MU CITATU, 18 ya Janero ya 2023, mu jw.org makaoneka ciziiso cinokosha caibhuya kuti Hama Gage Fleegle uye Jeffrey Winder dzakagadzwa kuti dziseenze hinga nhengo dze Dare Rinotungamirira re Apupuri a Djehovha. Hama mbiri idzi dzaano nguwa yakareba dzeciseenza dzakagondeka mu basa ra Djehovha.

Hama Fleegle akarerhwa kumabirira ke Pensilvânia, ku Estados Unidos nge abereki awo Apupuri a Djehovha. Awona paainga aciri murumbwana, abereki awo akafuruka oenda kucithaundi kaidikanwa aparidzi akawanda. Pasati padarika nguwa yakareba, awona akabhabhatidzwa mu 20 ya Novembro ya 1988.

Abereki a Hama Fleegle airumbwa eciakhohomedzesa kuti apinde mu nguwa yakadzara. Kakawanda kakhona, awona aitambira aonereri no Mabheterita pa nyumba pawo. Hama Fleegle aikwanisa kuona mupfaro wainga uno hama no hanzvadzi idzi. Pasati padarika nguwa yakareba mumasure mekubhabhatidzwa, awona akatanga kuseenza hinga pionero we nguwa dzese—mu 1 ya Setembro ya 1989. Mumasure me makore mairi, awona akakwanisa kudzadzisa cinangwa caainga anaco kubvira paainga ano makore 12—kuseenza pa Bheteri. Awona akatanga kuseenza ku Bheteri re Brooklyn mu Otubro ya 1991.

Ku Bheteri, Hama Fleegle akaseenza pa basa re Kubatanidza mabhuku ke makore 8, uye pedzepo akagadzwa kuti aseenze mu Dhepartamento re Basa. Mu nguwa iyona, awona akaseenza ke makore manganani mu ungano inoreketa mureketero we ci Rússia. Mu 2006 awona akacata na Nadia, iyena wakatenderhwa kuti aseenzewo ku Bheteri. Ari pamwepo awona akaseenza mu nharaunda inoreketa ciPutukezi uye ke makore anodarika 10 akaseenza mu nharaunda inorekethwa Espanhol. Mumasure me makore akawanda eciseenza mu Dhepartamento re Basa, Hama Fleegle akagadzwa kuti aseenze mu Escritoriyo ye Dare Rekufundisa uye pedzepo mu Escritoriyo ye Dare re Basa. Mu Marso ya 2022 awona akagadzwa kuti agare  hinga mubetseri we Dare Rinotungamirira mu Dare re Basa.

Hama Winder akarerhwa Murrieta, Califórnia, ku Estados Unidos da América. Awona akafunda cokwadi no abereki awo uye akabhabhatidzwa mu 29 ya Marso ya 1986. Mu mwedzi wakazoteera awona akaseenza hinga pionero we rubetsero, awona akazvipfarira maningi zvekuti akada kurumbwa eciseenza hinga pionero we rubetsero. Mumasure we mwedzi dzakawanda eciseenza hinga pionero we rubetsero, awona akatanga kuseenza hinga pionero we nguwa dzese mu 1 ya Otubro, ya 1986.

Paainga ari murumbwana, Hama Winder akavhakacira madzikoma awo airi ainga eciseenza ku Bheteri. Pa nguwa iyona kuvhakaca uku kakaita kuti agare no cido cekuda kuseenzera ku Bheteri. Mu Mayo ya 1990, awona akapikwa kuti aseenze ku Bheteri re Wallkill.

Ku Bheteri, Hama Winder akaseenza pa mabasa akawanda akasiyana, kutobatanidza pa basa Rekucenesa, Farma ye Bheteri uye mu Escritoriyo ye Bheteri. Muna 1997, awona akacata no mukadzi wawo Angela uye ari kuseenza ku Bheteri dakara nyamasi. Mu 2014 awona akacinjwa kuti aende koosenzera ku Warwick kaakabetsera pakuwakwa ke sedhe mudhiyari. Mu 2016 awona akacinjwa kuti aende ku Centro Educacional da Torre de Vigia ku Patterson kaakabetsera pa basa re kugravharhwi ke Audhiyo no Mavhidhiyo. Mumasure me makore 4 awona akahwirira ku Warwick, uye Hama Winder akagadzwa kuti aseenze mu Escritoriyo ye Dare Rinocokuita no Anhu. Uye Marso ya 2022 awona akagadzwa hinga mubetseri we Dare Rinotungamirira mu Dare Rinocokuita no Anhu.

Isusu tinonamata kuti Djehovha arumbwe ecitungamirira “zvipo zvo anarume” aya uye kuti awona arumbwe eciseenza no simba pa basa rekutsigira Umambo.—Aef. 4:8.