1-2. Tingateedzera kudini zano riri pana Zvierengo 4:25? Pasai muezaniso.

RANGARIRAI miezaniso inoteera. Hanzvadzi yecukuru inorangarira mazuwa ayo e kare. Kunyazi upenyu wayo wecishupha, iyona iri kurumbwa yeciita zviri zvese pa kuseenzera Djehovha. (1Ako. 15:58) Mazuwa ese iyona inorangarira iri pamwepo no adiwa ayo mu nyika ipvsa yakagondeswa. Hanzvadzi imweni inorangarira kuti yakarhwadziswa no hanzvadzi, asi iyona inotsunga kuti isacengete bundu. (Ako. 3:13) Hama imweni inonyasa kuziya citema caakaita, asi inokanda ndangariro pa kurumbwa yakagondeka kutanga zvino.—Pis. 51:10.

² Miezaniso mitatu ii yakaezana papi? Ese hawo ari kurangarira zvakaitika kare, asi awona aaripi kurarama mazviri. Pane kuita izvi, aowa ari ku ‘ringisa mberi’ kana kuti ku nguwa ye mberi.—Erengai Zvierengo 4:25.

3. Ngei tecidikana ‘kuringisa mberi’ kana kuti ku nguwa ye mbei?

³ Ngei zvecikosha ‘kuringisa mberi’ kana kuti ku nguwa ye mberi? Kuita hingana munhu asikakoni kuhamba mu mutsara kana eciringisa sure, isusuwo atikwanisi kuita zvinoda Djehovha kana teciringira zvatakaita sure.—Ru. 9:62.

4. Ngazvipi zvaticafunda mu fundo ino?

⁴ Mu fundo ino, ticafunda mirau mitatu ingakwanisa kuita kuti tiwhirire sure. * Yakadai hingana: (1) kutsumba upenyu we kare, (2) bundu, uye (3) kunyanya kudzipasa ndaa. Pa dii rimwe na rimwe, ticaona kuti mazano ari mu Bhaibheri angatibetsera kudini, haiwa pa kuringira “zviro zviri sure,” asi pa kuringira “zviro zviri mberi.”—Afi. 3:13.

5. Ngazvipi zvatisikadikani kuita zvinoreketwa pana Muparidzi 7:10?

⁵ Erengai Muparidzi 7:10. Onai kuti vhersikuro ii aireketi kuti zvakashata kudzibvunzisa kuti: “Ngei mazuwa e kare ainga akanaka?” Kuedzurira kakanaka i cipo cinobva kuna Djehovha. Kusiya izvi, vherisikuro ii inoenderera mberi yeciti: “Musabhuye kuti, ‘Ngei mazuwa e kare ainga arinani kupinda aya?’” Nge masoko amweni, murau uripo ngewe kuezanisa mugariro wedu we kare no we nyamasi uno uye pedzepo toti taakushuphika kupinda kare. MaBhaibheri amweni anoturukira masoko aya eciti: “Musambodzibvunzise kuti, ‘Ah, ngei zviro zvainga zviri nani mu mazuwa e kare?’ Amubvunzopi wakanaka.”

6. Ngei zvakashata kutsumba kuti upenyu wedu we kare wainga uri nani? Pasai muezaniso.

⁶ Ngei zvakashata kutsumba kuti upenyu wedu we kare wainga uri nani kupinda we nyamasi uno? Cisuwo cingaita kuti titsumbe zviro zvakanaka zve upenyu we kare. Kana kuti, zvingaita kuti tisarangarire matambudziko ataisongana nawo. Onai, ngo muezaniso, aIsraeri e kare. Mu masure me kubuda mu Edjipitu, awona akakanganwa no kukasika upenyu wawo waishupa waairarama ikona. Pano kudaro, awona akakanda ndangariro dzawo pe zve kurhya zvakanaka zvaainga anazvo. Awona akati: “Taakurangarira howe dzatairhya ku Edjipitu tisikatengi, ticirhyawo makaka, makhebe, rikisi, macebhora, uye alho!” (Nu. 11:5) Asi i zvirokwazvo here kuti awona ainga “asikaripi” zvekurhya zvaairhya? Haiwa. AIsraeri aizviripa ngo mutengo wakakura; pa nguwa iyona, awona aidzwinyirirhwa uye eciseenza hingana aranda e Edjipitu. (Eki. 1:13, 14; 3:6-9) Asi, awona akakanganwa kushupika kese kaakasongana nako uye akatanga kutsumba upenyu we kare. Awona akasanangura kurangarira “mazuwa akanaka e kare” pane kuti akande ndangariro dzawo pa zviro zvaaiizirhwa ndi Djehovha. Djehovha aazi kupfzrira miitiro yawo.—Nu. 11:10.

7. Zvinyi zvakabetsera hanzvadzi ii kuti isabathwe no murau we kutsumba?

⁷ Tingaitei kuti tibatwe no murau we kurangarira upenyu we kare? Ngationei muezaniso  we hanzvadzi imweni yakatanga kuseenza ku Beteri ye ku Brooklyn mu gore ra 1945. Mu makore manganani, iyona, yakacata no hama imweni yaisenzawo pa Bheteri uye awona akaseenza pamwepo ke makore akawanda. Ngo kudaro, mukati me 1970, mwamuna wake wakatanga kurwara. Hanzvadzi ii yakati, paakaziya kuti kufa kake kainga kaa dhuze, wakandipasa zano rakanaka kuitira kuti andibetsere kurarama ndiri mufirwakadzi. Iyena wakati: “Tainga tino mucato uno pfadza. Akawanda aamboedzi izvi.” Asi iyona yakareketazve yeciti: “Usararamire nguwa dzakadarika—kunyazi ndangariro dzako dzecirumbwa dzeciedzurira. Nguwa icakubetsera kuti upore. Usagare no shungu uye usadzizwire usisi. Pfara nge kuti wainga uno mupfaro uu uye makomborero . . . Kuedzurira, cipo ca Mwari caakatipasa.” Amutenderani nazvo here kuti iri i zano rakanaka?

8. Hazvadzi yedu yakabetsereka kudini nge kutama kutsumba upenyu we kare?

⁸ Hanzvadzi yedu yakabata masoko aya no nyara mbiri. Iyona yakaseenzera Djehovha yakagondeka dakara peyakazofa no makore anokwana kuita 92. Mu makore manganani isati yafa iyona yakati: “Ndikaringira sure mu makore anokwana kuita 63 ndiri mu basa re nguwa yakadzara ra Djehovha, ndingatobhuya kuti, upenyu wangu, i upenyu unopfadza kamare.” Ngei? Iyona yakapanganidza kuti: “Cinonyanya kuita kuti upenyu upfadze, i hama dzakanaka uye kariro yekugara no hama uye hanzvadzi mu paradhiso ye pasi, teciseenzera Musiki wedu Mukuru, Mwari we zvirokwazvo, Djehovha, ne kusikaperi.” * Uu muezaniso wakanaka we munhu wakaringira mberi!

9. Hingana zviri pana Revhitiko 19:18 ngei pamweni paya zvingatishuphira kuti tisagare no bundu?

⁹ Erengai Revhitiko 19:18. Kakawanda kacona, zvingatishuphira kusama kugara no bundu  tikaona kuti munhu unonga watishaishira mutendi, shamwari tsika ndi tsikewo kana kuti we mu mhuri. Ngo muezaniso, hanzvadzi imweni yakapumhwa kuti yakaba mare yo hanzvadzi imweni. Pedzepo, hanzvadzi yakapumheyo yakakumbira rurekerero, asi hanzvadzi iya yakapumhwa yakarumbwa yecikanda ndangariro dzayo pa zviya zvakaitika. Makambozwawo kudaro here? Kunyazi tisikazi kubatana no cinetso cakaita hingana ici, asi akawanda edu pamweni takatoguma pa kutsamwa uye taitorangarira kuti bundu redu arizoperi.

10. Zvinyi zvingatibetsera kana tikazwa kuti tino bundu?

¹⁰ Zvinyi zvingatibetsera kana tikazwa kuti tino bundu? Cokutanga, rangarirai kuti Djehovha anoona zvese. Ayena unoziya zvese zvatiri kubatana nazvo, kubatanidzawo no kubathwa kedu zvisina unatsi. (Ahe. 4:13) Ayena unozwa kurhwadziwa patinoshuphika. (Isa. 63:9) Uye ayena anogondesa kuti acapedza matambudziko ese akabarhwa nge ndaa ye kubathwa kedu zvisina unatsi.—Zva. 21:3, 4.

11. Tinobetsereka kudini patinoita zviri zvese kuti tisagare no bundu?

¹¹ Cimwenizve tinodikana kuedzurira kuti, kana tikasagara no bundu, zvicabetsera isusu kamare. Ndizvona zvakaizwa no hanzwadzi yakapumhwa iya. Panguwa imweni, iyona yakabvisa bundu raainga anaro. Iyona yakaedzurira kuti kana isusu tikarekerera amweni, Djehovha anotirekererawo. (Mt. 6:14) Iyona aizi kupasa ndaa hanzvadzi yake nge zviya zvayakaita, asi yakaita zviri zvese kuti asagare no bundu. Mugumisiro, hanzvadzi yedu yakapfara maningi uye yakakwanisa kukanda ndangariro dzayo pa basa raaitira Djehovha.

12. Tinofundei pa bhuku ra 1 Juau 3:19, 20?

¹² Erengai 1 Juau 3:19, 20. Isusu tese tinodzipasa ndaa nguwa dzimweni. Ngo muezaniso, amweni anodzipasa ndaa nge zviro zvaakaita asati afunda cokwadi. Amweni anodzipasa ndaa nge zvishaishi zvaakaita abhabhatidzwa. (Aro. 3:23) Zvirokwazvo, tese tinoda kuita zvakanaka. Asi “tese tinoshaisha kakawanda.” (Tg. 3:2; Aro. 7:21-23) Kunyazi tisikadi kudzipasa ndaa, izvi zvinotipfadza. Ngei? Ngekuti kudzipasa ndaa kunoita kuti tigadzirise zvishaishi zvedu, uye toshinga kuti tisaphindezve.—Ahe. 12:12, 13.

13. Ngei tecindikana kungwarira kuti tisanyanye kudzipasa ndaa?

¹³ Nge dii rimweni, zvinokwanisika kunyanya kudzipasa ndaa—kana kuti, kurumbwa tecidzipasa ndaa kunyazi tacinyuka uye Djehovha apangidza kuti atirekerera. Mushobo uu wekudzipasa ndaa ungakuwadza. (Pis. 31:10; 38:3, 4) Ngei? Onai muezaniso we hanzvadzi imweni yakaneseka nge kudzipasa ndaa nge zvishaishi zvayakaita kare. Iyona yakati: “Ndakazwa hingana kuti andingakwanisi kuseenza no simba mu basa ra Djehovha nge kuti zvaita hingana kuti apacina nguwa kandiri.” Ajinji edu angakwanisa kuzwawo hingana hanzvadzi ii. Zvinokosha kuti tidzidziirire pa murau we kunyanya kudzipasa ndaa. Kusiya izvi, rangarirai kuti zvaizopfadza kudini Sathani kana tikati katiri—kunyazi Djehovha akasama kutisiya!—Ezanisirai na 2 Akorinti 2:5-7, 11.

14. Tingagara kudini no rugondo rekuti Djehovha aazi kutisiya?

¹⁴ Kunyazi zvakadaro, tingadzibvunzisa kuti: ‘Cinyi cingandigondesa kuti Djehovha aazi kundisiya?’ Patinodziita mubvunzo wakadai, tinonga tecitodaira. Murindiri we makore akadarika wakati: “Isusu [tingakwanisa] kushaisha uye kuwa kakawanda nge ndaa yemiitiro yakashata inonga yatsira nzinde mu  upenyu wedu nge ndaa ye zviro zvatinonga takaita . . . Musaore mwoyo. Musaone henyu hingana kuti makaita zvitema zvisikarekererhwi. Ndizvona zvinodiwa na Sathani. Nge ndaa yekuzwa kenyu kudaro cipangidziro cekuti amuzi kunyanya kuenda nhambo. Musarembe kudzidodosa kuti muhwirire kuna Mwari, mecikumbira kuti amurekerere, amubetsere pakumucenesa zviya zvamakashaisha. Endai kaari hingana mwana unoenda kuna baba ake kana ano matambudziko, kunyazi mawa kakawanda pa dambudziko rimwero, Djehovha no nyasha dzake acamubetsera.” *

15-16. Anhu amweni akazwa kudini paakazia kuti Djehovha aazi kuwasiya?

¹⁵ Anhu ajinji a Djehovha akanyaradzwa nge kuziya kuti Djehovha ainga asikazi kuasiya. Ngo muezaniso, makore amweni akadarika, hama imweni yakabetsereka nge eshiperiensiya yakabudiswa mu nyaya imweni inoti “Bhaibheri Rinochinja Upenyu.” Mu nyaya iyona, hanzvadzi imweni yakazia kuti nge ndaa yezvakaitika kairi, zvainesa kutenda kuti Djehovha aizomuda. Iyona yakarhwa ne muzwire wakadaro kunyazi padarika makore yaayabhabhatidzwa. Peyairangarira nge zve rumuko, yakatanga kuona zviro nge mushobo umweni. *

¹⁶ Zvakaitika kaari zvakabetsera kudini hama yakhona? Iyona yakatara yeciti: “Pandainga ndiri djaha ndakarhwisa kuti ndisiye kuona pornografia. Zvinopano, ndakahwirirazve kuiona. Ndakapsvaka rubetso re akuru eciKristu, uye ndakahambira mberi mukurhwisana no dambudziko rangu. Akuru akandigondesa nge zve rudo uye usisi wa Mwari. Asi nguwa dzimweni, ndinozwa hingana ndisikabetseri ciro, zvinoita hingana kuti Djehovha aandidi. Kuerenga zvakaitika ku hanzvadzi ii zvakandibetsera maningi. Zvino ndaakuona kuti kana ndecirangarira kuti Mwari aakwanisi kundirekerera, ndinonga ndecireketa kuti cibairo co Mwana wake acikwanisi kupfudza zvishaishi zvangu. Ndakabvisa  kopiya fundo ii kuti ndiiyerenge uye ndinyase kuirangarira pese panomuka dambudziko iri.”

17. Mu phostori Pauro wakadzidziirira kudini pa murau wekunyanya kudzipasa ndaa?

¹⁷ Zvakaitika izvi zvinotiedzurira nge zve mu phostori Pauro. Asati agara muKristu, wakaita zvitema zvakawanda. Pauro wakarangarira zvaakaita, asi aazi kurumbwa ecizvirangarira. (1Ti. 1:12-15) Pauro waiwona rusudzunuro hingana cipo kaari. (Aga. 2:20) Pauro wakadzidziirira pa murau wekunyanya kudzipasa ndaa, uye wakabatikana pakupa Djehovha zvakanakisisa.

18. Ngazvipi zvatafunda mu nyaya ino?

¹⁸ Ngazvipi zvataona pataifunda nyaya ino? (1) Ndangariro dzakanaka cikomborero ca Djehovha; asi azvina basa kuti upenyu wedu wainga wakanaka kudini mu nguwa ye kare, nge kuti upenyu we ramangwana unonga wakanaka. (2) Anhu amweni angatikuwadza, asi tikasanangura kuwarekerera, ticakwanisa kuhambira mberi. (3) Kunyanya kudzipasa ndaa kungakwanisa kuita kuti tisaseenzere Djehovha tecipfara. Mukuezana na Pauro, tinodikana kutenda kuti Djehovha anotirekerera.

19. Tinoziya kudini kuti mu nyika ipsva atizotambudziki nekutsumba zviro zvekare?

¹⁹ Tinokariro yokurarama nokusikaperi. Uye nyika ipsva ya Mwari atizorangariri zviro zvakasara sure. Maererano no nguwa iyona, Bhaibheri rinoti: “Zviro zvekare azvizouyi mu ndangariro.” (Isa. 65:17) Cimborangarirai: Amweni edu takacenera tiri mu basa ra Djehovha, asi mu nyika ipsva, ticazogarazve madjaha. (Djo. 33:25) Ngatishingei kurarama tisikarangariri zvakadarika. Mu kusiya izvona, ngatiringirei mberi uye toraramira zviri mberi!