MUSORO WE KUFUNDA 19
Tingabambisa Kudini Kutenda Kedu mu Cipikirhwa ca Djehovha ce Nyika Ipsva?
“Kana [Djehovha] akareketa ciro, aaciiti here?”—NUM 23:19.
NGOMA 142 Kariro Inotipasa Ushingi
ZVATICAFUNDA a
1-2. Tinodikana kuitei patinonga tecietsera nyika ipsva?
ZVAKANAKA maningi kuziya kuti Djehovha akagondesa kuti migariro ino ye zviro icapera uye torarama mu nyika ipsva. (2 Ped. 3:13) I zvirokwazvo kuti atizii kuti nyika ipsva icauya riini, asi tino cokwadi cakadjeka cekuti atizoetseri ke nguwa yakareba.—Mat. 24:32-34, 36; Zvii. 1:7.
2 Kunyazi zvakadaro, tese isusu tinodikana kubambisa kutenda kedu mu cipikirhwa ce nyika ipsva, azvinei kuti taano nguwa yakareba kudini tiri mu cokwadi. Ngei? Ngekuti kunyazi kutenda kedu kakabamba ikona kunokwanisa kuremba. Ndiyo ndaa, muphostori Pauro wakabhuya kuti kutama kugara nokutenda “citema cinotibata nokukasika.” (Aheb. 12:1) Kuti kutenda kedu kusarembe tinodikana kuongorora ngezve upupuri watinawo unopangidza kuti nyika ipsva yaa padhuze.—Aheb. 11:1.
3. Ticaonei mu fundo ino?
3 Mu fundo ino ticaona zviro zvitatu zvatinodikana kuita kuti tibambise kutenda kedu mu cipikirhwa ca Djehovha caakaita ce nyika ipsva: (1) kunyasa kurangarira ngezve rusudzunuro, (2) kurangarira ngezve simba ra Djehovha, uye (3) kuita ma basa e ku mwiya. Mumasure mazvo ticaona kuti masoko akapasa Djehovha Abhakuki anobambisa kudini kutenda kedu nyamasi uno. Asi cokutanga, tinodikana kugara nokutenda kakabamba mucipikirhwa ce nyika ipsva kuti tikwanise kushingirira mugariro unoshupha we mazuwa ano.
MIGARIRO YE ZVIRO INODA KUTI TIGARE NO KUTENDA KAKABAMBA
4. Zvisananguro zvipi zvinoda kuti tigare nokutenda kakabamba?
4 Mazuwa ese tinodikana kuita zvisananguro zvidoko kana kuti zvikuru. Ngo muezaniso, ushamwari, waraidzo, fundiso, mucato, ana uye basa. Asi ciro cimweni cinotiitisa kuti tiite zvisananguro zvakanaka kugara no kutenda kakabamba. Zvainga zvakanaka kudzibvunzisa kuti: ‘Zvandiri kusanangura zvinopangidza here kuti ndino rugondo rekuti nyika ino ngeye nguwa doko uye nyika ipsva yaakuda kuguma here? Kana kuti ndinosanangura kuita zviro hinga zvinoizwa no anhu amweni anorangarira kuti azviiti kurarama nokusikaperi?’ (Mat. 6:19, 20; Ruka 12:16-21) Kana tikabambisa kutenda kedu pakuti nyika ipsva yaa padhuze ticakwanisa kuita zvisananguro zvakanaka.
5-6. Panganidzai kuti ngei tecidikana kugara tino kutenda kakabamba patinobatana no zvinetso?
5 Isusu tinodikana kugara nokutenda kakabamba kuti tikwanisane no zvinetso. Pamweni tinokwanisa kubatana nokuteererhwa, nhenda isikarapiki, no zviro zvimweni zvinoita kuti tiore mwoyo. Pakutanga pamweni tingarangarira kuti tingakwanisa kushingirira zvinetso izvona. Asi mugariro iwona ukabambirira ke nguwa yakareba hinga zvinosoitika no miedzo—tinodikana kugara no kutenda kakabamba kuti tikwanise kushingirira uye kurumbwa teciseenzera Djehovha no mupfaro.—Aro. 12:12; 1 Ped. 1:6, 7.
6 Patinonga tecibatana no mugariro unoshupha, tingatanga kurangarira kuti nyika yakagondeswa na Djehovha aizombofi yakauya. Izvona zvinoda here kubhuya kuti kutenda kedu kakaremba? Haiwa andizvopi. Rangaridzai ngezve muezaniso unoteera. Panguwa yekuti cando ciri kunyanyisa isusu tingarangarira kuti akuzombopisizve. Asi kupisa kunozondoita. Nge mushobo umwewo, patinonga takaora mwoyo, tinotanga kurangarira kuti nyika ipsva aizombogumi. Asi kana tino kutenda kakabamba, tinogara no rugondo rekuti zvipikirhwa zva Mwari zvicadzadzika. (Pis. 94:3, 14, 15; Aheb. 6:17-19) Patinorumbwa tino rugondo irona, kunamata Djehovha kucarumbwa kuri ciro cinokosha maningi mu upenyu wedu.
7. Maonero api akashata atinodikana kungwarira?
7 Isusu tinodikana kugara no kutenda kakabamba kuti tiparidzire. Ku anhu akawanda atinoparidzira “masoko akanaka” e zve nyika ipsva ya Mwari, kaari anoti masoko aya akanaka maningi kuti agare e cokwadi. (Mat. 24:14; Ezek. 33:32) Asi atimbofi takatendera kuti maonero e anhu aya atikanganise. Asi kuti izvona zvisaitike tinodikana kurumbwa tecibambisa kutenda kedu. Ngationei mishobo mitatu ingatibetsera kuti tikwanise kuzviita.
NYASAI KURANGARIRA NGEZVE RUSUDZUNURO
8-9. Ngei kunyasa kurangarira ngezve rusudzunuro kecibambisa kutenda kedu?
8 Mushobo umweni wekubambisa kutenda kedu ngewekunyasa kurangarira mu rusudzunuro. Rusudzunuro ndi rugondeso rekuti Mwari acadzadzisa zvaakagondesa. Kunyasa kurangarira kuti ngei Djehovha akatipa rusudzunuro uye zvese zviya zvaaidikana kusiya nge ndaa ye rusudzunuro, zvicabambisa kutenda kedu zvekuti cipikirhwa ca Mwari ce upenyu usikaperi mu nyika ipsva cicadzadzika. Ngei mecibhuya kudaro?
9 Kuti atipase rusudzunuro Djehovha akatuma Mwana wake waanoda, munhu waaida maningi kuti abarhwe hinga munhu wakakwana. Djesu paainga ari panyika pano, akabatana no migariro yakawanda inoshupha. Pedzepo iyena akafa zvinorhwadza. Zvezvirokwazvo mutengo wakariphwa na Djehovha wainga wakakura maningi! Mwari wedu ano rudo wainga asikazotenderi kuti Mwana wake ashuphike maningi uye kuti afe kuti tigare no upenyu uri nane ke makore mashoma. (Juau 3:16; 1 Ped. 1:18, 19) Ngekuti Djehovha akaripa mutengo wakakura acaita zviri zvese kuti upenyu mu nyika ipsva ugare we zvirokwazvo.
RANGARIRAI NGEZVE SIMBA RA DJEHOVHA
10. Maererano na Aefeso 3:20, Djehovha ano simba rokuitei?
10 Ciro cecipiri cingabambisa kutenda kedu kurangarira ngezve simba ra Djehovha. Iyena ano simba rekudzadzisa zvese zvaakagondesa. Izvirokwazvo kuti cipikirhwa ce upenyu usikaperi mu nyika ipsva cingaita hingana aciitiki mu maonero e anhu. Asi Djehovha anogondesa zviro zvekuti anhu aazombofi akambozviita. Ngekuti iyena ngewe Masimba ese. (Djobo 42:2; Mark. 10:27) Hino taidikana kuetsera kuti Mwari aite cipikirhwa cekuti munhu upi hake ungakwanisa kucidzadzisa here?—Erengai Aefeso 3:20.
11. Pasai muezaniso we zvipikirhwa zvakadzadziswa na Mwari zvekuti mumaonero e anhu zvaiita hinga zvisikazombodzadziki. (Onai bhokisi rakazwi: “ Zvipikirhwa Zvimweni Zvinoshamisa Zvakadzadzika.”)
11 Ngationei zvipikirhwa zvimweni zvakaizwa na Djehovha ku anhu ake e kare uye zvaiita hingana zvisikazodzadziki. Iyena akagondesa Abrahamu na Sara kuti kunyazi awona ainga acembera aizobara mwana. (Gen. 17:15-17) Iyena akabvunzazve Abrahamu kuti aizopasa nyika ye Kanani kumubarirhwana wake. Cipikirhwa ici caiita hinga cisikazodzadziki ngekuti Aisraeri ainga ari abarirhwana a Abrahamu ke makore akawanda awona akashuphika hinga aranda mu Edjipitu, asi cipikirhwa ici cakadzadzika. Makore akazoteera Djehovha akati mwanakadzi umweni wainga acembera waizwi Erizabheti waizobara mwana. Iyena akagondesazve kuti Mariya musikana wainga ari mhandhwe waizobara Mwana wa Mwari, ecidzadzisa cipikirhwa ca Djehovha caakaita kare mumunda we Edheni!—Gen. 3:15.
12. Tsamba ya Djoshuwa 23:14 uye Isaya 55:10, 11 inopangidzei ngezve simba ra Djehovha?
12 Kana tikanyasa kurangarira kuti Djehovha akadzadzisa kudini zvipikirhwa zvaakapikira, kutenda kedu kekuti iyena acaunzisa nyika ipsva kucanyasa kubamba. (Erengai Djoshuwa 23:14; Isaya 55:10, 11.) Kana tikaita kudaro tinonga tagadzirira kubetsera anhu kuzwisisa kuti nyika ipsva kunonga kusiripi kurota. Djehovha akabhuya masoko anoteera ngezve matenga mapsva no nyika ipsva: “Masoko aya akagondeka uye ngee zvirokwazvo.”—Zvak. 21:1, 5.
BATIKANAI MU MABASA E KU MWIYA
MUSANGANO
Cimwe na cimwe ce mabasa aya e ku mwiya cingabambisa kudini kutenda kenyu? (Onai mandima 13)
13. Panganidzai kuti misangano ingabambisa kudini kutenda kedu?
13 Ciro cocitatu cinoita kuti tibambise kutenda kedu ngece kubatikana pamabasa e ku mwiya. Ngo muezaniso, cimborangarirai ngezve kubetserhwa katinoizwa no misangano ye ungano. Hanzvadzi imweni inozwi Anna ke makore akawanda yakaseenza mabasa akasiyana-siyana mu basa re nguwa yakadzara, yakati: “Misangano inoita kuti kutenda kangu kurumbwe kakanyasa kubamba, kunyazi muiti we mharidzo asikazi kunyasa kuita mharidzo yake kana kuti asiripi kufundisa ciro cipsva, kakawanda kakhona ndinozwa ciro cinondibetsera kuzwisisa zvakanaka Bhaibheri uye izvona zvinobambisa kutenda kangu.” b Kusiya izvona kutenda kedu kunonyasa kubamba patinozwa mhinduro dze hama no hanzvadzi dzaanopasa pamusangano.—Aro. 1:11, 12; 10:17.
BASA RE KUPARIDZIRA
Cimwe na cimwe ce mabasa aya e ku mwiya cingabambisa kudini kutenda kenyu? (Onai mandima 14)
14. Basa rekuparidzira rinobambisa kudini kutenda kedu?
14 Kuita basa rekuparidzira kuno simba rekubambisa kutenda kedu. (Aheb. 10:23) Barbara uri kuseenzera Djehovha ke makore anodarika 70, unoti: “Kandiri kuita basa rekuparidzira ciro cinobambisa kutenda kangu. Pandinoreketa no amweni ngezve zvipikirhwa zva Djehovha zvinoshamisa, kutenda kangu kunorumbwa kakabamba uye kecibudirira.”
FUNDO YE MUNHU EGA
Cimwe na cimwe ce mabasa aya e ku mwiya cingabambisa kudini kutenda kenyu? (Onai mandima 15)
15. Fundo ye munhu ega inobambisa kudini kutenda kedu? (Onai mifanikiso.)
15 Basa rimweni rinobambisa kutenda kedu i fundo ye munhu ega. Hanzvadzi imweni inozwi Susan inopfarira kuita urongwa painonga yecienda koofunda. Iyona inoti: “Mu Biningu inini ndinogadzirira fundo ye Murindiri ye sumana iri kuteera. Muciposi no Cipiri ndinogadzirira musangano ye pakati pe sumana. Uye mazuwa amweni e sumana inini ndine urongwa wekuita fundo ye munhu ega.” Ngekurumbwa ano urongwa wekuita fundo, Susan wakabambisa kutenda kake. Irene hanzvadzi imweni yaano makore yeciseenza ku sedhi mundial inoti, kufunda ngezve uphorofiti we Bhaibheri kunobambisa kutenda kangu. “Iyena unopanganidza kuti: “Inini ndinoona zvecishamisa kuti uphorofiti wa Djehovha unodzadzika kunyazi pa zviro zvidoko.” c
“ZVICADZADZIKA KAMARE”
16. Ngei tingati masoko akabhuya Djehovha ecibvunza muphorofita Abhakuki angaseenzawo katiri mazuwa ano? (Ahebheru 10:36, 37)
16 Aseenzi amweni a Djehovha ari kuetsera mugumo we mugariro uno we zviro ke makore akawanda. Mukuona ke anhu zvinoita hingana kuti zvipikirhwa zva Mwari zviri kunonoka kudzadzika. Asi Djehovha anoziya kuti aseenzi ake anozwa kudini, iyena akatoguma pakubvunza muphorofita Abhakuki kuti: “Ngekuti zvauri kupangidzwa zvicaitika pa nguwa yakasisira, uye nguwa yekuti zviitike yaa dhuze, izvona azvizombotami kuitika. Kunyazi zvikanonoka, rumbwa wakaetsera! Ngekuti izvona zvicandoitika. Azvizononoki!” (Abha. 2:3) Kodi Djehovha akareketa masoko aya kuti anyaradze Abhakuki basi here? Kana kuti masoko aya anoseenzawo katiri nyamasi uno? Afemerhwa, Pauro wakatarawo masoko amwewo ku Akristu arikuetsera nyika ipsva. (Erengai Ahebheru 10:36, 37.) Tingagonda hedu kuti kunyazi hazvo mumaonero edu zveciita hingana kuti zvipikirhwa izvi zvirikunonoka kudzadzika, izvona “zvicandodzadzika basi. Azvizononoki!”
17. Hanzvadzi imweni yakaseenzesa kudini mazano akapaswa Abhakuki ndi Djehovha?
17 Hama dzakawanda dzinoseenzesa mazano a Djehovha e “kurumbwa ecietsera” kunyazi ke makore akawanda. Ngo muezaniso Louise wakatanga kuseenzera Djehovha muna 1939, unoti: “Mu nguwa iyona, inini ndairangarira kuti Amagedhoni yaizouya ndisati ndapedza cikora ceku secundariya. Asi izvona azvizi kuitika. Ciro cakandibetsera makore ese aya ngecekuerenga ngano dze mu Bhaibheri dze anhu aidikana kuetsera Djehovha kuti adzadzise zvipikirhwa zvake akaita hinga Nowa, Abrahamu, Zuzee, uye no amweniwo. Kurumbwa ndecietsera kunobetsera inini no amweni kugara no rugondo rekuti nyika ipsva ya padhuze.” Hama dziri kuseenzera Djehovha ke nguwa yakareba dzinotenderana no masoko aya!
18. Kuona zviro zvakasikwa kungabambisa kudini kutenda kedu kekuti nyika ipsva icauya?
18 Izvirokwazvo kuti nyika ipsva aisati yaayo. Ngo muezaniso, cimborangarirai ku zviro zviya zvaapo zvakaita hinga nyeredzi, miti, zvinyama no anhu. Apana munhu waizobhuya kuti zviro izvi azviriyopi, asi kainga kuno nguwa yekuti zviro izvi zvainga zvisiriyopi. Izvona zviripo ngekuti Djehovha akazvisika. (Gen. 1:1, 26, 27) Mwari wedu akagondesa kuunzisa nyika ipsva. Uye iyena acadzadzisa cipikirhwa ici, kana cipikirhwa ici cikadzadzika anhu acagara no upenyu wakakwana nokusikaperi. Pa nguwa yakasisira ya Djehovha, nyika ipsva icaitikadi zvezvirokwazvo hinga zviro zvakawanda zvakatitenderedza.—Isa. 65:17; Zvak. 21:3, 4.
19. Imwimwi mungabambisa kudini kutenda kenyu?
19 Patinonga tecietsera nyika ipsva tinodikana kukhorovhera mikana yese kuti tibambise kutenda kedu. Nguwa dzese garai anotenda murusudzunuro. Rangarirai ngezve simba ra Djehovha. Uye nguwa dzese rumbwai makabatikana pa mabasa e ku mwiya. Nge mushobo iwona, imwimwi mucagara pakati pe aya e kuti “nokutenda uye no mwoyo unononoka kutsamwa awona anoona zvipikirhwa.”—Aheb. 6:11, 12; Aro. 5:5.
NGOMA 139 Dzione Uripo, Zvese Zvaa Zvipsva
a Anhu akawanda aatendi mucipikirhwa ce Bhaibheri ce nyika ipsva. Kaari izvona kurota, i ngano, uye cakanyasa kunaka kuti cigare cezvirokwazvo. Asi isusu tese tinorugondo rekuti zvipikirhwa zvese zva Djehovha zvicadzadzika. Kunyazi zvakadaro, tinodikana kupeta masimba kuti kutenda kedu kurumbwe kakabamba. Ngei? Ngationei mhinduro yakhona mu fundo ino.
b Mazina amweni akacinjwa.
c Mungagumira mafundo akawanda anoreketa ngezve uphorofiti we Bhaibheri pa dii rakazwi: “Uphorofiti” mu Índice das Publicações da Torre de Vigia. Ngo muezaniso, onai fundo inoti: “Zvinofanotaurwa naJehovha Zvinoitika” mu Murindiri wa 1 ya Janero ya 2008.
