Ngei? Ngokuti atizii zuwa raticabatana no nhenda yakakura kana kufirhwa no munhu watinoda. (Mup. 9:11; Tig. 4:13, 14) Kariro yedu yatinayo mu rumuko ingakwanisa kutipasa simba ratinoda kuti tikwanise kukunda zvinetso zvatingasongana nazvo. (1 Ate. 4:13) Bhaibheri rinotigondesa kuti Baba edu e kudenga Djehovha anotiziya uye anotida maningi. (Ruka 12:7) Iyena anonyasa kutiziya zvekuti anokwanisa kutimutsazve no unhu watainga tinawo. Uye iyena anotida maningi zvekuti anotipasa mukana we kurarama nokusikaperi, kunyazi zvecitodikanwa kuti timutswe!

³ Mu fundo ino, ticatanga ngekuona kuti ngei tecidikana kutenda mu rumuko. Pedzepo, ticafunda ngezve ngano iri mu Bhaibheri icabambisa kutenda kedu, mu ngano iyona ndimona maticagumira tsamba iri kutungamirira fundo ino, inoti: “Hama yako icamutswa.” (Juau 11:23) Pakupedzesera, ticaona kuti tinodikana  kuitei kuti kariro ye rumuko igare inokosha katiri.

4. Kuti titende mu cipikirhwa tinodikana kugara no rugondo rei? Pasai muezaniso.

⁴ Kuti titende mu cipikirhwa, tinodikana kugara no rugondo rekuti munhu akaita kariroyo ano cido uye simba, kana kuti anokwanisa kuzviita. Rangaridzai ngezve muezaniso unoteera: Cimborangarirai mumasure me kuitika ke tsawana nyumba yenyu inonga yecida kugadziriswa. Pedzepo shamwari yenyu inoguma ipona yomubvunzai kuti: ‘Ndingakwanisa kukubetsera kugadzira nyumba ii.’ Izvona zvinopangidza kuti shamwari yenyu ino cido ce kumubetserai. Kana shamwari yenyu yeciita basa re kuwaka uye ino zviro zvese zvinoseenzeswa pa kuita basa irona, imwimwi mucakwanisa kugonda kuti shamwari yenyu ino cido uye ino simba kuti izviite. Hino imwimwi mucagonda no zviya zvaakabhuya. Kodi tingakwanisawo kugara no rugondo rakadaro mu kariro ya Mwari mu rumuko? Asi iyena zvezvirokwazvo ano cido no simba re kuzviita kamare?

5-6. Ngei tingagara no rugondo rekuti Djehovha ano cido ce kumutsa aya akafa?

⁵ Kodi Djehovha ano cido ce kumutsa akafa here? Zvezvirokwazvo, iyena anaco. Kuti apangidze izvona iyena akaita kuti aya ese akatara Bhaibheri abhuye ngezve kariro iyona ye mune ramangwana. (Isa. 26:19; Oze. 13:14; Zvak. 20:11-13) Kana Djehovha akapikira, iyena anodzadzisa. (Djs. 23:14) Djehovha anocidaka-daka ce kumutsa aya akafa. Tinozviziya kudini izvona?

⁶ Hinga muezaniso, onai zvakarekethwa na Djobo. Iyena wainga ano rugondo rekuti kunyazi kana akafa, Djehovha aizozwa cisuwo, omumutsa. (Djobo 14:14, 15, masoko e pasi) Djehovha anozwa cisuwo ce aseenzi ake ese akafa. Iyena arikuda maningi kuamutsa uye kuapasa upenyu uno uthongo no mupfaro. Rangaridzai mabhiriyonji e anhu akafa asikazi kuziya Djehovha. Mwari wedu ano rudo anodawo kuamutsa. (Zvii. 24:15) Djehovha anoda kuti awona agare no mukana we kugara shamwari dzake uye aone upenyu usikaperi pa nyika. (Juau 3:16) Hino zviri pamhene kuti Djehovha ano cido ce kumutsa akafa.

7-8. Ngei tingagara no rugondo rekuti Djehovha ano simba rekumutsa akafa?

⁷ Kodi Djehovha ano simba rekumutsa akafa? Zviri pamhene kuti honde! Iyena nge we “Masimba ese.” (Zvak. 1:8) Iyena ano simba re kutsakatisa muzondi upi hake, kutobatanidzawo rufu. (1 Ako. 15:26) Kuziya izvona zvinotibambisa uye zvinotinyaradza. Onai muezaniso we Hanzvadzi Emma Arnold. Awona no mhuri yawo akasongana no zviro zvaiedza kutenda kawo mu Hondo II ye Nyika yese, kutobatanidzawo kuruza anhu akawanda aaida mu musasa we asungwa mu Nazista. Kuti anyaradze mwana wawo, hanzvadzi Emma akati: “Kudai rufu rainga rino simba rekuita kuti anhu arumbwe akafa nokusikaperi, ringadai rino simba kupinda Mwari, andizvopi?” Apana cino simba kupinda Djehovha! Ngokuti Mwari wedu we masimba ese ndiyena akasika upenyu, zvezvirokwazvo ano simba re kuhwirinzazve upenyu ku aya ese akafa.

⁸ Ticino zvikonzero zvimweni zvinopangidza kuti ano cido ce kumutsa aya akafa. Ndangariro dzake adzina mugumo. Kuti tinyase kuzvibata, iyena anodainza nyeredzi imwe na imwe ngo zina rayo. (Isa. 40:26) Kusiya izvona, iyena anoedzurira aya akafa. (Djobo 14:13; Ruka 20:37, 38) Kuna Djehovha zviri nyore kuedzurira zviro zvese zvinocokuita no aya aacamutsa, izvona zvinobatanidza mushobo waainga akaita, unhu wawo, zvaakasongana nazvo mu upenyu uye zvaaiedzurira.

9. Ngei imwimwi mecitenda mu cipikirhwa ca Djehovha ce rumuko?

 ⁹ Tisina kana mubvunzo tinokwanisa kugonda mu kariro ya Djehovha ye rumuko, ngokuti tinoziya kuti iyena ano cido uye simba re kuzviita. Asi tino ciro cimweni cinoita kuti titende mu kariro ye rumuko: Djehovha akamboita izvona kare. Mu nguwa ye kare, iyena akapasa simba irona ku aseenzi ake amweni, kutobatanidzawo Djesu kuti amutse akafa. Ngaticifundei zvino ngezve rumuko rakaizwa ndi Djesu, riri pana Juau kapituro 11.

10. Masoko api akatambira Djesu, uye iyena akaitei? (Juau 11:1-3)

¹⁰ Erengai Juau 11:1-3. Ngatihwirirei mu mapeto e gore ra 32 K.A. ku Bhetaniya. Djesu ainga ano shamwari dzakanaka mu nharaunda irona—Razaro no madziyaya ake airi, Marta na Mariya. (Ruka 10:38-42) Asi Razaro wakarhwara maningi, zvekuti madziyaya ake ainga aakunetseka ndizvo. Ndiyo ndaa awona akatumira masoko kuna Djesu, ainga ari kudii rimweni re Djorodhani, rhwendo rinopedzwa mazuwa maiiri mecihamba. (Juau 10:40) Zvinotsukwarisa kuti Razaro wakafa pa nguwa yakaziiswa Djesu masoko awona. Kunyazi Djesu aitoziya kuti shamwari yake yainga yatobva kufa, Djesu akaetsera mazuwa mairi kuti aende ku Bhetaniya. Hino Djesu paakaguma ku Bhetaniya, Razaro wainga aano mazuwa marongomuna afa. Asi ngei Djesu akaetsera nguwa yese ii? Ngekuti pane kuti abetsere shamwari dzake, iyena aida kuita zviro zvinokudza Djehovha Mwari.—Juau 11:4, 6, 11, 17.

11. Mu ngano inobhuya ngezva Razaro tinofundei ngezve ushamwari?

¹¹ Ngano ii inotifundisawo nge zve ushamwari. Cimborangarirai zvinoteera: Mariya na Marta paakatumira masoko kuna Djesu, awona aazi kukumbira kuti iyena aende ku Bhetaniya. Awona caakaita kuziisa basi kuti shamwari yenyu ye pamwoyo irikurhwara. (Juau 11:3) Kusiya izvona, Djesu kudai akatomutsa Razaro ngece kure. Kunyazi zvakadaro, iyena wakasanangura kuenda ku Bhetaniya koogara no shamwari dzake Marta na Mariya. Imwimwi muno shamwari yakadaro here yakagadzirira kumubetsera kunyazi musikazi kuikumbira? Hino imwimwi mucagonda kuti shamwari iyona icamubetserai kunyazi “mukabatana no matambudziko.” (Zvie. 17:17) Hingana Djesu, tingakwanisa kugara shamwari yakadaro ku anhu amweni! Zvino ngaticihwirirei ku ngano ya Razaro tione kuti cinyi cakazoitika mu masure mazvo.

12. Djesu akagondesei Marta, uye ngei Marta waidikana kutenda mu cipikirhwa icona? (Juau 11:23-26)

¹² Erengai Juau 11:23-26. Marta wakazoziya kuti Djesu ainga aakuguma ku Bhetaniya. Hino wakaenda ecigogoma koosongana naye uye wakati: “Tenzi, kudai mainga muri pano, hama yangu ingadai isikazi kufa.” (Juau 11:21) Zvezvirokwazvo, Djesu aikwanisa kuporesa Razaro. Asi iyena aida kuita ciro cinoshamisa. Iyena akagondesa kuti: “Hama yako icamuka.” Uye iyena akapasa Marta cikonzero cimweni cinoita kuti atende pacipikirhwa icona: “Inini ndini rumuko no upenyu.” Ndizvona  kamare, Djesu ainga akapaswa simba ra Mwari rekumutsa aya akafa. Kutobatanidza aya aainga akamutsa mu migariro dzakasiyana, musikana wainga waanomazuwa manganani afa no mudjaha wainga afa zuwa rimwe-rimwero. (Ruka 7:11-15; 8:49-55) Kuzoti Razaro kei, wainga ano mazuwa maromgomuna afa uye waakutonuhwa. Hino Djesu aizokwanisa kumumutsa here?

13. Hingana zvakatarhwa pana Juau 11:32-35, Djesu anoitei paanoona Mariya no amweni ake ecicema? (Onai mufanikiso.)

¹³ Erengai Juau 11:32-35. Cimborangaridzai imwimwi muripoo meciona zvese zvirikuitika. Mariya, unoonanazve na Djesu. Iyena unophindazve masoko amwe-amwewo akarekethwa ndi Marta eciti: “Tenzi, kudai mainga muri pano, hama yangu ingadai isikazi kufa.” Mariya no anhu amweni kutobatanidzawo na iyena akatsukwara maningi. Paaiyaona ecicema, Djesu akarumbwa akanyarara uye akatsukwara. Ecirhwadziwa ngekuona shamwari dzake dzakatsukwara, Djesu akatanga kucema. Iyena ainyasa kuziya kamare kurhwadza kazvinoita kufirhwa nge munhu watinoda!

14. Zvakaizwa ndi Djesu paakaona Mariya ecicema zvinotifundisei ngezva Djehovha?

¹⁴ Mushobo wakazwa Djesu paakaona Mariya ecicema unonyasa kupangidza kuti Djehovha ndi Mwari ano mazwiro akaezana no ake. Tinozviziya kudini izvona? Hingana zvataona mu fundo yadarika, Djesu anoteedzera nge mushobo wakakwana mazwiro uye maitiro a Djehovha. (Juau 12:45) Hino patinoerenga kuti Djesu akazwira usisi shamwari dzake zvekuguma pakucema, tinokwanisa kutendera kuti Djehovha anogara no mazwiro okutsukwara paanoona misodzi yedu. (Pis. 56:8) Kurangarira izvona kunotunhudzira cido cedu cokugara no shamwari yedu ino rudo Djehovha andizvopi?

15. Hingana zvinorekethwa pana Juau 11:41-44, cinyi cakaitika Djesu paakaguma pa guwa ra Razaro? (Onai mufanikiso.)

¹⁵ Erengai Juau 11:41-44. Djesu anoguma paguwa rainga rakaigwa Razaro uye anokumbira kuti abvise buwe rainga rakafunga pamusuwo. Marta unophikisa eciti, mwiri wake pamweni waakunuhwa maningi. Asi Djesu anodaira kuti: “Andizi kukubvunza kuti kana ukagara nokutenda ucaona kukudzwa ka Mwari?” (Juau 11:39, 40) Pedzepo Djesu akaringisa  kudenga oita munamato pamberi pe anhu ese. Iyena arikuda kukudza Djehovha nge zvese zvirikuda kuitika ipona. Pedzepo Djesu anokhuwa nge izwi guru eciti: “Razaro, buda!” Uye Razaro unobuda ecihamba kubva mukati me guwa! Djesu wakakwanisa kuita ciro caiita hinga acikwanisiki kuitika.—Onai masoko e pasi e kufunda ari pana Juau 11:17.

16. Kapituro 11 ya Juau inobambisa kudini kutenda katinako mu kariro ye rumuko?

¹⁶ Kapituro 11 ya Juau inobambisa kutenda kedu mu kariro ye rumuko. Nge gwanza ripi? Karirai ngezve cipikirhwa cakabhuiwa ndi Djesu ecibvunza Marta paakabhuya kuti: “Hama yako icamutswa.” (Juau 11:23) Ngokuti wakaezana na Baba ake, Djesu ano simba uye cido rekudzadzisa zvipikirhwa izvi. Kucema kakaita Djesu kunonyasa kupangidza kuti iyena anoda no mwoyo wese kupedza rufu uye matambudziko. Kupinda izvona Razaro paakabuda mu guwa, Djesu akapangidza kuti ano simba rekumutsa akafa. Pakupedzesera, rangarirai ngezve masoko akabvunzwa Marta ndi Djesu: “Andizi kukubvunza kuti kana ukatenda ucaona simba ra Mwari?” (Juau 11:40) Isusu tinozvikonzero zvakanaka zvekutenda kuti zvipikirhwa zva Mwari zve rumuko zvicaitikadi zvezvirokwazvo. Hino, tinodikana kuitei kuti zvipikirhwa izvona zvigare zvakabamba katiri?

17. Tinodikana kurangarirei patinoerenga ngezve nyaya dze rumuko dziri mu Bhaibheri?

¹⁷ Erengai uye torai nguwa yekunyasa kurangarira ngezve rumuko rakaitika. Mu Bhaibheri tinogumira ngano dzinokwana kuita 8 dze anhu akamutswa kuti ararame pa nyika pano. c Zvakadini kutora nguwa kuti munyase kufunda ngezve ngano idzi? Pamunoita izvona edzurirai kuti aya ainga ari anarume, anakadzi uye no ana akagondeka. Psvakai kufunda ciro pa ngano imwe na imwe. Tarirai kuti rumuko rimwe na rimwe rinopangidza kudini kuti Mwari ano cido uye simba rekumutsa aya akafa kuti araramezve. Maka-maka, kutora nguwa kuti muerenge uye munyase kurangarira ngezve rumuko  rinokosha ra Djesu. Rumuko iri rakaoneka ngo mabhirionji e anhu rinotunhudzira kutenda kedu uye musambofe makakanganwa izvi.—1 Ako. 15:3-6, 20-22.

18. Mungakhorovhera kudini ngoma dzinobhuya ngezve rumuko? (Onai masoko e pasi.)

¹⁸ Izwai “ngoma dzedu” dzinobhuya ngezve rumuko. d (Aef. 5:19) Ngoma idzona dzinobambisa kutenda kedu mukariro inoshamisa kuita kudaro rumuko rinogara rinokosha katiri. Izwai uye fundirai ngoma idzona. Imwimwi mungakwanisa kuongorora soko rimwe na rimwe pakunamata kenyu ke mhuri. Kandai ngoma idzona mundangariro dzenyu uye mu mwoyo menyu. Nge kuita kudaro, pamucasongana no zviro zvinokanda upenyu wenyu pangozi kana pamunofirhwa no munhu wamunoda, mwiya mucena wa Djehovha ucamubetserai kuedzurira mabhii e ngoma dziya. Nge kudaro, imwimwi mucagara no simba uye kunyaradzwa nge ndaa yazvo.

19. Tingarangaridzei ngezve rumuko? (Onai bhokisi rakazwi: “ Maizoabvunzisei?”)

¹⁹ Seenzesai marangariro enyu. Djehovha akatisika tecikwanisa kurangarira tiri mu mu nyika ipsva. Hanzvadzi imweni yakati: “Inini ndakapedza nguwa yakareba ndecirangaridza upenyu wangu mu nyika ipsva uye kuzwa kunuhwirira ke maruwa anonga ecifununguka mu Paraiso.” Imai kuti murangaridze kuti zvicange zvakadini kuziya anarume no anakadzi e mu nguwa dze Bhaibheri. Ndiyani wamaizopfarira kuziya? Mibvunzo dzipi dzamaizoita? Cimborangaridzaizve kuti zvicange zvakadini pamucazosongana no hama no shamwari dziya dzakafa. Rangarirai ngezve ciro cimwe na cimwe pamucasongana nawo—ciro cokutanga camucabhuya, kukhumbatira kakabamba kamucaita, uye kucema kamucaita nge mupfaro.

20. Tinodikana kushinga kuitei?

²⁰ Isusu tinotenda maningi nge zvipikirhwa zva Djehovha zve rumuko! Tingakwanisa kugara no rugondo rokuti izvona zvicadzadzika, ngekuti Djehovha ano cido uye simba rekuzvidzadzisa. Ndiyo ndaa tinodikana kushinga kubambisa kutenda kedu mu kariro ii ye rumuko inoshamisa. Ngekuita izvona, zvicatikhwededza dhuze na Djehovha, Mwari anogondesa ku umwe na umwe wedu kuti: ‘Uya wamunoda ucamutswa!’