Pfarai Pamunonga Mecietsera Djehovha no Mwoyo Unononoka Kutsamwa
IMWIMWI muri kuda maningi kuti Djehovha apedze matambudziko ese ari kuitika mu nyika uye kuti aite kuti zviro zvese zvigare zvipsva andizvopi? (Zvak. 21:1-5) Zviri pamhene kuti imwimwi munoda maningi kuona zuwa iri reciguma! Asi, azviripi nyore nguwa dzese kuetsera no mwoyo unononoka kutsamwa dakara Djehovha adzadzisa zvipikirhwa zvake maka-maka paya patinosongana no zvinetso. Patinoetsera maningi ciro cekuti acisati caitika, tingaora mwoyo maningi.—Zvie. 13:12, masoko e pasi.
Kunyazi zvakadaro, Djehovha anoda kuti timuetsere no mwoyo unononoka kutsamwa dakara iyena aita ciito pa nguwa yake yakasisira. Ngei iyena ecietsera izvona katiri? Uye cinyi cingatibetsera kuti tipfare patinonga tecietsera?
NGEI DJEHOVHA ECIDA KUTI TIETSERE?
Bhaibheri rinoti: “Djehovha ari kuetsera no mwoyo unononoka kutsamwa kuti amupangidzirei nyasha, uye acapurumuka kuti amupangidzirei usisi. Ngekuti Djehovha ndi Mwari we unatsi. Anopfara ese aya anomuetsera.” (Isa. 30:18) Masoko aya e muphorofita Isaya akatanga kutarirhwa Adjudha ainga asikazwiri. (Isa. 30:1) Asi pakati pe Adjudha aya painga pano anhu ainga akatendekawo, uye masoko aya aiapasa kariro. Uyewo aseenzi akatendeka a Djehovha nyamasi uno anogara no kariro imweyo paanoerenga masoko a Isaya.
Isusu tinodikana kuetsera no mwoyo unononoka kutsamwa, ngekuti Djehova anoetsera no mwoyo unononoka kutsamwa. Iyena akatogadza zuwa rekutsakatisa nyika ino yakashata, uye ari kuetsera zuwa uye nguwa kuti ikwane. (Mat. 24:36) Pa zuwa irona, zvicagara pamhene kuti kupumha kunoita Sathani kuna Djehovha uye no aseenzi Ake i manyepo. Pedzepo Djehovha acatsakatisa Sathani no ese ari ku dii rake, asi Djehovha “acatizwira usisi.”
Dakara zuwa irona raguma, pamweni Djehovha aabvisi matambudziko edu, asi anotigondesa kuti tingakwanisa kupfara patinonga tecietsera. Hingana zvakarekethwa na Isaya, zvinoita kuti tipfare uye pa nguwa imweyo togara tecietsera kuti ciro cakanaka ciitike. (Isa. 30:18) a Asi izvona zvinobvira kudini? Ngatione zviro zvirongomuna zvicatibetsera.
TINGAPFARA KUDINI PATINONGA TECIETSERA
Kandai ndangariro dzenyu pa zviro zvakanaka. Mambo Dhavhidhi wakaona zviro zvakashata maningi mu upenyu wake. (Pis. 37:35) Kunyazi zvakadaro, iyena wakatara kuti: “Rumbwai makanyarara pamberi pa Djehovha uye muetserei no mupfaro. Musatsukware nge ndaa ye munhu unobudirira pakuita zviro zvakashata zvaanorangarira.” (Pis. 37:7) Dhavhidhi wakateerera zano iri uye wakakanda ndangariro dzake pa kariro ye ruponeso yaakapaswa na Djehovha. Iyena wakatendawo zviro zvese zvakanaka zvaakaizirhwa na Djehovha. (Pis. 40:5) Kana tikaitawo zvimwezvo uye torangarira zviro zvakanaka mu upenyu wedu, pane kukanda ndangariro dzedu pa zviro zvakashata zvicatiitirawo nyore kuetsera Djehovha.
Rumbwai makabatikana pakukudza Djehovha. Mutari we Pisarema 71, pamweni wainga ari Dhavhidhi, wakabvunza Djehovha kuti: “Ndicarumbwa ndakaetsera; ndicatunhudzira kumukudza.” (Pis. 71:14) Dhavhidhi waizokudza kudini Djehovha? Iyena waizoreketa ngezvake ku amweni uye waizoemba ngoma dze rukudzo kaari. (Pis. 71:16, 23) Kuitawo hinga Dhavhidhi, isusu tingarumbwawo tino mupfaro patinonga tecietsera Djehovha. Isusu tinomukudza nge kuita basa re kuparidzira, nge kucedzesana kedu ke zuwa no zuwa, uye nge kuemba ngoma dzedu dzerukudzo. Hino pamucazoembazve ngoma dzedu zvakadini kunyasa kuteya nzee zvinobhuiwa pa ngomeyo uye morangarira kuti iyona ingapfadza kudini mwoyo wenyu?
Bambiswai nge hama no hanzvadzi dzenyu. Dhavhidhi paakasongana no zvinetso, iyena wakabvunza Djehovha kuti: “Pamberi pe anhu enyu akagondeka, inini ndicaetsera zina renyu.” (Pis. 52:9) Isusu tingakwanisa kubambiswa no hama no hanzvadzi dzedu, haiwa basi ku misangano kana kuti mu basa re kuparidzira, asiwo patinopedza nguwa tinadzo.—Aro. 1:11, 12.
Bambisai kariro yenyu. Pisarema 62:5 inoti: “Ndinoetsera Mwari ndakanyarara ngekuti kariro yangu inobva kaari.” Zvinokosha maningi kubambisa kariro yedu maka-maka paya patinonga tecietsera mugumo ke nguwa yakareba—tinodikana kugara no rugondo rekuti zvipikirhwa zva Djehovha zvicadzadzika, azvinei nokuti tinodikana kuzvietsera ke nguwa yakareba kudini. Isusu tingabambisa kariro yedu nge kufunda Soko ra Mwari—uphorofiti, kuona kuti matii amweni e Bhaibheri anopindirana kudini no amweni, uye zvakapanganidzwa na Djehovha ngezve unhu wake. (Pis. 1:2, 3) Isusu tinodikanawo kurumbwa “tecinamata no mwiya mucena” kuti tibambise ushamwari wedu na Djehovha patinonga tecietsera kudzadzika ke cipikirhwa ce upenyu usikaperi.—Djud. 20, 21.
Kuita hinga Mambo Dhavhidhi, garai no rugondo rekuti Djehovha anocengeta, anodziirira uye anopangidza rudo Rake rakagondeka ku ese aya noetsera Kaari. (Pis. 33:18, 22) Hino rumbwai mecietsera Djehovha no mwoyo unononoka kutsamwa, mecikanda ndangariro dzenyu pa zviro zvakanaka mu upenyu wenyu, mecimukudza, mecibambiswa nge hama no hanzvadzi dzenyu, uye mecibambisa kariro yenyu inoshamisa.
a Soko rekuti “kugara mecietsera” pa mureketero we kutanga ringareyawo kuti “kuda maningi kuti ciro ciitike,” zvecipangidza kuti azvizi kushata kuda maningi kuti Djehovha apedze matambudziko edu ese.
