1. Ngacipi cikomborero uye mupfaro watinawo?

KATIRI, mupfaro uye cikomborero cakakura kugara Mupupuri wa Djehovha. Isusu tinotwara zina ra Mwari uye tinopangidza kuti tiri Apupuri a Djehovha ngekuita basa rekuparidza uye rekuita afundi. Tinopfara maningi patinokwanisa kubetsera munhu “ano cido ce kuona upenyu usikaperi” kuti agare munamati wa Mwari. (Zvi. 13:48) Isusu tinozwawo hingana Djesu uyo, “akazwa mupfaro nge ndaa ye mwiya mucena” apo mu masure mekuti afundi ake akabatikana pa gwitikwiti rekuparidzira rakanyasa kubudirira.—Ru. 10:1, 17, 21.

2. Tinopangidza kudini kuti tinokoshesa basa redu rekuparidzira?

² Isusu tinokoshesa maningi basa rekuparidzira. Mupostori Pauro wakangwadza Timoti ne masoko ekuti: “Rumbwa we cizvingwariria pacako ne kufundisa kako.” Uye Pauro wakatunhudzirazve eciti: “Kana ukadaro ucadziponesa iwewe pacako ne aya anokupurutana.” (1Ti. 4:16) Upenyu we anhu akawanda uri pa ngozi. Ngekuti tinoda kutongwa ne Umambo wa Mwari tinodikana kurumbwa tecidzingwaririra. Tinoita izvona nge kurarama maererano ne zvia zvabhuiwa na Djesu uye zvinoenderana maererano ne masoko atinonga teciparidzira. (Afi. 1:27) Tinopangidza kuti tinongwarira kufundisa kedu nge kunyasa kugadzirira uye kukumbira Djehovha kuti atikomborere tisati taenda koparidzira amweni.

3. Anhu angakwanisa kutambira kudini masoko e Umambo? Pasai muezaniso.

³ Kunyazi tecipeta masimba ari ese mu basa rekuparidzira, zvingakwanisa kuita kuti anhu e mu ndima yedu angapangidza kupfarira padoko kana kutotama kupfarira masoko e Umambo. Onai muezaniso wa hama Georg Lindal, awo akaparidizira ega mu ndima dzakawanda dze ku Islândia kubvira muna 1929 dakara 1947. Iyona yakakoanisa ma mirionji e makopiya e mabhuku edu, asi kunyazi zvakadaro, apana kana munhu umwe hake wakatenda cokwadi. Iyona yakatara yeciti: “Amweni akatanga kuphikisa cokwadi, asi akawanda awo akarumbwa eciomesa mwoyo.” Mamisionariyo  mangani akapinda cikora ce Giriedhi akatumirhwawo ikona, asi kunyazi zvakadaro anhu akawanda akarumbwa asikapfariri cokwadi. Asi mumasure memakore 9 ma Islandeshi manganani akadzipira kuna Djehovha uye akabhabhatidzwa. *

4. Tinozwa kudini anhu paanotama kutambira zvakanaka masoko akanaka atinoparidzira?

⁴ Zvinonyangadza anhu paasikatambiri masoko atinoparidzira. Tingakwanisa kuzwa hinga Pauro “wakarhwadziya kukuru” apo Adjudha akawanda paainga sikatenderi kuti Djesu ndiye Mesiya. (Aro. 9:1-3) Pamweni imwimwi murikupeta masimba ari ese uye muri kunamata nguwa dzese nge zve mufundi we Bhaibheri, asi iyena aaripi kupangidza kubudirira, pamweni makatoguma pakuimisa fundo, kana kuti zvingakwanisa kuita kuti imwimwi amusati mafundisa munhu dakara pakubhabhatidzwa, hino munodikana kudzipasa ndaa mecirangarira kuti Djehovha aaripi kukomborera basa renyu here? Mu fundo ino, ticadaira mhinduro ye mibvunzo miiri: (1) Ngazvipi zvinoitisa kuti basa redu rekuparidza ribudirire? (2) Ngazvipi zvatinodikana kuetsera mu basa redu rekuparidza?

5. Ngei basa redu rekuparidza ringasama kugara ne magumo atinoda?

⁵ Recibhuya nge zve aya anoita kuda ka Mwari Bhaibheri rinoti: “Zvese zvaacaita zvicabudirira.” (Pis. 1:3) Asi izvi azvidi kureya kuti zvese zvatinoitira Djehovha zvicanyasa kubudirira hinga zvatinoda. Upenyu we anhu “wakadzara nge matambudziko” nge ndaa yekusama kukwana kedu—kutobatanidzawo wedu ne we amweniwo. (Djo. 14:1) Kupinda izvona azondi edu angakwanisa kutiimisa kuparidzira ke nguwa doko. (1Ako. 16:9; 1Ate. 2:18) Hino ngazvipi zvingaizwa ne munhu kuti kuparidza kake kubudirire? Ngatione mafundo manganani mu Bhaibheri angatibetsera kudaira mubvunzo iwona.

6. Cinyi cinoita kuti Djehovha aone kuti basa redu rekuparidzira ririkubudirira?

⁶ Djehovha anoona kuseenza kedu ne simba. Djehovha anoona kuti tiri kubudirira mu basa redu rekuparidza kana tikaita basa iri ne cido uye ne rudo, pasinei nekuti anhu anotipurutana here kana kuti haiwa. Pauro wakatara eciti: “Ngokuti Mwari amunhupi asikanatsi kuti akanganwe basa renyu uye rudo ramunopangidza ku zina rake, ngo kuseenzera acena uye ngo kurumbwa meciaseenzera.” (Ahe. 6:10) Djehovha anoedzurira kupeta masimba uye rudo ratinaro kunyazi basa redu rikasama kunyasa kubudirira. Hino masoko a Pauro ku Akorinti anoseenzawo katiri. Iyena watarawo eciti: “Basa renyu arisi pasina muna Tenzi,” uye masoko aya arikurumbwa eciseenzawo katiri kunyazi kupeta masimba katinoita kungatama kuunza migumisiro yataida.—1Ako. 15:58.

7. Tingafundei pane zvakabhuiya no muphostori Pauro nge zve basa rake rekuparidzira?

 ⁷ Mupostori Pauro wainga ari mu misionariyo wakanaka maningi, iyena wakabetsera kuti paumbwe ungano dzipsva mu ma thaundi akawanda. Asi anhu amweni aiumushora ecireketa kuti ainga asikakwanisi kufundisa. Kuti adzidziirire Pauro aazi kureketa nge zve anhu aakabetsera kuti agare aKristu. Panekudaro, iyena watara eciti: “Ndakaseenza basa rakakura.” (2Ako. 11:23) Kuita hingana Pauro tinodikana kuedzurira kuti, cinonyanya kukosha kuna Djehovha ngekekusama kuremba uye kupeta masimba katinonga teciita.

8. Tinodikana kuedzurirei pa basa redu rekuparidzira?

⁸ Basa redu rekuparidzira rinopfadza Djehovha. Djesu akatuma afundi ake anokwana kuita 70 kuti aparidzire masoko e Umambo, uye awona “akahwirira ne mupfaro mukuru.” Asi cinyi caiita kuti apfare? Awona akati: “Kunyazi madhimoni anodzikanda pasi pedu patinoseenzesa zina renyu.” Asi Djesu akagadzirisa marangariro awo eciti: “Musapfare nge ndaa yekuti mwiya inodzikanda pasi penyu, asi pfarai ngekuti mazina enyu akatarhwa kudenga.” (Ru. 10:17-20) Djesu aizia kuti afundi ake aisazogarapi ne maexperiensiya akanaka nguwa dzese pa basa rekuparidzira. Zvezvirokazvo atizii kuti pa anhu ese akazwa anhu angani akazogara aKristu. Afundi aya ainga asikadikani kupfara ngekuti ainga anyasa kubudirira pa basa rawo rekuparidzira, asi mupfaro wawo waidikana kubva pakuziya kuti arikupeta masimba pakupfadza Djehovha.

9. Maererano na Agaratiya 6:7-9, ngaupi mugumisiro wedu kana tikatama kuremba pa basa redu?

⁹ Kana tikasama kuremba pa basa redu rekuparidza, ticawina upenyu usikaperi. Munhu anoseenza ne simba rese pa basa rekuparidzira uye kufundisa masoko akanaka, zvezvirokwazvo “anonga ecisima ku mwiya” izvi zviri kuda kureya kuti tinodikana kusiya mwiya wa Mwari weciseenza mu upenyu wedu. Kana tikatama “kuremba” kana “kuora mwoyo,” Djehovha anotigondesa kuti ticakorora upenyu usikaperi, kunyazi kana pasina munhu watakabetsera dakara pakubhabhatidzwa.—Erengai Agaratiya 6:7-9.

10. Kutambira ke anhu masoko atinoparidza kunotsamira pa cinyi?

¹⁰ Mushobo unotambira anhu masoko ekuparidzira zvinotsamira pa zviya zvaanonga anazvo mu mwoyo. Mu mufanikiso wake, Djesu wakapanganidza nge zve musimi waizosima mbeu, asi pa mavhu ese anoreketwa pa mufanikiso uu, mbeu imwe basi, ndiyona inombwera pa mavhu akanaka uye inobara micero. (Ru. 8:5-8) Djesu wakabhuya kuti kusiyana-siyana ke mavhu, kunoemerera mwoyo ye anhu yakasiyana-siyana aizotambira nge mishobo yakasiyana-siyana “soko ra Mwari.” (Ru. 8:11-15) Kuita hingana musimi uu, isusu atikwanisi kuita kuti mbeu ye cokwadi yatinosima mu mwoyo me munhu ikasike kukura, asi zvinotsamira makamaka pamushobo unonga wakagara mwoyo iwona. Basa redu ngere kurumbwa tecisima mbeu ye masoko e Umambo. Izvi ndizvona zvakareketwawo no muphotsori Pauro, “umwe na umwe ucatambira mubairo maererano ne basa rake” haiwa maererano ne mugumisiro we basa rake.—1Ako. 3:8.

11. Ngei tecibhuya kuti Nowa wainga ari muparidzi anobudirira “pakuparidza unatsi?” (Onai foto ye pa kapa.)

¹¹ Mu nguwa yekare akawanda e aseenzi a Djehovha akaparidzira anhu ainga asikadi kuzwa. Nge muezaniso, Nowa wainga “muparidzi we unatsi,” ke makore 40 kana 50. (2Pe. 2:5) Zvezvirokwazvo, Nowa waida maningi kuti anhu aaiparidzira apurutane, asi Djehovha andizvopi zvaaiga areketa. Pane kudaro, paakapasa nhungamiriro Nowa kuti agadzire areka, Mwari akati: “Unodikana kupinda mu areka ne ana ako, ne mukadzi wako, uye ne akadzi e ana  ako.” (Ge. 6:18) Uye Mwari paakapanganidzira Nowa nge zve makurire anodikana kuita areka, pamweni Nowa waikwanisa kuzwisisa kuti anhu ainga asikazomupurutani ngekuti awona ainga asikazokwani imona. (Ge. 6:15) Hingana zvatinoziya apana munhu umwe hake wakapurutana Nowa pa nguwa iyona. (Ge. 7:7) Hino zvirikuda kubhuya kuti Djehovha aiona Nowa hinga munhu asikakwanisi kuparidzira zve unatsi here? Haiwa! Nowa wainga akagondeka! Uye wakaita zvese zvaainga abvunzwa na Djehovha. Mukuona ka Mwari iyena wainga muparidzi anobudirira.—Ge. 6:22.

12. Muphorofita Djeremiya wakakwanisa kudini kuzwa mupfaro mu basa rake rekuparidzira kunyazi anhu paainga asikamupurutani?

¹² Muphorofiti Djeremiya wakasonganawo ne mugariro we zviro umwewo. Anhu epa nguwa yake ainga asikadi kumupurutana. Kunyazi zvakadaro, Djeremiya wakaparidzira ke makore anokwana 40. Ngekuti akatanga “kumutuka ne kumuseka” iyena wakaora mwoyo zvekuti wakarangarira kusiya basa rake rekuparidzira. (Dje. 20:8, 9). Asi Djeremiya aazi kuremba! Ngazvipi zvakamubetsera kuti akunde mazwiro aya akashata uye kuti agarezve ne mupfaro mu basa rake rekuparidzira? Iyena wakakanda ndangariro dzake pa mafundo mairi anokosha. Rekutanga soko raaiparidzira anhu raibatanidza kupasa anhu “ramangwana ne kariro.” (Dje. 29:11) Recipiri, Djeremiya waitwara zina ra Djehovha. (Dje. 15:16) Isusuwo nyamasi uno, tinoparidzira anhu masoko anopasa kariro, uye tinotwara zina ra Djehovha hingana Apupuri ake. Kana tikakanda ndangariro dzedu pa mafundo mairi aya anokosha, tingakwanisa kugara ne mupfaro pasinei nekuti anhu anotipurutana here kana kuti haiwa.

13. Tingafundei ne mufanikiso wa Djesu uri pana Marko 4:26-29?

¹³ Kukura pakunamata kunoitika padoko ne padoko. Djesu akafundisa izvona mu mufanikiso wake nge zve mwanarume unoparira mbeu pedzepo owata. (Erengai Marko 4:26-29.) Kukura ke mbeu ii inonga yaparirhwa ne mwanarume uu kunoitika padoko ne padoko, uye iyena apana caanokwania kuita kuti azvikasikise. Pamweni imwimwi murikuetsera ke nguwa yakareba kuti muone kubudirira kenyu mu basa rekuparidzira, ngekuti kubudirira kakona kunoitika padoko ne padoko. Murimi aakwanisi kuita kuti zvaanonga asima zvikasike kukura nge mushobo waanoda. Nge gwanza rimwero isusu atikwanisi kuita kuti mufundi wedu akasike kukura pakunamata nge mushobo watinoda. Kana meciona kuti mufundi wenyu we Bhaibheri arikunonoka kukura, musaore mwoyo, uye musarembe. Kuita hinga murimi uyu, basa rekuita afundi rinoda mwoyo unonoka kutsamwa.—Tg. 5:7, 8.

14. Ngaipi miezaniso inopangidza kuti zvinotora nguwa kuti anhu atange kupurutana masoko edu?

¹⁴ Mu ndima dzimweni, kuti munhu agume pakubhabhatidzwa anopedza nguwa yakareba maningi. Onai muezaniso we hanzvadzi mbiri dze mundane imweyo Gladys na Ruby Allen. Mu gore ra 1959 awona akagadzwa kuti aseenze hinga mapioneiro e nguwa dzese mu thaundi re provinsiya ye Quebec ku Canadá. * Nge kutya maitiro e anyacigarisano uye mapastori, anhu e mu thaundi irona ainga asikapurutani masoko e Umambo. Gladys unoti: “Taienda pa nyumba ne nyumba pa nguwa 8 pa zuwa ke makore mairi uye pasina munhu aitipurutana! Anhu aiuya pa misuyo yawo haiwa kuti atipurutane asi kuti anyase kuifunga. Kunyazi zvakadaro, isusu atizi kuremba.” Padoko ne padoko, maitire e anhu aya akatanga kucinja, awona akatanga kugara anhu ane ushamwari uye akatanga kupurutana masoko e Umambo. Nyamasi uno kaano ungano nhatu mu thaundi irona.—Isa. 60:22.

15. Tsamba ya 1 Akorinti 3:6, 7 inotifundisei pa basa rekuita afundi?

 ¹⁵ Basa rekuita afundi rinobatanidza anhu akawanda. Ese ari mu ungano angakwanisa kubetsera munhu dakara pakubhabhatidzwa. (Erengai 1 Akorinti 3:6, 7.) Nge muezaniso, hama imweni ingakwanisa kupasa taratadho kana revhista ku munhu anopfarira. Pedzepo iyena aazokwanisi kuzohwirira ku munhu iyena nge ndaa ye urongwa wake. Nge kudaro anokumbira muparidzi umweni kuti ahwiririre munhu iyena. Muparidzi umweniwo unotanga kuitisa fundo. Ne kuhamba ke nguwa iyena unopika hama ne hanzvadzi dzakasiyana-siyana kuti amuperekedze ku fundo iyona, uye umwe na umwe unokohomedzesa mufundi nge mushobo wakasiyana. Hama imwe na imwe inonga yecibetsera pakudirira cokwadi. Ndiyo ndaa munhu paanobhabhatidzwa ese akabatanidzwa pakukorora ku mwiya anopfara pamwepo.—Ju. 4:35-38.

16. Kunyazi musikakwanisi kuita zvakawanda mu basa rekuparidzira ngei mungakwanisa kuzwa mupfaro?

¹⁶ Pamweni imwimwi amuna uthongo wakanaka kana simba rekuita basa rekuparidzira nguwa dzese, kunyazi zvakadaro mungakwanisa kuzwa mupfaro nge zviya zvamunokwanisa kuita. Onai muezaniso wa mambo Dhavhidhi, iyena ne anarume ake, aidikana kurhwa ne Amareki kuti akwanise kuhwirinza zviro ne mhuri dzawo. Asi anarume 200 ainga akaremba maningi, zvokuti ainga asikazokwanisi kurhwa uye akasara ecionerera mitoro dzawo. Dhavhidhi ne anarume ake akawina pa hondo ii, uye akakwanisa kuhwirinza zviro zvese zvawo zvinokosha. Hino Dhavhidhi wakapasa mutemo wekuti zviro izvona zvikoaniswe zvakaezana ku anarume akaenda ku hondo kunyazi ku aya ainga asara ecionerera mitoro. (1Sa. 30:21-25) Mupfaro unooneka pa basa iri unodikana kukoaniswa kuti ese azwewo nge mushobo umwewo.

17. Zviro zvipi zvinoita kuti titende Djehovha?

¹⁷ Tinotenda maningi Djehovha nge mushobo waanoona ne rudo basa redu rekuparidzira. Ayena anoziya kuti atikwanisi kubambidzira anhu kuti atipurutane uye kuti agare anamati ake. Kunyazi zvakadaro ayena anonyasa kuona kupeta masimba katinoita ne rudo ratinopangidza kaari uye anotikomborera ndizvona. Ayena anotifundisawo kuti tizwe mupfaro nge zviya zvatinokwanisa kuita mu basa rekuparidzira. (Ju. 14:12) Tingakwanisa kugara ne rugondo rekuti Mwari acapfara nge basa redu kana tikatama kuremba!