1. Migariro ipi ingatiitisa kuti tithye?

 TESE isusu ticasongana no migariro mu upenyu ingaita kuti tithye. Ngatione eshiperiyensiya dze hama dzinganani. Nestor na mukadzi wake María, aida maningi kuseenza kumbuto yaidiwa aparidzi akawanda. * Kuti akwanise kuita izvona awona aidikana kugara no upenyu usina zvakawanda. Asi awona aithya kuti ainga asikazopfari nge kugara no zviro padoko. Biniam paakagara Mupupuri wa Djehovha mu nyika yekuti basa redu rairambidzwa iyena waizviziya kuti waizoteererhwa. Iyena wakathya nge ndaa ye izvona. Asi iyena wainyanya kuthya nge kurangarira kuti mhuri yake yaizozviona kudini kana akazoziya ngezve gereja rake ripsva. Valérie wakazooneka kuti wainga ano kankro inoshupha kurapa, uye zvaishupha maningi kuti aone medhiko anoreremedza zviya zvaaitenda mu Bhaibheri uye omuita operasau asikaseenzesi ngazi. Iyena wakathya maningi kufa.

2. Ngei tecidikana kuonerera kuthya kedu?

² Imwimwi makambosongana no migariro yakaita kuti muthye here? Akawanda edu akasongana nayo. Kana tikatama kufundira kuonerera kuthya kedu, ticaita zvisananguro zvakashata zvicakuwadza ushamwari wedu na Djehovha. Uye izvi ndizvo kamare zvinodiwa na Sathani. Iyena unoedza kukhorovhera kuthya kedu kuti tiime kuparidzira uye kuteerera mitemo dzimweni dza Djehovha, uye pamitemo idzi panobatanidzwa kuparidzira masoko akanaka. (Zvak. 12:17) Sathani wakashata, anoutsinye uye anomasimba. Hino tingadzidziirira kudini?

3. Cinyi cingatibetsera kukunda kuthya?

 ³ Kana tikagara no rugondo rekuti Djehovha anotida—uye ari kudii redu—Sathani aakwanisi kutithyisidzira. (Pis. 118:6) Ngo muezaniso, mutari we Pisarema 118 wakabatana ne migariro inoshupha. Iyena wainga uno azondi akawanda, kutobatanidzawo anhu ano masimba (mavhersikuro 9, 10). Nguwa dzimweni waibatana no kubambidzirhwa kakakura (vhersikuro 13). Iyenazve wakapangwa na Djehovha (vhersikuro 18). Kunyazi zvakadaro mutari we Pisarema uu wakaemba kuti: “Andizothyi.” Cinyi cakaita kuti mutari we Pisarema uu agare no rugondo rakadaro? Iyena waizviziya kuti kunyazi no kupangirhwa kaakaizwa, Baba ake e kudenga aimuda maningi. Mutari we Pisarema wainga ano rugondo rekuti angakwanisa kurhwisa mugariro upi hawo, ngekuti Baba ake ane rudo akagadzirira kumubetsera.—Pis. 118:29.

4. Kana tikatendera kuti Djehovha anotida tingakwanisa kukunda mishobo ipi yekuthya?

⁴ Zvinokosha maningi kutenda kuti Djehovha anoda maningi umwe na umwe wedu. Kugara no rugondo iri kungatibetsera kukunda mishobo mitatu ye kuthya: (1) kuthya kukonerhwa kuriritira mhuri yedu; (2) kuthya munhu, uye (3) kuthya kufa. Hama ne hanzvadzi dzinorekethwa pa ndima yekutanga dzakakwanisa kukunda kuthya ngekuti dzainga ne rugondo rekuti Mwari aidzida.

5. Mugariro upi ungaitisa kuti musoro we mhuri agare ecinetseka? (Onai foto ye pakapa.)

⁵ Musoro we mhuri unoona ubaba wekuriritira mhuri hingana ciro cinokosha maningi. (1 Ti. 5:8) Kana muri musoro we mhuri zvingaita kuti pakati pe nhenda ye koronaviru, makagara no ngozi ye kuruza basa. Pamweni makanetseka maningi nge kukonerhwa kuriritira mhuri yenyu uye kupagari nyumba. Kana makaruza basa pamweni makathya kukonerhwa kuona rimweni. Kuita hingana Nestor na María atabhuya pekutanga, pamweni imwimwi muri kuthya kurerusa upenyu wenyu uye mokonerhwa kurarama no zviro padoko. Sathani anosokhorovhera kuthya kakadai, uye anosokwanisa kuita kuti anhu akawanda aime kuseenzera Djehovha.

6. Sathani unoda kutiitisa kuti tirangarirei?

⁶ Sathani urikuda kuita kuti titendere kuti Djehovha aatidi uye aatibetseri pakuriritira mhuri yedu. Izvi zvingaita kuti tirangaridze kuti isusu tinodikana kuita zviri zvese kuti tisaruze basa redu, kunyazi izvona zvecireya kutama kuteerera zvokwadi zve Bhaibheri.

7. Djesu akatigondesei?

⁷ Djesu, anonyasa kuziya Djehovha kupinda tese isusu, anotigondesa kuti Mwari wedu: “anoziya zviro [zvatinoda] tisati tatombomukumbira.” (Mat. 6:8) Djesu anoziya kuti Djehovha anoona zvatiri kuda uye anotipasa zvatiri kuda nguwa dzese. Hingana Akristu, umwe na umwe wedu i dii re mhuri ya Djehovha. Djehovha ndi musoro wedu we mhuri, isusu tinorugondo rekuti ayena acaita zvaakatarisa pana 1 Timoti 5:8.

8. (a) Cinyi cicatibetsera kukunda kuthya ke kutama kukwanisa kuriritira mhuri? (Mateu 6:31-33) (b) Hingana zvinopangidzwa pamufanikiso, tingateedzera kudini muezaniso we kazado irikutora zvekurhya kuti ipase hanzvadzi?

⁸ Kana isusu tikagonda kamare kuti Djehovha anotida uye anoda mhuri yedu, atizoshuphirhwi kutendera kuti ayena acazotipasa zvese zvatinoda zvekurarama nazvo. (Erengai Mateu 6:31-33.) Djehovha anoda kuticengeta, uye apana anganyasa kuita izvona kupinda ayena! Ngo muezaniso, paakasika nyika ayena aazi kutipasa basi  zviro zvekurarama nazvo ayena akadzadza nyika no zviro zvinoita kuti tipfare. (Gen. 2:9) Kunyazi nguwa dzimweni tecigara no zviro padoko zvekurarama nazvo, zvakanaka kuedzurira kuti tinazvo ngekuti Djehovha ari kutibetsera. (Mat. 6:11) Zvakanaka kuedzurira kuti zviro zvekunyama zvatinoruza nyamasi uno, azviezaniswi no zvatinopaswa na Mwari wedu ane rudo zvino uye mune ramangwana. Izvi ndizvo zvakazwisiswa na Nestor na María.—Isa. 65:21, 22.

9. Tinofundei no muezaniso wa Nestor na María?

⁹ Nestor na María aigara ku Colômbia. Awona ainga ano zviro zvakawanda zvekurarama nazvo. Awona anoti: “Isusu tairangarira zvekurerusa upenyu wedu kuti tiite zvakawanda pa basa rekuparidzira, asi taithya kuti taizokonerhwa kupfara kana tikararama no zviro padoko.” Cinyi cakabetsera kazado ii kuti ikunde kuthya kakadai? Awona akaima kuti arangarire mushobo waakapangidzirhwa rudo na Djehovha, uye akabambirira kugonda kuti Djehovha airumbwa eciapasa zviro zvaaida. Awona akasiya basa rawo raiyapasa mare yakawanda, akatengesa nyumba yawo, ofuruka oenda ku mbuto yaidiwa aparidzi akawanda. Awona akaona kudini cinjo dzaakaita? Nestor unoti: “Isusu takadzionera tega kuti masoko a Mateu 6:33 ngee zvirokwazvo. Apana zviro zvekurarama nazvo zvatakashoterhwa nazvo. Tiri kunyasa kupfara kupinda kare.”

10. Ngei zvisikashamisi kuona munhu ecithya munhu umweni?

¹⁰ Kubvira pakutanga Adhamu na Evha paakapandukira Djehovha, anhu anosokonzera amweni awo matambudziko akawanda. (Mup. 8:9) Ngo muezaniso, kupinda mudida pakuseenzesa masimba e kutonga, ubhinya, kusingirirhwa ku cikora, uye kutobatanidzawo bvinga rinoizwa mu mhuri. Ndiyo ndaa azvishamisi kuona munhu ecithya munhu umweni! Sathani unoseenzesa kudini murau iwona?

11-12. Sathani unoseenzesa kudini murau wekuthya munhu katiri?

¹¹ Sathani unoseenzesa kuthya munhu kuti tiime kuparidzira uye kuti tisazwire mitemo ya Djehovha. Anyautongi ecipfuridzirhwa na Sathani anotiteerera uye anoimisa basa redu. (Ruka 21:12; Zvak. 2:10) Mu nyika ino iri kutongwa na Sathani, anhu akawanda anobararisa manyepo nge zve Apupuri a Djehovha. Nge ndaa ye manyepo aya, anhu  anotiseka, anotirhwisa uye aatipfariri. (Mat. 10:36) Zviro izvona zvinodikana kutitsukwarisa here? Haiwa. Kubvira kare Sathani unoseenzesa murau uu kuti arhwise anhu a Mwari. —Zvii. 5:27, 28, 40.

¹² Asi kuthya kuteererhwa ne a utongi andiwopi mushobo umwe basi unoseenzeswa na Sathani. Asi ku anhu amweni kuno mushobo umweni unopinda kuteererhwa uye kutambudzwa. Anhu amweni paanogara Akristu anorangarira kuti anyaukama awo acazorangarira kudini kana akazviziya, awona anoda maningi anyaukama awo, uye anodawo kuti aziye Djehovha uye amude. Ndiyo ndaa zvinorhwadza kuona anyaukama asikareremedzi Djehovha uye hama dze mu ungano. Mu migariro imweni, anyaukama ainga ari azondi, nekuhamba ke nguwa akazogara aseenzi a Djehovha. Asi zvakadini anyaukama enyu akaramba kushamwaridzana nemwi? Maizozwa kudini?

13. Ngei kugonda kuti Djehovha anotida kungatibetsera kana anyaukama edu akatisiya? (Pisarema 27:10)

¹³ Tinganyaradzwa ne masoko atinogumira pana Pisarema 27:10. (Erengai.) Kunyazi anyaukama edu akatisiya, kuedzurira mushobo unotida Djehovha, kucatipasa simba rokushingirira kuteererhwa uye rugondo rokuti ayena acatikomborera nge kugondeka kedu. Apana munhu angatipasa zviro zvekunyama uye zvekumwiya kupinda Djehovha! Izvi ndizvo zvakazwisiswa na Biniam wambobhuiwa pakutanga.

14. Tingafundei ne muezaniso wa Biniam?

¹⁴ Biniam wakagara Mupupuri wa Djehovha kunyazi eciziya kuti anyautongi e nyika yaaigara aiteerera Apupuri a Djehovha. Kuzia kuti Djehovha aimuda, ndizvo zvakabetsera Biniam kuti akunde kuthya munhu. Iyena wakati: “Kuteererhwa kainga kakashata maningi kupinda zvandairangarira.” “Asi ciro cainyanya kundithyisa kupinda kuteererhwa ne anyautongi kainga kuri kuphikiswa ne anyaukama angu. Ndaithya kutsukwarisa baba angu ainga asiripi Mupupuri wa Djehovha uye kuti anyaukama angu aizopsveruka nge ndaa yangu.” Kunyazi zvakadaro Biniam wainga anorugondo rokuti Djehovha anoriritira munhu anomuda. Iyena unoti: “Ndakatanga kurangarira mushobo wakabetsera Djehovha hama dzakabatana ne migariro inoshupha maningi, zvakadai kukonerhwa zvekurarama nazvo rusaruro. Uye ubhinya. Ndaizviziya kuti kana ndikasama  kusiya Djehovha, ayena aizondikomborera. Pandakasungwa kakawanda uye kutambudzwa, inini ndakakwanisa kuona mushobo unotibetsera Djehovha kana tikarumbwa takagondeka.” Djehovha akagara Baba kuna Biniam uye hama dzakagara mhuri kuna Biniam.

15. Ngei zvisikazi kushata kuthya kufa?

¹⁵ Bhaibheri rinoti rufu ndi muzondi. (1 Ako. 15:25, 26) Ndiyo ndaa, isusu tinothya kufa maka-maka paya patinoziya kuti tinonhenda inothyisa uye umwe we mu mhuri yedu anonhenda yakadaro. Asi ngei tecithya kufa? Ngekuti Djehovha akatisika no cido cekurarama nekusikaperi. (Mup. 3:11) Nguwa dzimweni kuthya kufa kunodziirira upenyu wedu. Nge muezaniso, izvi zvingatibetsera kusanangura zvekurhya zvakanaka, kugara ne urongwa wakanaka wekuita maezersisiyo uye kutopsvaka kuraphwa kana zvecidikanwa, kusiya izvona atikandi upenyu pa ngozi pasina cikonzero.

16. Sathani unokhorovhera kudini kuthya katinoita kufa?

¹⁶ Sathani unoziya kuti upenyu unokosha maningi katiri. Asi iyena wakabhuya kuti ticapasa zvese zvatinazvo—kutobatanidzawo ushamwari wedu na Djehovha—kuti tiponese upenyu wedu. (Djobo 2:4, 5) Asi andizvopi! Kunyazi zvakadaro, ngekuti iyena “uno simba rekukonzera rufu” Sathani unoseenzesa kuthya katinoita kufa kuti tisiye Djehovha. (Aheb. 2:14, 15) Nguwa dzimweni, Sathani unoseenzesa anhu kuti athyisidzire aseenzi a Djehovha kuti acaauraya kana akarumbwa akagondeka kuna Djehovha. Pa migariro dzimweni Sathani unoseenzesa kurhwara kakakura kuti aedze kuti tisateerere mitemo ya Djehovha. Ngo muezaniso, mamedhiko uye anyaukama asikaseenzeri Djehovha angaedza kutibambidzira kuti tikandhwe ngazi ciro cisikapfarirhwi na Djehovha. Nguwa dzimweni awona angaedza kutibambidzira kuti titendere mishobo yekuraphwa isikapindirani no mitemo ya Djehovha.

17. Maererano na Aroma 8:37-39, ngei tisikadikani kuthya kufa?

¹⁷ Apana munhu unoda kufa, asi kana zvikaitika ngatigare ne rugondo rokuti Djehovha aazotikanganwi uye aazosii kutida. (Erengai Aroma 8:37-39.) Kana shamwari ya Djehovha ikafa, ayena acarumbwa eciirangarira, unoita hingana kuti iyena uciri mupenyu. (Ruka 20:37, 38) Ayena anoda maningi kumumutsa. (Djobo 14:15) Djehovha akaripa mutengo wakakura kuti “tiwone upenyu usikaperi.” (Juau 3:16) Isusu tinokwanisa kuzwa kuda kunotiita Djehovha. Ndiyo ndaa patinobatana nekurhwara kakakura uye ne migariro ingatitora dakara pakufa, tinopsvaka Djehovha kuti atipase nyaradzo ungwaru uye simba. Ndizvo zvakaizwa na Valérie ne mwamuna wake.—Pis. 41:3.

18. Tingafundei no muezaniso wa hanzvadzi Valérie?

¹⁸ Valérie paainga ano makore 35, wakabvunzwa kuti wainga ano kanseri inouraya uye isikanyanyi kuonekwa. Asi rudo rakamubetsera kuti akunde kuthya. Iyena wakati: “Pandakabvunzwa kuti ndainga ndino nhenda ii zvakacinja upenyu wedu ciriporipoco. Kuti ndipone ndaidikana kuita operasau inothyisa. Ndakaongororhwa ne mamedhiko akawanda, asi apana kana umwe wawo waida kuita operasau asikaseenzesi ngazi. Ndaithya maningi, asi ndainga ndisikadikani kuita ciro cinorambidzwa na Djehovha ndotenda ngazi! Ke upenyu wangu wese, Djehovha akandipangidza kakawanda kuti aindida maningi. Hino ndainga ndino mukana wekupangidza  rudo rangu kaari. Hino pese pandaitambira masoko akashata, ndaibambirira kuda kuita cisananguro cinopfadza Djehovha. Nekuhamba ke nguwa, ndakakwanisa kuizwa operasau pasikaseenzeswi ngazi. Kunyazi ndicirikurhwara hangu, Djehovha acirikurumbwa ecitipasa zvese zvatinoda. Ngo muezaniso, kumapeto e sumana ndisati ndabvunzwa kuti ndainga ndino nhenda iyona takafunda pa misangano musoro waiti ‘Kumirisana Nematambudziko Emazuva Ano Takashinga.’ * Fundo ii yakatibetsera maningi. Isusu takaifunda kakawanda maningi. Kuona fundo dzakadai uye kugara ne urongwa we kufunda, zvakatibetsera kuti tiite zvisananguro zvakanaka.”

19. Cinyi cicaitika mbai-mbai pano?

¹⁹ No rubetso ra Djehovha, hama dzedu mu nyika yese dzinosokwanisa kukunda migariro inoshupha, uye kuphikisa Sathani. (1 Ped. 5:8, 9) Imwimwi mungazviitawo. Nokukasika Djehovha acapasa mutemo kuti Djesu ne akadzodzwa “aparadze mabasa a Sathani.” (1 Juau 3:8) Mumasure mazvo anhu a Mwari pasi pano “aazothyi ciro uye aazogari ne cikonzero cekuthya.” (Isa. 54:14; Mik. 4:4) Izvi zvisati zvaitika, tinodikana kupeta masimba kuti tikunde kuthya.

20. Cinyi cicatibetsera kukunda kuthya?

²⁰ Tinodikana kurumbwa tecibambisa rugondo redu rokuti Djehovha anotida uye acarumbwa ecitidziirira. Ciro cicatibetsera kugara ne rugondo irona, nge ce kubvunzana ma eshiperiensiya uye kunyasa kurangarira mushobo wakadziirira Djehovha anhu ekare. Uye kunyasawo kurangarira mushobo wakatibetsera Djehovha kukunda zvinetso mu upenyu. No rubetso ra Djehovha, isusu ticakwanisa kukunda kuthya!—Pis. 34:4.