1-2. (a) Tinozwa kudini patinonyasa kurangarira nge zve upenyu uye nge zve basa rekuparidzira rakaizwa ndi Djesu? (b) Ticaonei mu fundo ino?

 KANA munhu watinoda akafa, isusu tinogara maningi no cisuwo naye! Pakutanga, pamweni mungatsukwara maningi ngo kurangarira zvaiita asati afa, maka-maka makashuphika naye. Asi no kuhamba ke nguwa mungazwa mupfaro ngo kurangarira zvaakamufundisa, kana ciro caakaita, kana caakabhuya cakaita kuti munyemwerere uye mubambiswe.

²Nge mushobo umwewo, tinotsukwara maningi patinorangarira mushobo wakafa Djesu uye zvakasongana na Djesu asati afa. Maka-maka mu nguwa ye Cirangaridzo, isusu tinotora nguwa yekuti tinyase kurangarira nge zve kukosha ke rusudzunuro. (1 Ako. 11:24, 25) Kusiya izvona, isusu tinozwa mupfaro wakakura nge kunyasa kurangarira zvese zvakaizwa ndi Djesu uye zvaakabhuya ari panyika pano. Zvinobambisa kuziya zvaari kuita zvino uye zvaacaita mune ramangwana. Hinga zvaticaona mu fundo ino, kunyasa kurangarira nge zviro izvi uye nge zve rudo ra Djesu raanopangidza katiri, zvicatiitisa kuti tipangidze kuti tinotenda nge zviito zvedu.

3. Zvikonzero zvipi zvatinazvo kuti tipangidze kuti tinotenda murusudzunuro?

³ Patinonyasa kurangarira nge zve upenyu uye rufu ra Djesu zvinotiitisa kuti tipangidze kuti tinotenda Djesu. Iyena paainga ari panyika pano, akafundisa anhu kuti Umambo wa Mwari  ucaunzisa makomborero akawanda. Isusu tinokoshesa maningi zvinobhuya Bhaibheri nge zve rusudzunuro. Uye tinopangidza kuti tinotenda nge zve cibairo ca Djesu ngekuti icona cinofunungura musuwo wekuti tigare no ushamwari we padhuze na Djehovha na Djesu. Aya anopangidza kutenda muna Djesu ano kariro ye kurarama nokusikaperi uye yekutambirazve aya anonga amutswa. (Juau 5:28, 29; Aro. 6:23) Isusu atizi kusisira kutambira makomborero aya uye atikwanisi kuhwirinzira zviya zvatakaizirhwa na Djehovha uye Djesu. (Aro. 5:8, 20, 21) Asi tingakwanisa kupangidza kuti tinotenda nge zvaakatiitira. Asi tingazviita kudini?

4. Mariya Madharena wakapangidza kudini kuti waitenda nge zvaakaizirhwa na Djesu? (Onai mufanikiso.)

⁴ Onai muezaniso we mwanakadzi umweni wo Cidjudha waizwi Mariya Madharena. Iyena wainga ano madhimoni manomwe uye waishuphwa maningi ndiwona. Iyena wairangarira kuti madhimoni aya ainga asikazomusii. Ndiyo ndaa wakazozwa kupfara maningi Djesu paakadzingira madhimoni ake! Kutenda uku kakamuitisa kuti agare muteeri wa Djesu uye kuseenzesa nguwa yake, simba rake no zvese zvaainga anazvo kuti atsigire basa rekuparidzira. (Ruka 8:1-3) Mariya waikoshesa maningi zvaakaizirhwa na Djesu, asi iyena wainga asikatozvizii zvaida kuzoita Djesu mu nguwa yo mberi. Iyena waida kuzopasa upenyu katiri tese, “kuti aya anotenda maari asaparadzwe” asi aone upenyu usikaperi. (Juau 3:16) Kunyazi zvakadaro, Mariya wakapangidza kutenda kuna Djesu nge kurumbwa akagondeka kaari. Djesu paainga ecishuphika ari pamutanda wekutambudzikira, Mariya wainga ari padhuze naye ecimubetsera mu ndangariro uye ecibetserawo amweni. (Juau 19:25) Mumasure mekuti Djesu afa, Mariya no anakadzi amweni airi akatenga zviro kuti agadzirire mutumbi wa Djesu. (Mark. 16:1, 2) Mariya wakakomborerhwa maningi nge kugondeka kake. Iyena wakagarazve no makomborero ekuzoonanazve na Djesu mumasure mekuti iyena wamutswa uye kureketa naye—makomborero ekuti  aphostori ake aazi kutombogara nawo.—Juau 20:11-18.

5. Tingapangidza kudini kuti tinotenda nge zvese zvatakaizirhwa na Djehovha uye Djesu?

⁵ Isusu tingapangidzawo kuti tinotenga nge zviya zvatakaizirhwa na Djehovha uye Djesu nge kuseenzesa nguwa yedu, simba redu no zvese zvatinazvo kuti tibetsere pa basa re Umambo. Nge muezaniso, tingagara takadzipira pa basa rekuwaka uye kugadzirisa nyumba dze umambo.

6. Ngei mungabhuya kuti rusudzunuro i cipo camakapaswa?

⁶ Patinonyasa kurangarira mushobo unotida Djehovha na Djesu zvinotiitisa kuti isusu tiadewo. (1 Juau 4:10, 19) Patinozwisisa kuti Djesu wakatifira pacedu rudo redu kaari rinotunhudzira kubamba. Muphostori Pauro wakapangidza kuti waitenda cibairo ca Djesu paakatara masoko anoti: “Mwana wa Mwari . . . akandida uye akadzipira nge ndaa yangu.” (Aga. 2:20) Nge ndaa ye rusudzunuro ra Djesu, Djehovha akamudainzai kuti mugare shamwari yake. (Juau 6:44) Kuziya kuti Djehovha akaona ciro cakanaka kamuri, uye kuziya kuti akaripa ngo mutengo wakakura kuti imwimwi mugare shamwari yake azvidzadzi mwoyo wenyu nge kutenda here? Azviitisi kuti rudo ramunaro kuna Djehovha na Djesu rinyase kubamba? Ndinodikana kudzibvunzisa kuti: ‘Rudo randinaro rinondiitisa kuti ndiitei?’

7. Hinga zvatirikuona pamufanikiso, tingapangidza kudini rudo ratinaro kuna Djehovha na Djesu? (2 Akorinti 5:14, 15; 6:1, 2)

⁷ Rudo ratinaro kuna Mwari na Kristu rinotiitisa kuti tide amweni. (Erengai 2 Akorinti 5:14, 15; 6:1, 2.) Mushobo wakanaka wekupangidza rudo ku anhu nge we kuaparidzira. Isusu tinocedza no anhu ese atinogumira. Azvinei no ganda rawo, dzinza rawo, kana kuti ano zviro zvekurarama nazvo here uye kuti akafunda  maningi here. Nge kuita izvona, tinonga teciita nge mushobo unoda Djehovha kuti “anhu akasiyana-siyana aponeswe uye agare no uzii ye unatsi ye cokwadi.”—1 Ti. 2:4.

8. Tingapangidza kudini kuti tinoda hama no hanzvadzi dzedu?

⁸ Isusu tinopangidzawo kuti tinoda Djehovha na Djesu nge kuda katinoita hama no hanzvadzi dzedu. (1 Juau 4:21) Tinorangarira nge zvawo uye tinoabetsa paya paanonga ecisonagana no zvitsinzwa. Hama painofirhwa nge munhu wainoda tinoinyaradza, painorhwara tinoivhakacira uye painoora mwoyo tinoita zviri zvese kuti tiipfadze. (2 Ako. 1:3-7; 1 Ate. 5:11, 14) Nguwa dzese isusu tinoitira munamato hama dzedu ngekuti “kudeketera ke munhu munatsi kuno simba.”—Tig. 5:16.

9. Mushobo upi umwenizve watingapangidza nawo kuti tinoda hama no hanzvadzi dzedu?

⁹ Mushobo umweni wekupangidza kuti tinoda hama no hanzvadzi dzedu nge we kuita zviri zvese kuti tigare murunyararo nadzo. Djehovha muezaniso wekurekerera uye tingakwanisa kumuteedzera. Ngekuti Djehovha akatendendera kupasa Mwana wake kuti afire zvitema zvedu, kodi isusu tingatamawo here kurekerera hama no hanzvadzi dzedu? Isusu atidi kuita hinga muranda unorekethwa mu muezaniso wa Djesu waiita zvakashata. Kunyazi tenzi wake wainga akamurekerera pa magaa ainga anawo akakura, iyena aazi kukwanisawo kuzorekerera pa magaa madoko aainga anawo. (Mat. 18:23-35) Kana imwimwi musiripi kupindirana no hama imweni mu ungano, zvinoita here kuti imwimwi mutange ndimwi kupsvaka runyararo nayo musati maguma pa Cirangaridzo? (Mat. 5:23, 24) Nge kuita izvona munonga mecipangidza kuti munoda Djehovha na Djesu.

10-11. Akuru angapangidza kudini rudo raanaro kuna Djehovha na Djesu? (1 Pedru 5:1, 2)

¹⁰ Akuru angapangidza kudini kuti anoda Djehovha na Djesu? Mushobo umweni uye unokosha nge we kucengeta mabira a Djesu. (Erengai 1 Pedru 5:1, 2.) Uye Djesu akasiya pamhene ku muphostori Pedru. Mumasure me kuramba Djesu katatu kese Pedru wainga apererhwa no zano re kupangidza kuti waida Djesu. Mumasure mekuti Djesu amutswa, Iyena wakabvunzisa Pedru kuti: “Simoni mwana wa Juau iwewe unondida?” Zvezvirokwazvo Pedru waizoita zviri zvese kuti apangidze kuti waida Mufundisi wake. Djesu wakati kuna Pedru: “Usha mabira angu.” (Juau 21:15-17) Dakara pakufa kake, Pedru wakabata zvakanaka mabira a Djesu ecipangidza kuti zvezvirokwazvo waida Djesu.

¹¹ Akuru mungapangidza kudini kuti zvakareketa Djesu na Pedru zvinokosha kamuri mu nguwa ye Cirangaridzo? Imwimwi mungapangidza kuti munoda Djehovha na Djesu nge kubambisa hama uye kubetsera aya asikacaiti basa kuti ahwirire kuna Djehovha. (Ezek. 34:11, 12) Imwimwi mungabambisawo afundi e Bhaibheri uye no amweni anopinda Cirangaridzo, meciita kuti azwe kuti anyasa kutambirhwa, tinozviziya kuti awona angakwanisawo kugara afundi a Djesu.

12. Ngei masoko akabhuiwa na Djesu pa usiku asati afa anotipasa ushingi? (Juau 16:32, 33)

¹² Pa usiku asati afa, Djesu akati ku afundi ake: “Mu nyika mucasongana no matambudziko, asi shingai! Inini ndakunda nyika.” (Erengai Juau 16:32, 33.) Cinyi cakabetsera Djesu kuti apangidze ushingi pamberi pe azondi ake uye kurumbwa akagodeka dakara pakufa? Iyena akanyasa kugonda Djehovha. Uye  Djesu waizviziya kuti afundi ake aizobatana no muyedzo yakatodzana no yake, ndiyo ndaa iyena wakakumbira Djehovha kuti aabetsere. (Juau 17:11) Ngei izvona zvinotipasa ushingi? Ngekuti Djehovha ano simba maningi kupinda muzondi wedu upi hake. (1 Juau 4:4) Djehovha apana zvaasikakwanisi kuita uye unoona zvese zvinoitika ndiyo ndaa tingagara no cokwadi kuti tinokwanisa kugonda naye uye iyena acatibetsera kuti tikunde kuthya uye kugara no ushingi.

13. Zuzee we ku Arimateya wakapangidza kudini ushingi?

¹³ Onai muezaniso wa Zuzee we Arimateya. Iyena wainga ari mwanarume waireremedzwa no Adjudha. Iyena wainga ari nhengo yo Sinedriyo akuru akuru e Cidjudha. Asi Djesu paainga aciri panyika pano, Zuzee aazi kupangidzazve ushingi. Juau wakabhuya kuti Zuzee “wainga ari mufundi wa Djesu asi wainga asikadzipangidzi pamhene ngekuti waithya Adjudha.” (Juau 19:38) Zuzee wainga ano kutenda kakakura kuna Djesu asi iyena wainga asikadzipangidziri ku anhu. Pamweni iyena waithya kuti anhu ainga asikazomureremedzi kana akabhuya kuti wainga ari muteeri wa Djesu. Asi Bhaibheri rinobhuya kuti Djesu mumasure mekufa, Zuzee “wakagara no ushingi wokwenda kuna Pirato kookumbira mutumbi wa Djesu.” (Mark. 15:42, 43) Zvino anhu ese aakuziya kuti waamuteeri wa Djesu uye Zuzee aazi kuthya.

14. Imwimwi munodikana kuitei kana mecithya munhu?

¹⁴ Imwimwi makambothya munhu hinga Zuzee we ku Arimateya here? Imwimwi makambopsveruka kupanganidza kuti muri Mupupuri wa Djehovha kucikora uye ku basa? Imwimwi muri kunonoka kugara muparidzi kana kubhabhatidzwa ngekuthya kuti anhu anorangarirei nge zvenyu? Musasiye kuti kuthya ikona kumuimisei kuita zviro zvamunoziya kuti zvakanaka. Fungurai mwoyo wenyu kuna Djehovha ngekuita munamato. Uye kumbirai kuti amupasei ushingi wekuita zvaanoda. Pamunozwisisa kuti Djehovha anodaira munamato wenyu, imwimwi mucanyasa kubamba uye mucagara no ushingi.—Isa. 41:10, 13.

15. Mumasure mekuti Djesu adzipangidza ku afundi ake, mupfaro waakazwa wakaita kuti ade kuitei? (Ruka 24:52, 53)

¹⁵ Afundi ainga akatsukwara maningi Djesu paakafa. Edzai kudzikanda pambuto yawo. Awona ainga asikazi kuruza basi shamwari yawo asi kutogara asina kariro. (Ruka 24:17-21) Asi izvona azvizi kutora nguwa yakareba, Djesu wakatora nguwa yekuti abetsere afundi  ake kuti azwisise kuti rufu rake raidzadzisa kudini uphorofita we Bhaibheri. Uye wakatoapasawo basa rinokosha kuti aite. (Ruka 24:26, 27, 45-48) Mumasure mekudarika mazuwa 40 Djesu aenda kudenga, kutsukwara ke afundi aya kakacinja kogara mupfaro. Awona aipfara ngekuti ainga aakuziya kuti Djesu wainga aamupenyu wainga akagadzirira kubetsera pa basa raainga akaapasa. Mupfaro waainga anawo wakaitisa kuti ade kuseenzera Djehovha asikaori mwoyo.—Erengai Ruka 24:52, 53; Zvii. 5:42.

16. Tingateedzera kudini afundi a Djesu?

¹⁶ Tingateedzera kudini muezaniso we afundi a Djesu? Isusu tingagara no mupfaro wekuseenzera Djehovha haiwa basi pa nguwa ye Cirangaridzo asi mazuwa ese. Kuti mukwanise kuita izvona imwimwi munodikana kukanda Umambo wa Mwari pa mbuto yekutanga mu upenyu wenyu. Nge muezaniso, hama dzakawanda dziri kuita izvona dzakapungura nguwa yawo kuti akwanise kuita zvakawanda mu basa rekuparidzira, kupinda misangano uye kuita fundo ye mhuri masumana ese. Hama imweni yakasanangura kusiya zviro zvakawanda zvekuti ku anhu amweni zvaikosha, idzona dzakaita izvona kuti dzikwanise kuita zvakawanda mu ungano uye kuseenza kunodiwa aparidzi akawanda. I zvirokwazvo kuti tinodikana kushingirira kuti tirumbwe teciseenzera Djehovha, asi iyena anotigondesa makomborero akawanda kana tikarumbwa tecikanda Umambo wake pa mbuto yekutanga.—Zvie. 10:22; Mat. 6:32, 33.

17. Imwimwi mashinga kuitei pa nguwa ye Cirangaridzo? (Onai mufanikiso.)

¹⁷ Tirikuetsera no mupfaro Cirangaridzo cicaizwa mu Cipiri, 4 ya Abriri. Isusu, atidikani kuimira kuti zuwa irona rigume kuti titange kurangarira nge zve upenyu, rufu ra Djesu uye no rudo raanotipangidzira iyena na Djehovha. Rangarirai nge zve zviro izvi pa nguwa yese ye Cirangaridzo. Nge muezaniso, torai nguwa yekuerenga no kunyasa kurangarira nge zve zviitiko zviri pa tabhera yakazwi: “Vhiki Rekupedzisira Reupenyu hwaJesu Panyika” pa Mashoko Ekuwedzera B12 yo Shanduro ye Nyika Ipsva. Pamunonga mecierenga ngano idzi psvakai tsamba dze Bhaibheri dzicabambisa kutenda kenyu, rudo renyu, ushingi wenyu uye mupfaro. Mumasure mazvo psvakai mushobo wekupangidza kutenda kenyu nge zviito. Zvezvirokwazvo Djesu ucakoshesa zvese zvamucaita kuti mumurangarire pa nguwa ye Cirangaridzo.—Zvak. 2:19.