1. Ngei Djesu akakumbira kuti Djehovha aonerere ateeri ake?

 USIKU wekupedzesera Djesu asati afa, ayena akaita cikumbiro cinokosha kuna Baba ake. Ayena akakumbira kuti Djehovha aonerere afundi ake. (Juau 17:15, 20) Izvirokwazvo kuti Djehovha akagara ecionerera anhu ake nguwa dzese—kana kuti aiacengeta uye aiadziirira nguwa dzese. Asi Djesu aizviziya kuti ateeri ake, aizobatana no kuteererhwa kakakura zvecibva kuna Sathani. Uye Djesu aizviziyawo kuti ateeri ake akwanise kurhwisana no zviya zvinobva kuna Sathani, awona aidikana kugara no rubetso ra Djehovha.

2. Maererano na Pisarema 33:18-20, ngei tisikadikani kuthya zvinetso?

² Nyika ino inoonererhwa na Sathani, inokonzera matambudziko akawanda ku Akristu. Isusu tinorhwisana no zvinetso zvingakwanisa kutiodza mwoyo uyewo zvingakwanisa kuedza kugondeka kedu kuna Djehovha. Mu fundo ino ticaona kuti atidikani kuthya, Djehovha ari kuticengeta uye arikuona zvese zvatiri kubatana nazvo uye akagadzirira kutibetsera. Ngatione miezaniso miiri ye Bhaibheri inopangidza kuti Djehovha “anoonerera kudini aya anomuthya.”—Erengai Pisarema 33:18-20.

3. Migariro ipi ingatiitisa kuti tizwe tiri tega?

³ Izvirokwazvo kuti isusu tiri dii re mhuri yakakura ye kumwiya, kunyazi zvakadaro pamweni isusu tinozwa tiri tega. Ngo muezaniso, pamweni madjaha anozwa ari ega paanonga ecidikana kupanganidza zvaanotenda ku cikora uye paanonga ari ku ungano ipsva. Amweni anodikana kurhwisana no mazwire e kutsukwara uye kuora mwoyo, uye pamweni awona anorangarira kuti anodikana kurhwisana ega no mazwire aya. Pamweni aadi kucedza nge zvazvo no anhu amweni nge kurangaridza kuti anhuwo aakwanisi kuazwisisa. Nguwa dzimweni, munhu angaguma  pakurangaridza kuti apana anomurangarira. Patinozwa tiri tega—azvinei kuti ngei tecizwa kudaro—tingakwanisa kuzwa kuti tasiiwa tega uye tecinetseka mu mwoyo. Asi Djehovha aadi kuti tizwe kudaro. Tingagara kudini no cokwadi nazvo?

4. Ngei muphorofita Eriya wakati: “Ndini ndega ndasara”?

⁴ Onai muezaniso wa Eriya museenzi wakagondeka wa Djehovha. Djezabheri waida kumuuraya, Eriya wakapedza mazuwa 40 ecimutiza. (1 Mad. 19:1-9) Pakupedzesera, paainga akafindara mu bako, Eriya wakabvunza Djehovha kuti: “Inini ndini [muphorofita] wekupedzesera wasara.” (1 Mad. 19:10) Asi kainga kucine Aphorofita amweni; Obhadhiya wakakwanisa kupingaidza kuti aphorofita anokwana kuita 100 asauraiwe na Djezabheri. (1 Mad. 18:7, 13) Hino ngei Eriya waizwa ari ega? Pamweni iyena wairangaridza kuti panguwa iyona aphorofita akaponeswa na Obhadhia ainga apera kufa. Pamweni iyena wakazwa ari ega ngekuti apanazve wakasanangura kuseenzera Djehovha pamwepo naye, mumasure mekuti Djehovha apangidza kuti ndiye ega basi Mwari we cokwadi ku Dunhu re Kameri. Zvingaitawo kuti iyena wakarangaridza kuti apana waiziya zviro zvaaibatana nazvo, uyezve pamweni wakarangaridza kuti apana waimurangaridza. Azvikwanisiki kunyasa kuziya mushobo waizwa Eriya. Asi ciripo catinoziya, Djehovha aizwisisa kuti ngei Eriya aizwa ari ega uye ainyasa kuziya mushobo wekumubetsera.

5. Djehovha akabetsera kudini Eriya kuti akwanise kuona kuti wainga asiripi ega?

⁵ Djehovha akaita zviro zvakawanda kuti abetsere Eriya. Djehovha akaita kuti Eriya azwe akasudzunuka uye arekete mazwire ake. Ayena akabvunzisa Eriya kairi kese eciti: “Uri kuitei pano?” (1 Mad. 19:9, 13) Panguwa dzese idzi dzekuti Eriya waifungura mwoyo wake, Djehovha aimupurutana. Ayena akadaira Eriya paakapangidza kuti ainga ari ku dii rake uye kuti kuno Mwari ano simba rakakura. Djehovha akabvunzawo Eriya kuti ainga aciriyo Aisraeri akawanda akagondeka. (1 Mad. 19:11, 12, 18) Zvezvirokwazvo, Eriya wakazwa kurerukirhwa nge kufungura mwoyo wake kuna  Djehovha uye nge kuzwa zvaakabvunzwa Naye. Mumasure mazvo, Djehovha akagadza Eriya kuti aite zviro zvinokosha. Ayena akakumbira kuti Eriya adzodze Azaeri hinga mambo we ku Siriya, Jeuu hinga mambo we ku Israeri, uye Erizeu hinga muphorofiti. (1 Mad. 19:15, 16) Paakagadza Eriya kuti aite zviro izvona, Djehovha akamubetsera kuti akande ndangariro dzake pa zviro zvakanaka. Mwari akapasawo Eriya shamwari, muphorofiti Erizeu. Hino pacenyu imwimwi, mungatambira kudini rubetso ra Djehovha kana mukazwa muri mwega?

6. Kana mukazwa muri mwega munganamata ngezvei? (Pisarema 62:8)

⁶ Djehovha anomupikai kuti mucedze naye nge munamato. Ayena anoziya zvinetso zvamuri kubatana nazvo, uye anogondesa kuti acadaira minamato yenyu panguwa ipi hayo. (1 Ate. 5:17) Djehovha anodakadzwa nge kuzwa minamato ye aseenzi ake. (Zvie. 15:8) Munganamata ngezvei kuna Djehovha panguwa yamunonga muri kuzwa muri mwega? Itai hingana Eriya, fungurai mwoyo wenyu kuna Djehovha. (Erengai Pisarema 62:8.) Mupanganidzirei zviya zviri kumunetsai uye mazwiro enyu. Kumbirai kuti Djehovha amubetserei kurhwisana no mazwire enyu. Ngo muezaniso kana imwimwi munosonetseka mumwoyo uye munosothya panguya yamunobvunziswa ku cikora no adoni enyu nge zve Bhaibheri kumbirai kuti Djehovha amubetserei. Imwimwi munga kumbira Djehovha ungwaru kuti mukwanise kupanganidza zvamunotenda. (Ruka 21:14, 15) Kana imwimwi muri kurwhisana no mazwiro akashata kumbirai Djehovha kuti amubetserei kuti mukwanise kureketa ngezvazvo no Mukristu wakakura pakunamata. Imwimwi mungakumbira kuti Djehovha aitise kuti munhu wamucapanganidzira ngezvenyu akwanise kumuzwisisai. Fungurai mwoyo wenyu kuna Djehovha uye nyasai kuona mushobo waanodaira minamato yenyu, uye tendai rubetso ramunopaswa no amweni, kana mukaita izvona imwimwi amunyanyi kuzwa muri mwega.

7. Mafundei no muezaniso wa Mauricio?

⁷ Djehovha akatipasa basa rinokosha maningi kuti tiriite. Imwimwi mungagara no cokwadi cekuti Djehovha anoona uye anokoshesa zvese zvamunoita mu basa rekuparidzira uye mu ungano. (Pis. 110:3) Kubatikana mu basa iri kungamubetserai kudini kuti musanyanye kuzwa muri mwega? Onai muezaniso we hama imweni inozwi Mauricio. * Mumasure mekuti iyona yabhabhatidzwa, shamwari yake yaaida maningi yakasiya cokwadi padoko no padoko. Mauricio unoti: “Kuona shamwari yangu yecisiya Djehovha zvakaita kuti ndisazwe ndakacengeteka. Ndakagara ndisina cokwadi cekuti ndaizokwanisa kuseenzera Djehovha here uye ndorumbwa ndiri dii re anhu ake. Inini ndaizwa ndiri ndega kamare uye ndairangarira  kuti apana munhu waizokwanisa kundizwisisa.” Cinyi cakabetsera Mauricio? Iyena unopanganidza kuti: “Ndakatanga kupedza nguwa yakawanda ndiri mu basa rekuparidzira. Izvona zvakandibetsera kuti ndisagare no mazwiro akashata uye kurangarira nge zvangu basi. Pandainga ndiri mu basa re kuparidzira, ndaipfara uye ndainga ndisikanyanyi kuzwa ndiri ndega.” Kunyazi tisikakwanisi kuparidzira pamwepo uye pa nyumba no nyumba, tingaparidzira tese teciseenzesa thurufunu uye tsamba. Izvona zvinotibambisa maningi. Cinyi cakabetserazve Mauricio? Iyena unopanganidza kuti: “Ndakatanga kubatikana mu mabasa e ungano. Ndakatangawo kunyasa kugadzirira matii andaipaswa ku misangano. Matii aya andaipaswa akandibetsera kuona kuti ndaikosha kuna Djehovha uye ku hama no hanzvadzi.”

8. Tingazwa kudini nge ndaa ye zvinetso?

⁸ Isusu tirikurarama mu mazuwa ekupedzesera. Ndiyo ndaa tingaetsera kusongana no miedzo. (2 Ti. 3:1) Kunyazi teciziya kuti izvi zvinoitika, zvinetso zvedu zvingatigumira tisikakariri. Ngo muezaniso, tingasongana no cinetso ce mare, ce uthongo uye ce kufirhwa no munhu watinoda. Migariro yakadai ingatipedza mazano nyanye-nyanye paya pekuti zvinetso zvedu zvinoitika cimwe ku sure ke cimwe kana pa nguwa imweyo uye ayena angatibetsera kuti tirhwise no ushingi cinetso cipi haco.

9. Djobo wakasongana no zvinetso zvipi?

⁹ Rangaridzai mushobo wakabetsera Djehovha museenzi wake wakagondeka Djobo. Djobo wakasongana no zvinetso zvakawanda uye zvakakura pa nguwa imweyo. Pa zuwa rimwe basi, Djobo wakatanga kuruza zvinyama zvake zvese, ofirhwa no aseenzi ake uye cakanyanya kurhwadza, ikufirhwa no ana ake. (Djobo 1:13-19) Panguwa yekuti wainga ecirhwadziwa uye pasati patodarika nguwa yakareba, Djobo wakabatana no nhenda yakakura uye inorhwadza, yakakuwadza muiri wake wese. (Djobo 2:7) Djobo wakarhwadziwa maningi zvekuti wakatoguma pakureketa kuti: “Ndinozonda upenyu wangu; Andidi kurumbwa ndecirarama.”—Djobo 7:16.

10. Djobo wakabetserhwa kudini ndi Djehovha kuti akunde zvinetso zvaaisongana nazvo? (Onai foto ye pa kapa.)

¹⁰ Djehovha ainyasa kuona zvese zvaiitika na Djobo. Ayena aida Djobo, ndiyo ndaa, akamubetsera kuti akwanise kukunda matambudziko ake. Ngo muezaniso, Djehovha akacedza na Djobo uye akamuedzurira kuti Ano uzii usikaperi uye anoriritira no rudo zvisikwa zvese. Ayena wakareketa nge zve zvinyama zvinoita kuti agare ne simba. (Djobo 38:1, 2; 39:9, 13, 19, 27; 40:15; 41:1, 2) Djehovha akaseenzesawo mwanarume wakagondeka Eriu kuti abambise uye anyaradze Djobo. Eriu wakagondesa Djobo kuti Djehovha aazosii kukomborera kushingirira ke aseenzi Ake. Djehovha akaseenzesawo Eriu kuti apase mazano Djobo. Eriu wakabetsera Djobo kuti asarangarire nge zvake basi, uye akwanise kuona mushobo watakadodoka pakuezaniswa na Djehovha Musiki we zviro zvese. (Djobo 37:14) Djehovha akapasawo Djobo basa rekuti aite. Iyena waidikana kunamatira shamwari dzekunyepedzera dzitatu dzainga dzashaisha. (Djobo 42:8-10) Asi Djehovha angatibetsera kudini patinosongana no zvinetso?

11. Bhaibheri rinotibetsera kudini patinobatana no zvinetso?

¹¹ Nyamasi uno, Djehovha aareketi na isusu hinga mushobo waakareketa na Djobo, asi Ayena anoreketa na isusu eciseezesa Soko Rake Bhaibheri. (Aro. 15:4) Kariro yatinopaswa na Djehovha ye ramangwana iciro cinotinyaradza maningi. Ngatione mazano manganani e mu Bhaibheri angatibetsera patinonga tecisongana  no migariro inoshupha. Ngo muezaniso, mu Bhaibheri Djehovha anotigondesa kuti apana cinetso cipi haco, kunyazi cakakura cingakwanisa—“kutisiyanisa no rudo” rake. (Aro. 8:38, 39) Djehovha anogondesawo kuti “acagara dhuze na ese aya anomudainza” pamunamato. (Pis. 145:18) Ayena anobhuyawo kuti kana tikamugonda ticakwanisa kukunda cinetso cipi haco uye tingatozwa mupfaro patinonga tecisongana no cinetso. (1 Ako. 10:13; Tig. 1:2, 12) Bhaibheri rinotiedzurira kuti cinetso cipi haco catingasongana naco acigari nokusikaperi uye nge ce nguwa doko mukuezanisa no upenyu usikaperi waticatambira mune ramangwana. (2 Ako. 4:16-18) Djehovha anogondesawo kuti acatsakatisa ese anoita kuti tishuphike—Sathani Dhiyabhurosi no aya anomuteedzera. (Pis. 37:10) Zvakadini kukanda mu musoro tsamba dzinganani dze mu Bhaibheri dzicazomubetserai kana mukasongana no matambudziko?

12. Djehovha anoda kuti tiitei kuti tinyase kukhorovhera rubetso ratinopaswa no Bhaibheri?

¹² Djehovha anoda kuti tipsvake nguwa yekuerenga Bhaibheri mazuwa ese, kurifunda, uye kunyasa kurangarira zviya zvatinonga taerenga. Ayena anopasawo mwiya wake mucena ku aya anopangidza kuti anogonda Bhaibheri nge mushobo wawo wekurarama. Uye mwiya mucena ungatipasa “simba rakatunhudzirhwa” kuti tikwanise kurhwisana no cinetso cipi haco.—2 Ako. 4:7-10.

13. Zvekurhya zvekumwiya zvatinopaswa no “muranda wakagondeka uye wakangwara” zvingatibetsera kudini kukunda zvinetso?

¹³ No rubetso ra Djehovha “muranda wakagondeka uye wakangwara” ari kubudisa mafundo, ngoma uye mavhidhiyo akawanda anotibetsera kuti tigare nokutenda kakanyasa kubamba uye anotibetserawo kuti tirumbwe takangwarira. (Mat. 24:45) Tinodikana kunyasa kukhorovhera zvekurhya zvese zvekumwiya zvatinopaswa na Djehovha. Hanzvadzi imweni yeku Estados Unidos yakabhuya kutenda kainoita nge zvekurhya zvese zvekumwiya. Iyona inoti: “Ndaano makore 40 ndeciseenzera Djehovha, uye pa nguwa yese ii kutenda kangu kakaedzwa kakawanda.” Iyona yakasongana no zvinetso zvakawanda. Ngo muezaniso, mbiya yawo akauraiwa no mutekeni wainga akararadza, abereki ayo akafa mumasure mekubatana no nhenda yakakura uye iyona yakarhwisana no nhenda ye kanser kairi kese. Cinyi cakaibetsera kushingirira zvese izvi? Iyona inopanganidza yeciti: “Djehovha akandiriritira nguwa dzese. Uye zvekurhya zvekumwiya zvaanondipasa eciseenzesa muranda wakagondeka uye wakangwara zvinosondibetsera  kushingirira. Ndiyo ndaa ndinozwa hingana Djobo wakati: ‘Dakara ndafa, andizosii kugondeka kangu!’”—Djobo 27:5.

14. Djehovha angaseenzesa kudini hama dzedu kuti dzitibetsere patinosongana no matambudziko? (1 Atesaronika 4:9)

¹⁴ Djehovha anorowedza aseenzi ake kuti apangidze rudo uye abetserane mu nguwa inoshupha. (2 Ako. 1:3, 4; erengai 1 Atesaronika 4:9.) Eciteedzera Eriu, hama no hanzvadzi dzedu dzinoda maningi kutibetsera kuti tikunde zvinetso. (Zvii. 14:22) Onai zvakaitika no hanzvadzi Diane. Mwamuna wayo wakabatana no nhenda yakakura uye ungano yakaita zviro zvakawanda kuitira kuti irumbwe yakabamba pakunamata. Iyona inoti: “Zvainga zvisiripi nyore. Asi pa nguwa yese ii ndakakwanisa kuona mushobo wataibetserhwa na Djehovha. Hama dze mu ungano dzakatanga kutibetsera. Idzona dzakativhakacira, dzakatifonera, dzakatikhumbatira, uye izvona zvakatipasa simba rataida. Ngekuti andikwanisi kutekenya, hama dzakaita urongwa wekuti dzinditore kuti ndiende ku misangano uye kubuda mu basa rekuparidzira pese pazvaibvira.” Makomborero akakura kugara nhengo ye mhuri yekumwiya yakanakisisa!

15. Ngei tingagara no rugondo rekuti tingakwanisa kukunda zvinetso zvedu?

¹⁵ Tese isusu ticazobatanawo no cinetso. Hingana zvataona mu fundo ino, isusu atizorhwisani no cinetso tiri tega. Kuita hingana Baba ano rudo, Djehovha anogara akateya nzee kuti aziye zviya zvirikuitika katiri. Ayena ari kudii redu, anozwa minamato yedu nguwa dzese uye akagadzirira kutibetsera. (Isa. 43:2) Tingagonda hedu kuti tingakwanisa kurhwisa cinetso cipi haco ngekuti Djehovha anotipasa rubetso ratinoda kuti tishingirire. Ayena akatipasa cipo ce munamato, Bhaibheri, zvekurhya zvakawanda zvekumwiya, uye hama dzedu.

16. Tinodikana kuitei kuti ticengethwe na Djehovha?

¹⁶ Tinotenda maningi ngekugara na Baba akanakisisa anorangarira umwe na umwe wedu! Hingana zvinorekethwa na Pisarema 33:21 “Mwoyo wedu unopfadzwa naye.” Tingapangidza kuti tinogonda Djehovha ngekunyasa kukhorovhera rubetso rese raanotipasa. Isusu tinodikana kuita dii redu kana kuti kupeta masimba kuti timuzwire uye tiite zvakamunakira. Kana tikadaro, tingagonda hedu kuti Djehovha acacengeta umwe na umwe wedu!—1 Ped. 3:12.