1. Cinyi cinouya mu musoro medu patinorangarira nge zve mwanarume wainga ano usisi?

PATINORANGARIRA nge zve munhu uno usisi, tinorangarira munhu wakapfawa, unotambira anhu zvakanaka, munhu uno nyasha uye uno rupo. Munhu wakadai unoita kuti tiedzurire mufanikiso wakareketwa na Djesu wakaringana nge zve mu Samaria. Mwanarume iyena wainga asiripi mu Djudha, asi “wakabata no usisi” mu Djudha wainga abirhwa uye apondwa nge mabhinya. Mu Samaria uu “wakazwira usisi” mu Djudha wainga akuwadzwa uye wakamubata no rudo. (Ru. 10:29-37) Mufanikiso uu unopangidza wara rakanaka ra Mwari wedu—usisi. Zuwa no zuwa Djehovha anotipangidzira usisi nge mushobo wakasiyana uye anoita kudaro ngekuti anotida.

2. Cinyizve cinobatanidzwa pakugara munhu ano usisi?

² Patinozwa nge zve soko rokuti usisi, pamweni rinoita kuti tirangarire zviro zvakawanda. Irona rinobatanidza kusanangura kusama kupanica munhu kana pano cikonzero cakanaka. Tingatoreketa kuti, pa nyaya ii, Djehovha ano usisi wakakura. Pisarema 103:10 inoti: “Ayena aatibati maererano no zvishaishi zvedu”. Asi mumigariro imweni, pamweni Djehovha anopanga munhu unonga aita cishaishi.

3. Mibvunzo dzipi dzaticadaira mu fundo ino?

³ Mu fundo ino ticaona kuti Soko ra Mwari rinodaira kudini mibvunzo dzinoteera: Ngei Djehovha ano usisi? Mubatano upi uripo pakati pekupasa mupango uye kugara no usisi? Uye cinyi cingatibetsera kuti tipangidze usisi?

4. Ngei Djehovha ecibata anhu no usisi?

⁴ Djehovha ano usisi. Muphostori Pauro wakatara kuti Mwari “akapfuma no usisi.” Pauro wakareketa izvi ngekuti Djehovha ainga apasa anhu asikazi kukwana kariro yekuti ararame kudenga.  (Aef. 2:4-7) Asi Djehovha aapangidzi usisi basi ku aya akadzodzwa. Dhavhidhi wakatara kuti: “Djehovha akanaka ku zvisikwa zvese, uye usisi wake unooneka pa mabasa ake ese.” (Pis. 145:9) Djehovha anoda anhu. Ndiyo ndaa pese paanoona cikonzero cakanaka kuti apangidzire munhu usisi, ayena anozviita.

5. Djesu akafunda kudini nge zve usisi wa Djehovha?

⁵ Djesu anonyasa kuziya kupinda munhu upi hake kuti Djehovha anoda kuita zviro ne usisi. Asati auya pa nyika, ayena akararama na Baba ake kudenga ke nguwa yakareba. (Zvie. 8:30, 31) Kajinji kakhona ayena aikwanisa kuona Djehovha ecipangidza usisi ku anhu anoshaisha. (Pis. 78:37-42) Paaifundisa amweni, Djesu aiita zviri zvese kuti arekete nge zve wara iri rakanaka ra Baba ake.

6. Djesu akatibetsera kudini kuzwisisa kuti Djehovha ane usisi?

⁶ Hingana zvetakaona mu fundo yakadarika, Djesu wakapanganidza nge zve mufanikiso we mwana anohwirira kumba kuti atifundise madire anoita Djehovha kupangidza usisi. Mwanewo wakabuda pa nyumba uye “wakaparadza upfumi wake ecirarama upenyu wakashata.” (Ru. 15:13) Nokuhamba ke nguwa, iyena wakacinyuka pa zvishaishi zvake uye wakadzidodosa ohwirira ku nyumba. Asi baba ake akamutambira kudini? Djesu akati: “Paainga aciri kure, baba ake akamuona omuzwira usisi, hino akagogoma omukhumbatira uye omupasa bejo” Baba ake aazi kumupsverudza. Awona akamuzwira usisi, akamurekerera uye akamutambira no nyara mbiri. Zviro zvainga zvaizwa no mwana uya zvainga zvakashata maningi, asi ngekuti iyena wakacinyuka, baba ake akamurekerera. Baba ane usisi e mumufanikiso uu, anoimirira Djehovha. Ne mufanikiso uu unobaya mwoyo, Djesu akapangidza kuti Djehovha anoda maningi kurekerera aya anocinyuka zvezvirokwazvo.—Ru. 15:17-24.

7. Kubatana kupi kuripo pakati pe ungwaru ne usisi wa Djehovha?

⁷ Djehovha ane usisi nge ndaa ye ungwaru wake usina magumo. Djehovha anoseenzesa ungwaru nguwa dzese. Wara iri rinoita kuti ayena arangarire kuitira zvakanaka ku anhu ese. Bhaibheri rinoti: “Ungwaru we kudenga wakadzara ne usisi uye ne mabasa akanaka.” (Tg. 3:17) Hinga baba ane rudo, Djehovha anoziya kuti paanopangidza usisi, ayena anonga ecibetsera ana ake (Pis. 103:13; Isa. 49:15) Kunyazi asikazi kukwana, aseenzi a Djehovha ano kariro ye ramangwana nge ndaa ye usisi wa Djehovha. Hino ungwaru wa Djehovha usina magumu, unomuita kuti apangidze  usisi nguwa dzese kana pano zvikonzero zvekuti adaro. Ayena anoziya nguwa yekusama kupangidzira usisi. Djehovha ano ungwaru wakakura. Ayena anozwisisa musiyano uripo pakati pekupangidza usisi nekuregeredza.

8. Zviro zvipi zvinodikanwa kuizwa nguwa dzimweni, uye ngei?

⁸ Cimborangarirai kuti mu Kristu anosanangura kurarama upenyu usikazi kunaka. Kana zvakadaro tinodikana kuitei? “Siyai kushamwaridzana no” munhu wakadaro. Ii ndiyo nhungamiriro ya Djehovha yaakakumbira kuti Pauro ape ku ungano. (1Ako. 5:11) Anhu anoita zvitema asikacinyuki anodinaka kudzingwa mu ungano. Izvi zvinodikanwa kuizwa kuti hama no hanzvadzi dzakagondenga dzidziirirhwe uye kuti tigarewo acena hingana Djehovha. Asi amweni anoona kuti munhu paanodzingwa, Mwari anonga asikazi kupangidza usisi kaari. Kodi izvona zvirokwazvo here? Ngatione.

9-10. Maererano na Ahebheru 12:5, 6, ngei tingareketa kuti kudzinga kupangidza usisi? Pasai muezaniso.

⁹ Tinotsukwara maningi patinozwa pa musangano ciziiso cekuti munhu watinoziya uye watinoda, “aasisiripizve Mupupuri wa Djehovha”. Pamweni tingagara tecidzibvunzisa kuti zvaidikanadi kamare kuti ayena adzingwe. Kodi kudzinga kupangidzadi kamare usisi here? Honde, kupangidzadi usisi. Kusama kupanga munhu unoda mupango, akupangidzapi ungwaru, akupangidzapizve usisi kunyazi rudo. (Zvie. 13:24) Kodi kudzinga kungabetsera munhu washaisha uye asikazi kucinyuka pa miitiro wake here? Honde. Ajinji akaita zvitema zvakakura akadzionera ega kuti mushobo waakabatwa ne akuru wakaita kuti aone kuti ainga ashaisha uye kuti aidikana kucinja muitiro ohwirirazve mu nyara dza Djehovha.—Erengai Ahebheru 12:5, 6.

¹⁰ Cimborangarirai pa mufanikiso unoteera: Muushi unoziya kana rimwe re mabira ake recirhwara. Iyena unoziya kuti arape nhenda ii, zvinodikana kuti aparadzanise mabira akanaka no bira ririkurhwara. Asi mabira zvinyama zvinoda kushamwaridzana. Awona anopfarira kugara pamwepo no mabira amweni uye aagarisiki kana akakandwa kawo oga. Hino izvi zvirikuda kureya here kuti muushi unosanangura kuparadzanisa bira ririkurhwara no mabira akanaka unonga ecipangidzira utsinye here? Zviri pamhene kuti haiwa. Iyena unoziya kuti, kana akatendera kuti bira ririkurhwara rigare pamwepo no mabira asikarhwari, nhenda ingakwanisa kubararika. Ngekuparadzanisa bira ririkurhwara, iyena unocengetedza mabira ese.—Ezanisai na Revhitiko 13:3, 4.

11. (a) Munhu wakadzingwa wakaita hinga bira ririkurhwara nge gwanza ripi? (b) Aya akadzingwa angakwanisa kuitei?

¹¹ Kana mu Kristu akadzingwa, tinodikana kumuona hingana bira ririkurhwara. Asi nhenda yake nge ye ku mwiya. (Tg. 5:14) Kuitawo hingana nhenda dzimweni dzatinoziya, nhenda ye ku mwiya inokwanisawo kubararika. Ndiyo ndaa nguwa dzimweni, zvinodikanwa kuparadzanisa bira ririkurhwara mu ungano. Mupango uu, cipangidzo ce rudo ra Djehovha ku mabira ake akagondeka, uye zvingabaya mwoyo we munhu waita citema cakakura uye zvomuita kuti acinyuke. Asi munhu wakadzingwa, ungakwanisawo kuita zviro zvimweni. Iyena wakasudzunuka kuti apinde musangano kuti akwanise kudzirhisa pa kunamata uye kuti abambise kutenda kake. Iyena unokwanisawo kutambira ma bhuku kuti aite fundo ye munhu ega uye kuona JW Broadcasting. Pa nguwa no nguwa kana akuru akaona cinjo irikuizwa no munhu wadzingwa, awona angakwanisa kumupasa mazano uye nhungamiriro kuti ayena akwanise kuhwirirazve pa uthongo wake wekunamata.  Uye izvi pamweni zvingamubetsera kuti ahwirinzwe hinga Mupupuri wa Djehovha. *

12. Mushobo upi wakanakisisa wekuti akuru angapangidza rudo ku mushaishi usikacinyuki?

¹² Zvakanaka kuedzurira kuti aya anoita citema uye asikacinyuki, ndiwona anodzingwa. Akuru anoziya kuti anodikana kunyasa kurangarira asati asanangura kudzinga munhu. Awona anoziya kuti mupango wa Djehovha unodikanwa kupaswa “ne mushobo wakasisira.” (Dje. 30:11) Akuru anoda hama, uye aadi kuita ciro caizokwanisa kukuwadza ushamwari wadzo na Djehovha. Asi pa nguwa dzimweni, mushobo wakanaka we kupangidza rudo uye usisi, nge we kubvisa mushaishi pakati pe ungano ke cinguwa.

13. Ngei mu Kristu we ku Korinti waidikana kudzingwa?

¹³ Onai kuti muphostori Pauro wakabata kudini mushaishi wainga asikacinyuki. Mu Kristu umweni ku Korinti waiita useki no mukadzi wa baba ake. Zviro izvi zvinopsverudza! Djehovha ainga akatozvireketa ku Aisraeri: “Mwanarume unowata no mukadzi wa baba ake unopsverusa baba ake. Anotodikana kuuraiwa.” (Re. 20:11) Zviri pamhene kuti Pauro wainga asikadikani kupasa mutemo kuti mwanarumewo auraiwe. Asi iyena wakapa nhungamiriro ku hama dze ku Korinti kuti mwanarumewo adzingwe. Muhambiro wakashata we mwanarumewo wainga wecibatawo amweni mu ungano, uye amweni ainga otorangarirawo kuti iyena wainga asikaiti zviro zvakanyanya kushata!—1Ako. 5:1, 2, 13.

14. Muphostori Pauro wakapangidza kudini usisi ku mwanarume wainga adzingwa ku Korinti, uye ngei? (2 Akorinti 2:5-8, 11)

¹⁴ No kuhamba ke nguwa, Pauro wakazoziya kuti mwanarume uya wainga aita cinjo dzakakura. Iyena wainga acinyukadi kamare! Mwanarumewo wainga apsverusa ungano, asi Pauro wakabvunza akuru kuti iyena wainga asikadi “kunyanyisa.” Iyena wakapasa nhungamiriro inoti: “Imwimwi munodikana kumurekerera no mwoyo wese uye kumunyaradza.” Pauro wakapanganidza cikonzero caiita kuti awona aite kudaro: “Kuitira kuti asanyiswe nokutsukwara kukuru.” Muphostori Pauro wakazwira mwanarume uu wainga acinyuka. Iyena wainga asikadi kuti mwanarumewo agare akatsukwara maningi nge zviya zvaainga aita, zvozoguma pakuti asiye kupsvaka rurekerero ra Mwari.—Erengai 2 Akorinti 2:5-8, 11.

15. Akuru angapangidza kudini ushingi uye usisi pa nguwa imweyo?

 ¹⁵ Eciteedzera muezaniso wa Djehovha, akuru anoda kugara no usisi. Awona anoshiga kana zvecidikanwa, asi anopangidza usisi pese pazvinobvira. Akuru anoziya kuti kusama kupasa mupango ku munhu unoda kupangirhwa, akupangidzapi usisi, asi kuregeredza. Asi akuru ega basi anodikana kupangidza usisi here?

16. Maererano na Zvierengo 21:13, Djehovha anoitei kana munhu asikapangidziri usisi?

¹⁶ Tese isusu tinoda kugara no usisi hinga Djehovha. Ngei? Cimwe ce cikonzero ngecekuti Djehovha aapurutani minamato we aya asikapangidziri usisi. (Erengai Zvierengo 21:13.) Akuna na umwe wedu unoda kuti izvi zviitike, ndiyo ndaa tinongwarira kuti tisagare no mwoyo wakaoma. Atirambi kubetsera hama inonga yecishuphika, asi nguwa dzese tinoteya nzee dzedu “kucema ke murombo.” Uyewo tinobata nge nyara mbiri nhungamiriro iri pana Tiyago inoti: “Ngekuti munhu usikapangidzi usisi acatongwa asina usisi.” (Tg. 2:13) Kana tikaedzurira tecidzidodosa kuti tinoda maningi kubatwa ne usisi, tinonga takagadzirira kubatawo amweni no usisi. Mugariro umweni watinoda maningi kupangidzira usisi, ndi paya pekuti mushaishi wacinyuka uye wahwirira mu ungano.

17. Mambo Dhavhidhi wakapangidza kudini kuti wainga ano usisi?

¹⁷ Bhaibheri rino miezaniso yakawanda ingatibetsera kugara no usisi, asi haiwa anhu asikapangidzi usisi. Ngo muezaniso onai muezaniso wa Mambo Dhavhidhi. Kajinji kakhona waipangidza kuti wainga no usisi. Mambo Sauro waida kumuuraya, asi Dhavhidhi waipangidza usisi mambo wakadzodzwa na Mwari, haiwa kuedza kuhwirinzira no kuda kumukuwadza.—1Sa. 24:9-12, 18, 19.

18-19. Dudzai migariro miiri inopangidza kuti Dhavhidhi aazi kupangidza usisi?

¹⁸ Pa nguwa dzimweni, Dhavhidhi aazi kupangidza usisi. Ngo muezaniso, Nabhari wainga ano unhu wakashata wakareketa asikareremedzi Dhavhidhi uye wakaramba kupasa cokurhya kaari pamwepo no anarume ake. Dhavhidhi wakagara no shungu uye wakasanangura kuuraya Nabhari pamwepo no anarume e pa nyumba pake. Dhavhidhi aazozi kuzogara no ndaa ye ngazi ngekuti Abhigairi mukadzi wa Nabhari wakamupangidzira upfawi uye mwoyo unononoka kutsamwa uye wakaita ciito nokukasika.—1Sa. 25:9-22, 32-35.

¹⁹ Pa nguwa imweni, muphorofita Natani wakabvunza Dhavhidhi kuti mwanarume umweni mupfumi wakaba bira rinodiwa maningi re anyacigarisano ake murombo. Dhavhidhi wakatsamwa uye wakadaira eciti: “Na Djehovha mupenyu mwanarume wakaita zvakadaro unodikana kufa!” (2Sa. 12:1-6) Dhavhidhi wainyasa kuziya mutemo wa Mozesi. Maererano no mutemo iwona, kana mwanarume akaba bira iyena waidikana kuripa muridzi we bira irona nge kumupasa mabira marongomuna. (Eki. 22:1) Asi ngei Dhavhidhi wakabhuya kuti mwanarumewo wakasisira kufa? Iyena wainga  anyanyisa maningi. Natani wainga ecipanganidza ngano kuti abetsere Dhavhidhi kuzwisisa kuti ndaa dzaainga apara, dzainga dzakakura maningi uye Djehovha ainga amupangidzira usisi kudarika mabatire akaita Dhavhidhi mwanarume we mufanikiso wa Natani!—2Sa. 12:7-13.

20. Muezaniso wa Dhavhidhi unotifundisei?

²⁰ Onai kuti Dhavhidhi paakaita zviro no shungu, iyena wakasanangura kuti Nabhari no anarume e nyumba yake aidikana kufa. Paapadarika nguwa, iyena wakazozwisisa kuti mwanarume wemufanikiso wa Natani waidikana kufa. Patinoerenga masoko aya mu Bhaibheri, pamweni tingagara tecirangarira kuti: ‘Ngei mwanarume wainga akanaka wakatonga umweni ecimupasa mutongo wakashata kudaro?’ Cimborangarirai basi. Pa nguwa iyona, hana ya Dhavhidhi yainga yecirema. Munhu wakabamba pakunamata aatongi amweni asikapangidzi usisi. Kusiyana na izvi, Djesu akangwadza ateeri ake kuti: “Siyai kutonga kuti musazotongwewo, ngekuti matongero amunoita mucazotongwawo kudaro.” (Mt. 7:1, 2) Hino tinodikana kungwarira kuti tisanyanyise, asi ‘tipfume ne usisi’ hingana Mwari wedu.

21-22. Mishobo ipi yatingapangidzira nayo usisi ku amweni?

²¹ Anhu ano usisi aandouzwiri basi kune amweni, asi “anoita zviri zvese kuti aabetsere.” Tese isusu tinodikana kungwarira kuti tione kuti mu mhuri, mu ungano uye ku mbuto yatinogara pano munhu unoda rubetso here. Kana tikadaro, ticaona mikana yakawanda kuti tipangidze usisi! Kodi pa mbuto yamunoraramira aripo anoda kunyaradzwa here? Pamweni mungabetsera munhu uu ngekumubikira cokurhya kana kumuitira basa rimweni. Pano munhu wakabva kuhwirinzwa urikuda kunyaradzwa kana kubambiswa nge shamwari here? Kana kuti tingakwanisa kunyaradza anhu ari mu ndima yedu ngekuwaparidzira masoko akanaka? Uu ndi umwe mushobo wakanaka maningi wekupangidzira usisi kune amweni.—Djo. 29:12, 13; Aro. 10:14, 15; Tg. 1:27.

²² Kana tikagara takangwaririra pa zviro zvinodikanwa no amweni, ticaona kuti pano mikana yakawanda yatingakwanisa kupangidzira usisi. Kana tikapangidzira wara iri, tinopfadza maningi Baba edu e kudenga, Mwari “akapfuma no usisi!”