1. Zvinyi zvakakwaniswa kuizwa no madjaha akawanda?

 MAKORE ese, madjaha akawanda anosobhabhatidzwa. Kana muri mudjaha wabhabhatidzwa pa nguwa doko yadarika, garai no rugondo rekuti hama no hanzvadzi dzenyu dziri kupfara maningi nge cisananguro camaita, uye zvezvirokwazvo Djehovha ari kupfarawo! (Zvie. 27:11) Cimboimai padoko murangaridze zvese zvamakwanisa kuita. Imwimwi makanyasa kufunda zvinobhuiwa no Bhaibheri, pamweni makatozviita ke makore manganani, nge ndaa yazvo makagara no cokwadi cokuti Bhaibheri i Soko ra Mwari. Uye cinonyanya kukosha, imwimwi makatanga kuziya uye kuda Djehovha. Uye rudo irona rakakura maningi zvekuti makaita cisananguro cekudzipira kuna Djehovha uye kubhabhatidzwa. Tinoti makorokoto nge cisanguro cenyu!

2. Ticaonei mu fundo ino?

 ² Zvezvirokwazvo makabatana no miedzo yakawanda pamaigadzirira kuti mubhabhatidzwe. Asi mungaetsera kubatana no miedzo imweni mune ramangwana, uye Sathani acaedza zviri zvese kuti arembese rudo ramunaro kuna Djehovha, oita kuti muime kumuseenzera. (Aef. 4:14) Musasiye izvona zveciitika. Cinyi cingamubetserai kuti murumbwe makagondeka kuna Djehovha uye mukwanise kudzadzisa cipikirhwa cekudzipira kenyu? Imwimwi munodikana kurumbwa mecikura hingana Mukristu—kana kuti munodikana kurumbwa “mecihambira mberi” pakunamata. (Aheb. 6:1) Asi mungazvita kudini?

3. Cinyi cinodikana kuizwa no Akristu ese mumasure mekubhabhatidzwa?

³ Mumasure mekubhabhatidzwa, tese isusu tinodikana kuteerera zano re muphostori Pauro raakapasa Aefeso. Iyena akabhuya  kuti owona aidikana kugara Akristu “akakura” pakunamata. (Aef. 4:13) Nge masoko amweni, isusu tinodikana ‘Kurumbwa tecihambira mberi.’ Zvinoita nyore kuzwisisa zvaida kubhuiwa na Pauro kana tikarangaridza mushobo unokura mwana. Izvirokwazvo kuti kamwana i rupfaro kuabereki. Asi iyena aadikani kurumbwa ari kamwana nokusikaperi. Icazoguma nguwa yekuti iyena unodikana kusiya “maitiro e ana adoko.” (1 Ako. 13:11) No Akristu zvinoitikawo zvimwezvimwezvo. Tinodikana kurumbwa tecihambira mberi mumasure me kubhabhatidzwa. Hino ngatione mazano manganani anotibetsera kuita izvona.

4. I wara ripi ringamubetsera kuti muhambire mberi pakunamata? Panganidzai. (Afiripi 1:9)

⁴ Bambirirai kuda Djehovha. Zvezvirokwazvo imwimwi munoda maningi Djehovha. Asi rudo ramunaro kaari ringatunhudzirika. Ringatunhudzirika kudini? Muphostori Pauro wakapanganidza mushobo wekuita izvona pana Afiripi 1:9. (Erengai.) Pauro wakanamata kuti rudo re Akritsu aya “rirumbwe recikura.” Hino zvinobvira kutunhudzira rudo redu kuna Djehovha. Asi tingazviita kudini? Tinodikana kunyasa kugara no “ruziyo rezvirokwazvo uye no ungwaru” tisati taita ciro. Patinonyasa kuziya Djehovha, rudo redu kaari rinonyasa kukura, uye kushamiswa no unhu wake uye nge mushobo waanoita zviro. Tinogara no cido cekumupfadza uye atizodi kuita ciro cisikamupfadzi. Ndiyo ndaa tinopeta masimba kuti tizwisise kuti cido ca Djehovha ngacipi uye kuti tingararama kudini maererano naco.

5-6. Tingatunhudzira kudini rudo redu kuna Djehovha? Panganidzai.

⁵ Rudo redu kuna Djehovha ringatunhudzira kukura kana tikapeta masimba kuti tinyase kuziya Mwana wake, ngekuti ayena wainyasa kuteedzera nge mushobo wakakwana unhu wa Baba ake. (Aheb. 1:3) Uye mushobo wakanyasa kunaka wekuziya Djesu, ngewekufunda mabhuku marongomuna e Maevhangeri. Kana musina musambo wekuerenga Bhaibheri mazuwa ese, zvakadini kutanga nyamasi? Pamunonga mecierenga nge zva Djesu, petai masimba kuti muone mawara ake. Anhu aizwa akasudzunuka naye, kunyazi ana adoko aipfarira kugara naye. (Mark. 10:13-16) Djesu ainga ano rudo no unaki, uye afundi ake ainga asikathyi kumubvunza zvaairangaridza. (Mat. 16:22) Ngekuti tinoziya kuti Djesu anoteedzera Baba ake, tingagara no cokwadi cekuti Djehovha anawo mawara awona. Tinganamata kuna Djehovha tecireketa zvese zviri mumwoyo medu, teciziya kuti ayena aatitongi nge mazwiro edu. Ayena anotida uye anotiriritira.—1 Ped. 5:7.

⁶ Djesu airangarira maningi matambudziko aibatana no anhu. Muphostori Mateu wakati: “Eciona anhu ajinji, ayena akaazwira usisi ngokuti aibathwa zvakashata uye ainga akabararika hingana mabira asina muushi.” (Mat. 9:36) Uye Djehovha anozwa kudini? Onai zvakarekethwa na Djesu: “Baba angu ari kudenga, aadi kuti kunyazi umwe we adoko aya aparare.” (Mat. 18:14) Zvakanaka maningi kuziya mazwiro a Djehovha! Uye patinonyasa kuziya Djesu, rudo redu kuna Djehovha rinorumbwa recitunhudzirika.

7. Ngei kutora nguwa mecicedza no hama dzakakura pakunamata zvicamubetserai?

⁷ Ciro cimweni cingamubetserai kutunhudzira rudo uye kuhambira mberi pakunamata, ikushamwaridzana no hama no hanzvadzi dzakakura pakunamata. Onai kupfara kunoita hama idzi. Idzona adzitsumbi ngekusanangura kaakaita kuseenzera Djehovha. Kumbirai kuti idzona dzimupanganidzire maeshiperiensiya adzinadzo mu basa ra Djehovha. Uye pamunonga mecida kuita zvisanangura zvinokosha, kumbirai rubetso rawo, ngekuti zviro “zvinobudirira kana anopa mazano akawanda.”—Zvie. 11:14.

8. Mungaitei kana mukatama kugara no cokwadi ce zviya zvinofundiswa no Bhaibheri?

 ⁸ Psvakai mhinduro dze mubvunzo dzenyu dzese. Hinga zvataona mu  ndima 2, Sathani ucaita zviri zvese kuti amupingaidze pakuhambira mberi kenyu pakunamata. Mushobo umwe wekuita izvona, ngewekumuitisa kuti musagare no cokwadi ce zviya zvinofundiswa no Bhaibheri. Ngo muezaniso, pasinei no zvamunoita, mucazosongana no nyaya inocokuita no zvekuphinduka-phinduka. Pamweni pamainga muciri mwana mudoko, imwimwi mainga musina basa no nyaya ii, asi ngekuti makura, pamweni mucanyanya kusongana no nyaya ii kucikora. Uye pamweni zvinorekethwa no afundisi enyu e kucikora kuti atsigire kuphinduka-phinduka zvingatoita hingana kuti nge zve zvirokwazvo uye zvino musoro. Uye pamweni awona aasatoti atora nguwa kuti aone zviro zvinopangidza kuti kuno Musiki. Zvakanaka kuedzurira zvinobhuiwa na Zvierengo 18:17: “Munhu unotanga kududza nyaya yake unoita hingana kuti uno razau dakara paguma munhu umweni omubvunzisisa.” Pane kurangarira kuti zvese zvamunofunda kucikora izvirokwazvo, psvakai nguwa kuti mukwarakwatise zvinorekethwa no Soko ra Mwari, Bhaibheri. Psvakisisai mu mabhuku edu. Cedzai no hama no hanzvadzi dzekuti kareko dzaitenderawo fundiso yekuphinduka-phinduka. Mungaabvunzisa kuti cinyi cakaagondesa kuti atendere kuti kuno Musiki anotirangaridza. Makani akadai angamubetsera kuti mubambirire kugara no cokwadi cekuti kuno Musiki.

9. Mafundei no eshiperiyesiya ya Melissa?

⁹ Hanzvadzi imweni inozwi Melissa yakanyasa kukwarakwatisa nge zve kusikwa. * Zvayakakwarakwatisa zvakaibetsera kutunhudzira kutenda kayo mu zviya zvinofundiswa no Bhaibheri. Iyona inoti: “Afundisi angu ekucikora anoreketa nge zve kuphinduka-phinduka ngemushobo unomuitisai kuti mutende kuti nge zve zvirokwazvo. Pakutanga, inini ndaithya kurhwisana no mubvunzo dzangu ngekuti ndaithya kuti ndaizokwarakwatisa mibvunzo idzona uye ndoona kuti zvairekethwa no afundisi angu ekucikora zvainga zvino musoro. Asi ndakaedzurira kuti Djehovha aadi kuti titende maari ngekundotendawo basi. Ndiyo ndaa, ndaidikana kurhwisana no mibvunzo dzangu. Ndakaerenga bhuku rinozwi Existe um Criador Que Se Importa com Você? Uye mabhroshura akazwi A Vida — Teve um Criador? uye A Origem  da Vida — Cinco Perguntas Que Merecem Resposta. Izvi ndizvona zvandaida kamare. Zvinotsukwarisa kuti andizi kuwaerenga kare.”

10-11. Cinyi cingatibetsera kuti tirumbwe takacena mu madziso a Djehovha? (1 Atesaronika 4:3, 4)

¹⁰ Tizai useki. Patinopinda mu udjaha, cido cekuita zvepamaponde cingakura maningi, uye imwimwi mungasongana nokubambidzirhwa kakakura kuti muite useki. Uye Sathani urikuda kuti muite izvona. Asi cinyi cingamubetsera kuti mukunde muedzo uu? (Erengai 1 Atesaronika 4:3, 4.) Pamunoita munamato kuna Djehovha, panganidzai zvese zviri mu mwoyo menyu uye mazwiro amurikuita. Bhuyai zvese kamare uye mukumbirei kuti amupase simba. (Mat. 6:13) Edzurirai kuti Djehovha arikuda kumubetserai, haiwa kumutongai. (Pis. 103:13, 14) Kuerenga Soko ra Mwari kungamubetserawo. Melissa, watambobhuya nge zvake unobhuya zviro zvakamubetsera kuti akunde marangariro asikazi kucena. Iyena unoti: “Kuerenga Bhaibheri mazuwa ese kakandibetsera kuti ndisarembe. Izvona zvaindibetsera kuedzurira kuti inini ndiri wa Djehovha uye ndaida kuti ayena aite dii re upenyu wangu.”—Pis. 119:9.

¹¹ Musaedze kugadzirisa zvinetso zvenyu muri mwega. Cedzai no abereki enyu nge zviya zvamuri kubatana nazvo. Izvirokwazvo kuti azviripi nyore kucedza no abereki enyu nge zviro zvakaringana nemwi kamare, asi zvinokosha kuita izvona. Melissa unoti: “Inini ndakanamata ndecikumbira ushingi uye ndakareketa na baba angu nge zve cinetso icona. Mumasure mazvo, ndakazwa runyararo. Ndaizviziya kuti Djehovha aidada neni.”

12. Mungakwanisa kudini kuita zvisananguro zvakanaka?

¹² Teererai zvokwadi zvisikacinji zve mu Bhaibheri. Padoko no padoko, imwimwi mucakwanisa kugara no rusununguko rakakura rekuita zvisananguro zvenyu kamare. Asi cokwadi ngecekuti pacino zviro zvakawanda zvamunodikana kufundira. Hino mungaitei kuti musaite ciro cingakuwadza ushamwari wenyu na Djehovha? (Zvie. 22:3) Hanzvadzi imweni inozwi Kari inopanganidza zviro zvakaibetsera kuti iite zvisananguro zvakanaka. Iyona yakazwisisa kuti Mukristu wakakura pakunamata aadikani kugara no mindandanda ye mitemo kuti aseenzese mu upenyu wake. Iyona inoti: “Ndakaona kuti ndaidikana kuzwisisa maonero a Djehovha haiwa basi kugara no mindandanda ye mitemo mu musoro.” Hino pamunonga mecierenga Bhaibheri, dzibvunzisei kuti: ‘Pandiri kuerenga apa panondifundisei nge zve maonero a Djehovha nge zve nyaya ii? Kodi pandirikuerenga apa, ndingagumira zano ringandibetsera kuita cisananguro cakanaka here? Kuteerera zvinofundiswa no Bhaibheri zvicandibetsera kudini?’ (Pis. 19:7; Isa. 48:17, 18) Kana mukaerenga Bhaibheri uye monyasa kurangaridza mazano amunogumira imona zvicamuitirai nyore kuita zvisananguro zvinopfadza Djehovha. Pamunonga mecikura pakunamata, mucaona kuti amudikani kugara no mundandanda we mutemo mu upenyu wenyu ngekuti imwimwi munonga maakuziya zvinorangarirhwa na Djehovha nge zve nyaya iyona.

13. Kugara no shamwari dzakakura pakunamata zvingamubetsera kudini? (Zvierengo 13:20)

¹³ Sanangurai shamwari dzinodawo Djehovha. Hingana zvatabhuya, shamwari dzenyu dzingamubetserai maningi pakukura pazvekunamata. (Erengai Zvierengo 13:20.) Hanzvadzi imweni inozwi Sara yaiwora mwoyo. Asi pano cakaibetsera kuti icinje maonero ayo. Sara wakati: “Ndakaita shamwari dzakanaka paya kamare pandainyanya kuda. Ndakatanga kugadzirira fundo ye Murindiri masumana ari ese no hanzvadzi imweni ye mu ungano. Shamwari imweni yakandibetsera kuti nditange kupasa mhinduro pa misangano. Nge ndaa ye rubetso re shamwari dzakanaka, ndakatanga kubata  no nyara mbiri fundo yangu ye munhu ega uye kuita munamato. Uye ushamwari wangu na Djehovha wakatanga kunyasa kubamba uye ndakatangazve kuzwa mupfaro.”

14. Julien wakakwanisa kudini kuita shamwari dzakanaka?

¹⁴ Mungashamwaridzana kudini no hama dzakakura pakunamata? Hama imweni inozwi Julien, irikuseenza hinga mukuru we ungano inoti: “Pandainga ndiciri mudoko, ndakaita ushamwari wakanaka no hama dzandaibuda nadzo mu basa rekuparidzira. Hama idzi dzaiseenza no simba mu basa rekuparidzira uye dzakandibetserawo kuti ndipfarire kuita izvona. Idzona dzakandibetsera kuti ndigare no cinangwa cekupinda mu nguwa yakadzara. Ndakaona kuti ndairuza mikana yekugara no shamwari dzakanaka ngekuti ndaindoshamwaridzana no anhu e thunga rangu. Dakara zvino, ku Bheteri kuno ndirikurumbwa ndeciita shamwari dzakanaka. Muezaniso wawo wakanaka unondibetsera kuti ndiite zvisananguro zvakanaka, ngo muezaniso pa nyaya dzekuwaraidzwa. Awona anosondibetsera kukhwedera dhuze na Djehovha.”

15. Ingwadzo ipi yakapaswa Timoti ndi Pauro? (2 Timoti 2:20-22)

¹⁵ Zvakadini kana mukaona mu ungano kuti pano munhu usiripi shamwari yakanaka? Pauro waizviziya kuti Akristu amweni e mu nguwa yake ainga asikakoshesi zviro zvekumwiya, ndiyo ndaa wakabvunza Timoti kuti agare kure nawo. (Erengai 2 Timoti 2:20-22.) Ushamwari wedu na Djehovha unokosha maningi. Ndiyo ndaa, atidikani kusiya kuti munhu upi hake akuwadze ushamwari watatora nguwa uye simba kuti tiuwake.—Pis. 26:4.

16. Zvinangwa zvipi zvamungagara nazvo?

¹⁶ Sanangurai zvinangwa zvakanaka. Imwimwi mungasanangura zvinangwa zvingabambisa kutenda kenyu uye zvingamubetserai kuti mugare Mukristu wakanaka. (Aef. 3:16) Ngo muezaniso, pamweni murikuona kuti cinangwa cakanaka ngecekugadzirisa fundo yenyu ye munhu ega uye urongwa wenyu wekuerenga Bhaibheri. (Pis. 1:2, 3) Uye Pamweni mungaona kuti munodikana kugadzirisa mushobo wenyu wekuita munamato. Uye pamweni mungaonawo kuti munodikana kutunhudzira kudzibata kenyu pamunosanangura zviro zvekuwaraidzwa nazvo uye mushobo wamunoseenzesa nguwa yenyu. (Aef. 5:15, 16) Djehovha  paanoona kuti muri kupeta masimba kuti muhambire mberi, ayena anopfara maningi.

17. Mucazwa kudini pamunobetsera amweni?

¹⁷ Kubetsera amweni zvingamubetsera kuti mugare Mukristu wakakura pakunamata. Djesu akati: “Kupasa kuno mupfaro wakakura kupinda kutambira.” (Zvii. 20:35) Zvezvirokwazvo, mucabetsereka maningi kana mukaseenzesa nguwa yenyu uye simba renyu kuti mubetsere amweni. Ngo muezaniso, pamweni mungagara no cinangwa cekubetsera hama dzacembera uye dziya dziri kurhwara dze mu ungano yenyu. Pamweni imwimwi mungaabetsa kutenga ciro kana kutoatengera ciro kamare. Pamweni mungaabetsera pakuseenzesa micini dze magetsi. Kana muri hama, mungagara no cinangwa cekuseenza hinga mubati anoseenzera kuti munyase kubetsera hama no hanzvadzi dzenyu dze mu ungano. (Afi. 2:4) Imwimwi mungapangidzawo rudo ku aya asiripi mu ungano ngekuwaparidzira masoko akanaka. (Mat. 9:36, 37) Kana zvecibvira kamuri, nyasai kurangarira nge zve kupinda mu nguwa yakadzara.

18. Kuseenza mu nguwa yakadzara zvingamubetserai kudini kuti muhambire mberi pakunamata?

¹⁸ Kuseenza mu nguwa yakadzara zvicamubetserai nge mishobo yakawanda kuti muhambire mberi pakunamata. Kuseenza hinga mupionero, zvingamubetsera kuti mupinde Cikora ce Aparidzi, kuseenza ku Betheri kana kutobetserawo pa basa rekuwaka. Hanzvadzi inozwi Kaitlyn inoseenza hinga mupionera inoti: “Ciro cimweni cakandibetsera mumasure mekubhabhatidzwa, ikushamwaridzana no hama mu basa rekuparidzira dzino maeshiperiyesiya akawanda. Muezaniso wawo wakandibetsera kuti nditunhudzire ruziyo rangu re Bhaibheri uye mushobo wandinoparidzira.”

19. Makomborero api amungatambira ngekupeta masimba kuti muhambire mberi pakunamata?

¹⁹ Imwimwi mucagara no makomborero akawanda ngekupeta masimba kamunoita kuti muhambire mberi pakunamata. Ngo muezaniso, imwimwi amupedzi nguwa mecigogomera zviro zvisikamubetseri. (1 Juau 2:17) Uye imwimwi amuzoshuphiki nge cinetso cinobarhwa ngekuita cisananguro cakashata. Imwimwi mucapfara uye mucabudirira zvezvirokwazvo. (Zvie. 16:3) Muezaniso wenyu wakanaka ucabambisa hama dzenyu dzese. (1 Ti. 4:12) Kupinda izvona, imwimwi mucagara no runyararo uye mupfaro wekuziya kuti murikupfadza Djehovha uye muri shamwari yake.—Zvie. 23:15, 16.