1-2. Cinyi cinotibetsera kuzwisisa kuti Djehovha akazwa kudini mumasure mekuti manyepo akawanda abarariswa nge zvake?

 CIMBORANGARIDZAI nyaya ii: Munhu wamunoda maningi unobhuya zvakashata nge zvenyu. Uye imwimwi munozviziya kuti azvirokwazvopi, asi anhu anganani anozvitendera. Uye kupinda izvona, awona anotanga kubararisa manyepo aya, uye anhu akawanda anotanga kuzvitendera. Pakadaropo maizozwa kudini? Kana anhu aya anokosha kamuri, uye imwimwi munokoshesa muhambiro wawo wakanaka, zvezvirokwazvo imwimwi maizotsukwara maningi ngezvazvo, andizvopi?—Zvie. 22:1.

² Nyaya ii inotibetsera kuzwisisa kuti Djehovha akazwa kudini zina rake parakasvipiswa. Umwe we ana ake e kumwiya, wakareketa manyepo nge zvake ku mwanakadzi we kutanga, Evha. Uye iyena wakatendera manyepo aya. Nge ndaa ye manyepo aya, abereki edu ekutanga, akapandukira Djehovha uye mugumisiro wakhona nge wekuti citema uye rufu, zvakabararika ku anhu ese. (Gen. 3:1-6; Aro. 5:12) Matambudziko ese atiri kuona mu nyika nyamasi uno—hingana rufu, hondo, uye kushuphika—zviripo nge ndaa ye manyepo akarekethwa na Sathani mu munda we Edheni. Kodi Djehovha ari kuzwa kudini nge kuona matambudziko ese aya akakonzerhwa nge ndaa ye manyepo aya? Zvezvirokwazvo, izvi zviri kutsukwarisa maningi Djehovha. Asi kunyazi zvakadaro, Djehovha aazi kugara Mwari anoita zvakashata kana kuti no bundu. Kureketa zvazviri, Djehovha anorumbwa ari “Mwari anopfara.”—1 Ti. 1:11.

3. Makomborero api atinawo?

³ Isusu tino makomborero ekubetsera kupangidza pamhene kuti Sathani wakanyepa ngezve zina ra Djehovha, nge kuzwira mutemo wa Djehovha wekuti: “Kudzai zina ra Djehovha.” (Pis. 113:1) Isusu tinoita izvona, nge kureketa zvakanaka ngezve munhu unoimirira zina iri, cena. Hino imwimwi makagadzirira kuita izvona here? Ngatione zvikonzero zvitatu, zvicatibetsera kukudza zina ra Djehovha no mwoyo wedu wese.

 DJEHOVHA ANOPFARA MANINGI PATINOKUDZA ZINA RAKE

4. Djehovha anopfara maningi patinokudza zina rake here? Pasai muezaniso. (Onaiwo foto.)

⁴ Baba edu e kudenga, anopfara maningi patinokudza zina rawo. (Pis. 119:108) Anhu amweni anozwa asikazi kucengeteka kana kuti anondoda basi kuti amweni arumbwe eciasimba uye arekete zvakanaka nge zvawo. Kodi Djehovha akaita hinga anhu aya here? Zviri pamhene kuti haiwa. Rangarirai muezaniso uu: Kamusikana kanokhumbatira baba akhona nge mushobo we rudo, uye kanoti: “Imwimwi makanakisisa maningi kudarika baba upi hake!” Babewo anopfara maningi uye anozwa zvakanaka nge zviya zvaizwa no mwana wawo. Asi ngei? Kodi Babewo anondozwa asikazi kucengeteka uye ecindoetsera kusimbwa no mwana wawo basi? Haiwa. Ngekuti iyena anozviziya kuti ndi baba akanaka, uye anopfara nge kuona mwana wawo ecipangidza rudo uye kutenda. Babewo anoziya kuti mawara aya anokosha kuti mwanewo agare munhu anopfara kana akakura. Nge ndaa cikonzero cimweco, Djehovha Baba edu, anopfara maningi patinoakudza.

5. Patinokudza Djehovha, tinobetsera pakupangidza cinyi?

⁵ Patinokudza Djehovha, tinobetserawo pakupangidza pamhene kuti Sathani wakanyepa nge zvedu. Nge gwanza ripi? Iyena wakabhuya kuti apana munhu waizokwanisa kurumbwa akatendeka kuna Djehovha uye kudziirira zina rake. Sathani wakabhuya kuti apana munhu waizokwanisa kurumbwa akatendeka kana akaedzwa. Sathani wakabhuyawo kuti tese isusu, taizosiya Djehovha kana munhu akatipasa zviro zvakanakisisa maningi. (Djobo 1:9-11; 2:4) Asi Djobo ngo kutendeka, wakapangidza pamhene kuti Sathani wainga ecinyepa. Zvakadiniwo katiri? Umwe na umwe wedu nyamasi uno, uno makomborero e kutsigira akagondeka zina ra Djehovha uye kumuseenzera akagondeka. (Zvie. 27:11) Ici, cikomborero cakakura maningi.

6. Tingateedzera kudini Mambo Dhavhidhi no Arevhi? (Neemiya 9:5)

⁶ Kuda Mwari kunoitisa kuti anhu akatendeka ade kukudza zina rake. Mambo Dhavhidhi wakatara kuti: “Siyai ndikudze Djehovha; zvese zviri mandiri ngazvikudze zina rake cena.” (Pis. 103:1) Dhavhidhi wakazwisisa kuti kukudza zina ra Djehovha kainga kuri kutokudzawo Djehovha wene. Zina ra Djehovha rinobatanidzawo muhambiro wake. Hino izvona zvinotiedzurira mawara ake akanaka, uye zviro zvinoshamisa zvaanoita. Dhavhidhi waida kukudza zina ra Baba ake ngekuti irona rakacena. Iyena waida kuita izvona no “zvese zvainga zviri  mukati make” kana kuti—no mwoyo wese. Nge mushobo umwewo, Arevhi ndiwona ainga ari pamberi pakukudza Djehovha. Ecidzidodosa, awona akatendera kuti masoko awo ainga asikazokwanisi kukudza zina cena ra Djehovha nge mushobo warinosisira. (Erengai Neemiya 9:5.) Apana mubvunzo kuti kudzidodosa uku kakaita kuti Djehovha apfare.

7. Tingakudza kudini Djehovha mu basa rekuparidzira uye mu upenyu wedu we zuwa no zuwa?

⁷ Isusuwo tingakudza Djehovha patinoreketa nge zvake no rureremedzo, rudo uye ngo kumutenda. Patinonga tiri mu basa rekuparidzira, tinodikana kuedzurira kuti cinangwa cedu cikuru ngece kuita kuti anhu akhwedere dhuze na Djehovha uye kuabetsera kuti anhu amuone hingana Baba ano rudo. (Tig. 4:8) Katiri mupfaro mukuru kupangidza anhu mu Bhaibheri kuti Djehovha ndi Mwari we rudo, ano unatsi, uzii, simba uye kuti iyena ano mawara amweni anoshamisa. Mushobo umweni wekukudza Djehovha uye we kumupfadza, ndi paya patinopeta masimba kuti timuteedzere. (Aef. 5:1) Patinoita izvona, amweni angakwanisa kuona kuti isusu takasiyana no anhu amweni. (Mat 5:14-16) Patinonga tinawo mu upenyu wedu we zuwa no zuwa, pamweni tingagara no mukana we kupanganidza kuti ngei takasiyana. Mugumisiro wakhona ngewe kuti anhu ano mwoyo unoda angapedzisira aakutoda kuziya zvakawanda ngezve Mwari wedu. Patinokudza Djehovha nge mushobo uwona, iyena anopfara maningi ndizvona.—1 Ti. 2:3, 4.

ISUSU TINOPFADZA DJESU PATINOKUDZA ZINA RA DJEHOVHA

8. Djesu akatanga kudini kukudza zina ra Djehovha?

⁸ Pa zvisikwa zvese zvino uzii zviri kudenga no pa nyika, apana anonyasa kuziya Baba kupinda Mwana. (Mat. 11:27) Djesu anoda Baba ake uye anotanga ndiye kukudza zina rake. (Juau 14:31) Pa munamato waakaita kuna Baba ake usiku asati afa, iyena akabhuya nge masoko padoko ngezve basa rake pa nyika pano, nge mushobo uu: “Ndakaaziisa zina renyu.” (Juau 17:26) Iyena waida kubhuyei?

9. Djesu akaseenzesa muezaniso upi kuti atibetsere kunyasa kuzwisisa kuti Djehovha akadini?

⁹ Djesu akaita zvakawanda pano kubvunza anhu basi kuti zina ra Mwari ndi Djehovha. Adjudha aireketa na Djesu ainga aakuziya zina ra Mwari, asi Djesu ndiye akatanga kupangidza kuti “Mwari ndiani kamare.” (Juau 1:17, 18) Ngo muezaniso, Matarhwa e Cihebheru anobhuya kuti Djehovha ano nyasha uye ano usisi. (Eki. 34:5-7) Djesu akanyasa kupangidza izvona paakaseenzesa muezaniso we mwana wakapsveteka. Patinoerenga ngezva Baba anoona mwana wawo nge “cekure,” ogogoma kuti asongane naye uye ecimukhumbatira, omurekerera no mwoyo wese, isusu tinonyasa kuona pamhene nyasha uye usisi wa Djehovha. (Ruka 15:11-32) Djesu akabetsera amweni kuti azwisise kuti Djehovha munhu akaita kudini kamare.

10. (a) Tinozviziya kudini kuti Djesu aiseenzesa zina ra Baba ake uye aidawo kuti amweni aitewo zvimwezvo? (Marko 5:19) (Onaiwo mufanikiso.) (b) Djesu anoda kuti tiitei nyamasi uno?

¹⁰ Kodi Djesu aidawo kuti amweni aseenzese zina ra Baba ake here? Zviri pamhene kuti honde. Atungamiriri amweni e magereja aitendera kuti kubhuya zina ra Mwari kainga kuri kutama kupangidza rureremedzo, asi Djesu aazi kusiya kuti tsika ii isikatsamiri mu Bhaibheri imuitise kuti asakudze zina ra Baba ake. Zuwa rimweni, Djesu akaporesa mwanarume umweni wainga ano madhimoni waigara ku muthana we Agerasa. Anhu akathya maningi Djesu zvekuti awona akadeketera kuti abude mu mutanha uwona. (Mark. 5:16, 17) Kunyazi zvakadaro, Djesu aida kuti anhu e mutanha uwona aziye zina ra Mwari. Hino Djesu akabvunza mwanarume uya waiinga aporesa kuti  andiyepi Djesu ainga amuitira izvona, asi Djehovha ndiye ainga amuitira. (Erengai Marko 5:19.) a Djesu ainga ecida kuti zina ra Baba ake riziikanwe mu nyika yese! (Mat. 24:14; 28:19, 20) Patinoita zviro izvona, tinosiya Mambo wedu Djesu Kristu akapfara.

11. Djesu akafundisa ateeri ake kunamata ngezvei uye ngei izvona zvecikosha? (Ezekiyeri 36:23)

¹¹ Djesu aizviziya kuti cinangwa ca Djehovha cainga ciri cekucenesa zina Rake uye kureketa cokwadi ngezve manyepo ainga arekethwa nge zvake. Ndiyo ndaa iyena akafundisa ateeri ake kuti anamate eciti: “Baba edu muri kudenga, zina renyu ngariceneswe.” (Mat. 6:9) Djesu aizviziya kuti ii yainga iri nyaya yaibatanidza zvisikwa zvese. (Erengai Ezekiyeri 36:23.) Apana cisikwa cipi haco ciri kudenga no pa nyika cakaita zvakawanda kuti cicenese zina ra Djehovha hinga zvakaizwa na Djesu. Asi Djesu paakasungwa, azondi ake akamupumha kuti ainga asikareremedzi Baba ake kunyazi padoko. Zviri pamhene kuti Djesu aizviziya kuti kushaisha kuseenzesa kana kutuka zina cena ra Baba ake cainga ciri citema cakakura cingaizwa no munhu. Kupumhwa uye kutongwa nge ndaa ye nyaya ii zvakamurhwadza maningi. Pamweni izvi ndizvona zvakaita kuti Djesu “atsukware maningi” pa nguwa yaainga asati asungwa.—Ruka 22:41-44.

12. Djesu akacenesa kudini zina ra Baba ake nge mushobo wese waaikwanisa?

¹² Kuti acenese zina ra Baba ake, Djesu akatambudzwa, akatukwa uye akapumhwa manyepo. Iyena aiziya kuti ainga ateerera Baba ake mu zviro zvese. Uye wainga asina cokupsveruka naco. (Aheb. 12:2) Djesu aiziyawo kuti Sathani wainga ecimurhwisa zvakananga mu nguwa idzona dzinoshupha. (Ruka 22:2-4; 23:33, 34) Sathani waida kuita zviri zvese kuti Djesu asarumbwe akatendeka; asi Sathani aazi kuzvikwanisa! Djesu akapangidza kuti Sathani ndi munyepi wakashata uye kuti Djehovha ano aseenzi akatendeka uye anorumbwa akagondeka kaari kunyazi ecibatana no miedzo inoshupha!

13. Imwimwi mungaita kudini kuti mupfadze Mambo wenyu Djesu?

¹³ Imwimwi munoda kusiya Mambo wenyu Djesu akapfara here? Rumbwai mecikudza  zina ra Djehovha ngekubetsera amweni kufundira zvakawanda ngezve mawara anoshamisa a Mwari. Pamunoita izvona munonga mecitsika no makatsikwa na Djesu. (1 Ped. 2:21) Kuita hingana Djesu, imwimwi murikuita kuti Djehovha apfare uye murikupangidza kuti muzondi Wake Sathani ndi munyepi unothyisa!

PATINOKUDZA ZINA RA DJEHOVHA, ISUSU TINOBETSERA PAKUPONESA UPENYU WE ANHU

14-15. Zviro zvipi zvakanakisisa zvingaitika kana tikafundisa amweni ngezva Djehovha?

¹⁴ Isusu tinobetsera pakuponesa upenyu we anhu patinokudza zina ra Djehovha. Tinozviita kudini? Sathani “wakafunga marangariro e asikatendi.” (2 Ako. 4:4) Awona anotendera manyepo a Sathani akaita hingana aya: Mwari akuna, Mwari ari kure na isusu uye iyena aana basa no anhu, Mwari akashata uye anotambudza ashaishi nokusikaperi. Sathani unobhuya manyepo ese aya ngekuti unoda kusvipisa zina ra Djehovha uye kuita kuti anhu asakhwedere dhuze naye. Patinoparidzira tinonga tisikatenderi kuti iyena aite izvona. Isusu tinofundisa anhu cokwadi ngezva Baba edu ngekukudza zina cena ra Mwari wedu. Uye mugumisiro wakhona ngaupi?

¹⁵ Zvokwadi zviri mu Soko ra Mwari zvino simba maningi. Patinofundisa anhu ngezva Djehovha uye ngezve kuti iyena akadini, isusu tinoona zviro zvinoshamisa. Djira rakaseenzeswa na Sathani pakufukidza madziso e anhu rinombwera uye awona anotanga kuona mawara anoshamisa a Baba edu. Awona anoshamiswa no simba ra Djehovha risina mugumo. (Isa. 40:26) Awona anofundira kumugonda nge ndaa ye unatsi wake wakakwana. (Dhe. 32:4) Awona anofunda zvakawanda nge ndaa ye uzii wake wakakura. (Isa. 55:9; Aro. 11:33) Uye awona anonyaradzwa paanofundira kuti Djehovha i rudo. (1 Juau 4:8) Paanorumbwa ecikhwedera dhuze na Djehovha, kariro yawo yekurarama nokusikaperi inogara ye zvirokwazvo. I makomborero akanakisisa atinawo e kubetsera anhu kuti akhwedere dhuze na Baba edu! Patinoita izvona, Djehovha anotiona hinga aseenzi “anoseenza pamwepo naye.”—1 Ako. 3:5, 9.

16. Anhu angazwa kudini paanofunda ngezve soko ra Mwari? Pasai muezaniso.

 ¹⁶ Pamweni ciro cekutanga catinofundisa anhu ngecekuti zina ra Mwari ndi Djehovha. Izvona zvingatobata-bata maningi munhu uno mwoyo unoda. Ngo muezaniso, musikana umweni unozwi Aaliyah b wakarerhwa mu gereja risipi re Cikristu. Iyena wainga asikagutsikani no gereja rake uye wainga asikazwi ari dhuze na Mwari. Izvona zvakacinja iyena paakatanga kufunda Bhaibheri no Apupuri a Djehovha. Iyena wakatanga kuona Djehovha hingana Shamwari yake. Uye wakashamisika maningi paakafundira kuti zina ra Mwari rainga rakaduswa mu ma Bhaibheri rotsiiwa no zina rekureremedza rakaita hingana Tenzi. Kufundira zina ra Djehovha kakacinja upenyu wake. Iyena unoti: “Shamwari yangu ye padhuze ino zina!” Mugumusiro wakhona ngaupi? Iyena unoti: “Parizvino, inini ndino runyararo mu mwoyo. Ndinoona hingana kuti cikomborero cakakura maningi kandiri.” Mwanarume umweni unozwi Steve wainga ari muembi, wakarerhwa mu citendero ce Cidjudha nge mushobo unoshupha maningi. Iyena wainga asikadizve kugara dii re citendero cakarongeka ngekuti wainga akaona zviro zvakashata maningi. Asi, mumasure mekuti mai ake afa iyena wakatenda kufunda Bhaibheri no Apupuri a Djehovha. Paakafunda zina ra Djehovha zvakamubata-bata maningi. Iyena unoti: “Inini ndainga ndisati ndakambofunda ngezve zina ra Mwari. Uye kekutanga ndakaona kuti Mwari ariyo zvezvirokwazvo! Parizvino ndaakumuona hingana Munhu kamare. Panguwa iyona ndakazwisisa kuti ndainga ndagumira Shamwari ye zvirokwazvo.”

17. Ngei munoda kurumbwa mecikudza zina ra Djehovha? (Onaiwo foto.)

¹⁷ Mu basa renyu rekuparidzira, imwimwi munosofundisa anhu ngezve zina cena ra Djehovha here? Munosoabetsera kuti aone mawara anoshamisa a Mwari wedu here? Pamunoita izvona, imwimwi munonga mecikudza zina ra Mwari. Rumbwai mecikudza zina cena ra Djehovha ngekubetsera anhu kuti aziye Munhu uno zina irona. Ngo mushobo uwona, imwimwi mucaponesa anhu. Imwimwi mucateera matanho a Mambo wedu Djesu Kristu. Uye kupinda zvese, mucapfadza maningi Baba edu ano rudo Djehovha. ‘Rumbwai mecikudza zina ra [Djehovha] nokusikaperi’!—Pis. 145:2.