1. Muezaniso upi unotibetsera kuzwisisa kuti tinoda Djehovha hinga Mutungamuiri wedu?

 RANGARIDZAI mapsveteka pakati pe makwasha. Mbuto yese ino ngozi: zvinyama zve mushango, zvinyama zvinoita kuti mubatane no matenda, miti dzino vheneno uye mabako no mapuwe akaigika. Imwimwi maizogara makaterama kana mecitungamirirhwa no munhu unonyasa kuziya kuno ngozi uye zvamungaita kuti mugare makacengeteka! Nyika nyamasi yakaita hingana mbuto ii. Nyika nyamasi uno, ino ngozi dzakawanda inobata-bata kunamata kedu uye ushamwari wedu na Djehovha. Asi isusu taano Mutungamiriri akakwana—Djehovha. Iyena anotiendesa kure no ngozi uye anotibetsera kuti tigume katiri kuenda—ku upenyu usikaperi mu nyika ipsva.

2. Djehovha anotitungamirira kudini?

² Djehovha anotitungamirira kudini? Anotitungamirira maka-maka eciseenzesa Soko rake Bhaibheri. Asi iyena anoseenzesawo anhu kuti atitungamirire. Ngo muezaniso, iyena anoseenzesawo “muranda akatendeka uye akangwara” kuti atipase zvekurhya zve ku mwiya uye kutibetsera kuti tiite zvisananguro zvakanaka. (Mat. 24:45) Djehovha anoseenzesawo anarume akaita hinga aonereri e nharaunda uye akuru e ungano. Awona anotibambisa uye anotipasa nhungamiriro kuti atibetsere kushingirira matambudziko. Isusu tinotenda maningi Djehovha nge kutitungamirira zvakanaka pa nguwa ino inoshupha mugumo usati wauya! Nhungamiriro idzi dzinotibetsera kuti tirumbwe tiri shamwari dza Djehovha uye tirumbwe tecihamba mu gwanza rinoenda ku upenyu usikaperi.

3. Ticaonei mu fundo ino?

³ Kunyazi tecizviziya, nguwa dzimweni zvingatishuphira kuteerera nhungamiriro dza Djehovha maka-maka nhungamiriro iyona painopaswa ngo anhu asikazi kukwana. Asi ngei? Pamweni zano irona andiropi ratiri kuda kuzwa. Kana kuti tingarangarira  kuti nhungamiriro iyona aibetseri ciro kana kuti aizi kubva kuna Djehovha. Ii ndiyo nguwa yekuti tinodikana kugonda maningi kuti Djehovha ndiyena ari kutungamirira anhu ake uye kuti kutondoedza nhungamiriro yake zvakatinakira nguwa dzese. Kuti atibetsere kuti tibambise rugondo redu, fundo ino icareketa ngezve kuti (1) Djehovha akatungamirira kudini anhu ake mu nguwa ye kare, (2) iyena ari kutungamirira kudini anhu ake mazuwa ano, uye (3) tinobetsereka kudini patinotondowedza nhungamiriro dzake.

DJEHOVHA AKATUNGAMIRIRA KUDINI DZINZA RE AISRAERI

4-5. Djehovha akapangidza kudini kuti aiseenzesa Mozesi kuti atungamirire Aisraeri? (Onai foto ye pa kapa.)

⁴ Djehovha akagadza Mozesi kuti atungamirire Aisraeri kuti abude ku Edjipitu. Djehovha akapasa Aisraeri zvikonzero zvakadjeka zvinopangidza kuti Iyena akagadza Mozesi kuti aatungamirire. Ngo muezaniso, Djehovha co masikati aiseenzesa gore uye co usiku aiseenzesa murazvi we muriro. (Eki. 13:21) Mozesi waiteera gore iri, nge kudaro wakatungamirira Aisraeri kuenda ku Bahari Rekupsvuka. Aisraeri akathya maningi paakaona kuti ainga akatenderedzwa nge Bahari Rekupsvuka uye no anyahondo e Edjipitu. Awona akatanga kurangarira kuti Mozesi wainga ashaisha nge kuaunzisa ku Bahari Rekupsvuka. Asi Mozesi wainga asikazi kutomboshaisha ciro, Djehovha ndiyena akada kutora anhu ake uye akaseenzesa Mozesi kuti aite izvona. (Eki. 14:2) Izvona zvakapasa Djehovha mukana we kupangidza simba rake nge mushobo unoshamisa.—Eki. 14:26-28.

⁵ Pa makore 40 akazoteera, Mozesi wakarumbwa ecigonda nhungamiriro dza Djehovha kuti atungamirire anhu Ake mu renje. a Ke nguwa yakareba, Djehovha akasiya kuti gore rigare pamusoro pe tenda ra Mozesi kuti Aisraeri ese akwanise kuriona. (Eki. 33:7, 9, 10) Djehovha aireketa na Mozesi ari mukati me gore uye Mozesi waibvunza anhu zvese zvaainga azwa. (Pis. 99:7) Aisraeri aikwanisa kunyasa kuona kuti Djehovha aiseenzesa Mozesi kuti aatungamirire.

6. Aisraeri aitambira kudini nhungamiriro yaipaswa ndi Djehovha? (Numero 14:2, 10, 11)

⁶ Zvinotsukwarisa kuti Aisraeri akawanda aazi kutendera zvipangidzo zvinopangidza kuti Djehovha Ndiyena ainga ecireketa eciseenzesa Mozesi. (Erengai Numero 14:2, 10, 11.) Kakawanda kese, awona akaramba kutendera kuti Djehovha aiseenzesa Mozesi. Nge ndaa yazvo, Djehovha aazi kutendera kuti mibarirhwana ii ye Aisraeri ipinde mu Nyika Yakapikirhwa.—Num. 14:30.

7. Aisraeri amweni akapangidza kudini kuti aigonda mushobo waitungamirira Djehovha anhu ake? (Numero 14:24) (Onaiwo mufanikiso.)

⁷ Nge dii rimweni, Aisraeri amweni akatondowedza nhungamiriro ya Djehovha. Ngo muezaniso, Djehovha akati: “Karebhi . . . wakarumbwa ecinditera no mwoyo wese.” (Erengai Numero 14:24.) Djehovha akakomborera Karebhi uye akatomupasa dii raakasanangura mu nyika ye Kanani. (Djs. 14:12-14) Mubarirhwana wakazoteera we Israeri wakazorumbwawo wecizwira nhungamiriro dza Djehovha. Mumasure mekuti Mozesi wafa uye Djoshuwa wagara mutungamiriri we Israeri, awona “akamureremedza mu upenyu wake wese.” (Djs. 4:14) Mugumisiro wakhona, Djehovha akakomborera Aisraeri uye akaatora dakara ku nyika yaainga akaapikira.—Djs. 21:43, 44.

8. Panganidzai kuti Djehovha akatungamirira kudini anhu ake mu nguwa ye madzimambo? (Onaiwo mufanikiso.)

⁸ Mumakore akazoteera, Djehovha akasanangura atongi kuti atungamirire anhu ake. Pedzepo, mu nguwa ye madzimambo, Djehovha akasanangura aphorofita kuti atungamirire anhu ake. Madzimambo ainga akatendeka kuna  Djehovha aikwanisa kubetserhwa no mazano e aphorofita. Ngo muezaniso, Mambo Dhavhidhi ecidzidodosa wakatenda mupango waakapaswa no muphorofita Natani. (2 Sam. 12:7, 13; 1 Mak. 17:3, 4) Mambo Djeosafati wakateerera zano re muphorofita Djazieri kuti aziye zvaaizoitira anhu uye kuabambisa kuti agare no “kutenda ku aphorofita a [Mwari].” (2 Mak. 20:14, 15, 20) Nge dii rimweni, Mambo Ezekiya wakapsvaka rubetso ku muphorofita Isaya paainga ecinetseka. (Isa. 37:1-6) Madzimambo ese aya paaiteerera nhungamiriro dza Djehovha, awona aikomborerhwa uye dzinza rese raidziirirhwa. (2 Mak. 20:29, 30; 32:22) Zvaigara pamhene kuti Djehovha aiseenzesa aphorofita kuti atungamirire anhu ake. Asi kunyazi zvakadaro, akawanda e madzimambo kutobatanidzawo no anhu amweni akaramba aphorofita a Djehovha.—Djer. 35:12-15.

DJEHOVHA AKATUNGAMIRIRA KUDINI AKRISTU E KUTANGA

9. Djehovha akaseenzesa ani kuti atungamirire Akristu e pakutanga? (Onaiwo mufanikiso.)

⁹ Djehovha akaumba ungano ye Cikristu mu Pentekosti ya 33 K.A. Asi iyena akatungamirira kudini Akristu e kutanga? Djehovha akagadza Djesu kuti agare musoro we ungano. (Aef. 5:23) Asi Djesu ainga asikareketi zvakananga no munhu umwe na umwe kuti amubvunze zvaaidikana kuita. Iyena akaseenzesa aphostori no akuru e mu Djerusarema kuti atungamirire Akristu e kutanga. (Zvii. 15:1, 2) Kusiya izvona, akuru akatogadzwawo kuti atungamirire ungano.—1 Ate. 5:12; Tito 1:5.

10. (a) Akristu akatambira kudini nhungamiriro dzaakapaswa? (Zviito 15:30, 31) (b) Ngei mu nguwa yo kare anhu amweni ainga asikagondi no anhu aiseenzeswa na Djehovha kuti atungamirire anhu ake? (Onai bhokisi rakazwi: “ Ngei Amweni Asikatenderi kuti Djehovha Aseenzese Anhu kuti Atungamirire Anhu Ake.”)

¹⁰ Kodi Akristu ekutanga aigonda mushobo waitungamirira Djehovha anhu ake here? Honde, akawanda awo aipfara nge kuzwira nhungamiriro dzaaipaswa. Uye “aipfara nge kubambiswa” kaaiizwa. (Erengai Zviito 15:30, 31.) Asi zvakadini no mazuwa ano, Djehovha ari kutungamirira kudini anhu ake?

DJEHOVHA ARI KUTUNGAMIRIRA KUDINI ANHU AKE MAZUWA ANO

11. Pasai muezaniso unopangidza kuti Djehovha ari kutungamirira kudini anhu ake mazuwa ano.

¹¹ Djehovha ari kurumbwa ecitungamirira anhu ake mazuwa ano. Iyena anoita izvona eciseenzesa Soko rake Bhaibheri uye eciseenzesa Mwana wake Djesu musoro we ungano. Kodi  isusu tino zvipangidzo zviri pamhene zvinopangidza kuti Djehovha ari kurumbwa eciseenzesa anhu kuti atungamirire anhu ake here? Honde. Ngo muezaniso, onai zvakaitika kubvira mu gore ra 1800. Charles Taze Russell no shamwari dzake dzaifundawo Bhaibheri, akatanga kuzwisisa kuti gore ra 1914 rainga riri gore raikosha rainga rino cokuita no kugadzwa ke Umambo wa Mwari. (Dha. 4:25, 26) Kuti azogume pacitenderano icona, awona akafunda zvakawanda ngezve uphorofita ye Bhaibheri. Kodi Djehovha ainga ecitungamirira kukwarakwatisa kaaiita here? Zviri pamhene kuti honde. Zvakaitika muna 1914 zvainga zviri zvipangidzo zvekuti zvezvirokwazvo Umambo wa Mwari wainga wagadzwa. Mu gore irona, makaitika Hondo Yekutanga ye Nyika Yese uye pedzepo matenda, zvigidhi-gidhi uye nzara zvakatunhudzirika. (Ruka 21:10, 11) Djehovha akaseenzesa anarume awona kuti abetsere anhu ake.

12-13. Zvinyi zvakaizwa pa Hondo Yecipiri ye Nyika Yese kuti basa re kuparidzira ritunhudzirike?

¹² Rangariraiwo zvakaitika mu Hondo ye Cipiri ye Nyika Yese. Mumasure mekuongorora Zvakapangidzwa 17:8, hama dze sedhi mundiyari dzakazwisisa kuti hondo iyona yainga isikazoitisi kuti hondo ye Amagedhoni igume, asi yaizoita kuti paoneke runyararo yaizoita kuti paoneke mukana wekuti basa rekuparidzira ritunhudzirike. Hino awona akaita cisananguro caiita hingana kuti cainga cisikabetseri. Akatanga kuitisa Cikora ce Bhaibheri ce Torre de Vigia kuti arowedze mamisionariyo kuti aparidzire uye afundise mu mbuto dzakasiyana-siyana dze nyika. Mamisionariyo akawanda akatumwa kunyazi hondo payaiitika. Kusiya izvona, muranda akatendeka akaronga kuti paoneke Curso do Ministério Teocrático b kuti arowedze ungano dzese kugara aparidzi uye afundisi akanaka. Nge mushobo uwona, anhu a Mwari airowedzwa kuita basa guru raaizogara naro mberi.

¹³ Kana tikaona zvakaitika kare, tinonyasa kuona kuti Djehovha ainga ecitungamirira anhu ake pa nguwa iyona inoshupha. Uye kubvira mu Hondo ye Cipiri ye Nyika Yese, anhu a Djehovha e mu nyika dzakasiyana-siyana anosokwanisa kuita basa re kuparidzira no rusudzunuko. Kubhuya zvazviri, basa re kuparidzira mu nyika yese ririkurumbwa recitunhudzira.

14. Ngei tingagonda no nhungamiriro dzinobva ku sangano ra Djehovha uye dzinobva ku akuru? (Zvakapangidzwa 2:1) (Onaiwo foto.)

¹⁴ Mazuwa ano, nhengo dze Dare Rinotungamirira dzinorumbwa dzeciteerera nhungamiriro dza Djesu. Awona anoita izvona ngekugara no cokwadi cekuti zvisananguro zvawo zvinoenderana maererano no zvinodiwa na Djesu. Kusiya izvona, aonereri e nharaunda no akuru anoseenzeswa kuti agumise nhungamiriro idzona ku ungano. c Akuru akadzodzwa ari ku “moko kwawo” wa Djesu (Erengai Zvakapangidzwa 2:1.) Zviri pamhene kuti akuru ese anhu asikazi kukwana uye anotoshaishawo. Mozesi na Djoshuwa akatomboshaishawo nguwa dzimweni uye no aphostori amweni. (Num. 20:12; Djs. 9:14, 15; Aro. 3:23) Kunyazi zvakadaro, isusu tirikunyasa kuona pamhene kuti Djesu acirikurumbwa ecitungamirira muranda akatendeka no akuru, uye iyena acarumbwa eciseenzesa anarume aya “mazuwa ese dakara pa kupera ke nyika.” (Mat. 28:20) Hino isusu tino zvikonzero zvese zvekuti tigonde nhungamiriro dzatirikupaswa na Djesu eciseenzesa anarume aya akatendeka.

NGEI ZVAKANAKA KUTI TIGONDE AYA ARIKUSEENZESWA NA DJEHOVHA KUTI ATUNGAMIRIRE ANHU AKE

15-16. Mungafundei no miezaniso dze anhu akateerera mazano a Djehovha?

¹⁵ Patinoteerera nhungamiriro dza Djehovha, isusu tinonyasa kuona kubetsera kadzo. Ngo muezaniso, Andy no mukadzi wake Robyn akateerera mazano e muranda akatendeka e kurumbwa ano upenyu usina zvakawanda. (Onai masoko e pasi e kufunda ari pana Mateu 6:22.) Nge kuita izvona, awona akaona mukana we kuseenza hinga adzipiri mu maprojeto e kuwaka e sangano. Robyn unoti: “Nguwa dzimweni isusu taitodikana kugara mu nyumba dzainga dzakadodoka uye dzainga dzisina kuzinya. Inini ndakatodikanawo kutengesa maekipamento akawanda e kudusa foto uye cainga ciri ciro cekuti ndaicipfarira maningi. Inini ndakatocema pandakatengesa kamera dzangu. Asi kuita hingana Sara mukadzi wa Abrahamu, inini ndainga ndakashinga kusama kuringira sure.” (Aheb. 11:15) Asi Andy no mukadzi wake Robyn anorangarirei ngezve maesperiensiya ese aya aakasongana nawo? Robyn unoenderera mberi eciti: “Isusu tiri kupfara maningi nge kuziya kuti tiri kupasa Djehovha zvese zvatinazvo. Patinoseenzera sangano ra Djehovha, isusu tinoona cipangidzo cidoko cekuti upenyu unonga wakadini mu nyika ipsva.” Mwamuna wake Andy, unotenderana naye uye unoti: “Isusu tiri kupfara ngekuziya kuti tiri kupasa Djehovha nguwa uye simba redu rese.”

 ¹⁶ Onai muezaniso umweni unopangidza kuti ngei zvakatinakira kuteerera nhungamiriro dza Djehovha. Mumasure me kupedza kufunda ku cikora Marcia wakasanangura kuteerera zano raakapaswa re kugara piyonero. (Mat. 6:33; Aro. 12:11) Iyena unoti: “Inini ndakabvunzwa kuti ndifunde ke makore 4 ndisikapagari ku univhersidhadhe. Asi inini ndaida kuitira Djehovha zvakawanda. Ndiyo ndaa, ndakasanangura kuita cikursu cidoko caizodibetsera kuita basa raizondibetsera kuti ndidziriritire hinga piyonero. Ici i cisananguro cakanaka candakaita mu upenyu wangu. Parizvino ndiri piyonero uye nguwa yandinoseenza ku basa inonditendera kuti ndiseenze mazuwa manganani ku Bheteri uye ndiitewo zviro zvimweni zvinoshamisa mu basa ra Djehovha.”

17. Rubetso ripizve ratinoona kana tikateerera mazano a Djehovha? (Isaya 48:17, 18)

¹⁷ Nguwa dzimweni, isusu tinotambira mazano e sangano anotidziirira. Ngo muezaniso, tinoziiswa ngezve ngozi iripo yekudisa zviro zvakawanda zve kunyama uye kuita zviro zvingazotikanda pa ngozi ye kusama kutondowedza mitemo dza Mwari. Patinoteerera mazano aya, tinoona kuti zvakanaka kudini kutondowedza nhungamiriro dza Djehovha. Isusu tingagara no hana yakaterama uye kudziirira matambudziko akawanda. (1 Ti. 6:9, 10) Ngekuita izvona, tingaseenzera Djehovha no mwoyo wedu wese. Apana ciro mu nyika cingatipasa mupfaro, kuterama uye kugutsikana.—Erengai Isaya 48:17, 18.

18. Ngei mashinga kurumbwa meciteerera nhungamiriro dza Djehovha?

¹⁸ Apana mubvunzo kuti Djehovha acarumbwa eciseenzesa anhu kuti atipase nhungamiriro pa nguwa ye kutambudzika kukuru uye pa nguwa ye Kutonga ke Makore Ciuru. (Pis. 45:16) Kodi ticarumbwa teciteerera nhungamiriro idzi here kunyazi tecida edu kuita zviro zvimweni? Zvicazotiitira nyore kutondowedza nhungamiriro dza Djehovha kana tikatanga zvino kuzwira mazano aanotipasa. Hino, tiri kuda kurumbwa tecitondowedza nhungamiriro dza Djehovha dzinobatanidza mazano ese aanotipasa eciseenzesa anarume aakagadza kuti aticengetedze. (Isa. 32:1, 2; Aheb. 13:17) Patinozwira Mutungamiriri wedu akakwana Djehovha, isusu tingagonda kuti iyena acatinunura pa zviro zvese zvine ngozi uye ticarumbwa tiri shamwari dzake ke upenyu wese mu nyika ipsva.