MU NGUWA ye Bhaibheri, mwanarume paaida kuwaka, iyena kana kuti hama dzake, dzaidikana kuripa mare ye kuroora ku hama dze mukadzi. Mare ye kuroora yaibatanidza zviro zvinokosha, zvinyama kana kuti mare kamare. Nguwa dzimweni, munhu waikwanisa kuripa mareyo nge kuseenzera abereki e musikanewo. Ngo muezaniso Djakobo wakaseenza ke makore 7 kuti awakane na Raqueri. (Gen. 29:17, 18, 20) Ngacipi cainga ciri cinangwa ce tsika ii?

Mukwarakwatisi we Bhaibheri unozwi Carol Meyers unoti: “Ngekuti abereki airuza basa raiizwa ne mwana wawo, pamweni mare ye kuroora yairipa basa raiitero. Ngekuti izvi zvaikosha maningi ku mhuri dzairarama nge kuita basa rokurima.” Zvingaitawo kuti pakuripa mare yekuroora zvaizobambisa ukama uye ushamwari ku mhuri mbiri idzi dziri kubatana pa mucato. Kubatana ke mhuri idzi kaikosha maningi paaizosongana ne cinetso nge kuti aizobetserana. Uyewo kuripa mare ye kuroora kaipangidza pamhene kuti mwanakadziwo wawakwa uye kuti aberki ake ainga asikazomucengeti ne kumudziirira, asi mwamuna wake.

Kuripa mare yekuroora zvainga zvisikarei kuti mwanakadziwo uri kutengeswa kana kutengwa hingana ciro. Bhuku rinozwi Ancient Israel—Its Life and Institutions, rinoti: “Tsika ii yekuripa mare ye kuroora ku abereki e mukadzi kana kuti kuseenza kuti atsiye mareyo zvaiita kuti micato ye ku Israeri iite hingana kutenga. Asi zvinoita hingana kuti kuripa mare ye kuroora kaiita hingana kutenda abereki e mwanakadziwo haiwa hingana kutenga mwanakadzi.”

Mu nyika dzimweni mazuwa ano, amweni aciri no tsika yekuripa mare ye kuroora. Abereki e ciKristu paanocadja mare ye kuroora anoita kuti “zvireruke” aakumbiri mare yakawanda kudarika yakasisira. (Afi. 4:5; 1Ako. 10:32, 33) Nge mushobo iwona awona anopangidza kuti aana “makharo,” uye aadisisi mare. (2Ti. 3:2) Uyezve kana abereki e mukadzi akatama kucadja mare yakawanda maningi, mwanarume aazononoki kucata kuti apsvake mare yekuripa mukadzi. Mwamuna aazosiiwo basa re upionero kuti aone nguwa yakawanda yekuseenza kuti aripe mare ye kuroora.

Mu nyika dzimweni, mare ye kuroora inonga yakacadjuwa kare ne atongi. Mu nyika dzakadaro, abereki e ciKristu anoteerera mutemo. Ngei? Ngekuti Bhaibheri rinobhuya kuti aKristu e zvirokwazvo “anodikana kudzikanda pasi pe anhu ano masimba” uye oteerera mitemo isikapesani ne mitemo ya Mwari.—Aro. 13:1; Zvi. 5:29.