ANHU akawanda anoziya nhorondo inoreketa kuti Djesu akaturikwa pa danda rekutambudzikira pakati pe mabhinya mairi. (Mat. 27:35-38) Asi anhu amweni anotendera kuti Bhaibheri ariripi kureketa zvirokwazvo parinobhuya kuti muiri wa Djesu wakagadzirirhwa kuti uwigwe.—Mark. 15:42-46.

Apsvakisisi anganani e ma Evhangeri aatenderani nazvo kuti munhu wakaurairhwa pa danda waizogadzirirhwa uye okotswa. Awona aitendera kuti anhu aya aizokotswa nge mushobo wakasiyana. Mutapi we masoko unozwi Ariel Sabar, wakatara pa revhista Smithsonian ecipanganidza kuti ngei anhu amweni ecirangarira kudaro. Iyena wakati: “Kukhomerhwa pa mucinjikwa (danda) wainga uri muphanico wakagadzirirhwa mabhinya akanyanyisa e pa mutanha. Apsvakisisi amweni anoona kuti azvizi kusisira kuti Aroma aizotendera kuti munhu wakatongerhwa rufu rakadai akotswe.” Aroma aida kupsverusa mabhinya nge mushobo wakashatisisa, osiya kuti mutumbi wawo ugare wakaturikwa pa danda kuti zvinyama zvemushango zvirhye. Zvaisarezvo zvaikhandirhwa murindi raikhandirhwa muiri dzakawanda dze anhu akafa.

Asi aceri e mapuwe anopangidza zvimweni. Ngo muezaniso, Adjudha anganani akauraiwa. Muna 1968, pakagumirhwa makodo e mwanarume umweni wainga akauraiwa pa danda mu mazuwa a Djesu. Makodo awona akgumirhwa duze no ku Djerusarema mu guwa rainga riri re muri ye ciDjudha, mu bhokisi raiigwa makodo. Pa makodo awona painga pano godo recisisinho rainga rakaborhwa no prego ye simbi ino 11.5 centímetros (4.5 in.) “Godo irona rainga riri re mwanarume waizwi Yehochanan.” Sabar unoti, “ndizvona zvakabetsera kukanda mugumo shwiro yairekethwa ke makore akawanda nge zve cokwadi cinorekethwa mu Maevhangeri nge zve kukotswa ka Djesu.” “Godo recisisinho ra Yehochanan ndi muezaniso wekuti Aroma aitendera kuti munhu wakakhomerhwa akotswe maererano no mutemo we ciDjudha.”

Godo re cisisinho rinoita kuti paoneke maonero akasiyana-siyana nge zve mushobo wakakhomerhwa Djesu pa danda. Asi zviri pamhene kuti munhu waitongerhwa rufu pa danda hingana bhinya waitokotswawo uye wainga asikakhandirhwi mu mbuto yaikhandirhwa mutumbi dze anhu akafa. Hino zvinobhuiwa no Bhaibheri nge zve kukotswa ka Djesu i zvirokwazvo. Uye zvipangidzo zve aceri e mapuwe zvinotsigira zvinobhuiwa no Bhaibheri.

Uye cinonyanya kukosha ngecekuti Djehovha ndiyena akaphorofita kuti Djesu aizokotswa pakati pe apfumi, uye apana ungaita kuti masoko a Mwari asadzadzike.—Isa. 53:9; 55:11.