MUSORO WE KUFUNDA 34
“Rumbwai Mecihamba mu Cokwadi”
“Apana cinondipfadza kupinda kuzwa kuti ana angu ari kurumbwa ecihamba mu cokwadi.”—3 JUAU 4.
NGOMA 111 Zvinoita kuti Tipfare
ZVATICAFUNDA *
1. Ngei zvakanaka kucedza nge zve mushobo watakaziya “cokwadi”?
“MAKAZIYA kudini cokwadi?” Zviri pamhene kuti makadaira mubvunzo uu kakawanda. Uu ndi umwe we mubvunzo wekutanga wamunozwa mumasure mekuziya hama. Zvakanaka maningi kuziya kuti hama yakatanga kuziya kudini Djehovha, uye zvakanakawo maningi kuti tipanganidze mushobo watakaziya Djehovha. (Aro. 1:11) Makani akadai anotibetsera kutiedzurira mushobo unokosha cokwadi katiri. Kupinda izvona, tinonyasa kushinga “kurumbwa tiri mu gwanza recokwadi”—izvona zvinoreya kuti kurarama nge mushobo unopfadza Djehovha.—3 Juau 4.
2. Ticaonei mu fundo ino?
2 Mu fundo ino ticaona zviro zvinganani zvinoita kuti tide cokwadi. Ticaonawo kuti tingapangidza kudini kuti tinonyasa kuda cokwadi. Fundo ino icatibetsera kutunhudzira kutenda ngekukweerhwa mu cokwadi katakaizwa na Djehovha. (Juau 6:44) Uye kucabambisawo cido cedu cekufundisa cokwadi amweni.
NGEI TECIDA “COKWADI”
3. Cikonzero cipi catinaco cinonyanya kukosha cinotiitisa kuti tide cokwadi?
3 Tino zvikonzero zvakawanda zvekuti tide cokwadi. Asi cikonzero cinonyanya kukosha ngecekuti tinoda Djehovha Mwari, Manyuku ecokwadi. Peciseenzeswa Bhaibheri, isusu tinoona kuti ayena Amusikipi basi we masimba ese, asi kuti ayena ndi Baba ano rudo anoticengeta. (1 Ped. 5:7) Isusu tinoziya kuti Mwari wedu ano “nyasha uye usisi, ano mwoyo unononoka kutsamwa, akadzara no rudo rakagondeka uye cokwadi.” (Eki. 34:6) Kusiya izvona, Djehovha anoda unatsi. (Isa. 61:8) Djehovha paanotiona tecitambudzika, ayena anorhwadziwa uye anoda maningi—kupedza matambudziko ese. (Djer. 29:11) Isusu tinodawo maningi kuti izvona zviitike! Ndizvo zvinotiitisa kuti tide maningi Djehovha!
Cokwadi ce Bhaibheri Cakaita Hingana . . . Âncora
Kuita hingana âncora inoita kuti bharko rirumbwe riri pa mbuto yaro dutu parinonga reciitika, kariro yedu inotsamira mu Bhaibheri inotibetsera kurumbwa takaterama patinobatana no matambudziko. Cokwadi ce Bhaibheri cinotiitisa kuti tide kureketa no amweni nge zve kariro yedu ye ramangwana (Onai mandima 4-7)
4-5. Ngei muphostori Pauro wakaezanisa kariro yedu no âncora?
4 Cikonzero cipizve catinaco cinotiitisa kuti tide cokwadi? Cokwadi cinotipasa kariro ye ramangwana. Uye izvona zvinotibetsera maningi. Onai kuti Pauro wakaezanisa kariro ii no cinyi. Iyena wakati: “Tino kariro ii hingana âncora inobambisa mwiya, yecokwadi uye yakabamba.” (Aheb. 6:19) Kuita hingana âncora inoita kuti bharko rirumbwe riri pa mbuto yaro dutu parinonga reciitika, kariro yedu inotsamira mu Bhaibheri inotibetsera kurumbwa takaterama patinobatana no matambudziko.
5 Izvirokwazvo kuti Pauro waireketa nge zve kariro ye Akristu akadzodzwa ano kariro yekurarama kudenga. Asi masoko ake anoseenzawo ku Akristu ano kariro yekurarama mu paraizo pasi pano. (Juau 3:16) Zvezvirokwazvo, kariro yatinayo yekurarama nokusikaperi inotipasa cinangwa mu upenyu.
6-7. Kufunda cokwadi nge zve ramangwana kakabetsera kudini Ivhoni?
6 Onai zvakaitika no hanzvadzi imweni inozwi Ivhoni. Iyona aizi kurererhwa mu cokwadi uye payainga iciri mwana yaithya maningi kufa. Zuwa rimweni iyona yakaerenga masoko aasikambozi kuwakanganwa anoti: “Ricaguma zuwa rekuti ngerekupedzesera.” Iyona yakati: “Masoko aya akandiitisa kuti ndikonerhwe kuwata uye ndecipedza usiku wese ndecirangaridza ramangwana. Ndairangaridza kuti: ‘Upenyu audikani kugara kudaro.’ Uye ndaidzibvunzisa kuti: ‘Ngei ndiri pano?’ ndainga ndisikadi kufa!”
7 Nokuhamba ke nguwa, Ivhoni paainga amboti kurei wakaziya Apupuri a Djehovha. Iyena unoti: “Ndakatanga kutendera kuti ndaizorarama mu Paraizo pasi pano.” Kufunda cokwadi kakabetsera kudini hanzvadzi yedu? Iyona inoenderera mberi yeciti: “Andicapedzi usiku wese ndisikazi kuwata, ndecinetseka ngekurangarira ramangwana uye rufu.” Tinokwanisa kuona mushobo unodaIvhoni cokwadi, uye iyena unopfarira maningi kubuda mu basa rekuparidzira nokureketa nge zve kariro yake ku amweni.—1 Ti. 4:16.
Cokwadi ce Bhaibheri Cakaita Hingana . . . Upfumi
Kuseenzera Djehovha zvino uye kugara tecizviita nokusikaperi tecitongwa no Umambo wake i upfumi. Atizombotsumbi ngekusiya ciro cipi haco (Onai mandima 8-11)
8-9. (a) Mwanarume we muezaniso wakapanganidzwa na Djesu wakaitei paakaona upfumi? (b) Kamuri cokwadi cinokosha kudini?
8 Masoko akanaka akaringana nge zve Umambo wa Mwari, anobatanidzwawo pa cokwadi ce Bhaibheri. Uye Djesu akaezanisa cokwadi uwona cakaringana no Umambo no upfumi wakaigika. Pana Mateu 13:44, Djesu akareketa kuti: “Umambo wekudenga wakaezana no upfumi wakaigika mu munda, wakaoneka no mwanurume umweni, uye wakaiigazve; uye no kupfara kaanoita, unoenda otengesa zvese zvaanazvo otenga munda uwona.” Zvinoshamisa kuona kuti mwanarume uu wainga asikapsvaki upfumi. Asi paakagumira upfumi uu, iyena wakaita zvakawanda kuti agare nawo. Zvezvirokwazvo iyena wakatengesa zvese zvaainga anazvo. Ngei? Ngekuti iyena waiziya mushobo waikosha upfumi uwona. Waiziyawo kuti zvaizobetsera kutengesa ciro cipi haco kuti atengese upfumi iwona.
9 Zvezvirokwazvo, ndiwo mushobo wamunokoshesawo cokwadi! Tinoziya kuti apana catingapaswa no nyika ino cingaezaniswa no mupfaro wekuseenzera Djehovha zvino uye kugara no kariro yekurarama nokusikaperi tecitongwa no Umambo wa Mwari. Kugara no ushamwari na Djehovha i makomborero uye atizotsumbi kusiya ciro cipi haco kuti tigare no makomborero awona. Ciro cinoita kuti tipfare ikuziya kuti “tirikunyasa kumupfadza.”—Ako. 1:10.
10-11. Ngei Michael wakaita cinjo dzakakura mu upenyu wake?
10 Hama dzakawanda dzakasiya zviro zvakawanda kuti dzirarame nge mushobo unopfadza Djehovha. Amweni akasiya mabasa aizoita kuti abudirire mu nyika ino. Amweni akaitawo cisananguro cekusama kupsvaka kupfuma. Uye amweni akacinja mararamiro awo paakafunda nge zva Djehovha. Ndizvo zvakaitika no hama imweni inozwi Michael. Iyona aizi kurerhwa no abereki eciKristu. Uye payainga yeciri djaha, iyona wakafundira makharati. Iyona inoti: “Kandiri zvainga zvakanaka maningi kugara no muiri wakanaka. Nguwa dzimweni ndaidziona hingana kuti andinyiswi.” Asi Michael paakatanga kufunda Bhaibheri iyena wakaona zvinorangarirhwa na Djehovha nge zvecisimba. (Pis. 11:5) Michael unoreketa zvinoteera nge zve kazado yakamufundisa bhaibheri eciti: “Awona aambozi kundibvunza kuti ndaidikana kusiya kufunda kharati, asi aindondifundisa basi zvokwadi zve Bhaibheri.”
11 Michael paairumbwa ecifunda nge zva Djehovha, rudo rake Kaari raitunhudzirikawo. Ciro cakanyanya kubaya mwoyo wa Michael i nyasha dzina Djehovha ku anhu Ake. Nokuhamba ke nguwa iyena wakaona kuti waidikana kuita cisananguro cakakura mu upenyu. Michael unoti: “Ndaizviziya kuti kuima kufunda kharati cainga ciri ciro caizoshupha maningi mu upenyu wangu. Asi inini ndaida maningi kupfadza Djehovha uye ndainyasa kuziya kuti zvaizobetsera kusiya ciro cipi haco kuti ndipfadze Djehovha.” Michael waizviziya kuti cokwadi ce Bhaibheri cainga ciri ciro cinokosha maningi, ndiyo ndaa wakaita cinjo dzakakura.—Tig. 1:25.
Cokwadi ce Bhaibheri Cakaita Hingana . . . Ruju
Ruju rinotibetsera kuona gwanza patinonga tiri mu cidima. Ngo mushobo umwewo, Soko ra Mwari rinotibetsera kuti tiite zvisananguro zvakanaka mu nyika ino yakashata ya Sathani (Onai mandima 12-13)
12-13. Cokwadi ce Bhaibheri cakabetsera kudini Mayli?
12 Bhaibheri rinoezanisa cokwadi no ruju rakabaka mu cidima. Muezaniso uu unotibetsera kuona mushobo unokosha cokwadi. (Pis. 119:105; Aef. 5:8) Mayli, weku Azerbaijão, unotenda maningi nge mushobo waari kutungamirirhwa no Soko ra Mwari. Iyena wakakurira mu mhuri ino anhu anonamata magereja akasiyana. Baba ake ainga ari mu Musurumano, uye mai ake ainga ari Mudjudhiya. Iyena unoti: “Ndakabvira kare kutenda muna Mwari, asi pano zviro zvandainga ndisikazwisisi. Ndaidzibvunzisa kuti: ‘Ngei Mwari akasika anhu, ngei anhu ecishuphika maningi mu upenyu uye otambudzwa nokusikaperi mu rindi re muriro?’ Anhu aibhuya kuti uku kainga kuri kuda ka Mwari uye nge ndaa yazvo ndairangaridza kuti: ‘Kodi Mwari ndiyena anokonzera matambudziko ese here?’ Uye ayena anopfara nge kuona anhu ecishuphika here?”
13 Mayli wakarumbwa ecipsvaka mhinduro dze mibvunzo dzake. Uye nokuhamba ke nguwa iyena wakatanga kufunda Bhaibheri uye wakagara Mupupuri wa Djehovha. Iyena unoti. “Mhinduro dzakadjeka dze Bhaibheri dzakacinja maonero angu e upenyu uye dzakandibetsera kugara no runyararo.” Kuita hingana Mayli, isusu tinokudza Djehovha, “uya [akatidaidza] kubva mu cidima otiendesa mu ciedza cake cinoshamisa.”—1 Ped. 2:9.
14. Tingatunhudzira kudini rudo redu ku cokwadi? (Onai bhokisi rakazwi “ Miezaniso Dzimweni.”)
14 Idzi imuezaniso dzinganani dzinopangidza mushobo unokosha cokwadi ce Bhaibheri. Izvirokwazvo kuti imwimwi munoziya miezaniso dzimweni. Zvakadini kukwarakwatisa zvikonzero zvimweni pa fundo yenyu ye munhu ega zviro zvinotiitisa kuti tide cokwadi? Patinonyasa kuda cokwadi, tinonyasawo kuzvipangidza mu upenyu wedu.
TINGAPANGIDZA KUDINI KUTI TINODA COKWADI
15. Tingapangidza kudini rudo redu ku cokwadi?
15 Tinopangidza kuti tinoda cokwadi ngekufunda Bhaibheri mazuwa ese uye mabhuku e sangano. Zvezvirokwazvo, azvinei kuti taano makore mangana tiri mu cokwadi, isusu tinondorumbwa tecifunda zvimweni. Numero yekutanga ye murindiri yakabhuya kuti: “Cokwadi cakaita hingana frori riri pakati pe mashango anoripingaidza kuti risakure. Kuti tigumire frori irona, zvinodikana kuti tipete masimba. . . . Asi munhu aadikani kugutsikana ngekugara no frori rimwe basi.” Zvirokwazvo kuti kufunda kunokumbira kuti tipete masimba, asi kupeta masimba uku kunobetsera.
16. Mushobo upi wamunoseenzesa pamunofunda Bhaibheri? (Zvierengo 2:4-6)
16 Aesepi anopfarira kuerenga uye kufunda. Asi Djehovha anotipika kuti “tirumbwe tecipsvaka” uye “tinyase kupsvaka” zviro zvakadzika zvakaringana no cokwadi. (Erengai Zvierengo 2:4-6.) Tinorumbwa tecibetsereka kana tikapeta masimba kuti tizviite. Hama imweni inozwi Corey inobhuya kuti painoerenga Bhaibheri inokanda ndangariro dzayo pa vhersikuro imwe na imwe. Iyona inoti: “Ndinoerenga masoko ese e pasi, ndinopsvaka mareferesiya anondiendesa kutsamba dzimweni uye ndinokwarakwatisa tsamba dzimweni. . . . Ndinofunda zvakawanda pandinoita izvona!” Pasinei no mushobo watinoseenzesa kuti tifunde Bhaibheri, isusu tinopangidza kuti tinokoshesa Bhaibheri kana tikapsvaka nguwa kuti tirierenge uye topeta masimba kuti tizviite.—Pis. 1:1-3.
17. Zvinoda kureyei kurarama maererano no cokwadi? (Tiyago 1:25)
17 Kufunda cokwadi iciro cinokosha, asi tinodikana kuita zvakawanda kupinda apona. Tinodikana kurarama maererano no cokwadi kana kuti, kuseenzesa zviya zvatinofunda. Kana tikadaro, ticapfara zvezvirokwazvo. (Erengai Tiyago 1:25.) Asi tingaziya kudini kuti tirikurarama maererano no cokwadi? Hama imweni inopasa zano rekudziongorora kuitira kuti tiwone kuti ngapapi patirikuseenzesa cokwadi uye paya patinodikana kugadzirisa. Muphostori Pauro wakati: “Asi dakara pataguma tecienda mberi, ngatirumbwe tecihamba zvakanaka no gwanza iri.”—Afi. 3:16.
18. Ngei tecipeta masimba kuti tirumbwe “tecihamba mu cokwadi”?
18 Makamborangarira here mushobo wamurikubetserhwa “ngekurumbwa mecihamba mu cokwadi”! Upenyu wedu wakatanga kupfadza, kupinda izvona, takakwanisa kupfadza Djehovha uye hama dzedu. (Zvie. 27:11; 3 Juau 4) Zvezvirokwazvo, tino zvikonzero zvakawanda zvekuti tide cokwadi uye tirumbwe tecirarama maererano naco?
NGOMA 144 Rumbwai Makaringira Mubayiro!
^ Kajinji tinosoezanisa zvatinotenda uye mararamiro edu no “cokwadi.” Pasinei nekuti takabhabhatidzwa zvino kana kuti haiwa, zvakanaka maningi kuti tese tiedzurire kuti cinyi cakatiitisa kuti tide cokwadi. Kuita izvona kucabambisa cisananguro cedu cekuda kurumbwa tecipfadza Djehovha.
