“UNAKI we hama no hanzvadzi ndiwo wakaita kuti ndipfarire cokwadi,” unodaro Lisa. * Uye ndizvonawo zvakaitika na Anne. Iyena unoti: “Ciro cakandibaya mwoyo pakutanga ndi unaki we hama no hanzvadzi haiwa zvandaifunda.” Hanzvadzi idzi dzinoda maningi kuerenga Bhaibheri uye kunyasa kurangarira zvarinobhuya, asi unaki we hama no hanzvadzi ndiwona wakaabata-bata maningi.

Tingapangidza kudini unaki dakara pa kubaya mwoyo ye anhu amweni? Ngatione mishobo miiri yatingazviita: tingabaya mwoyo ye anhu nge zviya zvatinoreketa uye zvatinoita. Ticaonawo kuti tingapangidzira ani unaki.

Mukadzi unoita zvakanaka unorekethwa pana Zvierengo kapituro 31 wainga “uno mutemo we unaki” pa rurumi. (Zvie. 31:26) Iyena waisiya kuti “mutemo” iwona utungamirire zvaaireketa uye mushobo waaireketa. Musoro we mhuri unodikanawo kugara no “mutemo” uwona pa rurumi. Abereki akawanda anozviziya kuti kureketa no hasha kungakuwadza ana awo uye kungaita kuti anewo asaazwire. Abereki paanoreketa no rudo zvinoita nyore kuti ana aapurutane uye aaterere.

Kunyazi musina ana, mungafundira kudini kureketa no unaki? Rimwe re mazano angamubetserai riri pana Zvierengo 31:26 inoti: “Iyena unoreketa no ungwaru.” Izvi zvinobatanidza kupangidza ungwaru patinosanangura masoko edu uye mushobo watinoareketa. Mungadzibvunzisa kuti: ‘Zvandicareketa zvicaita kuti amweni agare no shungu here kana kuti zvicaita kuti tigare murunyararo?’ (Zvie. 15:1) Zviri pamhene kuti kunyasa kurangarira tisati tareketa tinonga tecipangidza ungwaro.

Cirengo cimweni cinoti: “Masoko anorekethwa asikazi kumborangarirhwa anobaya hingana supada.” (Zvie. 12:18) Kana tikarangarira nge zve masoko edu uye kuti mushobo watinowareketa acabata-bata kudini amweni, zvicaita nyore kuonerera zvatinoreketa. Kana tikaseenzesa “mutemo we unaki” patinoreketa no amweni, atiseenzesi masoko akashata kana kuti kureketa nge mushobo unokuwadza amweni. (Aef. 4:31, 32) Pano kudaro, tinotsiya masoko uye marangariro akashata no masoko akana anopangidza rudo. Djehovha akaita izvona kamare paakaenda koobambisa Eriya ngekuti waithya pa nguwa iyona. Ngirozi yaimirira Djehovha yakareketa no izwi “rakaterama uye riri pasi.” (1 Mad. 19:12) Asi zvinokosha kuedzurira kuti, kupangidza unaki kunodarika kuseenzesa masoko akanaka. Isusu tinodikana kuita zviro nge mushobo wakanaka. Asi tingazviita kudini?

Isusu tinoteedzera Djehovha, haiwa basi ngekureketa nge mushobo wakanaka asi ngekuitawo zviro nge mushobo wakanaka. (Aef. 4:32; 5:1, 2) Lisa, wamborekethwa nge zvake wakareketa zvinoteera nge zve unaki unopangidzwa no Apupuri a Djehovha. “Mhuri yedu payakabambidzirhwa kufuruka ciriporipoco, kazado mbiri dze Apupuri a Djehovha dzakasiya basa radzo kuti dziuye kotibetsera pakufuruka. Pa nguwa iyona, ndainga ndisati ndafunda Bhaibheri!” Zviito izvi zve unaki zvakaita kuti Lisa apfarire cokwadi.

 Anne, wamborekethwawo nge zvake wakapangidza kutenda maningi nge unaki waakapangidzirhwa no Apupuri a Djehovha. Iyena unoti: “Nge ndaa ye mugariro we nyika inini ndainga ndisikagondi munhu upi hake.” Iyena unoenderera mberi eciti: “Pandakaziya Apupuri a Djehovha inini andizi kuwagonda. Inini ndaidzibvunzisa kuti: ‘Ngei awona ecindibata zvakanaka?’ Asi mufundisi wangu we Bhaibheri wainga ari munhu wakanaka uye izvona zvakaita kuti ndimugonde.” Ngaupi mugumisiro wakhona? “Nokuhamba ke nguwa, ndakatanga kukoshesa zvandaifunda.”

Makwanisa kuona kuti ngazvipi zvakabaya mwoyo wa Lisa na Anne? I zviito zve unaki zve hama no hanzvadzi dze mu ungano uye izvona zvakaita kuti awona ade kufunda. Unaki we hama no hanzvadzi wakaita kuti awona agonde na Djehovha uye no anhu ake.

Anhu amweni akabarhwa akanaka uye akapfawa. Izvona zvakanaka maningi uye zvinosimbwa. Asi kana tiri kupangidza unaki ngekuti takabarhwa takadaro, tinonga tisikaripi  kupangidza unaki we zvirokwazvo unobva kuna Djehovha.—Ezanisai na Zviito 28:2.

Unaki unobva kuna Djehovha unobatanidzwa pa zvibereko zve mwiya mucena wa Mwari. (Aga. 5:22, 23) Kuti tisakurire unaki unobva kuna Mwari tinodikana kusiya kuti mwiya mucena utungamirire marangariro uye maitiro edu. Patinoita izvona, tinonga teciteedzera Djehovha na Djesu. Uye hingana Akristu isusu tinoda anhu, asi zvinotiitisa kuti tipangidze unaki i rudo redu kuna Djehovha uye ku adoni edu. Ngekudaro, tinonga tecipangidza unaki unobva mu mwoyo uye unotenderhwa na Mwari.

Zviri nyore kupangidza unaki ku anhu atinoziya uye ku anhu anotipangidzirawo unaki. (2 Sam. 2:6) Ngo muezaniso, zvakadjairika kuti tiite ciro cakanaka, kuti titende munhu wakatipasa kana kuti wakatiitirawo ciro cakanaka. (Ako. 3:15) Asi zvakadini paya patinorangarira kuti munhuwo aasisiri kupangidzirhwa unaki?

Rangarirai zvinoteera: Djehovha anotipasa muezaniso wakakwana wekupangidza unaki ku anhu kunyazi asikasisiri. Uye mu Soko rake Bhaibheri, tinofunda kuti zvinokosha maningi kupeta masimba kuti tipangidzirewo wara irona. Soko rekuti “unaki usikazi kusisira” rinophindhwa kakawanda mu Matarhwa e ciGrego. Mwari anopangidza kudini unaki katiri?

Djehovha anopangidza unaki ku mamirionji e anhu ngekuwapasa zvaanoda kuti arumbwe ecirarama. (Mat. 5:45) Cokwadi ngecekuti, kunyazi patainga tisati tafunda Bhaibheri, Djehovha aipangidzira unaki ku umwe na umwe. (Aef. 2:4, 5, 8) Ngo muezaniso, ayena akapasa upenyu we Mwana wake ku anhu ese. Muphostori Pauro wakabhuya kuti Djehovha akapasa rusudzunuro “maererano no upfumi we unaki wake usikazi kusisira.” (Aef. 1:7) Kusiya izvona, Djehovha anorumbwa ecititungamirira uye ecitifundisa kunyazi nokutama kukwana kedu uye no zvitema zvedu. Nhungamiriro dza Djehovha uye masoko ake akaita hingana “mvura irikufefa.” (Dhe. 32:2) Zviri pamhene kuti atizokwanisi kutsiya unaki wese watinopangidzirhwa na Djehovha. Zvezvirokwazvo, kudai pasina unaki usikazi kusisira wa Djehovha isusu dai tisina kariro ye ramangwana.—Ezanisai na 1 Pedru 1:13.

Zvezvirokwazvo, unaki wa Djehovha i wara rakanakisisa uye isusu tinoda kugarawo naro. Hino pane kugara tecisanangura kuti ticapangidza unaki kuna ani, ngatiteedzere Djehovha torumbwa tecipangidza unaki mu upenyu wedu. (1 Ate. 5:15) Kana tikapangidza unaki ku anhu ese, ticaita hingana muriro pa zuwa riri kutonhora. Ticagara manyuku e runyararo ku anyaukama edu, hama dzedu dze mu ungano, ku adoni edu e kubasa, ku adoni edu e kucikora uye ku anyacigarisano edu.

Rangarirai kuti masoko enyu akanaka angabetsera kudini anhu e mu mhuri yenyu uye e mu ungano. Pamweni mungabestera hama ye mu ungano yenyu pa mabasa e pa nyumba, kuwarimira uye mabasa amweni hingana ekuwatengera zviro. Kusiya izvona, kana mukagumira munhu unoda kubetserhwa mu basa rekuparidzira, zvakadini kudzipira kuti mumubetsere?

Kana tikaita kudaro, tinonga teciteedzera Djehovha uye tinopangidza no mareketero uye no zviito kuti tinoteerera “mutemo we unaki.”