1. Makafundei nge zve Musiki?

IMWIMWI makabarirhwa mu mhuri ye ciKristu here? Kana zviri izvona, zviri pamhene kuti kubvira muciri mwana mudoko makafunda nge zva Djehovha. Abereki enyu akamufundisa kuti Djehovha ndiyena Musiki, kuti ano mawara anoshamisa, uye kuti ano cinangwa ce rudo ku anhu ese.​—Ge. 1:1; Zvi. 17:24-27.

2. Anhu amweni anoona kudini aya anotenda kuti kuno Musiki?

² Asi anhu akawanda, aatendi kuti Mwari ariyo, uye akawanda awo aatendi kuti ndiyena Musiki. Kupinda izvona, awona anotenda kuti upenyu wakatanga wega uye wozotanga kuphinduka-phinduka, kubva pa upenyu udoko zvecienda pa upenyu ukuru. Akawanda e anhu aya, nde aya a no ruziyo rakakura maningi. Awona angakwanisa kureketa kuti siensiya yakatoreketa kuti Bhaibheri rinonyepa, uye aya anotendera kuti kuno Musiki ndi anhu anotendera zviro zvese, anhu akapusa, uye aana ruziyo.

3. Ngei zvecikosha maningi kuti titunhudzire kutenda kedu?

³ Maonero e anhu aya ano uzii wakakura maningi, angakwanisa kubata-bata kutenda kedu kuna Djehovha Musiki wedu ano rudo here? Zvinotsamira pa mhinduro yatinopasa pa mubvunzo unoteera, unoti: Ngei tecitenda kuti Djehovha ndiyena Musiki? Nge ndaa yekuti takaita zvekubvunzwa kuti ndizvona here kana kuti takatora nguwa yekuti tinyase kukwarakwatisa pacedu isusu? (1Ako. 3:12-15) Kunyazi tiri Apupuri a Djehovha ke makore akawanda, tinodikana kurumbwa tecitunhudzira kutenda kedu. Kana tikadaro, atizocengedzwi nge anhu anofundisa “uzii usina zvaunobetsera” zvisikaenderani no Soko ra Mwari. (Ako. 2:8; Ahe. 11:6) Kuti tibetsereke pa kutunhudzira kutenda kedu, fundo ino icakwarakwatisa zviro zvinoteera (1) ngei anhu akawanda asikatendi ku Musiki, (2) mungaitei kuti mutunhudzire kutenda kenyu kuna Djehovha Musiki wenyu, uye (3) mungaitei kuti murumbwe mune kutenda kakabamba.

4. Maererano na Ahebheru 11:1 uye no masoko epasi, kutenda ke zvirokwazvo kunotsamira pa cinyi?

⁴ Anhu amweni anorangarira kuti kutenda kuri kuda kureya kutendera ciro pasina cinopangidza kuti zvezvirokwazvo ciriyo. Asi maererano ne Bhaibheri, ikona akutendapi ke zvirokwazvo. (Erengai Ahebheru 11:1, uye masoko opasi.) Onai kuti kutenda ke zvirokwazvo ke zviro zvisikaoneki, hingana kuna Djehovha, Djesu, uye Umambo we kudenga, kunotsamira pa zviro zvinobudisa pamhene kuti zvezvirokwazvo zviriyo. (Ahe. 11:3) Bioquímico umweni pari zvino waa Mupupuri wa Djehovha, iyena wakati: “Kutenda kedu akubvi pa kutenda kakapofumadzwa kunondotendera zvese zvinorekethwa no masientista.”

5. Ngei anhu akawanda anotendera kuti upenyu wakatanga pasina Musiki?

⁵ Pamweni mungadzibvunzisa kuti: ‘Kana pano zviro zvakawanda zvinopangidza pamhene kuti zvezvirokwazvo kuno Musiki, hino ngei anhu akawanda anotendera kuti Mwari apana paanobatanidzwa nge zve kutanga ke upenyu?’ Zvirokwazvo nge zve kuti anhu akawanda asati ambotora nguwa yekuti anyase kukwarakwatisa zviro zvinopandidza pamhene. Ngo muezaniso, Robert, pari zvino waa Mupupuri wa Djehovha, iyena unoti: “Ngekuti ndainga ndisati ndakambozwa pecireketywa nge zve kusikwa ku cikora, inini ndaiwona kuti zvainga zvisiripi zvezvirokwazvo. Asi pandakagumisa makore 20, ndipona pandakagara no cokwadi pandakacedza ne Apupuri a Djehovha uye pandakazwa masoko anopangidza pamhene zvezvirokwazvo kuti aibva mu Bhaibheri anoreketa nge zve kusikwa.” *​—Onai bhokisi“  rinoti, “Masoko Anokosha ku Abereki.”

6. Ngei anhu amweni asikatendi kuti Musiki ariyo?

⁶ Anhu amweni aatenderi kuti kuno Musiki nge ndaa yekuti awona anoda kutendera basi zviro zvaanokwanisa kuona. Asi zvirokwazvo nge zve kuti, awona anotendera zviro zvakawanda zvaasikakwanisi kuona. Ngo muezaniso, mutemo we gravidade. Mutemo iwona iciro cekuti anhu akawanda anotendera. Mushobo we kutenda  unorekethwa mu Bhaibheri unotsamirawo pa “kutenda ke zvirokwazvo pa zviro zvisikaoneki.” (Ahe. 11:1) Kunyasa kukwarakwatisa zviro zvinopangidza pamhene, kunoda nguwa uye simba, izvona ndizvo zvisikadi kuizwa nge anhu akawanda. Munhu asikadi kupsvaka zviro zvinopangidza pamhene kamare kuti kuno Musiki, unopedzesera nge kutenda kuti Mwari akuna.

7. Zviri kuda kubhuya kuti anhu ese akanyasa kufunda aatendi kuti Mwari ndiye akasika nyika here? Panganidzai.

⁷ Masientista manganani, akakwarakwatisa zviro zvinopangidza pamhene uye akaguma pakutenda kuti zvezvirokwazvo Mwari ndiye akasika nyika ino. * Anhu akawanda akaita hingana Robert wamborekethwa nge zvake, airangarira kuti akuna Musiki, ngekuti awona ainga asati ambofunda nge zve Musiki kuma universidade. Kunyazi zvakadaro, masientista akawanda akaguma pa kuziya  uye pa kuda Djehovha. Kuita hingana zvakaitika no masientista aya, tese hedu tinodikana kubambisa kutenda kedu kuna Mwari, pasinei nokuti takafunda maningi here kana kuti haiwa. Apana unokwanisa kutiitira izvona.

8-9. (a) Mubvunzo upi waticadaira parizvino? (b) Ngei zvakanaka kuti tifunde nge zviro zvakasikwa?

⁸ Mungaitei kuti mutunhudzire kutenda kenyu ku Musiki? Ngationei zviro zvingatibetsera kuita izvona.

⁹ Fundai zviro zvakasikwa. Mungatunhudzira kutenda kenyu ku Musiki nge kuringira zvinyama, miti, uye nyeredzi. (Pis. 19:1; Isa. 40:26) Pamunotora nguwa yakawanda mecifunda zviro izvi, mucagara no cokwadi cekuti zvezvirokwazvo Djehovha ndiyena Musiki. Kakawanda kakhona mabhuku edu anounza maartigo anonyasa kupanganidza nge zve kusikwa ke zviro. Mungakwanisa kuonawo hingana kuti maartigo aya anoshupha kuzwisisa. Kunyazi zvakadaro, musasiye kuerenga maartigo awona. Petai masimba ari ese kuti muafunde. Uye musakanganwe kuona mavhidhiyo akanaka mu saite yedu ye jw.org, anoreketa nge zve kusikwa akabudiswa mu magungano e nharaunda e makore akadarika.

10. Pasai muezaniso kuti zvisikwa zvinopangidza kudini kuti kuno Musiki. (Aroma 1:20)

¹⁰ Pamunonga mecifunda nge zve zvisikwa, nyasai kuona zviro zvinopangidza pamhene kuti zvezvirokwazvo kuno Musiki. (Erengai Aroma 1:20.) Ngo muezaniso, pamweni munotoziya kamare nge zve zuwa, irona rinokwanisa kubudisa kupisa kunodikanwa pa nyika yese kuti pagare no upenyu. Asi ironawo rinobudisa zviro zvinozwi raios ultravioleta, uye izvona zvingakwanisa kutikuwadza. Isusu anhu tinoda kudziirirhwa pa zviro izvi. Asi kureketa zvazviri tiri kudziirirhwa! Nge gwanza ripi? Nyika yedu ino civhikhiro cinoivhikhira pa zviro izvi—icona cinozvi kamadha ye gás ozônio, kamadha iyona inovhikhira zviro zvese zvingakwanisa kukuwadza nyika yedu. Maraio aya paanobambirira kupisa, gás ozônio inonga yecitunhudzirikawo. Amutenderani nazvo here kuti kudziirirhwa uku kakaizwa nge munhu? Uye kuti munhu iyena anodikana kugara Musiki akangwara uye ano rudo?

11. Mungagumira kupi masoko angamubetsera kutunhudzira kutenda kenyu ku Musiki? (Onai bhokisi rinoti, ““ Zviro Zvingabambisa Kutenda Kenyu.”)

¹¹ Kana mecida masoko akawanda angamubetserai kuti mutunhudzire kutenda kenyu ku Musiki, pindai mu Índice de Publicações da Torre de Vigia uye mu jw.org. Imwimwi mungakwanisa kutanga no mundandanda we maartigo uye no mavidhiyo ano musoro unoti, “Zvakangoitika Zvega Here?” Awona aazi kureba maningi uye anopangidza zviro zvinobudisa pamhene uye zvinoshamisa nge zve zvinyama uye no zvisikwa zvimweni. Uye izvona zviri kupasa miezaniso yakanaka yekuti masientista ari kuteedzera kudini zviro zviri mu nyika.

12. Patinonga tecifunda Bhaibheri, ngazvipi zvatinodikana kunyasa kuona?

¹² Fundai Bhaibheri. Bioquímico wamborekethwa nge zvake, iyena wainga asikatendi ku Musiki. Asi ne kuhamba ke nguwa, wakatanga kugara no kutenda. Iyena unoti: “Kutenda kangu kainga kusikatsamiri basi pa zviro zviya zvandakafunda hingana sientista, asi kakatsamirawo pa kufunda kandakaita Bhaibheri. Pamweni maano ruziyo rakakura pa zviya zvinofundiswa no Bhaibheri. Kunyazi zvakadaro, kuti mubambise kutenda kenyu ku Musiki, imwimwi munodikana kurumbwa mecifunda Soko ra Mwari. (Djos. 1:8; Pis. 119:97) Onai kuti Bhaibheri rinonyasa kupanganidza zviro zvakamboitika. Nyasai kuona uphorofita urimo uye kuti matii awo anopindirana kudini no ndima dzimweni. Kuita izvona zvingakwanisa kutunhudzira kutenda kenyu ku Musiki ane ungwaru, ano rudo uye kuti ayena akafemera Bhaibheri. *​—2Ti. 3:14; 2Pe. 1:21.

13. Mazano api anobetsera atinogumira mu Soko ra Mwari?

 ¹³ Pamunonga mecifunda Soko ra Mwari, onai kuti mazano aro angabetsera kudini. Ngo muezaniso, Bhaibheri rakagara rareketa kare kuti kudisa mare kunokuwadza uye izvona zvinounzisa “matambudzuko akawanda.” (1Ti. 6:9, 10; Zvie. 28:20; Mt. 6:24) Ngwadzo ii iciri kuseenza here dakara no nyamasi uno? Bhuku rinozwi, The Narcissism Epidemic (A epidemia do narcisismo mu Ciputugezi) rinoti: “Kakawanda kakhona, anhu anodisa maningi zviro ndi anhu asikapfari uye anogara akatsukwara nguwa dzese. Kugara basi no murangariro we kudisa maningi mare, kungakwanisa kutunhudzira matambudziko e mundangariro, kutobatanidzawo e muiri.” Pasina mubvunzo, mazano e mu Bhaibheri e kuti tisadise maningi mare anobetsera zvezvirokwazvo! Munokwanisa kurangarira mazano amweni ari mu Bhaibheri akakwanisa kumubetserai? Patinonyasa kurangarira mazano akanaka ari mu Bhaibheri, tinokwanisa kuzwisisa kuti Musiki wedu ane rudo anoziya zviro zvakatinakira. (Tg. 1:5) Nge ndaa yazvo, izvona zvinotikohomedzesa kuti tirumbwe tecipsvaka mazano ake nguwa dzese mu upenyu wedu. Uye migumisiro yakhona, upenyu wedu ucapfadza maningi.​—Isa. 48:17, 18.

14. Fundo ye Bhaibheri ingamufundisei nge zva Djehovha?

¹⁴ Fundai no cinangwa cakanaka cekuziya Djehovha. (Ju. 17:3) Pamunonga mecifunda Bhaibheri, mucakwanisa kufunda nge zve unhu uye mawara a Djehovha—mawara awona ndiwonawo amakawona pamakafunda nge zve zvisikwa. Mucakwanisa kuona Djehovha hingana munhu kamare kamuri, haiwa ciro cekurangarirawo. (Eki. 34:6, 7; Pis. 145:8, 9) Pamunonga mecibambirira kuziya zvakawanda nge zva Djehovha, rudo renyu kaari ricatunhudzirikawo uye ushamwari wenyu naye ucagara wakabamba.

15. Ngei zvakanaka kureketawo no amweni nge zve kutenda kenyu ku Musiki?

¹⁵ Reketai no amweni nge zve kutenda kenyu kuna Mwari. Izvona zvicaita kuti kutenda kenyu kugare kakabamba. Asi mungaitei kana munhu ecida kuziya kuti Mwari ariyo here kana akuna uye imwimwi motama kuziya kuti mungamudaira kudini? Edzai kupsvaka mhinduro dze mu Bhaibheri dzinopanganidzwa mu mabhuku edu, pedzepo cedzai nge zvazvo no munhu iyena. (1Pe. 3:15) Mungakwanisawo kukumbira rubetso ku aparidzi amweni agara no basa. Uye kunyazi munhuwo akatama kutendera zviya zvinoreketywa no Bhaibheri, psvakisiso yamunonga maita, munonga musikazi kupedza nguwa. Iyona icamubetserai kuti mutunhudzire kutenda kenyu ku Musiki. Migumisiro yakhona, imwimwi amuzotsotswi nge aya anodziita hingana kuti akangwara kana kuti ano ruziyo rakakura maningi, asi anoreketa kuti akuna Musiki.

16. Cinyi cingaitika kana tikasama kubambisa kutenda kedu?

¹⁶ Kunyazi taano nguwa yakareba teciseenzera Djehovha, tinodikana kurumbwa tecibambisa kutenda kedu. Ngei? Ngekuti kana tikatama kudaro, kutenda kedu kungakwanisa kuremba. Edzurirai kuti kutenda kunobatanidza zviro zvatisikakwanisi kuona. Uye zviro zvatisikakwanisi kuona, zviri nyore kukasika kuzvikanganwa. Ndiyo ndaa muphostori Pauro wakadaidza kusama kutenda hingana “citema cinotibata nokukasika.” (Ahe. 12:1) Tinodikana kuitei kuti tisabathwe no murau iwona?​—2Ate. 1:3.

17. Rubetso ripi ratinaro rinoita kuti tirumbwe tino kutenda?

¹⁷ Cekutanga, rumbwai mecikumbira Djehovha mwiya mucena wake. Ngei? Ngekuti kutenda kunobatanidzwawo pa zvibereko zvo mwiya. (Aga. 5:22, 23) Pasina rubetso re mwiya mucena, atikwanisi kurumbwa tino kutenda kedu ku Musiki. Kana tikarumbwa tecikumbira mwiya mucena, Djehovha acatidaira. (Ru. 11:13) Tingakwanisa kutonamata teciti: “Titunhudzirei kutenda.”​—Ru. 17:5.

18. Maererano na Pisarema 1:2, 3, makomborero api atingagara nawo nyamasi uno?

 ¹⁸ Cecipiri, rumbwai meciita fundo ye munhu ega ye Soko ra Mwari. (Erengai Pisarema 1:2, 3.) Panguwa yakatarhwa pisarema iri, anganani basi e Aisraeri ndiwona ainga ano mupumburu we Mutemo wa Mwari. Asi madzimambo uye apristi aidikana kugara no mipumburu ii ye Mutemo, uye mumakore manomwe ega-ega, “anarume, anakadzi, ana adoko” uye atorhwa aigara Muisraeri, aidikana kuungana pamwepo kuti azwe kuerengwa ke Mutemo wa Mwari. (Dhe. 31:10-12) Mu nguwa ya Djesu, anhu anganani basi ndiwona ainga ano mipumburu ye Mitemo basi uye mipumburu yakawanda yaigara mumasinagoga. Asi kusiyana no kare, nyamasi uno, anhu akawanda ano Bhaibheri kana kuti rimwe re dii rakhona. Zvezvirokwazvo, makomborero akakura maningi. Tingapangidza kudini kuti tinoreremedza Bhaibheri?

19. Tinodikana kuitei kuti kutenda kedu kurumbwe kakabamba?

¹⁹ Tinopangidza kuti tinoreremedza cikomborero cekugara no Soko ra Mwari nge kurierenga mazuwa ese. Atidikani kuita kuti fundo yedu ye munhu ega igare pa mbuto yecipiri tecirangarira kuti: ‘Ndicafunda kana ndikaona nguwa.’ Tinodikana kutora nguwa yekuerenga nokufunda Bhaibheri uye kubatisisa urongwa wedu wekufunda. Kana tikadaro ticakwanisa kurumbwa tino kutenda kakabamba.

20. Tinodikana kushinga kuitei?

²⁰ Anhu ano “uzii uye akafunda maningi” aatendi mu Soko ra Mwari, asi isusu takasiyana nawo. Isusu tinotenda zvinobhuya Bhaibheri (Mt. 11:25, 26) Nge ndaa ye Bhaibheri, tinoziya kuti ngei nyika yakadzara no matambudziko uye kuti Djehovha acaitei kuti aigadzirise. Ndiyo ndaa rumbwai makashinga pakutunhudzira kutenda kenyu uye kubetsera anhu akawanda kuti agare nokutenda kune Musiki wedu. (1Ti. 2:3, 4) Rumbwai mecietsera zuwa re kuti anhu ese ari pa nyika acareketa masoko atinogumira pana Zvakapangidzwa 4:11: “Djehovha Mwari wedu, makasisira kuti mutambire kukudzwa . . . ngokuti makasika zviro zvese.”