1-2. (a) Ngei anhu akawanda ano cinetso cekugonda aya ano masimba? (b) Ticaonei mu fundo ino?

 MAZUWA ano anhu anoshuphirhwa kugonda ano masimba. Awona anoona kuti anhu ano masimba uye ne upfumi ndiwona anonyanya kureremedzwa haiwa arombo. Bhaibheri rinotenderana nazvo parinoti: “Munhu unotonga munhu ecimubata zvakashata.” (Mup. 8:9) Kusiya izvona atungamiriri amweni e magereja anoita zviro zvimweni zvakashata maningi. Izvi zvinoita kuti anhu asiye kugonda Mwari. Patinofunda Bhaibheri ne munhu, tinodikana kumubetsera kuti agonde Djehovha ne aya aanoseenzesa kuti atungamirire sangano rake.

² Asi afundi e Bhaibheri andiopi basi anodikana kufundira kugonda Djehovha ne sangano rake. Kunyazi aya aakuseenzera Djehovha ke makore akawanda angakwanisa kuruza rugondo rawo kuna Djehovha, nge kuti mushobo waanoita zviro ndiwo wakanyasa kunaka. Nguwa dzimweni kungaoneka migariro imweni ingaedza kutenda kedu kuna Djehovha. Mu fundo ino ticaona zviro 3 zvingaedza kutenda kedu kuna Djehovha: (1) kukonerhwa kuzwisisa zvinobhuya Bhaibheri, (2) patinopaswa nhungamiriro dzinobva ku sangano ra Djehovha, uye (3) patinosongana ne matambudziko mune ramangwana.

3. Ngei zviitiko zviri mu Bhaibheri zvingaedza kutenda kedu kuna Djehovha?

 ³ Patinoerenga Bhaibheri nguwa dzimweni tingasama kugara  ne cokwadi nge mabatiro akaita Djehovha anhu amweni uye nge zve zvisananguro zvaakaita. Nge muezaniso, paciitiko cimweni ciri mu bhuku ra Numero, tinoerenga kuti mu israeri umweni waidikana kuuraiwa nge kuti waipsvaka huni mu Sabudu. Mu bhuku ra 2 Samueri tinoerenga kuti mumasure me makore manganani, Mambo Dhavhidhi wakaita uhure uye wakauraya mwanarume umweni, asi Djehovha akamurekerera. (Num. 15:32, 35; 2 Sam. 12:9, 13) Pamweni anhu angarangarira kuti: ‘Ngei Djehovha akarekerera Dhavhidhi kunyazi akaita uhure uye ne kuuraya munhu, asi akapa mutongo wekuuraya munhu wakaita ciro cisikazi kunyanya kushata?’ Kuti tinyase kuzwisisa ngatione zviro 3 zvatinodikana kuedzurira patinoerenga Bhaibheri.

4. Mabhuku a Genesi 18:20, 21 na Dheuteronomiyo 10:17 anobambisa kudini rugondo redu pakutonga ka Djehovha?

⁴ Bhaibheri arireketi zvese, ndiyo ndaa atidikani kutonga cisananguro ca Djehovha. Nge muezaniso isusu tinoziya kuti Dhavhidhi wakacinyukadi kamare nge zvaakaita. (Pis. 51:2-4) Asi zvakadini ne mwanarumwe uya usikazi kupurutana mutemo we Sabudu, iyena wakacinyuka nge zvaakaita here? Kareko wakambopandukirazve Djehovha here? Wainga akamboziiswa nge ndaa yazvo, asi iyena aazi kupurutana here? Bhaibheri aribhui. Asi tingagara ne rugondo rekuti: Djehovha “ane unatsi.” (Dhe. 32:4) Ayena anotsamira zvisananguro zvake pa masoko akadzara, haiwa pa zviro zvekuzwa, maonero e anhu, kana ciro cipiwo haco cinoita kuti atonge zvisina unatsi. (Erengai Genesi 18:20, 21; Dheuteronomiyo 10:17.) Patinonyasa kufunda nge zva Djehovha uye mushobo waanoita zviro, tinonyasa kugonda zvisananguro zvake. Kunyazi pano dii re Bhaibheri ratisikanyasi kuzwisisa, tinonyasa kuziya Djehovha zvokuti tinoona kuti “ano unatsi mu zvese.”—Pis. 145:17.

5. Kusakwana kedu kunobatabata kudini matongero edu? (Onai bhokisi rakazwi “ Kusakwana Kedu Kungaita kuti Tione Zviro nge Mushobo Usiriwopi.”)

⁵ Isusu tiri anhu asikazi kukwana. Ndiyo ndaa atikwanisi kutonga zvakanaka nguwa dzese. (Gen. 1:26) Isusu takasikwa ne mufanikiso wa Mwari, hino tinoda kubata amweni ne unatsi. Asi ngekusama kukwana kedu,  kunyazi teciona hingana kuti tinoziya zvese zvakaitika tingakonerhwa kutonga zvakanaka. Ndizvona zvakaitika na Djona. Pamweni munoedzurira kuti Djona aazi kupfarira cisananguro ca Djehovha cekuzwira usisi agari e ku Ninivhi. (Juau 3:10–4:1) Asi cimborangarirai basi, pakupedzesera Aninivhi anokwana 120 000 akacinyuka uye akaponeswa! Hino ndiyani waidikana kugadziriswa? Djehovha here kana kuti Djona?

6. Ngei Djehovha asikadikani kupanganidza zvisananguro zvake?

⁶ Djehovha aabambidzirhwi kupanganidza ngei eciita zvisananguro zvake. Zvirokwazvo kuti nguwa dzimweni Djehovha akasiya kuti aseenzi ake abhuye maonero awo nge zve zvisananguro zvake. (Gen. 18:25; Djona 4:2, 3) Nguwa dzimweni akapanganidza kuti ngei akaita cisananguro icona. (Djon. 4:10, 11) Asi zvakanaka kuedzurira kuti Djehovha aabambidzirhwi kupanganidza zvisananguro zvake. Ngekuti ndiyena Musiki ayena aadi citenderhwa cedu kuti azviite kunyazi paanonga azviita.—Isa. 40:13, 14; 55:9.

7. Cinyi cingatishuphira uye ngei?

⁷ I zvirokwazvo kuti atina mubvunzo kuti Djehovha anoita zvakanaka nguwa dzese. Asi cingashupha nge ce kugonda anarume aakasanangura kuti atungamirire anhu ake. Asi tingapedzesera tisina cokwadi cokuti anarume aya anoteereradi kamare nhungamiriro dza Djehovha here kana kuti anoita zviro nge mushobo wawo. Pamweni ndizvona zvakarangarirhwa ne anhu amweni e mu nguwa ye kare. Rangarirai miezaniso yetaona mu  ndima ye ci 3. Pamweni anyaukama e mwanarume wakaposha mutemo we Sabudu akadzibvunzisa kuti, kodi Mozesi wakabvunzisadi kamare Djehovha asati apasa mutongo we rufu? Kana kuti pamweni shamwari ya Uriya wainga ari mwamuna wa Bati-sebha wakarangarira kuti, zviri pamhene kuti Dhavhidhi wakakwanisa kupukunyuka pa rufu nge kuti iyena ndi mambo. Cokwadi nge ce kuti atingabhui kuti tinogonda Djehovha asi tisingagondi anarume aakasanangura kuti atungamirire anhu ake.

8. Mazuwa ano sangano ra Djehovha rinoteerera kudini zano riri pana Zviito 16:4, 5?

⁸ Nyamasi uno Djehovha ari kuseenzesa “muranda akagondeka akangwara” kuti atungamirire sangano rake pasi pano. (Mat. 24:45) Muranda uu unoteedzera muezaniso we dare rinotungamirira re aKristu e pakutanga. (Erengai Zviito 16:4, 5.) Muranda uu unoonerera anhu a Mwari mu nyika yese, uye anopasa nhungamiriro akuru e mu ungano. Uye akuru anoita kuti nhungamiriro idzona dziteererhwe mu ungano. Patinozwira nhungamiriro dzatinopaswa ne sangano uye ne akuru, tinonga tecipangidza kuti tinogonda mushobo wa Djehovha wekuita zviro.

9. Migariro ipi ingatishuphira kupurutana zvisananguro zve akuru, uye ngei?

⁹ Nguwa dzimweni zvingashupha kutsigira zvisananguro zve akuru. Nge muezaniso, mumakore adarika ungano dzimweni ne nharaunda dzakagadziriswa. Pamigariro imweni, kuti Nyumba ye Umambo iseenzeswe zvakanaka aparidzi akacinjwa kuti aende ku ungano dzimweni. Pamweni mungaona kuti zvingashupha kubuda mu ungano yakadzara ne shamwari uye hama dzenyu. Kodi Djehovha anoreketa ne akuru kuti aabvunze ungano inodikana kuenda muparidzi umwe na umwe here? Haiwa. Ndiyo ndaa zvingatishuphira  kutsigira zvisananguro zvaanoita. Asi Djehovha anogonda kuti akuru acaita zvisananguro zvakanaka, uye isusu tinodikanawo kugonda nawo. *

10. Maererano na Ahebheru 13:17, ngei tecidikana kutsigira zvisananguro zve akuru?

¹⁰ Ngei tecidikana kutsigira zvisananguro zve akuru kunyazi, tisikatenderani nazvo? Nge kuti patinotsigira akuru ungano inorumbwa yakabatana. (Aef. 4:2, 3) Ungano yese painotsigira akuru ecidzidodosa ungano inobudirira. (Erengai Ahebheru 13:17.) Cinonyanya kukosha nge ce kuti tinonga tecipangidza kuti tinogonda Djehovha patinotsigira hama dzaakasanangura kuti atungamirire ungano.—Zvi. 20:28.

11. Cinyi cingatibetsera kuti tigonde zvisananguro zvinoizwa ne akuru?

¹¹ Ciro cingatibetsera kuti tigonde zvisananguro zve akuru kuedzurira kuti awona anoita munamato ecikumbira mwiya mucena paanonga ecida kubatabata nyaya dzakaringana ne ungano. Awona anonyasa kuongorora mazano e Bhaibheri uye anoteerera nhungamiriro dze sangano. Zvezvirokwazvo awona anoda kupfadza Djehovha uye kuonerera anhu ake nge mushobo wakanaka. Akuru anarume akagondeka uye anoziya kuti acadzidairira kuna Djehovha nge mushobo waanobata ungano. (1 Pe. 5:2, 3) Cimborangarirai zvinoteera: Anhu ari mu nyika aazi kubatana nge kusiyana ke ganda, zvitendero uye zvematongerhwe e nyika, asi anhu a Djehovha akabatana nge kuti anonamata Mwari umwe basi wecokwadi. Kubatana uku kunobvira ngekuti Djehovha arikutungamirira sangano rake!

12. Akuru anodikana kuitei kuti aone kuti munhuwo wacinyukadi zvezvirokwazvo?

¹² Djehovha akapasa akuru ubaba wekuita kuti ungano irumbwe yakacena pakunamata. Kana munhu akaita citema cakakura, Djehovha anoda kuti akuru anyase kuongorora kuti aone kuti munhuwo unodikana kurumbwa ari mu ungano here. Akuru anodikana kuona kuti munhuwo wakacinyukadi pa zviro zvaakaita? Kuti adaro awona anodikana kudzibvunzisa kuti, iyena ungakwanisa kubhuya kuti wacinyuka, asi anozondadi kamare citema caakaita? Iyena wasanangura kusama kuphinda kuita citema icona, kana kuti waita citema icona nge ndaa ye shamwari dzake? Iyena wasanangura kutama kushamwaridzana ne anhu awona here? Akuru anonamata kuna Djehovha, anoongorora zvinorekethwa ne Bhaibheri, anokwarakwatisa zvese zvakaitika pa nyaya iyona, uye anoona kuti munhuwo ari kuzwa kudini nge ndaa ye zvaakaita. Mumasure me zvese izvi ndipo paanozosanangura kuti munhuwo ungarumbwa ari mu ungano here. Pa migariro imweni iyena unodikana kudzingwa.—1Ako. 5:11-13.

13. Tingarangarirei nge zve hama kana anyaukama edu akadzingwa?

¹³ Kugonda kedu akuru mu ungano kungaedzwa kudini? Kana munhu akadzingwa asiripi shamwari kana anyaukama edu zvingaita nyore kutendera cisananguro ce akuru. Asi kana munhu wakadzingwa ari anyaukama edu? Tingadzibvunzisa kuti, akuru atongadi nge mwazvo here? Djehovha aizotongawo kudaro? Cinyi cingatibetsera kuti titsigire cisananguro ce akuru?

14. Cinyi cingatibetsera kana akuru akasanangura kuti shamwari kana anyaukama edu anodikana kudzingwa?

¹⁴ Tinodikana kuedzurira kuti kudzinga mushobo unoseenzeswa na Djehovha kuti  ungano irumbwe yakacena uye zvinobetserawo munhu unonga aita citema. Munhu unonga aita citema akasama kucinyuka orumbwa ari mu ungano, waizoita kuti amweni aitewo citema mu ungano. (Aga. 5:9) Kana akasama kudzingwa ucazoona kuti citema caakaita acizi kunyanya kukura, uye waizoona kuti aadikani kucinja miitiro yake, ngekudaro zvaizoshupa maningi kuti munhuwo atenderhwezve na Djehovha. (Mup. 8:11) Tingagonda hedu kuti akuru ano ubaba wakakura kusanangura kuti munhu unodikana kudzingwa here kana kuti haiwa. Awona anoziya kuti, hinga atongi e kare e ku Israeri “aadikani kutongera munhu asi Djehovha.”—2 Mak. 19:6, 7.

15. Ngei tecidikana kunyasa kugonda nhungamiriro dza Djehovha nyamasi uno?

¹⁵ Pamweni pakutambudzika kukuru ticapaswa nhungamiriro dzinoshupha kuzwisisa uye kutondoedza. Zviri pamhene kuti Djehovha aazoreketi na isusu hope no hope. Pamweni Djehovha acaseenzesa anarume arikutungamirira nyamasi kuti atipase nhungamiriro. Pa nguwa iyona atizodikani kuramba nhungamiriro dzaticazopaswa pamweni tecidzibvunzisa kuti, kodi ‘nhungamiriro ii irikubva kuna Djehovha kamare, kana kuti icisananguro ce hama dziri kutungamirira?’ Imwimwi munonga makagadzirira kugonda Djehovha ne sangano pa nguwa iyona here? Mhinduro icabva pakuti tiri kutondoedza here nyamasi uno mazano atirikupaswa. Kana mecigonda nhungamiriro dzamunopaswa nyamasi uno uye mecidzitondoedza musikarangariri kairi katatu, pamweni mucakwanisa kuita zvimwezvo pakutambudzika kukuru.—Ruka 16:10.

16. Kugonda kedu Djehovha kucaedzwa kudini mune ramangwana?

¹⁶ Tinodikanawo kunyasa kurangarira kuti Djehovha acaita kudini paanonga ecitonga nyika ino yakashata. Tino kariro yekuti ajinji asikanamati Djehovha kubatanidzawo anyaukama edu angasanangura kumuseenzera tisati taguma kumugumo. Asi pa nguwa ye Amagedhoni, atisupi ticasanangura kuti ndiyani ucaponeswa na Djehovha. (Mat. 25:31-33; 2 Ate. 1:7-9) Mwari eciseenzesa Djesu ndiyena acasanangurira anhu ramangwana rawo. (Mat. 25:34, 41, 46) Kodi ticagonda matongero a Djehovha kana kuti ticasiya kumuseenzera nge ndaa ye zvisananguro zvake? Zviri pamhene kuti tinodikana kubambisa kugonda kedu Djehovha zvino kuti tizokwanise kunyasa kumugonda mune ramangwana.

17. Zviro zvipi zvakanaka zvicaitika nge ndaa yekutonga ka Djehovha pa Amagedhoni?

 ¹⁷ Makamborangarira muzwire wamucaita mu nyika ipsva here patinoona makomborero e kutonga ka Djehovha? Zvitendero zvokunyepa azvizoonekizve, zvekutengeserana uye zvematongerhwe e nyika zvinoita kuti anhu atambudzike zvese zvicapera. Cinetso ce uthongo, kucembera, rufu re anhu atinoda zvese zvicagara zviro zvakadarika. Sathani ne madhimoni ake acasungwa ke makore 1000. Zviro zvese zvakashata zvaakaita azvizoonekizve. (Zvak. 20:2, 3) Ndipona paticaona kuti takanatsa maningi nge kugonda mishobo ya Djehovha yekuita zviro!

18. Maererano ne tsamba ya Numero 11:4-6 na 21:5 tingafundei kubva ku Aisraeri?

¹⁸ Asi mu nyika ipsva, ticasonganawo ne zviro zvicaedza kugonda kedu Djehovha here? Rangarirai zvakaitika ne Aisraeri mumasure mekusiya basa re uranda mu Edjipitu. Amweni akatanga kunyunyuta nge kuti ainga ano cisuwo ce zviro zvaairhya ku Edjipitu, pedzepo akatanga kunyunyuta nge mana aaipaswa na Djehovha. (Erengai Numero 11:4-6; 21:5.) Izvona zvingaitikawo katiri pakupera ke Amagedhoni here? Atizii kukura kunonga kakaita basa ratinonga tinaro pakucenesa nyika uye atizii kuti zvicatora nguwa yakareba kudini kuti igare paraizo. Zvingaita kuti ticagara ne basa rakawanda uye azvesepi zvicagara zvakakwana pakutanga. Ticanyunyuta nge zviro zvatinopaswa na Djehovha here? Icokwadi kuti kana tikakoshesa zvatinopaswa na Djehovha kubvira zvino, zvicatiitira nyore mune ramangwana.

19. Maizopanganidza kudini mucigwagwa fundo ino?

¹⁹ Mu fundo ino taona kuti Djehovha anoita zviro nge cikonzero cakanaka. Isusu tinodikana kugonda anarume akasanangurhwa na Djehovha kuti atungamirire anhu ake. Musambokanganwe masoko a Djehovha ari pana Isaya e kuti: “Simba renyu ricabva pakurumbwa makaterama uye pakugonda neni.”—Isa. 30:15.