1. Mambo Soromoni wakatara cokwadi cipi pana Muparidzi 7:20?

 MAMBO Soromoni wakati: “Apana munhu munatsi pa nyika unorumbwa eciita zvakanaka asikashaishi.” (Mup. 7:20) Izvi zvirokwazvo kamare. Tese tiri ashaishi. (1 Juau 1:8) Ndiyo ndaa, tese tinodikana kurekererhwa na Djehovha kutobatanidzawo anhu amweni.

2. Makazwa kudini pamakarekererhwa no shamwari yenyu?

² Pamweni munoedzurira pamakatsukwarisa shamwari yenyu. Imwimwi makashupika nge zviro zvemakaitezvo, uye makapeta masimba kuti muzvigadzirise, ndiyo ndaa makakumbira rurekerero no mwoyo wese ku shamwari yenyu. Makazwa kudini pamakarekererhwa no shamwari yenyu? Makazwa kusununguka uye makapfara andizvopi!

3. Ticaonei mu fundo ino?

³ Isusu tinoda kuti Djehovha agare Shamwari yedu ye pamwoyo, asi ngekuti tiri anhu asikazi kukwana, ticapedzesera taita kana kureketa ciro cinomugumbura. Hino tingagara kudini no cokwadi cekuti Djehovha anoda kutirekerera? Ngei tingabhuya kuti rurekerero ra Djehovha rakakwirira kudarika kurekerera katinoita amweni? Uye pakupedzesera ndiyani anorekererhwa na Djehovha?

4. Tinoziya kudini kuti Djehovha akagadzirira kutirekerera?

⁴ Soko ra Mwari rinotigondesa kuti Djehovha akagadzirira kurekerera. Djehovha akatuma ngirozi kuti irekete na Mozesi  ku Dunhu re Sinai, eciseenzesa ngirozi iyona, Djehovha akabhuya ngezvake eciti: “Djehovha, Djehovha, Mwari ano nyasha no usisi, ano mwoyo unononoka kutsamwa uye akadzara ne rudo rakagondeka, no cokwadi, anopangidza rudo rakagondeka ku zviuru, anorekerera zvishaishi, kuposha uye citema.” (Eki. 34:6, 7) Djehovha ndi Mwari akanaka maningi uye ane usisi uye akagadzirira nguwa dzese kurekerera ashaishi akacinyuka.—Nee. 9:17; Pis. 86:15.

5. Maererano na Pisarema 103:13, 14, Djehovha anozwa ecida kuitei ngekunyasa kutiziya?

⁵ Ngekuti ndi Musiki wedu, Djehovha anoziya zvese ngezvedu. Zvinotishamisa! Patinoona kuti Djehovha anoziya zviro zvese ngezve munhu umwe na umwe panyika pano. (Pis. 139:15-17) Ayena anokwanisa kuona kutama kukwana kedu katakagara nhaka kubva ku madzibaba edu. Kupinda zvese izvi, Djehovha anoziya zvatakabatananazvo mu upenyu, uye anoziya kuti izvona zvakaita kuti tigare munhu watiri zvino. Ngekuti Djehovha anotiziya ayena anozwa ecida kutipangidzira nyasha dzake.—Pis. 78:39; erengai Pisarema 103:13, 14.

6. Djehovha akapangidza kudini kuti akagadzirira kutirekerera?

⁶ Djehovha akapangidza kare kuti akagadzirira kutirekerera. Djehovha anozviziya kuti tese takatongerhwa rufu nge ndaa ye citema ca Adhamu. (Aro. 5:12) Apana catingaita kuti tisudzunure munhu umweni kutobatanidzawo isusu pa citema ne rufu. (Pis. 49:7-9) Asi Mwari wedu ano rudo akatipangidzira usisi, uye akaita ciro kuti atisudzunure. Ayena akaitei? Hingana zvinopangidzwa pana Juau 3:16, ayena akatuma Mwana wake kuti atifire. (Mat. 20:28; Aro. 5:19) Djesu akafa kuti asudzunure pa rufu aya anotenda maari. (Aheb. 2:9) Rangaridzai kurhwadziwa kakaita Djehovha eciona Mwana wake waanoda ecifa nge mushobo unorhwadza uye unopsverusa! Munorangarira kuti Djehovha aizosiya Mwana wake ecifa, kudai asikazi kugadzirira kutirekerera?

7. Ngaipi miezaniso miiri inopangidza kuti Djehovha anoda kutirekerera?

⁷ Bhaibheri rino miezaniso ye anhu akarekererhwa na Djehovha. (Aef. 4:32) Pamweni munhu we kutanga angauya musoro menyu ndi Mambo Manase. Mwanarume uu  wakashata mwoyo wakaita zvitema zvakakura. Iyena wakaita kunamata ke kunyepa uye wakakohomedzesawo amweni kuti aite zvimwezvo. Iyena wakapisira ana ake hingana cibairo ku anamwari e kunyepa. Iyena wakaguma pakukanda cidhori mukati me tempro yakacena ya Djehovha. Bhaibheri rinobhuya nge zva Manase reciti: “Wakaita zvakashata zvijinji pamberi pa Djehovha, ecimunyangadza.” (2 Mak. 33:2-7) Asi, Manase paakacinyuka ne mwoyo wese Djehovha akamurekerera. Djehovha akatotendera kuti iyena agarezve mambo. (2 Mak. 33:12, 13) Pamweni mungarangarirazve nge zva Mambo Dhavhidhi, iyena wakaitira Djehova zvitema zvakakura, zvakadai hinga uhure uye kuuraya. Asi Dhavhidhi paakatendera zvishaishi zvake uye opangidza kucinyuka kezvirokwazvo, Djehovha akamurekerera. (2 Sam. 12:9, 10, 13, 14) Miezaniso miiri ii inopangidza kuti Djehovha anoda maningi kutirekerera. Hingana zvaticaona mushobo unorekerera Djehovha wakasiyana maningi no mushobo watinorekerera.

8. Ngei tecibhuya kuti Djehovha ndi Mutongi akanaka kudarika ese?

⁸ Djehovha ndiye “Mutongi we nyika yese.” (Gen. 18:25) Mutongi wakanaka unodikana kugara munhu unonyasa kuziya mutemo. Isusu tingabhuya kuti Djehovha ndi Mutongi wakakwana. Ngei? Ngekuti pane kugara basi Mutongi wedu, ayena ndiye Mupi we mitemo iri mu Bhaibheri. (Isa. 33:22) Apana munhu unokwanisa kusiyanisa cakanaka no cakashata kupinda Djehovha. Mutongi wakanaka unodikanazve kugara no wara ripi? Iyena unodikana kuziya zvese zvakaringana no nyaya asati aita cisananguro. Ndiyo ndaa, Djehovha ndi Mutongi akanaka kupinda ese ngekuti anoziya zvese.

9. Djehovha anorangarira ngezvei paanoita cisananguro cekurekerera munhu?

⁹ Djehovha akasiyana no atongi e nyika, ayena anoziya nguwa dzese zviro zvinonga zvecibatanidzwa panyaya ipi hayo. (Gen. 18:20, 21; Pis. 90:8) Atongi e nyika anotonga eciringira basi pa zviro zvaanokwanisa kuona uye kuzwa. Asi Djehovha akasiyana, ayena anozwisisa cikonzero cinonga caitisa kuti munhu aite kudaro, zvakadai hingana unhu we kubarhwa nawo, mushobo waakarerhwa, kaanoraramira uye mazwire ake. Cimwenizve nge cekuti Djehovha anokwanisa kuona zviri mu mwoyo uye anonyasa kuzwisisa cikonzero catitora kuti tiite ciro catinonga taita. Djehovha anokwanisa kuona zvese. (Aheb. 4:13) Hino Djehovha paanorekerera munhu ayena anonga aakuziya zvese zvinonga zveciitika no munhuwo.

10. Ngei tecibhuya kuti matongere a Djehovha ngee unatsi nguwa dzese? (Dheuteronomiyo 32:4)

¹⁰ Djehovha ndi Mwari asikasananguri uye matongere ake ngee unatsi nguwa dzese. Djehovha paanorekerera munhu ayena aaringiri hope, upfumi wake, zvaanokwanisa kuita uye kunyazi ecitoziikanwa maningi. (1 Sam. 16:7; Tig. 2:1-4) Atikwanisi kubambidzira Djehovha kuti aite ciro kana kumudyekera. (2 Mak. 19:7) Djehovha paanoita cisananguro ayena aaciiti nge ndaa ye mazwire ake. (Eki. 34:7) Tinorugondo rekuti Djehovha ndi Mutongi akanaka kudarika ese uye kuti ayena anozwisisa zvese zvakaringana na isusu uye migarire yedu.—Erengai Dheuteronomiyo 32:4.

11. Ngei tecibhuya kuti kurekerera ka Djehovha kakasiyana no kumweni kese?

¹¹ Matarhwa eciHebheru anopangidza pamhene kuti rurekerero ra Djehovha rakasiyana  kupinda ese. Pamigariro imweni pakaseenzeswa soko re ciHebheru. Uye maererano no Dicionário Bíblico soko irona “rinoseenzeswa basi pakupanganidza rurekerero rinopasa Mwari ku ashaishi, soko iri aritomboseenzeswi pa rurekerero rinopasa munhu ku mudoni wake uye rakadodoka maningi pakuezaniswa no rurekerero rinopaswa na Mwari.” Djehovha ndiye basi anokwanisa kurekerera zvacose mushaishi wa cinyuka. Asi kurekerera ka Djehovha kunoreyei katiri?

12-13. (a) Tingatambirei patinorekererhwa na Djehovha? (b) Djehovha angatiphanica nge zvishaishi zvaakarekerera here?

¹² Kana isusu tikazwisisa uye totendera kuti Djehovha atirekerera, tinogara no “nguwa yekuzorodzwa” kana kuti runyararo mu ndangariro uye hana yakacena. Tinokwanisa kuzwa kudaro patinorekererhwa na “Djehovha wene.” (Zvii. 3:19) Djehovha paanotirekerera anotendazve ushamwari wedu uye zvinotoita hingana tisikazi kutomboshaisha.

¹³ Djehovha paanotirekerera ayena aazombotipanicizve nge cishaishi catinonga taita (Isa. 43:25; Djer. 31:34) Djehovha anokanda zvitema zvedu “kure na isusu hingana mukuwo uri pakati pe kumabvazuwa ne kumadokera.” * (Pis. 103:12) Patinonyasa kurangaridza kukura kakaita rurekerero ra Djehovha mwoyo wedu unoshamisika uye unodzara no kutenda. (Pis. 130:4) Asi ndiyani angarekererhwa na Djehovha?

14. Dakara zvino, tafundei ngezve rurekerero ra Djehovha?

¹⁴ Hingana zvataona rurekerero ra Djehovha aritsamiri pakuti citemeco cakakura kudini. Ngekuti Djehovha ndi Musiki wedu, Mutongi wedu uye ndiye Akapasa mitemo dzatinoteerera, ayena ndiye akasisira kuita cisananguro cekuti acarekerera munhu here. Asi ngazvipi zvinobatanidzwa na Djehovha pakuita cisananguro cekuti acarekerera munhu kana kuti haiwa?

15. Maererano na Ruka 12:47, 48, cinyi cinorangarirhwa na Djehovha paanorekerera munhu?

¹⁵ Ciro cimwe cinorangarirhwa na Djehovha ngecekuti mushaishiwo waizviziya kuti  zvaainga eciita zvakashata here. Djesu akasiya izvona pamhene pa masoko atinogumira pana Ruka 12:47, 48. (Erengai.) Kana munhu akaronga uye oita ciro caanoziya kuti Djehovha anobhuya kuti icona cakashata, iyena unonga ari kuita citema cakakura maningi. Munhu uu ungaguma pakutama kurekererhwa na Djehovha. (Mark. 3:29; Juau 9:41) Asi zvirokwazvo kuti tese takamboita ciro cataiziya kuti cainga cakashata, kunyazi zvakadaro, tingakwanisa kurekererhwa here? Honde. Izvi zvinoitika ngekuti Djehovha anorangarirazve ciro cimweni.

16. Cinyi cinozwi kucinyuka uye ngei kucinyuka kecikosha kuti tirekererhwe na Djehovha?

¹⁶ Ciro cimweni cinorangarirhwa na Djehovha ngecekuti mushaishiwo wacinyuka zvezvirokwazvo here. Zvinyi zvinobatanidzwa pakucinyuka ke zvirokwazvo? Zvinobatanidza “kucinja maitiro, marangariro uye zvinangwa zve munhuwo.” Izvi zvinobatanidzawo kuti munhuwo unonyasa kutsukwara nge zvitema zvaakaita uye ngekutama kuita zvaaidikana kuita. Munhu wakacinyuka zvezvirokwazvo aatsukwari basi nge cishaishi caanonga aita, asi unotsukwarawo nge kusiya ushamwari wake na Djehovha weciremba dakara pakuita izvona. Edzurirai kuti Mambo Manase na Dhavhidhi akaita zvitema zvakakura, kunyazi zvakadaro Djehovha akaarekerera ngekuti ainga acinyuka zvezvirokwazvo. (1 Mad. 14:8) Zviri pamhene kuti Djehovha anotirekerera kana akaona kuti tacinyuka zvezvirokwazvo. Asi kutsukwara basi nge citema catinonga taita azvikwani. Isusu tinodikana kuita ciro ciito. * Izvi zvinotitora kuti tione cimwenizve cinorangarirhwa na Djehovha.

17. Kutendeuka kunoreyei uye ngei zvecikosha kuita izvona kana tisikadi kuphindazve zvishaishi zvatakaita? (Isaya 55:7)

¹⁷ Ciro cimweni cinonyanya kukosha cinorangarirhwa na Djehovha ndipaya pekuti mushaishi watendeuka, kana kuti mushaishiwo waita cinjo dzakakura mu upenyu, osiya kuita zvakashata oita zviya zvinobhuiwa na Djehovha kuti zvakanaka. (Erengai Isaya 55:7.) Munhuwo unodikana kucinja mushobo wake  we kurangarira kuti atungamirirhwe na Djehovha. (Aro. 12:2; Aef. 4:23) Munhuwo unodikana kuita zviri zvese kuti asasiye basi kuita zvakashata asi kuti asiyewo kurangarira zvakashata. (Ako. 3:7-10) Asi izvirokwazvo kuti cibairo ce resudzunuro ra Djesu ndico cinoita kuti Djehovha atirekerere uye apfudze zvitema zvedu. Asi Djehovha anoseenzesa cibairo ce rusudzunuro kana akaona kuti isusu tirikupeta masimba ne mwoyo wese kuti tisiye maitiro akashata.—1 Juau 1:7.

18. Taonei ngezve rurekerero ra Djehovha?

¹⁸ Ngatione mucigwagwa zviro zvataona mu fundo ino. Djehovha ndiye murekereri mukuru we nyika yese. Ngei tecidaro? Cekutanga, ngekuti ayena wakagadzirira kutirekerera nguwa dzese. Cecipiri, ayena anotiziya kupinda munhu upi hake. Ayena anoziya zvese ngezvedu uye apana munhu kupinda ayena angaona kuti isusu tacinyukadi kamare. Uye pakupedzesera taona kuti Djehovha paanotirekerera zvinoita hingana apfudza zvitema zvedu. Izvona zvinoita kuti tigare ne hana yakacena uye titenderhwe naye.

19. Ngei tingakwanisa kupfara kunyazi tiri anhu asikazi kukwana uye anoshaisha?

¹⁹ Ngekuti tiri anhu asikazi kukwana ticandoshaisha. Asi ciro cingatinyaradza ndi masoko atinogumira mu bhuku Estudo Perspicaz, Volume 1, pajina 210, ipona panoti: “Ngekuti Djehovha anonyasha anorangarira pakarembera aseenzi ake, awona aadikani kugara akatsukwara nge ndaa ye zvinoitika nge kutama kukwana katakagara nhaka. (Pis 103:8-14; 130:3) Mukahamba meciziya makwanza a Mwari, mucapfara. (Afi 4:4-6; 1Ju 3:19-22).” Zvinobambisa maningi kurangarira izvona!

20. Ticaonei mu fundo inoteera?

²⁰ Tingatenda Djehovha ngekutirekerera pacitema cipi haco catinonga taita. Asi isusu tingateedzera kudini mushobo wekurekerera wa Djehovha? Kurekerera kedu no ka Djehovha kakaezana papi uye kakasiyana papi? Uye ngei zvecikosha kuzwisisa misiyano iyona? Mu fundo inoteera icadaira mibvunzo ii.