1-2. Musiyano upi wainga uripo pakati pa mambo Akabhi na Manase, uye mibvunzo dzipi dzaticadaira?

NGATIMBOREKETE nge zve madzimambo mairi akararama mu nguwa dze Bhaibheri. Umwe waitonga umambo we madzinza gumi e Aisraeri uye umweni waitonga umambo uwiri we dzinza ra Djudha. Kunyazi akararama mu nguwa dzakasiyana-siyana madzimambo mairi aya akaita zviro zvakaezana. Awona akapandukira Djehovha uye akaita kuti anhu aite zvitema. Madzimambo aya ainga ano ndaa yekunamata zvidhori uye yekuuraya. Asi painga pano musiyano pakati pe anarume aya. Umwe wawo wakarumbwa eciita zvakashata dakara pakufa kake. Asi umweni wakacinyuka uye zvitema zvake zvese zvakarekererhwa. Madzimambo aya ndiyanani?

² Mambo we Aisraeri wainga ari Akabhi, uye mambo we Djudha wainga ari Manase. Musiyano wainga uripo pakati pe anarume airi aya ungakwanisa kutifundisa fundo rinokosha—kucinyuka. (Zvi. 17:30; Aro. 3:23) Asi cinyi cinozwi kucinyuka? Munhu ungapangidza kudini kuti acinyuka zvezvirokwazvo? Isusu tinodikana kuzviziya ngekuti tinoda kuti Djehovha arekerere zvitema zvedu. Kuti tikwanise kudaira mibvunzo idzi, ticaongorora upenyu we madzimambo airi aya uye ticaonawo kuti muezaniso wawo unotifundisei. Pedzepo, ticafunda nge zviya zvakafundiswa na Djesu nge zve kucinyuka.

3. Akabhi wainga ari mambo wakadini?

³ Akabhi wainga ari mambo we cinomwe we umambo we madzinza gumi e Aisraeri. Iyena wakawaka Djezabheri mwana wa mambo we Sidhoni, dzinza rainga rakapfuma raigara ka kutsi. Mucato uu pamweni wakaunzisa upfumi ku Aisraeri. Asi iwona wakakuwadzawo maningi ushamwari we Aisraeri na Djehovha. Djezabheri wainamata Bhaari, kunamata uku kaibatanidza kuita zve uhure nokubaira zviyana, uye Djezabheri wakakohomedzesa  Akabhi kuti amutsidzire kunamata uku kaishoreka. Djezabheri paainga aciri mukadzi wa mambo, apana muphorofita wa Djehovha waikwanisa kugara akacengeteka. Iyena wakaita kuti akawanda awo auraiwe. (1Mad. 18:13) Akabhi kamare “wainyanya kuita zviro zvakashata pamberi pa Djehovha kudarika ese akatonga sure kake.” (1Mad. 16:30) Djehovha aazi kufunga madziso ku zviya zvaiizwa na Akabhi uye na Djezabheri. Kusiyana na izvona, ayena aiona zvese zvaiita. Ngo nyasha, Djehovha akatuma Eriya no aphorofita amweni kuti akohomedzese anhu kuti acinje miitiro yawo nguwa isati yapera. Asi Akabhi na Djezabheri akaramba kupurutana.

4. Akabhi waizopanicwa kudini uye iyena wakaitei?

⁴ Kunonoka kutsamwa ka Djehovha kakaguma kumapeto. Ayena akatuma muphorofita Eriya kuti abvunze Akabhi na Djezabheri kupanicwa kaaizoizwa. Mhuri yawo yese yaizoparadzwa. Akabhi wakarhwadziwa maningi no masoko a Eriya! Asi zvinoshamisa kuti mwanarume uu waidzikudza “wakazodzidodosa.”—1Mad. 21:19-29.

5-6. Cinyi cinopangidza kuti kucinyuka ka Akabhi kainga kusikazi kubva mu mwoyo?

⁵ Panguwa iyona, Akabhi wakadzidodosa. Asi zviro zvaakazoita mumasure mazvo zvakapangidza kuti kucinyuka kake kainga kusikabvi mu mwoyo. Iyena aazi kuedza kuparadza kunamatwa ka Bhaari mu umambo wake. Uye iyena aaziwo kumutsidzira kunamatwa ka Djehovha. Akabhi wakapangidzawo kuti wainga asikazi kucinyuka nge mishobo imweni.

⁶ Nokuhamba ke nguwa, Akabhi wakarhwisana mu hondo no Asiriya. Iyena wakadaidza Mambo Djeosafati we Djudha kuti abatane naye. Ngekuti wainga Mambo wakanaka, Djeosafati wakabhuya kuti awona aidikana kutanga kubvunzisa muphorofita wa Djehovha. Pakutanga, Akabhi aazi kuzvipfarira. Iyena akati: “Uciriyozve mwanarume umwe watingaseenzesa kuti tibvunzise Djehovha, asi inini ndinomuzonda ngekuti aambophorofiti zviro zvakanaka nge zvangu, asi zviro zvakashata basi.” Kunyazi zvakadaro, awona akabvunzisa muphorofita Mika. Uye hinga zvaietserhwa, masoko e muphorofita kuna Akabhi ainga asikazi kunaka! Akabhi waidikana kucinyuka uye kupsvaka kurekererhwa na Djehovha. Pane kudaro, iyena wakaita kuti muphorofitiwo akonyerhwe mu karaboso. (1Mad. 22:7-9, 23, 27) Zvirokwazvo kuti Akabhi wakakwanisa kuita kuti muphorofita wa Djehovha asungwe, asi iyena aazi kukwanisa kuita kuti uphorofiti uu usadzadzike. Akabhi wakazouraiwa pa hondo yakazoteera.—1Mad. 22:34-38.

7. Mumasure mekufa ka Akabhi, Djehovha akabhuyei nge zvake?

⁷ Mu masure mekufa ka Akabhi, Djehovha akapangidza pamhene maonere aaiita mwanarume uu. Mambo wakanaka Djeosafati paakahwirira kumba ecibva ku hondo, Djehovha akatuma muphorofita Djeu kuti amusumurure ngekuita citenderano na Akabhi. Muphorofita Djeu akati: “Munodikana kubetsera anhu akashata uye moda anhu anozonda Djehovha here?” (2 Mak. 19:1, 2) Cimborangarirai basi: Kudai Akabhi akacinyuka zvezvirokwazvo, muphorofita Djeu wainga asikadi kubhuya kuti Akabhi wainga mwanarume wakashata uye waizonda Djehovha. Zviri pamhene kuti kunyazi Akabhi akapangidza kutsumba, iyena wainga asikazi kucinyuka zvezvirokwazvo.

8. Muezaniso wa Akabhi unotifundisei nge zve kucinyuka?

⁸ Tinofundei pa muezaniso wa Akabhi? Iyena paakazwa nge zve kupanicwa ke mhuri yake, pakutanga wakadzidodosa. Aya ainga ari matangiro akanaka. Asi zviro zvaakazoita, zvakapangidza kuti iyena wainga asikazi kucinyuka zvezvirokwazvo. Zvino, taakuona kuti kucinyuka ke zvirokwazvo kunobatanidza zvakawanda kudarika kutsukwara ke cinguwa cidoko basi. Zvino, ngatione muezaniso umweni ucatibetsera kuzwisisa kuti kucinyuka ke zvirokwazvo cinyi.

9. Manase wainga ari mambo wakadini?

⁹ Makore 200 aadarika, Manase wakagara mambo we Djudha. Zvitema zvake zvainga zvakakura kudarika zva Akabhi! Bhaibheri rinobhuya kuti Manase: “Wakaita zviro zvakashata zvakawanda pamberi pa Djehovha ecimunyangadza.” (2 Mak. 33:1-9) Iyena wakawakira anamwari ekunyepa ma artari akawanda. Kupinda izvona, iyena wakakanda mukati me tempro psvene ya Djehovha mufanikiso wakatsetswa pa danda cena pamweni waiseenzeswa pakunamata kakaringana no zve pamaponde. Iyena wakaita zve masarapita, kufembera uye zve uroi. Manase “wakadururawo ngazi yakawanda isina ndaa.” Iyena wakauraya anhu asikaerengeki uye “wakatopisawo ana ake kamare mu muriro,” hinga cibairo ce munhu ku anamwari ekunyepa.—2Mad. 21:6, 7, 10, 11, 16.

10. Djehovha akapangira kudini Manase, uye Manase wakaitei?

¹⁰ Djehovha akatuma aphorofita kuti aende koziisa Manase, asi kuita hinga Akabhi, Manase aazi kupurutana zviziiso zvaakapaswa nge aphorofita. Hino “Djehovha akaita kuti akuru e hondo a mambo e Asiriya aende koorhwisana no [Adjudha], uye awona akabata Manase omusunga no makorente mairi e kobhre uye akaenda naye ku Bhabhironi.” Paainga ari mu karaboso ku nyika ye kure, Manase wakanyasa kurangarira nge zve zviro zvaakaita. Iyena “wakadzidodosa maningi pamberi pa Mwari we madzitsekuru ake.” Manase wakatoitazve zviro zvimweni kudarika kudzidodosa basi. “Iyena wakadeketera kuna Djehovha Mwari wake.” Zvezvirokwazvo, Bhaibheri rinobhuya kuti, Manase “wainamata kaari.” Mwanarume uu wakatanga kucinja maitiro ake. Iyena wakatanga kuona Djehovha hinga “Mwari wake,” uye wainamata kaari kakawanda.—2 Mak. 33:10-13.

11. Maererano na 2 Makoronika 33:15, 16, Manase wakapangidza kudini kuti wainga acinyukadi zvezvirokwazvo?

¹¹ Nokuhamba ke nguwa, Djehovha akadaira minamato ya Manase. Pa minamato yaiithwa na Manase, Djehovha akawona kuti iyena wainga acinja. Nge ndaa ye munamato wekudeketera wa Manase, Djehovha akatendera kuti Manase agarezve mambo. Uye Manase wakakhorovhera mukana uu kuti apangidze kuti wainga acinyuka zvezvirokwazvo. Iyena wakaita zvisikambozi kuizwa na Akabhi. Uye iyena wakacinjawo miitiro yake. Iyena wakarhwisawo kunamata kekunyepa uye wakamutsidzira kunamata ke cokwadi. (Erengai 2 Makoronika 33:15, 16.) Kuita zviro izvi, zvaida kuti Manase no ushingi uye no kutenda. Ngekuti ke makore akawanda iyena wainga ari muezaniso wakashata ku mhuri yake, ku anhu anoseenza ku nyumba ya mambo uye ku anhu ese. Asi mu makore ake ekupedzesera, Manase wakaedza kugadzirisa zvishaishi zvimweni zvaainga aita. Zvingaita kuti iyena wakapangidza muezaniso wakanaka ku muzukuru wake Djosiya, wakazogara mambo wakanaka maningi.—2Mad. 22:1, 2.

12. Muezaniso wa Manase unotifundisei nge zve kucinyuka?

 ¹² Tinofundei pa muezaniso wa Manase? Iyena wakadzidodosa pamberi pa Mwari uye wakaita zvakawanda kupinda kudzidodosa basi. Iyena wakanamata uye wakadeketera kuna Djehovha kuti amuzwire usisi. Manase wakacinja miitiro. Iyena wakapeta masimba kuti agadzirise ushaishi waainga aita, uye wakaita zviri zvese kuti anamate Djehovha uye wakabetserawo amweni kuti aite zvimwezvo. Muezaniso wa Manase, unopasa kariro anhu aya anonga aita zvitema zvakakura. Isusu tirikuona cipangidzo cakanaka cekuti Djehovha Mwari “akanaka uye akagadzirira kurekerera.” (Pis. 86:5) Kurekerera kunobvira—asi ku uya unonga wacinyuka.

13. Muezaniso upi unopangidza fundo rinokosha rakaringana no kucinyuka?

¹³ Manase wakaita zvakawanda kupinda kutsukwara basi nge ndaa ye zvitema zvake. Izvi zvinotifundisa mafundo anokosha nge zve kucinyuka. Rangarirai nge zve muezaniso uu: Imwimwi munoenda ku padhariya uye mokumbira bhoro rimwe, asi pa mbuto yekupaswa bhoro, mutengesi unomupasa zanda rimwe. Imwimwi maizopfara ndizvo here? Zviri pamhene kuti haiwa! Asi zvakadini kana mutengesi akamubvunza kuti zanda ciro cinokosha cinoseenzeswa pakuita bhoro? Imwimwi mainga musikazopfarizve ndizvo! Zvimwezvimwezvoo, Djehovha anokumbira kuti mushaishi acinyuke. Kana mushaishi arikuzwa kutsukwara nge ndaa ye citema caakaita, izvona zvakanaka. Mazwiro aya cipangidzo cinokosha cekucinyuka, asi kuita izvona azvikwani. Panodikaneizve? Tinofunda zvakawanda kubva pa ngano yakanaka yakapanganidzwa na Djesu.

14. Pa mufanikiso wa Djesu, mwana unohwirira kumba wakapangidza kudini kuti wainga acinyuka?

¹⁴ Djesu akapanganidza ngano imweni yaibaya moyo iri pana Ruka 15:11-32. Mwana unorekethwa mu ngano ii, wakapandukira baba ake, uye wakabuda pa nyumba oenda ku “nyika imweni iri kure.” Paainga ari ikona iyena wairarama upenyu we useki uye upenyu wakashata. Asi, paakabatana no matambudziko, iyena wakanyasa kurangarira zviya zvaakaita. Iyena wakakwanisa kuona kuti upenyu wake wainga wakanaka maningi paainga aciri kumba ka baba ake. Hingana zvakabhuiwa na Djesu, mudjaha uu “wakapembenuka.” Hino iyena wakasanangura kuhwirira kumba uye wokumbira baba ake rurekerero. Zvainga zvakakosha maningi kuti mwana uu aone kuti wainga aita zvisananguro zvakawanda zvakashata. Asi zvainga zvakakwana here kuita izvona basi? Haiwa. Pano zviro zvimweni zvaaidikana kuita.

15. Mwana we mufanikiso wa Djesu, wakapangidza kudini kuti wainga acinyuka?

¹⁵ Mwana unohwirira kumba wakapangidza kuti wainga wacinyuka zvezvirokwazvo nge zvese zvaainga aita. Iyena wakaita rhwendo rakareba ecihwirira kumba. Hino, paakaonanazve na baba ake, iyena wakati: “Ndashaishira  denga pamwepo na imwimwi. Andicasisiri kudaidzwa mwana wenyu.” (Ru. 15:21) Kupupura uku kaibva mu mwoyo kakapangidza kuti mwana uu waida kugadzirisazve ushamwari wake na Djehovha. Iyena wakazwisisawo kuti zvaakaita zvakarhwadzisa maningi baba ake. Uye iyena wainga akagadzirira kuita zvese zvaidikanwa kuti arekererhwe na baba ake, kunyazi zvaireya kuseenza hingana museenzi wawo! (Ru. 15:19) Mufanikiso we mwana anohwirira kumba ainganopi yakanaka basi. Iyona inofundisawo akuru e ungano mazano anokosha. Hama painoita citema cakakura, akuru anodikana kuongorora kuti aone kuti iyona yacinyukadi kamare here.

16. Ngei zvingashupa kuti akuru aziye kuti munhu wacinyuka zvezvirokwazvo?

¹⁶ Zvingashuphira akuru kuona kuti munhu wakaita citema cakakura wacinyuka zvezvirokwazvo. Ngei? Ngekuti akuru aakwanisi kuona zviri mu mwoyo, hino awona anoedza kuona zvipangidzo zvekuti hama yawo yacinja maonero ayo nge zve citema caakaita. Pa nyaya dzimweni, munhu ungaita citema nge mushobo unopsverudza zvekuti akuru anoungana naye angakonerhwa kugonda kuti iyena wacinyuka zvezvirokwazvo.

17. (a) Muezaniso upi unopangidza kuti mushaishi paanobhuya kuti wakatsukwara nge citema caanonga aita, azvireyi kuti wacinyuka zvezvirokwazvo? (b) Maererano na 2 Akorinti 7:11, ngazvipi zvinoetserhwa ku munhu unonga acinyuka zvezvirokwazvo?

¹⁷ Rangarirai nge zve muezaniso unoteera. Hama inoita uhure kakawanda uye ke makore akawanda. Pane kukumbira rubetso, iyona inoiga citema cake ku mukadzi wake, ku shamwari dzake uye ku akuru. Hino, iyona inopedzesera yabatika. Pedzepo, akuru paanozomubvunza kuti ano zviro zvinopangidza kuti iyona yaiita upombwe, hameyo inotendera kuti yakashaisha uye inogara hingana kuti yakatsukwara maningi. Kodi kutsukwara basi kunokwana here? Akuru aizoda kuona zviro zvakawanda kudarika kutsukwara basi. Edzurirai kuti hama ii aizi kuita citema ici kamwe basi kana kukangaidzika panguweyo, asi yakaita citema ici kakawanda uye ke makore akawanda. Kupinda izvona, hama ii andiyopi yakapupura yega zvayakaita, asi yakabatika. Ndiyo ndaa, akuru anodikana kuona zviro zvinopangidza kuti nzero, mazwiro uye zviito zve mushaishi kuti zvacinja here. (Erengai 2 Akorinti 7:11.) Pamweni zvingatora nguwa yakaremba kuti mwanarume uu aite cinjo dzinodiikanwa. Uye zvingaita kuti hameyo idzingwe mu ungano ke nguwa yakareba.—1Ako. 5:11-13; 6:9, 10.

18. Munhu wakadzingwa ungapangidza kudini kuti wacinyukadi zvezvirokwazvo, uye mugumisiro wakhona ngaupi?

¹⁸ Munhu wakadzingwa anodikana kuita zviro zvinganani kuti apangidze kuti wacinyukadi zvezvirokwazvo. Iyena unodikana kupinda misangano nguwa dzese, oteera mazano e akuru e kuita munamato nguwa dzese uye kufunda Bhaibheri. Iyena unodikana kuita zviri zvese kuti asasongane no migariro yakaita kuti aite citema  icona. Kana munhu akapeta masimba kuti agarezve no ushamwari na Djehovha, iyena ucagara no rugondo rekuti Djehovha acamurekerera uye akuru acamuhwirinza mu ungano. Zviri pamhene kuti paanobatana no munhu wakaita citema, akuru anoedzurira kuti ndaa imwe na imwe yakasiyana no ndaa imweni uye kuti awona aadikani kutonga asikapangidziri usisi.

19. Kucinyuka ke zvirokwazvo kunobatanidzei? (Ezekiyeri 33:14-16)

¹⁹ Hingana zvetawona, kucinyuka ke zvirokwazvo kunodarika kutsumba citema cetakaita. Kucinyuka ke zvirokwazvo kunobatanidza kucinja marangariro no mazwiro edu. Uye cinjo iyona inodikana kutitora kuti tiite ciito, kusiya gwanza recitema uye kuhwirira ku gwanza ra Djehovha. (Erengai Ezekiyeri 33:14-16.) Ciro cinonyanya kukosha ku mushaishi ngecekugadzirisa ushamwari wake na Djehovha.

20-21. Tingabetsera kudini munhu wakaita citema cakakura?

²⁰ Djesu akabhuya fundo rinokosha mu ushumiri wake paakati: “Inini andizi kuuya kozodaidza anatsi . . . asi ashaishi kuti acinyuke.” (Ru. 5:32) Isusu tinodikana kugarawo no cido cakadaro. Cimborangarirai kuti shamwari yenyu ye padhuze yaita citema cakakura. Munodikana kuitei?

²¹ Kuedza kufisa citema ce shamwari yenyu zvicashatira iyena kamare. Uye akutobetseri, ngekuti Djehovha arikutoona zvese. (Zvie. 5:21, 22; 28:13) Kana mecida kubetsera shamwari yenyu, ibvunzei kuti icedze no akuru. Kana iyona ikaramba, imwimwi wene munodikana kucedza no akuru nge zvazvo. Izvi ndizvo zvinozwi kubetsera shamwari yenyu, ngekuti ushamwari wake na Djehovha uri pa ngozi!

22. Ticaonei mu fundo inoteera?

²² Nguwa dzimweni, munhu unoita citema cakakura kakawanda uye ke nguwa yakareba, zvekuti akuru anoita cisananguro cekuti munhuwo unodikana kudzingwa. Izvi zvinoreya kuti akuru aazi kumupangidzira usisi here? Mu fundo inoteera, ticanyasa kuzwisisa mapangidzire anoita Djehovha usisi paanopangira ashaishi uye kuti tingamuteedzera kudini?