1-2. Mukuru umweni wakafundei nge zve kupasa mazano?

 MAKORE akawanda adarika, akuru airi akaenda koousha hanzvadzi imweni yainga isikacapindi misangano. Umwe wawo wakaerenga tsamba dze Bhaibheri dzinoreketa nge zve kukosha kekupinda misangano. Mukuruwo wakarangarira kuti wainga wakwanisa kubambisa hanzvadzi iyona, asi paainga ecibuda pa nyumba pe hanzvadziyo, iyona yakati: “Imwimwi amuzvizii zvandiri kusongana nazvo.” Hama idzona dzainga dzapasa mazano hanzvadzi ii dzisati dzaziya zvirikuitika mu upenyu wayo. Ndiyo ndaa mazano aakapasa aazi kubetsera hanzvadzi iyona.

² Ecirangarira zvakaitika, mukuru wakaerengera tsamba hanzvadzi ii wakati: “Panguwa iyona ndakazwa kuti hanzvadzi iyona aizi kundireremedza. Asi mu masure mekunyasa kurangarira, ndakaona kuti pano kuguma ne tsamba dzakasisira, ndaidikana kuguma ne mibvunzo dzakasisira. Nge muezaniso ndaidikana kubvunzisa kuti: ‘Zvinyi zvirikuitika kamuri?’ ‘Ndingamubetserai kudini?’” Mukuru uya wakadusa fundo rinokosha. Nyamasi uno, iyena muushi uno rudo uye wakagadzirira kubetsera.

3. Mu ungano ndiyani angapasa mazano?

 ³ Akuru, aushi e muungano, ndiyo ndaa awona ano ubaba wekupasa mazano hama ne hanzvadzi. Asi nguwa dzimweni, amweni ari mu ungano angapasawo mazano. Nge muezaniso hama ne hanzvadzi angapasa shamwari dzawo mazano anobva mu Bhaibheri. (Pis. 141:5; Zvie. 25:12) Uye hanzvadzi yakura ingapa “mazano hanzvadzi yecidjaha” hingana mazano ari pana Tito 2:3-5. Zviri pamhene kuti abereki anodikana  kupasa mazano ana awo. Kunyazi hazvo fundo ino yecibhuya maka-maka nge zve akuru, tese tingafundira nge zve kupasa mazano angakwanisa kubetsera no kukohomedzesa uye “anopfadza mwoyo.”—Zvie. 27:9.

4. Ticaonei mu fundo ino?

⁴ Mu fundo ino ticadaira mibvunzo 4 yakaringana ne kupasa mazano: (1) Cinyi cinodikana kutiitisa kuti tipase zano? (2) Zano iri rinodikanadi kamare here? (3) Ndiyani unodikana kupasa zano? (4) Tingapasa kudini zano rakanaka?

5. Cinyi cinodikana kuitisa kuti mukuru apase zano amweni? (1 Akorinti 13:4, 7)

⁵ Akuru anoda hama ne hanzvadzi dzawo. Nguwa dzimweni hama ye mu ungano inonga iri dhuze kuita cishaishi uye akuru anodikana kuipasa mazano. (Aga. 6:1) Kuita izvona cipangidzo ce rudo. Asi asati atanga kupa zano munhuwo, mukuru ucaita zvakanaka kana akaita zvakarekethwa na Pauro kuti: “Rudo rinononoka kutsamwa uye rino upfawi. . . . Rinoshingirira zviro zvese, rinotenda zviro zvese, rino kariro pa zviro zvese, uye rinotsungirira zviro zvese.” (Erengai 1 Akorinti 13:4, 7.) Kunyasa kurangarira nge zve tsamba idzi dze Bhaibheri kucabetsera akuru kuti apase mazano nge mushobo wakanaka uye ne rudo. Ne mushobo uu, uya unonga ecipaswa mazano ucaona kuti mukuruwo unomudadi uye unomurangarira, kana zvikadaro zvicaita nyore kutambira mazano.—Aro. 12:10.

6. Mupostori Pauro wakasiya muezaniso upi wakanaka ku akuru?

⁶ Akuru angateedzera muezaniso we mupostori Pauro. Nge muezaniso, aKristu e ku Tesaronika paaida kupaswa mazano, Pauro wakazviita. Asi mu tsamba dzaakatarira Atesaronika, asati apasa mazano, Pauro wakareketa nge zve kutenda, kugondeka, kushingirira ke hama idzona, uye wakaasimbawo nge kuseenza kawo ne rudo. Pauro wakaedzurirawo mugariro wawo we zviro ecizviziya kuti upenyu wawo wainga usiripi nyore uye kuti awona aiphikiswa maningi. (1 Ate. 1:3; 2 Ate. 1:4) Pauro wakazoguma pakureketa kuti awona ainga ari muezaniso wakanaka ku aKristu amweni. (1 Ate. 1:8, 9) Munokwanisa kurangarira mupfaro wakazwa hama dze ku Tesaronika ngekuzwa kusimbwa uku here! Awona ainga ano cokwadi cekuti Pauro waida hama dzake. Ndiyo ndaa mazano aakazopasa Atesaronika akaseenza.—1 Ate. 4:1, 3-5, 11; 2 Ate. 3:11, 12.

7. Ngei amweni angashaisha kutambira mazano?

⁷ Cinyi cingaitika kana tikapaswa zano nge mushobo usikazi kunaka? Mukuru umweni wagara ne basa wakati: “Anhu amweni aatambiri zvakanaka zano haiwa ngekuti zanoro rinonga rakashata asi ngekuti arizi kupaswa ne rudo.” Tinofundei? Zviri nyore kutendera zano kana tikaona kuti irona rapaswa ne rudo, haiwa ne shungu.

8. Mukuru unodikana kudziita mibvuzo dzipi asati apasa zano?

⁸ Akuru anodikana kutanga arangarira asati apasa zano. Mukuru ungadzibvunzisa kuti: ‘Ndinodikanadi kureketa ciro? Ndinorugondo rokuti zvaizwa ne munhu uu zvakashata here? Iyena waita zvinopesana ne Bhaibheri here? Kana kuti waita cisananguro cakasiyana necandaizoita?’ Mukuru uno ungwaru “aakasiki kureketa.” (Zvie. 29:20) Kana mukuru asina rugondo rokuti unodikana kupasa munhu zano, iyena ungabvunzisa mukuru  umweni kuti azwe maonero ake nge zve kuti munhuwo urikuita zviro zvinopesana ne Bhaibheri here.—2Ti. 3:16, 17.

9. Masoko a Pauro ari pana 1 Timoti 2:9, 10 angabetsa kudini akuru pakupasa mazano pa nyaya yekupfeka?

⁹ Onai muezaniso unoteera. Rangarirai nge zve mukuru umweni urikunetseka nge zve mapfekero e hama ye mu ungano. Pamweni mukuruwo ungadzibvunzisa kuti: ‘Kodi mapfekero e munhu uu anopesana ne Bhibheri here?’ Mukuruwo aadi basi kupasa maonero ake nge nyaya iyona, ndiyo ndaa iyena unobvunzisa mukuru umweni we mu ungano ne muparidzi umweni wakakura pakunamata kuti unorangarirei nge nyaya yazvo. Ese awona anoedzurira zvakarekethwa na Pauro pa nyaya yekupfeka. (Erengai 1 Timoti 2:9, 10.) Pauro wakareketa cokwadi cisikacinji cinotungamirira muKristu wese pa nyaya yekupfeka. Pauro aazi kuita mundandanda we zviro zvatinodikana kupfeka. Iyena wakapangidza pamhene kuti muKristu umwe na umwe uno citenderhwa cekusanangura zvaanoda kupfeka, asi asikapesani ne cokwadi cisikacinji ce Bhaibheri. Hino cinyi catinodikana kurangarira pakusanangura kuti tinodikana kupasa zano here, kana munhu akasanangura mushobo wekupfeka.

10. Cinyi cingatibetsera kureremedza zvisananguro zve amweni?

¹⁰ Tinodikana kuedzurira kuti aKristu airi akakura pakunamata anoita zvisananguro zvakasiyana kunyazi zvakadaro zvisanangurozvo zvorumbwa zvakanaka. Isusu atidikani kuita kuti hama dzedu dziite zviro nge mushobo watinoda.—Aro. 14:10.

11-12. Kana pecidikana kupasa zano mukuru unodikana kurangarirei uye ngei?

¹¹ Kana zvecidikana kupasa zano, tinodikana kurangarira kuti: Ndiyani waidikana kupasa zanoro? Asati apasa zano ku hanzvadzi yakawakwa kana hama ye cidjaha zvakanaka kuti akuru atange acedza ne musoro we mhuri, pamweni musoro we mhuri ungasanangura kugadzirisa ega nyaya iyona. * Uye zvingaitikawo kuti musoro we mhuri ungakumbira kuti mukuru apase zanoro. Uye hingana zvarekethwa mu  ndima 3, pamweni zvinonga zviri nani kuti hanzvadzi yakakura pakunamata ipase zano hanzvadzi ye cidjaha.

¹² Pano ciro cinodikana kutanga carangarirhwa. Mukuru ungadzibvunzisa kuti: ‘Ndiri munhu wakasisira kuti ndipase zano iri here, kana kuti zvainga zvakanaka kuti munhu umweni apase zanoro?’ Nge muezaniso, zvingaita kuti pano munhu unoda kupaswa mazano ngekuti uno mazwiro e kudzionera  pasi. Pa nyaya dzakadaro zvingaita nane kuti munhu ucaenda koopasa mazano unodikana kugara munhu wakambosonganawo ne mazwiro akadaro. Zvicaita nyore kuti mukuruwo azwisise izvona, uye zvicaitawo nyore kuti munhuwo atendere mazano aanonga apaswa. Kunyazi zvakadaro, zvinokosha kuedzurira kuti akuru ane ubaba wekubambisa uye kubetsera hama ne hanzvadzi dze mu ungano kuti dzirarame maererano ne Bhaibheri. Hino kunyazi zvisikabviri kugumira mukuru wakambosongana ne migariro yakadaro, cinokosha nge ce kuti mazano anodikana kupaswa.

13-14. Ngei akuru anodikana kugara anhu anonyasa kupurutana?

¹³ Garai makagadzirira kuzwa. Mukuru paanogadzirira kupasa zano, iyena unodikana kudzibvunzisa kuti: ‘Ndinonyasa kuziya hama yangu here? Ndinoziya zvirikuitika mu upenyu wake here? Iyena uri kusongana ne zvinetso zvandisikazii here? Cinyi caarikuda zvino?’

¹⁴ Cokwadi cisikacinji ciri pana Tiyago 1:19 zvezvirokwazvo cinoseenzawo pakupasa mazano. Tiyago wakati: “Umwe na umwe anodikana kukasika kuzwa asi ononoka kureketa, uye ononoka kutsamwa.” Mukuru ungarangarira kuti unoziya zvese zvirikuitika, asi unozviziadi kamare? Zvierengo 18:13 inoti: “Kana munhu akadaira kunyanya asati azwa zvese, ibenzi uye zvinopsverusa.” Ciro cakanaka cinodikana kuizwa, nge ce kukumbira munhuwo kuti apanganidze zvirikuitika kaari. Ndiyo ndaa akuru anodikana kufunda kupurutana asati areketa. Mucirikuedzurira zvataona pakutanga ke fundo ino here? Mukuru uya wakafundira kuti pane kutanga kuerenga tsamba dzakawanda dze Bhaibheri, waidikana kutanga kuita mibvunzo yakasisira ku hanzvadzi iya. Ngo muezaniso: “Zviro zvirikumuhambira zvakadini?” “Ndingamubetsera kudini?” Kana akuru akapeta masimba kuti anyase kuzwisisa zvirikuitika, zvicaita nyore kaari kubambisa ngekubetsera hama ne hanzvadzi dziri mu ungano mawo.

15. Akuru angaseenzesa kudini cokwadi cisikacinji ciri pana Zvierengo 27:23?

¹⁵ Nyasai kuziya hama dzenyu. Hinga zvataona pakutanga, kuti tipase mazano akanaka tinodikana kuita zvimweni kupinda kuerenga tsamba dze mu Bhaibheri pane kupasa maonero edu. Hama dzedu dzinodikana kuzwa kuti isusu tinoarangarira, tinozwisisa zvaarikusongana nazvo uye kuti tinoda kamare kuabetsera. (Erengai Zvierengo 27:23.) Akuru anodikana kupeta masimba kuti agare shamwari dzakanaka dze hama ne hanzvadzi dze mu ungano.

16. Cinyi cicabetsera akuru kuti apase mazano?

¹⁶ Akuru aadikani kuita kuti hama dze mu ungano dzirangarire kuti paanoreketa nawo arikuda kuapasa mazano. Zvezvirokwazvo  akuru anocedza ne hama ne hanzvadzi nguwa dzese. Uye anonetsekawo ne zviro zvaarikusongana nazvo mu upenyu wawo. Mukuru umweni wagara ne basa wakati: “Kana mecida kuziya zvakanaka hama, munodikana kugara shamwari dzawo.” Kana zvadaro, zvicaita nyore kupa mazano uye mazano awona acatambirhwawo zviri nyore.

17. Ndipapi akuru paanodikana kugara ne mwoyo unononoka kutsama uye unaki?

¹⁷ Garai ne mwoyo unononoka kutsamwa uye ne unaki. Zvinokosha kugara ne mwoyo unononoka kutsamwa kajinji pa nyaya yokuti munhu unonga asikazi kutendera zano kunyazi recibva mu Bhaibheri. Mukuru unodikana kungwarira kuti asakasike kutsamwa kana munhu akaramba kutendera zano ciriporipoco. Bhaibheri parinoreketa nge zva Djesu rinoti: “Apana tsanga yakakuzvuka yaacaphwanya, uye apana tambo inopfukuta yaacadzima.” (Mat. 12:20) Hino teciteedzera mwoyo unononoka kutsamwa uye unaki wa Djesu, mukuru paanoita munamato wake angakumbira Djehovha kuti hama iya izwisise uye itendere mazano ayapaswa. Pamweni hama iya ingada nguwa kuti irangarire nge zve zano rayapaswa. Kana mukuru akagara ne mwoyo unononoka kutsamwa uye unaki, zvicaita nyore kuti munhuwo atendere zano. Uye zviri pamhene kuti zanoro rinodikana kutsamira mu Bhaibheri.

18. (a) Icokwadi cipi catinodikana kuedzurira, uye tinodikana kupeta masimba kuti tiitei? (b) Hingana zvirikupangidzwa pa foto uye no bhokisi, abereki arikucedza nge zvei?

¹⁸ Fundirai ne zvishaishi zvenyu. Ngekusama kukwana kedu atikwanisi kuita zvese zvatafunda nge mushobo wakakwana. (Tg. 3:2) Isusu ticashaisha, asi kana zvikaitika tinodikana kupeta masimba kuti tifundire nge zvishaishi zvedu. Kana tikashaishira hama yedu nge zviito kana masoko zvicaita nyore kuti iyena atirekerere kana akazwa kuti tinomurekereradi kamare.—Onaiwo bhokisi “ Masoko ku Abereki.”

19. Tingapfadza kudini mwoyo we hama dzedu?

¹⁹ Hinga zvataona mu fundo ino, azviripi nyore nguwa dzese kupasa zano. Isusu tiri anhu asikazi kukwana uye anhu atinopasa mazano aaziwo kukwana. Asi nguwa dzese edzurirai zvataona mu fundo ino. Ciro cinomuitisa kuti mude kupasa zano cinodikana kugara cakanaka. Nyasai kurangarira kuti zano rinodikanadi kupaswa uye ndiyani waidikana kupasa zanoro. Musati mapasa zano, itai mibvunzo uye nyasai kupurutana, kana mukadaro mucanyasa kuzwisisa zviri kubatana ne munhuwo. Edzai kudzikanda pa mbuto yake. Garai ne unaki uye shamwaridzanai ne hama uye hanzvadzi dze mu ungano. Edzurirai nguwa dzese kuti cikonzero acokupasapi mazano akanaka, asi “cekupfadza mwoyo we hama dzedu.”—Zvie. 27:9.