MUSORO WE KUFUNDA 7
NGOMA 51 Takadzipira Kuna Djehovha!
Zvatinofunda Kubva ku Anaziri
“Iyena mucena kuna Djehovha ke mazuwa ake ese e Unaziri.”—NUM. 6:8.
CINANGWA
Muezaniso we Anaziri unotifundisa kudini kuti tigare anhu ano ushingi uye akagadzirira pakudzipira kuna Djehovha.
1. Anamati a Djehovha e kare akaitei?
IMWIMWI munokoshesa ushamwari wenyu na Djehovha here? Zvezvirokwazvo honde! Imwimwi andimwipi mwega. Kubvira mu nguwa ye kare, anhu akawanda ainga ano mazwiro akaezana no enyu. (Pis. 104:33, 34) Anhu akawanda akadzipira kuti anamate Djehovha. Ndizvona zvakaizwawo no Anaziri ku Israeri yo kare. Awona ainga ambori ani, uye tinofundei no muezaniso wawo?
2. (a) Anaziri ainga ari ani? (Numero 6:1, 2) (b) Ngei Aisraeri anganani akasanangura kuita mhiko ye kugara Anaziri?
2 Soko rekuti “Munaziri” rinobva pa Soko re Cihebheru recida kureya “Kusanangurhwa,” “Kuparadzana,” kana kuti “Kudzipira.” Anaziri ainga ari Aisraeri aishingaira maka-maka pakudzipira kunamata Djehovha nge mushobo wakanaka. Mutemo wa Mozesi waitendera kuti mwanarume kana kuti mwanakadzi aite mhiko inokosha kuna Djehovha ecisanangura kugara Munaziri ke kanguwa. a (Erengai Numero 6:1, 2.) Muisraeri paaiita mhiko iyona ye kugara Munaziri, iyena waidikana kutondowedza zviro zvimweni zvainga zvisikadikani kuizwa no Aisraeri amweni. Asi ngei Muisraeri waidikana kuita cisananguro ce kugara Munaziri? Pamweni nge ndaa ye rudo rake kuna Djehovha uye kutenda kake no mwoyo wake wese nge makomborero aaipaswa Naye.—Dhe. 6:5; 16:17.
3. Anhu a Mwari mazuwa ano anopangidza kudini muitiro umwewo we Anaziri?
3 “Mutemo wa Kristu” pawakatsiya Mutemo wa Mozesi, anhu a Mwari ainga asikadikanizve kugara Anaziri. (Aga. 6:2; Aro. 10:4) Kuita hingana Anaziri, nyamasi uno anhu a Djehovha anorumbwa ecipangidza cido cakabamba cekumuseenzera no mwoyo wawo wese, no upenyu wawo wese, no ndangariro dzawo dzese uye no simba rawo rese. (Mark. 12:30) Patinodzipira upenyu wedu kuna Djehovha isusu tinoita mhiko kaari no mwoyo wese. Patinorarama maererano no mhiko ii, isusu tinodikana kuita kuda ka Djehovha uye kudzipira kaari kuti timuseenzere. Isusu ticaona kuti Anaziri akadzadzisa kudini mhiko yawo uye kuti muezaniso wawo unotibetsera kudini kuti tidzadzise mhiko yedu yekudzipira kuna Djehovha. b (Mat. 16:24) Ngatione miezaniso minganani.
DZIPIREI
4. Maererano na Numero 6:3, 4, Anaziri ainga akadzipira kuti aitei?
4 Erengai Numero 6:3, 4. Anaziri ainga asikadikani kumwa doro kana kurhya zviro zvakaita hingana uvha kana kuti uvha dzakaoma. Aisraeri amweni aikwanisa kumwa doro kana kurhya zviro zvaiizwa no mu uvha, sezvo zvainga zvisikazi kushata kurhya zviro izvona. Bhaibheri rinoti “vhinyu inoita kuti mwoyo we munhu upfare” uye i cipo ca Mwari. (Pis. 104:14, 15) Kunyazi zvakadaro, Anaziri ainga akagadzirira kusiya zviro izvi. c
Imwimwi makagadzirira kudzipira hingana zvakaizwa no Anaziri here? (Onai mandima 4-6)
5. Madián uye Marcela akasanangura kuitei, uye ngei?
5 Kuita hinga Anaziri, isusuwo tinodzipira kuti tiitire Djehovha zvakawanda. Onai muezaniso wa Madián na Marcela. dKazado ii yainga ino upenyu wakanaka. Madián wainga ano basa rakanaka uye awona aigara mu nyumba yakanaka maningi. Asi awona aida kuita zvakawanda mu basa ra Djehovha. Kuti adzadzise cinangwa ici, awona akasanangura kuita cinjo dzinganani. Awona anopanganidza eciti: “Takatanga kuthurudza mushobo wataiseenzesa mare. Isusu takafuruka kuenda ku nyumba doko uye takatengesa karu yedu.” Madián na Marcela ainga asikadikani kudzipira uku—awona akaita izvona ngekuti aida kuita zvakawanda mu basa ra Djehovha. Awona akapfara maningi ngo zvisananguro izvi zvaakaita.
6. Ngei isusu tecidzipira? (Onaiwo mufanikiso.)
6 Nyamasi uno, aseenzi a Djehovha anopfara maningi nge kudzipira kuti aone nguwa yakawanda ye kumuseenzera. (1 Ako. 9:3-6) Djehovha aatibambidziri kuti tidzipire uye zviro zvimweni zvakasanangurhwa kusiiwa no hama dzimweni azvizi kushata. Ngo muezaniso, amweni anosanangura kusiya basa raanoda maningi, nyumba, kana kuti cinyama caanopfarira. Akawanda akasanangura kurumbwa asikazi kuwaka kana kuwakwa ke cinguwa uye kugara asina ana ke cinguwa mumasure me kucata. Amweni akasanangura kuenda koseenza kunodiwa aparidzi akawanda, kunyazi izvona zvecireya kugara kure no mhuri uye shamwari dzawo. Akawanda edu tinodzipira ngekuti tinoda kupasa Djehovha zvakanakisisa zvedu. Garai no rugondo rekuti Djehovha anokoshesa maningi kudzipira kedu kuti timuseenzere, kunyazi teciita zvakawanda kana zvidoko.—Aheb. 6:10.
GARAI MAKAGADZIRIRA KUGARA MUNHU WAKASIYANA NO ANHU AMWENI
7. Ngei pamweni zvaishupha ku Munaziri kudzadzisa mhiko yake? (Numero 6:5) (Onaiwo mufanikiso.)
7 Erengai Numero 6:5. Anaziri ainga asikadikani kucinga tsitsi rawo. Uu wainga uri mushobo we kupangidza kudzikanda pasi pa Djehovha. Kana Muisraeri wainga ari Munaziri ke nguwa yakaremba, tsitsi rake raizokura maningi uye zvaizoita nyore kuti amweni azvione. Kudai anhu amweni aireremedza Munaziri uye omubambisa kuti arumbwe ano mhiko yake, zvaizogara nyore kaari kuti agare munhu wakasiyana no amweni. Asi zvinotsukwarisa kuti pano nguwa yekuti ku Israeri, Anaziri ainga asikareremedzwi uye ainga asikatotsigirhwi no Aisraeri amweni. Pa nguwa ye muphorofita Amosi, Aisraeri akapauka pakunamata “aipasa vhinyu Anaziri,” pamweni eciedza kuita kuti awona asatondowedze mutemo we kusama kumwa vhinyu. (Amo. 2:12) Anaziri aidikana kushinga kuti akwanise kudzadzisa mhiko yawo uye kugara anhu akasiyana no amweni.
Munaziri wainga akagondeka ku mhiko yake, wainga akagadzirira kugara akasiyana no amweni (Onai ndima 7)
8. Esperiyensiya ya Benjamin yamubambisai kudini?
8 No rubetso ra Djehovha, isusuwo tingagara no ushingi uye kugara anhu akasiyana no amweni kunyazi tiri anhu akanyararisa. Onai muezaniso wa Benjamin uno makore 10 uye unogara ku Noruega. Nge ndaa ye hondo ku Ucrânia, ku cikora kake kakaitika ciitiko ce kupangidza kutsigira anhu e ku Ucrânia. Afundi e kucikora kake akaemba ngoma uye akapfeka macira ano kori yo bhandera re Ucrânia. Kuti asabatanidzwe pa ciitiko ici Benjamin wakagara kure no kaaizwa ciitiko ici. Asi mufundisi umweni wakamuona uye wakamudainza eciti: “Uya kuno, isusu tiri kukuetsera!” Benjamin wakakhwedera kuno mufundisi uye no ushingi wakati: “Inini andina dii randinotsigira uye andibatanidzwi pa zviitiko izvi zvinocokuita no matongerhwe e nyika. Zvezvirokwazvo Apupuri a Djehovha akawanda ari mu kadheya nge ye kuramba kuenda ku hondo.” Mufundisi wakatendera panganidzo ii uye wakamubvunza kuti wainga asikadikani hake kubatanidzwa pa ciitiko ici. Asi adoni e kucikora a Benjamin akatanga kumubvunzisa kuti ngei iyena wainga asikabatanidzwi paciitiko ici. Benjamin wakathya maningi zvekuti wakada kuguma pakucema, kunyazi zvakadaro iyena wakaphindazve zvese zvaainga abvunza mufundi ku ese. Mumasure mazvo, Benjamin wakabvunza abereki ake kuti wakazwa kuti Djehovha ainga amubetsera kuti adziirire kutenda kake.
9. Tingapfadza kudini mwoyo wa Djehovha?
9 Anhu anoona kuti isusu takasiyana no anhu amweni, ngokuti isusu tinozwira Djehovha. Isusu tinoda ushingi kuti tibvunze anhu amweni ku basa uye kucikora kuti tiri Apupuri a Djehovha. Pa nguwa yekuti mugariro we zviro we nyika ino uri kubambirira kushata, zvinoshupha maningi kurarama maererano no zvokwadi zvisikacinji zve Bhaibheri uye kureketa no amweni ngezve masoko akanaka. (2 Ti. 1:8; 3:13) Edzurirai nguwa dzese kuti “mwoyo wa [Djehovha] unopfara” paya patinopangidza ushingi kuti tisiyane no anhu aya asikamuseenzeri.—Zvie. 27:11; Mara. 3:18.
ITAI KUTI DJEHOVHA AGARE PA MBUTO YEKUTANGA MU UPENYU WENYU
10. Ngei zvaishupha kuti Anaziri ateerere mutemo uri pana Numero 6:6, 7?
10 Erengai Numero 6:6, 7. Anaziri ainga asikadikani kugara dhuze no munhu wakafa. Pamweni tingarangarira kuti kuita izvona cainga ciri ciro cisikashuphi, asi cainga ciri cinetso maka-maka paaifirhwa no munhu we dhuze kana uya waaida maningi. Asi pa nguwa iyona, munhu paaifa zvainga zvakadjairika kuti anhu agare dhuze no mutumbi wake. (Juau 19:39, 40; Zvii. 9:36-40) Asi Munaziri wainga asikadikani kuita izvona. Kunyazi paaibatana no mugariro iwona we kufirhwa unoshupha, Munaziri warumbwa ecidzadzisa mhiko yake. Izvona zvaipangidza kuti iyena wainga ano kutenda kakabamba. Zvezvirokwazvo Djehovha aipasa Anaziri simba kuti akwanise kushingirira mugariro iwona unoshupha.
11. Isusu tinoda kuitei patinoita zvisananguro zvinocokuita no mhuri? (Onaiwo mufanikiso.)
11 Isusu tinokoshesa maningi kudzipira kedu kuna Djehovha. Izvona zvinobata-bata zvisananguro zvedu pa nyaya inocokuita no mhuri. Isusu tinopeta masimba kuti tiite zviya zvinodiwa no mhuri yedu, asi atikandi zvido zvawo pa mbuto ye kutanga kudarika kuita kuda ka Djehovha. (Mat. 10:35-37; 1 Ti. 5:8) Pamweni paya, isusu tinodikana kuita zvisananguro zvekuti anyaukama edu aazvipfariri asi zvinopfadza Djehovha.
Imwimwi makagadzirira kukanda kuda ka Djehovha pa mbuto ye kutanga kunyazi pa migariro inoshupha here? (Onai ndima 11) e
12. Paaibatana no cinetso mu mhuri, Alexandru wakaitei uye cinyi caasikazi kuita?
12 Onai muezaniso wa Alexandru no mukadzi wake Dorina. Awona akatanga kufunda Bhaibheri uye mumasure me gore rimwe, Dorina wakasanangura kuima uye iyena waida kuti Alexandru aimewo. Akaterama uye no ruremedzo, iyena wakamubvunza kuti aazoimi kufunda. Dorina aazi kuzvipfarira uye wakaedza kuita kuti iyena aime kufunda. Alexandru wakabhuya kuti iyena waiedza kuzwisisa kuti ngei iyena uri kuita izvona, asi zvainga zvisiripi nyore kaari. Pamweni paya, Dorina paaishora Alexandru uye waireketa asikapangidzi rureremedzo, iyena waitogara no cido cekuda kusiya kufunda Bhaibheri. Kunyazi zvakadaro, Alexandru wakarumbwa ecikanda Djehovha pa mbuto yekutanga, pa nguwa imweyo wakarumbwawo ecipangidza rudo uye rureremedzo ku mukadzi wake. Nge ndaa ye muezaniso wakanaka wa Alexandru, Dorina wakasangura kuhwirira kufunda Bhaibheri uye mumasure mazvo wakabhabhatidzwa.—Onai mu jw.org vhidhiyo yakazwi: Alexandru na Dorina Văcar: “Rudo Rinononoka Kutsamwa uye Rino Unaki” pa mundandanda wakazwi: “Chokwadi Chinoshandura Upenyu.”
13. Isusu tingapangidza kudini rudo kuna Djehovha uye ku mhuri yedu?
13 Djehovha ndiye akasika mhuri uye iyena anoda kuti mhuri ipfare. (Aef. 3:14, 15) Kana isusu tecida kupfara zvezvirokwazvo, tinodikana kuita zviro nge mushobo unodiwa na Djehovha. Garai no rugondo rekuti Djehovha anopfara maningi nge kupeta masimba kamunoita kuti mumuseenzere uye pamunoriritira mhuri yenyu nge kuibata no rudo uye no rureremedzo.—Aro. 12:10.
KOHOMEDZESAI AMWENI KUTI ATEEDZERE ANAZIRI
14. Ndiani maka-maka atinodikana kubambisa no masoko edu?
14 Ese aya anosanangura kuseenzera Djehovha nyamasi uno, anodikana kugara akagadzirira kudzipira nge ndaa ye rudo rawo kaari. Pamweni paya, kuita izvona azviripi nyore. Hino isusu tingabetsera kudini amweni kuti adzipire kuna Djehovha? Tingaita izvona nge kuabambisa nge masoko edu. (Djobo 16:5) Kodi hama dzinganani dze mu ungano menyu dziri kuedza kusama kugara no zviro zvakawanda mu upenyu wawo, kuti dziite zvakawanda kuna Djehovha here? Imwimwi munoziya madjaha ari kupangidza ushingi kuti agare akasiyana no amweni ku cikora, kunyazi izvona zveciashuphira here? Munokwanisa kurangarira hama dzinganani kana afundi e Bhaibheri ari kurhwisa kuti arumbwe akagondeka kuna Djehovha kunyazi no kuphikiswa mu mhuri? Garai makagadzirira kuita zvese zvamunokwanisa kuti mubambise anhu aya uye kuabvunza kuti munoshamiswa kudini nge ndaa ye ushingi waanopangidza uye nge zvese zvaanoitira Djehovha.—Firi. 4, 5, 7.
15. Amweni anobetsera kudini aya ari mu nguwa yakadzara?
15 Pamweni paya isusu tingabetsera hama dzedu dziri kuseenza hinga mapiyonero e nguwa dzese. (Zvie. 19:17; Aheb. 13:16) Ndizvona kamare zvakaizwa no hanzvadzi imweni yacembera inogara ku Sri Lanka. Payakatunhudzirhwa mare yayo ye phenjeni, iyona yakabetsera hanzvadzi mbiri dzainga dziri mapiyonero dzainga dzino cinetso cekukonerhwa mare, akadzibetsera kuti dzirumbwe dzino basa re upiyonero. Iyona yakasanangura kuripa mare ye thurufunu mu mwedzi wese. Uu muitiro wakanaka wakapangidzwa no hanzvadzi ii!
16. Isusu tinofundei no Anaziri?
16 Zvezvirokwazvo isusu tinofunda zvakawanda no muezaniso we Anaziri! Asi, mhiko ye Anaziri inotifundisawo ciro ngezva Baba edu Djehovha. Iyena anozviziya kuti isusu tinoda kumupfadza uye kuti isusu takagadzirira kudzipira kuti tidzadzise mhiko yedu kaari. Iyena anotikudza nge kutipasa mukana we kusanangura kupangidza rudo redu kaari. (Zvie. 23:15, 16; Mark. 10:28-30; 1 Juau 4:19) Mhiko ye Anaziri inopangidza kuti Djehovha anoona kudzipira kedu uye anotida nge ndaa ye zviro zvese zvatinoita kaari. Ngatiite zvese zvatinokwanisa kuti tirumbwe teciseenzera Djehovha uye nguwa dzese tigare takagadzirira kuti tipase zvakanakisisa zvedu kaari.
MUNODAIRA KUDINI?
-
Anaziri ainga ano ushingi uye ainga akagadzirira kudzipira nge mushobo upi?
-
Isusu tingakohomedzesa kudini amweni kuti ateedzere Anaziri uye adzipire kuna Djehovha?
-
Mhiko ye Anaziri inotifundisei ngezva Baba edu Djehovha?
NGOMA 124 Rumbwa Wakatendeka
a Kunyazi Anaziri amweni ainga akasanangurhwa na Djehovha, Aisraeri akawanda ainga ari Anaziri nge cisananguro cawo kamare.—Onai bhokisi rakazwi: “ Anaziri Akasanangurhwa na Djehovha.”
b Pamweni paya, mabhuku edu anoezanisa Anaziri no aya ari kuseenzera Djehovha mu nguwa yakadzara. Asi mu fundo ino, isusu ticakanda ndangariro dzedu pakuti tese isusu takadzipira kuna Djehovha tingateedzera kudini Anaziri.
c Zvinoita hinga kuti Munaziri wainga asina zviro zvaaibambidzirhwa kuti aite zvakaita hinga basa rainga rino cokuita no mhiko yake.
d Onai mu jw.org fundo inoti: “Takasarudza Kurarama Upenyu Husina Twakawanda-wanda” pa mundandanda we mafundo anoti: “Zvakaitika kuZvapupu zvaJehovha.”
e KUPANGANIDZWA KE MIFANIKISO PA: Ari padenga pe nyumba, Munaziri eciona hama yake yaanoda yecienda kookotswa. Nge ndaa ye mhiko yake kuna Djehovha, iyena aadikani kuoneka ari pa rufu.
