MUSORO WE KUFUNDA 42
Batisisai Cokwadi
“Garai ne cokwadi ce zviro zvese, batisisai zviro zvakanaka.”—1 VAT. 5:21.
NGOMA 140 Upenyu Usikaperi—Kwenda no kwenda!
ZVATICAFUNDA *
1. Ngei anhu akawanda ecipisika musoro?
NYAMASI uno, kuno zvitendero zvakakwanda zvinoreketa kuti nge zve ciKristu, uye zvinotenderawo kuti zvinonamata Mwari nge mushobo wakanaka. Ndiyo ndaa anhu ajinji ecipisika musoro! Awona anodzibvunzisa kuti: “Kodi kuno citendero cimwe basi ce cokwadi kana kuti zvitendero zvese zvinopfadza Mwari?” Zvakadini na isusu? Kodi isusu tinorugondo rokuti tinofundisa cokwadi here? Tinogonda kuti Apupuri a Djehovha ndiwona anonamata Mwari nge mushobo waanoda here? Ngatimboongorore zvipangidzo zvicatibetsera kuti tigare ne rugondo irona.
2. Ngei Pauro waikwanisa kureketa masoko ari pana 1 Atesaronika 1:5, kuti wainga ano rugondo mu cokwadi?
2 Ngei Pauro wainga ano rugondo mu cokwadi? Mupostori Pauro wainga ane rugondo mu cokwadi (Erengai 1 Atesaronika 1:5.) Rugondo irona rainga risikatsamiri pa mazwire ake. Pauro wainga ari munhu wainyasa kufunda Soko ra Mwari. Iyena waitendera kuti: “Matarhwa ese akafemerhwa na Mwari.” (2Ti. 3:16) Ngazvipi zvakafundwa na Pauro mu fundo iyona? Paaifunda Soko ra Mwari, Pauro wakagumira zvipangidzo zviri pamhene zvaipangidza kuti Djesu wainga ari Mesiya wakapikirhwa. Nge dii rimweni atungamiriri e magereja e ci Djudha airamba zvipangidzo izvona. Nge kunyepera awona aitendera kuti awona ainga ari aemereri a Mwari, asi nge dii rimweni aiita zviro zvinozondhwa na Mwari. (Tit. 1:16) Asi Pauro wainga akasiyana ne atungamiriri awona, iyena wainga asikasananguri dii re Bhaibheri raaidikana kutendera. Pauro wainga akagadzirira kufundisa uye kuseenzesa mu upenyu wake “mazano ese a Mwari.”—Zvi. 20:27.
3. Tinodikana kugara ne mhinduro dze mibvunzo yese kuti tigare ne rugondo rokuti tagumira cokwadi here? (Onai bhokisi rinoti: “ Ndangariro uye Mabasa a Djehovha—‘Atiakwanisi Kuwaerenga.’”)
3 Anhu amweni anorangarira kuti citendero ce zvirokwazvo cinodikana kudaira mibvunzo dzese, kunyazi ne dziya dzisikadairhwi ne Bhaibheri. Asi izvona i zvirokwazvo here? Onai muezaniso wa Pauro. Iyena wakakohomedzesa aKristu kuti “agare ne cokwadi ne zviro zvese,” asi iyena wakatenderawo kuti painga pane zviro zvakawanda zvaainga asikazii. (1Ate. 5:21) Pauro wakatendera kuti “painga pane zviro zvakawanda zvaasikazi.” Iyena wakatara eciti, “wainga asina ruziwo re zviro zvese.” (1Ako. 13:9, 12) Asi Pauro waikwanisa kuona zvese zvaibatanidzwa pa zvinangwa zva Djehovha. Ruziwo raainga anaro rainga rakamukwanira kuti agare ne rugondo rokuti agumira cokwadi.
4. Tingabambisa kudini rugondo redu rokuti takagumira cokwadi uye ticaonei nge zve aKristu e zvirokwazvo?
4 Tinodikana kubambisa rugondo redu rokuti tagumira cokwadi. Mushobo wekuita izvona ngewe kuezanisa mitemo yekunamata ke cokwadi yakasiiwa na Djesu ne zviya zviri kuizwa ne Apupuri a Djehovha nyamasi uno. Mu fundo ino ticaona kuti aKristu e zvirokwazvo, (1) aanamati zvidhori, (2) anoreremedza zina ra Djehovha, (3) anoda cokwadi, uye (4) anodanana.
ISUSU ATINAMATI ZVIDHORI
5. Djesu akatifundisei nge zve mushobo wakanaka we kunamata Mwari, uye tingamuteedzera kudini?
5 Djesu akagara ecida Mwari, ndiyo ndaa ayena ainamata Djehovha basi, kunyazi paainga ari kudenga kunyazi paainga ari pasi pano. (Ru. 4:8) Djesu akafundisa afundi ake kuti aitewo zvimwezvo. Djesu ne afundi ake akagondeka aazi kumboseenzesa zvidhori pakunamata. Ngekuti Mwari mwiya mufanikiso upi hawo unoizwa ne munhu auyezaniswi ne magariro akaita Djehovha! (Isa. 46:5) Asi zvakadiniwo ne mifanikiso inodainzwa kuti acena uye ne kuanamatawo? Pa mutemo wecipiri we Mitemo Gumi, Djehovha akati: “Audikani kudzigadzirira mifanikiso yakatsetswa, kana mifanikiso ye ciro cipi haco ciri kudenga ku musoro, kana ciri pa nyika pasi, kana ciri mu mvura pasi pe nyika . . . Usazvikotamire kana kuzvinamata.” (Eki. 20:4, 5) Masoko aya, akadjeka ku aya anoda kupfadza Mwari.
6. Mutemo upi uri kuteererhwa ne Apupuri a Djehovha pakunamata kawo nyamasi uno?
6 Kunyazi aya anopanganidza zvakaitika kare, awona anotendera kuti aKristu e pakutanga ainamata Mwari basi. Nge muezaniso, bhuku rinozwi História da Igreja Cristã, rinobhuya kuti aKristu epakutanga “aitonyangadzwa ndizvona” nge kuzwa basi kuti tinodikana kugara ne mifanikiso mu mbuto dze kunamatira. Nyamasi uno, Apupuri a Djehovha anoteedzerawo mutemo umwewo wakasiiwa ne aKristu e pakutanga. Isusu atinamati mifanikiso ye “acena” kana kuti ye ngirozi; uye atinamatiwo kunyazi Djesu. Uyewo atiiti ciro cipi haco cingaita kuti anhu aone kuti tiri kunamata nyika yedu. Pasinei ne zvingaitika, takashinga kuzwira masoko akabhuiwa na Djesu anoti: “Djehovha Mwari wako ndiye waunodikana kunamata.”—Mt. 4:10.
7. Musiyano upi uripo pakati pe Apupuri a Djehovha ne magereja amweni?
7 Nyamasi uno, anhu akawanda anopfarira kuteera atungamiriri e magereja anoreremedzwa uye anonyanya kuziikanwa. Pamweni paya, kuareremedza kaanoita zvinopedzesera ne kuanamata. Anhu akawanda anodzara mu magereja awo, anotenga mabhuku awo, uye anoita mipiro yakawanda kuti atsigire zvinoizwa ne atungamiriri awo. Zvinoshupa kurangarira kuti anhu aya aizobata Djesu nge mushobo umwewo here kudai akadzipangidza kaari! Asi nge dii rimweni, anamati e cokwadi a Djehovha aanamati munhu. Zviri pamhene kuti tinoreremedza aya anotitungamirira, asi nguwa dzese tinoedzurira masoko akareketwa na Djesu e kuti: “Tese tiri hama.” (Mt. 23:8-10) Isusu atinamati munhu, pasinei nekuti mutungamiriri we gereja here kana kuti mukuru we zve matongerhwe e nyika. Uye atitsigiri zviya zvaanoita. Zviro zvese izvi, zvinopangidza pamhene kuti isusu takasiyana ne zvinoizwa ne magereja amweni anodziti tiri aKristu.—Ju. 18:36.
TINOREREMEDZA ZINA RA DJEHOVHA
AKristu e zvirokwazvo anoparidzirawo amweni nge zva Djehovha (Onai mandima 8-10) *
8. Tinozia kudini kuti Djehovha anoda kuti zina rake rikudzwe uye riziikanwe ne amweni?
8 Pa nguwa imweni, Djesu akanamata eciti: “Baba, kudzai zina renyu.” Hino Djehovha kamare akadaira munamato iwona nge izwi guru ari kudenga, ecigondesa kuti aizokudza zina rake. (Ju. 12:28) Paaiparidzira Djesu akakudza zina ra Baba ake. (Ju. 17:26) Ndiyo ndaa, zvakasisira kuti aKristu e zvirokwazvo adade nge kuseenzesa zina ra Mwari uye nge kuita kuti riziikanwe ne amweni.
9. AKristu epakutanga akapangidza kudini kuti aireremedza zina ra Mwari?
9 Mu zana re makore rekutanga rekuti ungano yekutanga ye ciKristu yaumbwa, Djehovha “akapasa ngwariro yake ku madzinza kuti atore anhu e zina rake.” (Zvi. 15:14) AKristu e pa nguwa iyona, aidada nge kuseenzesa zina ra Mwari uye nge kuita kuti amweni ariziyewo. Awona akaseenzesa maningi zina ra Mwari paaiparidzira uye paaitara mabhuku e mu Bhaibheri. * Awona akapangidza pamhene kuti ndiwona basi aiita kuti zina ra Mwari riziikanwe.—Zvi. 2:14, 21.
10. Zvinyi zvinopangidza kuti Apupuri a Djehovha anhu e zina ra Djehovha?
10 Apupuri a Djehovha anhu e zina ra Djehovha here? Onai zviro zvinopangidza pamhene. Nyamasi uno, atungamiriri e magereja akawanda anoita zviri zvese kuti zina ra Mwari risaziikanwe uye awona anotogumira pakuribvisa pa ma Bhaibheri aanoturikira. Mu zviitiko zvimweni awona anotorambidza kuseenzesa zina ra Mwari pa ma serimoniya awo. * Pano mubvunzo here kuti Apupuri a Djehovha ndiwona basi anokudza ne kureremedza zina ra Mwari here? Tingatoti tiri kuita zvese zvatinokwanisa kuti tikudze zina retakatambira rekuti Apupuri a Djehovha. (Isa. 43:10-12) Takatobudisa makopiya e Shanduro Yenyika Itsva Ye Magwaro Matsvene, anokwana mamirionji 240, anoseenzesa zina ra Djehovha mu mbuto dzese dzakabviswa ne aturikiri amweni e Bhaibheri. Uye tinobudisawo mabhuku anoreketa nge zve Bhaibheri anoita kuti zina ra Djehovha riziikanwe mu mireketero inodarika 1000!
ISUSU TINODA COKWADI
11. AKristu epakutanga akapangidza kudini kuti aida cokwadi?
11 Djesu aida cokwadi, kana kuti, cokwadi nge zva Mwari uye nge zve zvinangwa zvake. Djesu akararama maererano ne cokwadi icona uye akaita kuti ciziikanwe ne amweni. (Ju. 18:37) Ateeri e cokwadi a Djesu aingawo ane rudo mu cokwadi. (Ju. 4:23, 24) Zvokutoti mupostori Pedru wakadainza ciKristu hinga “gwanza re cokwadi.” (2Pe. 2:2) Rudo ku cokwadi re aKristu epakutanga rainga rakabamba zvokutoti aitoramba mirangariro ye magereja, tsika uye maonero e munhu ainga asikapindirani ne cokwadi. (Ako. 2:8) Zvimwezvo zvinoitikawo nyamasi ne aKristu e cokwadi, awona anopeta masimba kuti arumbwe “ecihamba mu cokwadi” uye awona anoita izvi ngekuita kuti mararamiro awo uye zvaanotenda zvitsamire mu Soko ra Djehovha.—3Ju. 3, 4.
12. Kana pecida kuizwa cinjo ye mazwisisiro edu e kunamata, hama dzinotungamirira dzinoitei uye ngei?
12 Apupuri a Djehovha aadziiti hingana ndiwo ano ruziwo rakakwana, kana kuti aziisisi e zviro zvese. Pamweni paya, awona anokwanisa kushaisha paanonga ecipanganidza tsamba ye Bhaibheri kana kuti pakupasa nhungamiriro e maseenzere anodikana kuita ungano. Zviro izvi, azvidikani kutishamisa. Bhaibheri rinobhuya pamhene kuti ruziyo re cokwadi raizotunhudzirika ne kuhamba ke nguwa. (Ako. 1:9, 10) Djehovha anoita kuti cokwadi cidjeke padoko ne padoko, uye isusu tinodikana kugadzirira kuetsera kuti icona cinyase kudjeka. (Zvie. 4:18) Hama dzinotungamirira padzinoona kuti panodikana kuizwa cinjo ye mazwisisire kana kuti maizirhwe e zviro, awona anokasika kuita cinjo idzona. Izvi zvakasiyana ne zvinoizwa ne magereja ekunyepa. Kajinji kakhona, awona anoita cinjo paanonga ecida kupfadza atendi awo, kana kuti paanonga ecida kuziikanwa ne nyika. Nge dii rimweni, sangano ra Djehovha rinoita cinjo dzicabetsera hama kuti dzikhwedere dhuze na Mwari uye kuti anyase kuteera mitemo yekunamata yakagadzwa na Djesu Kristu. (Tg. 4:4) Cinjo dzatinoita adziizwi ngekuda kupfadza anhu, asi nge kuti tino ruziyo rakanyasa kudjeka re Bhaibheri. Isusu tinoda maningi cokwadi!—1Ate. 2:3, 4.
ISUSU TINODANANA
13. I wara ripi rinokosha rinopangidzwa nge aKristu, uye irona rinooneka kudini pakati pe Apupuri a Djehovha?
13 AKristu e mu zana re makore ekutanga, ainga ano mawara akanaka akawanda. Asi rainyanya kukosha i rudo. Djesu akati: “Ese acaziya kuti muri afundi angu, kana muno rudo pakati penyu.” (Ju. 13:34, 35) Nyamasi, Apupuri a Djehovha e mu nyika yese, anokwanisa kuzwa rudo re cokwadi uye rubatano. Isusu takasiyana ne magereja amweni, takaita hinga mhuri yakabatana, kunyazi tiri we nyika uye tsika dzakasiyana-siyana, izvona azvitiparadzanisi. Tingakwanisa kuona cipangidzo ce rudo re cokwadi pa misangano, pa magungano uye pa magungano e nharaunda. Zvipangidzo izvi zvinonyasa kubambisa rugondo redu rokuti kunamata kedu, ndiko kunotenderhwa na Djehovha.
14. Maererano na Akorosi 3:12-14, mushobo upi unokosha watingapangidza nawo rudo rikuru ku amweni?
14 Bhaibheri rinoti “dananai.” (1Pe. 4:8) Mushobo umweni we kupangidza rudo irona, nge we kurekererana uye kushingirira kusama kukwana ke amweni. Tingakwanisawo kupsvaka mikana ye kugara ne rupo uye kutambira zvakanaka hama dzese dze mu ungano, kutobatanidzawo aya akatigumbura. (Erengai Akorosi 3:12-14.) Patinopangidza rudo rakakura kudai ku amweni, tinonga tecipangidza kuti tiri aKristu e cokwadi.
“KUTENDA KUMWE BASI”
15. Mishobo ipi ye mitemo yatingateerera yakasiiwa nge aKristu e pakutanga?
15 Pano zviro zvimweni zvinopangidza kuti tiri kuteerera mitemo yekunamata yakasiiwa ne aKristu e pakutanga. Nge muezaniso, sangano redu rino aonereri e nharaunda, akuru uye abati anoseenzera, zvese izvi ndizvonadi kamare zvainga zvakaita aKristu e muzana re makore ekutanga. (Afi. 1:1; Tit. 1:5) Kusiya izvona, maonero edu akaringana nge zve pamaponde, mucato, maseenzeserwe e ngazi uye nge zve kudziirira ungano ku ashaishi asikacinyuki, zviro zvese izvi zvinotsamira pa mitemo yakasiiwa nge aKristu e pakutanga.—Zvi. 15:28, 29; 1Ako. 5:11-13; 6:9, 10; Ahe. 13:4.
16. Tinofundei pa zviro zvinoreketwa pana Aefeso 4:4-6?
16 Djesu akareketa kuti anhu ajinji aizodaira kuti ateeri ake, asi ayena akareketawo kuti aesepi aizomuteeradi zvezvirokwazvo. (Mt. 7:21-23) Bhaibheri rakatingwadza paciri ne nguwa kuti mu mazuwa ekupedzesera, anhu ajinji aizoita hinga “anonamata Mwari.” (2Ti. 3:1, 5) Asi Bhaibheri rinobhuya pamhene parinoti: “Kuno kutenda kumwe basi” kunotenderhwa na Mwari.—Erengai Aefeso 4:4-6.
17. Anhu api nyamasi ari kuteedzera Djesu uye arikuita kunamata ke cokwadi?
17 Anhu api arikuita kunamata ke cokwadi nyamasi uno? Isusu taona zvipangidzo. Taongorora mitemo ye kunamata yakafundiswa ndi Djesu uye afundi ake epakutanga akaiteerawo. Mhinduro ndi imwe basi, Apupuri a Djehovha. Zviri pamhene kuti cikomborero cikuru kugara nhai ye Apupuri a Djehovha uye kuziya cokwadi cakaringana naye uye ne zvinangwa zvake! Umwe na umwe wedu ngaagare ne ushingi we kunyasa kubatisisa cokwadi ne rugondo rese.
NGOMA 3 Djehovha Ndiye Simba ne Kariro Yangu
^ par. 5 Mu fundo ino, ticada kuona mitemo yakaringana ne kunamata ke cokwadi yakasiiwa na Djesu uye kuti afundi ake e pakutanga akaiteerera kudini. Uye ticaongororawo zvipangidzo zvekuti Apupuri a Djehovha arikuteerera mitemo ii yakaringana ne kunamata ke cokwadi mu mazuwa atiri ano.
^ par. 9 Onai bhokisi rinoti: “VaKristu Vokutanga Vaishandisa Zita raMwari Here?” riri mu Murindiri wa 1 ya Khunguru ya 2010, paji. 6 mu ciShona.
^ par. 10 Nge muezaniso, muna 2008, Papa Bento XVI wakapasa mutemo wekuti zina ra Mwari “aridikani kuseenzeswa kana kureketwa” mu ma serimoniya, mu minamato uye mu ngoma dze cikatorika.
^ par. 63 KUPANGANIDZWA KE MUFANIKISO URI PA: Sangano ra Djehovha rakabudisa Shanduro yeNyika Itsva mu mireketero inokwana kuita 200 kuitira kuti anhu akwanise kuerenga Bhaibheri rine zina ra Mwari mu mureketero wawo.
