HAMA no hanzvadzi dzainga dzaenda ku nyika dzakapfuma maningi, dzakasanangura kuhwirira ku nyika dzawo. Kuda kaanoita Djehovha no mudoni wawo, zvakaita kuti aende ku mbuto dzinodiwa aparidzi akawanda e Umambo. (Mt. 22:37-39) Zvibairo zvipi zvaakaita, uye makomborero api aakatambira? Kuti tizvione, ngationei miezaniso ye hama dzimweni dze ku Camarões kumabirira ke África.

Mu gore ra 1998 hama imweni inozwi Onésime yakabva ku nyika yayo Camarões, uye yakaenda koraramira kunze ke nyika yayo ke makore 14. Zuwa rimweni pa misangano, iyona yakazwa miezaniso yaireketa nge zve basa rekuparidzira. Muiti we mharidzo wakati, “abati airi e howe, arikuedza ku mbuto dzakasiana. Umwe wawo urikubata howe dzakwanda kupinda umweni wake. Azvirinanipi kuenda kooedza kuno mudoni wake urikubata howe dzakawanda here?”

Ngo muezaniso uu, wakaita kuti Onésime arangarire kuhwirira ku Camarões, ngekuti ikona basa rekuedza anhu raizobudirira. Asi zvakamunesera nge kurangarira kuti, waizokwanisa kudjaira zvaainga asiya kare ku nyika yake yaakabarirhwa. Kuti azvione, Onésime wakasanangura kugara ku Camarões ke mwedzi mitanhatu. Hino mu gore ra 2012, iyena wakahwirira zvacose.

Onésime unoti: “Ndaidikana kudjairazve kupisa kunoita kunza uye ne upenyu we mu nyika yangu. Pa Nyumba ye Umambo ndaidikana ku garazve mu mabhanku anorhwadza.” Asi iyena unoreketa eciseka, “pandaikanda ndangariro dzangu pa misangano, zvaiita kuti ndikanganwe makadera akanaka andakasiya sure.”

Mu gore ra 2013, Onésime wakacata na Géraldine, iyena wakahwirira ku Camarões mu masure mekugara ku França ke makore mapfembamwe. Casado ii yakatambira makomborero api? Onésime unoti: “Takagara no cikombrero cekupinda pa Cikora ce Aziisi e Umambo uye cekuseenza pa Bheteri. Mu gore rakapera, afundi edu anokwana kuita 20 akabhabhatidzwa. Zvino ndiri kuona kuti ndiri pa mbuto yakanaka ye ‘kuedza.’” (Mk. 1:17, 18) Géraldine unoreketawo kuti: “Ndakatambira makomborero akawanda andisikakwanisi kurangarira.”

Judith wainga aenda koogara ku Estados Unidos, asi waida kuita zvakawanda mu basa rekuparidzira. Iyena unoti: “Pese pendaiiyenda kovhakacira hama dzangu ku Camarões, ndaibveyo ndecicema. Zvainesa maningi kusiya sure fundo dzangu dze Bhaibheri dzendainga ndatangisa.” Kunyazi zvakadaro, Judith wainga asikagondi kuti waizohwiriradi ku Camarões. Ecigonda Djehovha iyena wakasanangura kuhwirira. Iyena unobhuya pamhene kuti zvakarhwadza kusiya  zvese zvaainga anazvo ku Estados Unidos. Iyena wakakumbira rubetso ra Djehovha kuti akwanise kudjairazve upenyu upsva. Uye wakabambiswa ne muonereri we nharaunda ne mukadzi wake.

Judith unoti, “Mu makore matatu, ndakapfara nge kubetsera anhu arongomuna kuti agare afundi.” Judith wakaseenza hingana pioneira kamare. Nyamasi uno iyena no mwamuna wake, Sam-Castel, ari kuseenza hingana muonereri we nharaunda. Asi nga zvipi zvakaitika na baba a Judith? Iyena no mhuri yake akakwanisa kuona cipitari ku nyika ye kunze, caida kutsigira kuoperari baba ake. Operasao yaakaitwa yakabudirira.

Hama imweni inozwi Victor yainga yathutha koogara ku Canadá. Masure mekuerenga fundo imweni ye Murindiri nge zve cikora ce pamusorosoro, iyona yakatanga kurangarira nge zve kufunda kaaiita. Iyona yakasanangura kusiya curso yaaiita ku faculdade uye yakatanga kufundira basa raizomuriritira. Iyona inoti “Izvi zvakandibetsera kuona basa no kukasika” uye, “kuita zvandaida kuita—kuseenza hingana pioneiro.” Nge kuhamba nge nguwa, Victor wakacata na Caroline, uye akaenda kovhakacira ku Camarões. Paakaenda kovhakacira Betheri, aona akakohomedzeswa kurangarira nge zve kuseenzera ku Camarões. Victor unoti: “Tainga tisina cikonzero cekuramba uye ngekuti upenyu wedu wainga usina zvakawanda, takatendera mupiko uu.” Kunyazi Caroline ecineseka nge uthongo wake, kazado ii yakasangura kuita zvaada kuita.

Kuwanda kakaita anhu kakaita kuti Victor na Caroline aseenze hingana mapionero e nguwa dzese. Pakutanga awona akakwanisa kudziriritira ne mare yawo pacawo. Asi kuti arumbwe eciseenza hingana mapioneiro ku Camarões, iwona akahwirira ku Canadá uye akaseenzereyo mwedzi minganana. Akatambira makomborero api? Aona akapinda Cikora ce Aziisi e Umambo, aseenza hingana mapioneiro kamare uye zvino arikuseenza basa rekuwaka. Victor unoti, “Kusiya mbuto yedu yatakadjaira zvakaita kuti tizwe rubetso ra Djehovha.”

Mu gore ra 2002, Alain, waifunda cikora cepamusorosoro ku Alemanha, iyena wakaerenga tratadho rinoti Vechiduku—Muchaitei Noupenyu Hwenyu? Taratadho iri rakamubetsera kugara no zvinangwa zvimweni. Mu gore ra 2006, iyena wakapinda Cikora ce Kufundisa Aseenzi uye wakatumwa kuenda koseenzera ku Camarões, nyika yaakabarihwa.

Ku Camarões, Alain wakagumira basa raimupasa nguwa. Ngokuhamba ke nguwa iyena wakaona basa rimweni rakanaka kupinda rokare. Asi iyena waityira kuti basa rake raizomukanganisa pa basa rake rekuparidzira. Ndiyo ndaa, paakapikwa kuti aseenze hingana pionero special, iyena wakabva atotendera. Patrau ake akatogondesa kutunhudzira mare yaaitambira. Asi iyena wakaramba. Ne kuhamba ke nguwa, Alain wakacata na Stéphanie wainga ararama ku França ke makore akawanda. Wakasongana ne zvineso zvipi paakacinja kuenda ku Camarões?

Stéphanie unoti: “ndakasongana no cineso ce uthongo uye ce ku jiririka mwiri, asi ndakakwanisa ku rapwa uye zviri kuita nani.” Djehovha wakakomborera kushingirira ke kazado iyona. Alain unoti: “Patinoparidzira ku mbuto kusina aparidzi akawanda inozwi Katé, tinoona afundi akawanda e Bhaibheri. Ngo ku hamba nge nguwa, taiita fundo idzi teciseenzesa thurufunu. Pa afundi ese  aya, airi akabhabhatidzwa uye kakaumbwa grupu ku mbuto ii.” Stéphanie unoenderera mberi eciti: “Akuna mupfaro mukuro kunze ke kubetsera anhu amweni kuti adzipire kuna Djehovha. Kuseenzera kuno takatambira makomborero akawanda maningi.” Nyamasi, Alain na Stéphanie arikuseenza hingana muonereri we basa re nharaunha.

Gisèle wakabhabhatidzwa paaifunda ku faculdade ye medicina ku Itália. Iyena wakafunda no kazado imweni yainga pioneiro uye Gisèle waishamiswa nge upenyu wainga usina zvakawanda ye kazado ii yakamufundisa Bhaibheri uye iyena wakadawo kuteedzera miezaniso yawo pa kuita zvakawanda mu basa rekuparidzira. Hino, Gisèle wakatanga kuseenza hingana pioneira we nguwa dzese paaipedzesa faculdade yake.

Gisèle waida kuhwirira ku Camarões kuti aite zvakawanda mu basa ra Djehovha, asi pano caimunesa. Iyena unoti, “Ndaidikana kusiya zvese zvandainga nazvo ku Itália, uye kusiya mhuri no shamwari dzangu, dzaigara koneyo.” Kunyazi no zvineso izvi, Gisèle wakahwirira ku Camarões mwedzi wa Mauwe mu gore ra 2016. Nge kuhamba ke nguwa, Gisèle wakacata na Léonce, uye Betheri re ku Camarões rakaabvunza kuti kana zveciita wangatutha kuti aende koogara ku Ayos, thaundi rinodikana aparidzi akawanda.

Upenyu wainga wakaita kudini ku Ayos? Gisèle unoti: “Taigara kusina magetsi ngekuti aidzima-dzima, kunyazi mathurufunu ainga asikaiti kucadja nge kudzima kaiita magetsi. Ndakafundira kubika no hunhi, uye Taidikana koocera mvura kucimbo, asi kaidzara anhu akawanda, ndiyo ndaa, taienda kocera mvura no usiku teciseenzesa bhara rekugadzira tega.” Aona akakwanisana kudini no zvineso izvi? Gisèle unoti: “Mwiya wa Djehovha wakatibetsera kuti tishingirire, Inini no mwamuna wangu tinotsigirana, uye tinobambisana, uye nguwa dzimweni tinobetserwa ngo mare no mhuri yedu uye shamwari dzedu.”

Gisèle uri kupfara here nge kuhwirira ku nyika yaakabarirhwa? “Honde! Pasina mibvunzo,” iyena unoti. “Pakutanga, takasongana no zvineso uye takaora mwoyo. Asi takagonda na Djehovha uye takazwa tiri dhuzi naye. Petakakurira zvinesu izvi, inini na Léonce takazwa hingana kuti takaita izvona kamare zvataidikana kuita.” Léonce na Gisèle akapinda Cikora ce Aziisi e Umambo, uye nyamasi uno arikuseenza hingana mapioneiro kamare e nguwa doko.

Muedzi we howe uno ushingi paanosongana no migariro yakashata kuti abate howe dzakawanda, nge kudaro aya anohwirira ku nyika yawo yaakabarirhwa, anoshinga kusongana no zvineso kuti abetsere aya anoda kuzwa masoko e Umambo. Zve zvirokwazvo Djehovha acaedzurira mabasa e aparidzi aya uye rudo raanopangidzira nge zve zina rake. (Ne. 5:19; Ahe. 6:10) Kana mecigara ku nyika imweni uye kana mukaona kuti nyika yamakabarirhwa kunodiwa aparidzi akawanda, maizokwanisa kuhwirira here? Mukahwirira, Djehovha acamukomborera.—Zvie. 10:22.