1. Mubvunzo upi watinodziita patinorangarira zviro zvakasikwa na Djehovha?

PATINORANGARIRA zviro zvakasikwa na Djehovha, pamweni tinozwawo hinga zvakareketwa nge zve mapisarema Dhavhidhi, pa nguwa imweni iyena wakanamata kuna Djehovha eciti: “Pandinoringira matenga enyu, mabasa e zvinwe zvenyu, mwedzi uye nyeredzi dzamakasika, munhu cinyi kuti mumurangarire uye mwana we munhu kuti mumuriritire?” (Pis. 8:3, 4) Kuitawo hingana Dhavhidhi, patinoona kuti atiripi ciro pakuezaniswa ne denga uye nyika, pamweni tingashamiswa kuona kuti Djehovha anotida. Asi hingana zvaticaona, Djehovha aazi basi kupangidza rudo ku anhu e kutanga Adhamu na Evha, asi akaitawo kuti aona agarewo nhengo ye mhuri yake.

2. Adhamu na Evha akapaswa basa ripi na Djehovha?

² Adhamu na Evha ndiwona ana ekutanga akasikwa na Djehovha kuti agare pa nyika pano. Djehovha aiemera kuti Adhamu na Evha agare nhengo dze mhuri yake. Ndiyo ndaa ayena akaabvunza kuti: “Baranai muwande, dzadzai uye onererai nyika.” (Ge. 1:28) Adhamu na Evha aidikana kubara ana uye kuonerera nyika. Kudai awona naakazwira Mwari, uye oita basa raainga abvunzwa na Djehovha kuti aite, Adhamu na Evha pamwepo ne ana awo, aizorumbwa ari nhengo ye mhuri ya Mwari nokusikaperi.

3. Ngei tecikwanisa kureketa kuti Adhamu na Evha, ainga ari nhengo dzinokosha mu mhuri ya Djehovha?

³ Adhamu na Evha ainga ari nhengo dzinokosha mu mhuri ya Djehovha. Pana Pisarema 8:5 uye masoko opasi, Dhavhidhi wakareketa masoko anoteera nge zva Djehovha paakasika munhu: “Makamuita akaterera kudarika ngirozi, mukamukanda korona ye kukudzwa ne mbiri.” Icokwadi kuti anhu aana simba rimwero, aatodzani pa ungwaru uye pakukwanisa kuita zviro kudarika  ngirozi. (Pis. 103:20) Asi munhu, wakadodoka pa kudarika ngirozi “dzino simba.” Izvi zvinoshamisa! Zvezvirokwazvo Djehovha akapasa abereki edu ekutanga upenyu wakanaka.

4. Cinyi cakaitika na Adhamu na Evha mu mhuri ya Djehovha, uye ticaonei mu fundo ino?

 ⁴ Zvinotsukwarisa kuti, Adhamu na Evha aazi kurumbwa ari nhengo ye mhuri ya Djehovha. Hinga zvaticaona mberiyo, izvona zvakaunzisa migumisiro yakashata ku ana awo. Kunyazi zvakadaro, cinangwa ca Djehovha ku anhu acizi kucinja. Ayena aciri kuda kuti anhu anomuzwira agare ana ake nokusikaperi. Mu fundo ino, ticaona kuti Djehovha akaitei kuti apangidze kuti isusu tinokosha kaari. Uye ticazoonawo kuti ngazvipi zvatinodikana kuita kuti tirumbwe tiri nhengo ye mhuri ya Mwari. Pakupedzesera, ticada kuona makomborero acapaswa ana a Mwari acazorarama pasi pano nokusikaperi.

5. Tingapangidza kudini kuti tinotenda nge kusikwa ketakaizwa ne mufanikiso wa Mwari?

⁵ Djehovha akatisika no mufanikiso wake. (Ge. 1:26, 27) Isusu anhu takasikwa no mufanikiso wa Mwari. Djehovha akatipasa cipo cekukwanisa kupangidza mawara amwe amwewo no ake. Mawara aya, anokwanisa kutibetsera kuti tigare mushobo we munhu waanoda mu mhuri yake. Ngo muezaniso, rudo, usisi, kugondeka, uye unatsi. (Pis. 86:15; 145:17) Patinopeta masimba kuti tipangidze mawara akadai kuna Djehovha, tinonga tecipangidza kuti isusu tinotenda nge kutisika kaakatiita ne mufanikiso wake. (1Pe. 1:14-16) Kusiya izvona, upenyu wedu unopfadza uye une rewo. Ngekuti akatisika ne mufanikiso wake, Djehovha akatipasa ruziyo rinotibetsera kuti tigare munhu waanoda mu nhuri yake.

6. Kusikwa ke nyika, kunopangidza kudini kuti anhu anokosha kuna Djehovha?

⁶ Djehovha akatigadzirira nyika yakanaka. Asati asika munhu we kutanga, Djehovha akatanga kugadzira nyika yakanakisisa kuti izogare anhu. (Djo. 38:4-6; Dje. 10:12) Nge rudo uye rupo, Djehovha akakanda pa nyika zviro zvakawanda uye zvakanaka zvinoita kuti tipfare. (Pis. 104:14, 15, 24) Paakamboima kuti awone zviro zvese zvaakasika, Djehovha “akaona kuti zvese zvainga zvakanaka.” (Ge. 1:10, 12, 31) Ecipangidza kuti anhu anokosha, Djehovha akaapasa ‘simba rekuti aonerere’ zvisikwa zvake zvese zvinoshamisa zviri pa nyika. (Pis. 8:6) Cinangwa ca Mwari nge cekuti anhu akakwana azwe mupfaro we kuonerera zvisikwa zvinoshamisa nokusikaperi. Imwimwi munosotenda Djehovha nge kariro ii yakanaka here?

7. Djoshuwa 24:15 inopangidza kudini kuti anhu ano cipo cekukwanisa kusanangura zvekuita?

⁷ Djehovha akatipasa cipo cekukwanisa kusanangura. Isusu tinokwanisa kusanangura zvatinoda kuita mu upenyu wedu. (Erengai Djoshuwa 24:15.) Cipo icona cinodaidzwa kuti, cipo cekukwanisa kusanangura zvekuita. Djehovha anopfara maningi patinosanangura kumuseenzera. (Pis. 84:11; Zvi. 27:11) Pane mbuto dzakawanda mu upenyu dzatingakwanisa kuseenzesa cipo cekukwanisa kusanangura zvekuita. Onai muezaniso wetakasiirhwa na Djesu.

8. Djesu akaseenzesa kudini cipo cake ce kusanangura zvekuita?

⁸ Teciteedzera muezaniso wa Djesu, isusu tingakwanisa kusanangura kukanda zvido zve amweni pakutanga kudarika zvido zvedu. Pa nguwa imweni, Djesu no aphostori ake ainga akaremba maningi, ndiyo ndaa akaita rhwendo kuti aende ku mbuto yakanyararisa kuti ambozorore padoko. Asi, azvizi kuitika. Cikwata cakakura ce anhu cakamuteera, uye anhu ainga ecida kufundiswa ndi Djesu. Djesu aazi  kuwatsamwira nge zvazvo. Kusiyana na izvona, ayena akaazwira usisi. Hino, Djesu akaitei? “Ayena akatanga kuwafundisa zviro zvakawanda.” (Mk. 6:30-34) Kana tikateedzera muezaniso wa Djesu nge kupedza nguwa uye no simba redu kuti tibetsere amweni, tinonga tecikudza Baba edu e kudenga. (Mt. 5:14-16) Uyewo, tinonga tecipangidza Djehovha kuti tinoda kugara nhengo ye mhuri yake.

9. Abereki anodikana kuedzurirei?

⁹ Djehovha akasika anhu kuti akwanise kubara ana, uye mutoro we kuwafundisa kuti ade kumuseenzera. Kana imwimwi muri baba kana mai, munotenda nge cipo ici here? Icokwadi kuti Djehovha akapasa simba ngirozi kuti dzikwanise kuita zviro zvakasiyana-siyana, asi idzona adzizi kutambira cipo camunaco. Ndiyo ndaa, abereki anodikana kureremedza cipo ce kurera ana. Kurera ana, “mukupangira uye mukutungamirira ka Djehovha” imhiko ye rugondo yakatambira abereki, uye ibasa rakacena. (Aef. 6:4; Dhe. 6:5-7; Pis. 127:3) Kuti abetsere abereki, sangano ra Djehovha rinopasa mafaramenta akawakirhwa mu Bhaibheri, akaita hingana mabhuku, mavhidhiyo, ngoma, uye no zviro zvimweni zviri mu interneti. Zviri pamhene kuti, Baba edu ari kudenga pamwepo no Mwana wake Djesu, anokoshesa madjaha. (Ru. 18:15-17) Abereki paanogonda Djehovha uye oita zvese zvaanokwanisa kuti ariritire ana awo, Djehovha anopfara. Uye abereki awona, anopasa ana awo mukana wokuti azogarewo nhengo ye mhuri ya Djehovha nokusikaperi!

10-11. Mukana upi watinopaswa na Djehovha eciseenzesa rusudzunuro?

¹⁰ Djehovha akapasa upenyu we Mwana wake unokosha kuti tikwanise kugarazve nhengo ye mhuri yake. Hinga zvataona  mundima 4, Adhamu na Evha akasiya kugara nhengo ye mhuri ya Djehovha, uye zvimwezvo zvakaitikawo ku ana ake. (Aro. 5:12) Adhamu na Evha akasisira kuti asagare nhengo ye mhuri ya Djehovha, ngekuti akasanangura kutama kuzwira Mwari. Hino zvakadiniwo no ana ake? Djehovha anoda maningi anhu uye akaita kuti awona atorhwe hinga ana a Djehovha. Ayena akaita izvona eciseenzesa cibairo ce Mwana wake umwe ega, Djesu Kristu. (Ju. 3:16; Aro. 5:19) Nge ndaa ye rusudzunuro rakariphwa na Djesu Kristu, anhu anokwana kuita 144 000 akagondeka anokwanisa kuita kuti atorhwe hinga ana ake.​—Aro. 8:15-17; Zva. 14:1.

¹¹ Kusiya akadzodzwa, mamirionji e anhu amweni akagondeka ari kupeta masimba ari ese kuti aite kuda ka Mwari mazuwa ano. Awona ari kuetsera kuti azogare nhengo ye mhuri ya Mwari mumasure me muedzo wekupedzesera mu ciuru ce makore. (Pis. 25:14; Aro. 8:20, 21) Nge ndaa ye kariro ii, mamirionji e anhu aya anokwanisa kudaindza Djehovha kuti “Baba” uye Musiki wawo. (Mt. 6:9) Aya acamutswa acaonawo mukana we kufunda nge zva Djehovha. Kana awona akasanangura kuzwira Mwari, acagarawo nhengo ye mhuri ya Djehovha.

12. Tiri kuda kudaira mubvunzo upi zvino?

¹² Hinga zvataona, Djehovha akapangidza nge mishobo yakawanda kuti anokoshesa anhu. Ayena akatora akadzodzwa hinga ana ake, uye anopasa “cikwata cakakura ce anhu” mukana wekuti agare ana ake mu nyika ipsva. (Zva. 7:9) Tinodikana kuitei zvino kuti tipangidze Djehovha kuti tinoda kugara nhengo ye mhuri yake nokusikaperi?

13. Tingaitei kuti tigare nhengo ye mhuri ya Mwari? (Marko 12:30)

¹³ Pangidzai rudo renyu kuna Djehovha nge kumuseenzera no mwoyo wenyu wese. (Erengai Marko 12:30.) Ngo rudo Djehovha akapasa anhu zvipo zvakawanda, cimwe ce zvipo izvi, nge cekukwanisa kumunamata. Isusu tinopangidza kuti tinoda Djehovha,  ‘patinotondowedza nhungamiriro dzake.’ (1Ju. 5:3) Ecireketa nge zva Baba ake, Djesu anotibvunza kuti tiende koita kuti anhu agare afundi, teciabhabhatidza. (Mt. 28:19) Anotipasazve mutemo wekuti tidanane. (Ju. 13:35) Djehovha acaita kuti aya anopurutana mitemo ii, agare hinga nhengo ye mhuri yake nokusikaperi.​—Pis. 15:1, 2.

14. Tingapangidza kudini kuti tinoda amweni? (Mateu 9:36-38; Aroma 12:10)

¹⁴ Pangidzai rudo kuno amweni. Rudo ndirona wara rinokosha maningi kuna Djehovha. (1Ju. 4:8) Djehovha akatida kunyazi isusu tisati tamuziya. (1Ju. 4:9, 10) Isusu tinokwanisawo kuteedzera Djehovha nge kupangidza rudo ku amweni. (Aef. 5:1) Mushobo wakanaka wekupangidza rudo kuno amweni, ngewe kuabetsera kuti afunde nge zva Djehovha nguwa iciripo. (Erengai Mateu 9:36-38.) Kana tikadaro, tinonga teciapasa mukana wekuti awona agarewo nhengo ye mhuri ya Mwari. Kunyazi mu masure mekuti munhu abhabhatidzwa, tinodikana kuapangidzira rudo uye kuareremedza. (1Ju. 4:20, 21) Tingazviita kudini? Tingaita izvona nge kuapangidza pese pazvinobvira kuti tinoada. Ngo muezaniso, kana awona akaita ciro catisikakwanisi kuzwisisa, atidikani kuaona hingana kuti aita izvona nge ndaa ye umbau kana bibvu. Pane kudaro, tinodikana kukudza hama dzedu uye kudziona hinga akuru kupinda isusu.​—Erengai Aroma 12:10; Afi. 2:3.

15. Tinodikana kupangidza usisi uye runako kuna ani?

¹⁵ Pangidzai usisi no runako ku anhu ese. Kana tecida kugara pakati pe anhu ano citenderhwa cekudaidza Djehovha hinga Baba nokusikaperi, tinodikana kuseenzesa mu upenyu wedu zvese zvinobva mu Soko rake. Nge muezaniso, Djesu akafundisa kuti tinodikana kupangidza usisi uye runako ku anhu ese, kunyazi no azondi edu. (Ru. 6:32-36) Pa nguwa dzimweni, tingazviona hingana zvinoshupha kuita izvona. Kana zvakadaro, tinodikana kufundira kurangarira uye kuita hingana Djesu. Kana tikaita zvese zvatinokwanisa kuti tizwire Djehovha uye titeedzere Djesu, tinopangidza Baba edu e kudenga kuti tinoda kugara nhengo ye mhuri yake nokusikaperi.

16. Tingaitei kuti zina re mhuri ya Djehovha risasvipiswe?

¹⁶ Dziirirai zina re mhuri ya Djehovha. Mu mhuri, zvinoitika kuti mwana mudoko unoteedzera mukoma ake akuru. Kana mukoma ecirarama maererano no mazano e Bhaibheri mu upenyu wake, awona acagara muezaniso wakanaka ku munukuna wawo. Asi kana mukoma akatanga kuita zviro zvakashata, zvingaitawo kuti munukuna wake ateedzerewo muezaniso wake wakashata. Zvimwezvoo zvingakwanisa kuitika mu mhuri ya Djehovha. Rangarirai muKristu zvokuti kareko wainga akagondeka, asi wozogara mupanduki, osanangura kutora upenyu we useki kana kuitawo zviro zvimweni zvakashata. Izvi, zvingaitawo kuti amweni ade kuteedzera muezaniso wake wakashata. Asi aya anoita kudai, anokanda pa ngozi kana kutosvipisa zina re mhuri ye anamati a Djehovha. (1Ate. 4:3-8) Ndiyo ndaa, tecidikana kuramba miezaniso yakashata uye kusama kutendera kuti ciro cipi haco citiendese kure na Baba edu ane rudo e kudenga.

17. Murangariro upi wakashata watisikadikani kugara nawo, uye ngei?

¹⁷ Gondai Djehovha, haiwa mu zviro zve kunyama. Djehovha anotipikira kuti kana tikatanga kupsvaka Umambo wake pakutanga uye tomuzwira, ayena acatipasa zvekurhya, zvekupfeka, uye pekugara. (Pis. 55:22; Mt. 6:33) Tecirangarira zviro izvi, atidikani kuona kuti zviro zvekunyama zvinopaswa ne nyika ino, zvingatidziirira kana kuti kutipasa mupfaro usikaperi. (Afi. 4:6, 7) Kunyazi kana tino mare yekukwanisa kutenga zviro zvakawanda, tinodikana kurangarira kuti, tino nguwa no simba rekuseenzesa no kucengeta zviro izvona  here. Tinonyanya kubatikana here pa zviro zvedu zve kunyama? Tinodikana kurangarira kuti Mwari anoda kuti isusu tigare anhu anoita zviro zvakanaka mu mhuri yake. Izvi zvinoda kureya kuti, atidikani kusiya ciro cipi haco cecitipingaidza. Isusu atidi kuita hingana djaha riya rakaramba mukana wekuseenzera Djehovha uye kutorhwa hinga mwana wake—zvese izvi, zvakaitika ngekuti iyena wainga akabatisisa maningi zviro zve kunyama!​—Mk. 10:17-22.

18. Makomborero api acapaswa anhu anozwira Mwari?

¹⁸ Anhu anopurutana Djehovha acagara no makomborero—e kumuda, no kumunamata nokusikaperi! Aya ano kariro ye kurarama pano pa nyika mu paraizo, acagarawo ne mupfaro we kuonerera nyika, mbuto yawo ye kurarama akakwana. Pacatanga kutonga Umambo wa Mwari, nyika uye no zviro zviripo zvinonga zvagadziriswa. Djesu acapedza matambudziko ese akaitiswa nge kushaisha ka Adhamu na Evha paakasanangura kusiya mhuri ya Mwari. Djehovha acamutsa mamirionji e anhu uye awona acagara no mukana we kurarama nokusikaperi no uthongo wakakwana mu nyika inonga yacinjwa yodaidzwa kuzwi paraizo. (Ru. 23:42, 43) Uye anhu anomuzwira paanonga ecigara anhu akakwana padoko no padoko, umwe na umwe wawo acagara no ‘kukudzwa’ hingana zvakatarhwa na Dhavhidhi.​—Pis. 8:5.

19. Munodikana kushinga kuitei?

¹⁹ Kana muri ku dii re “cikwata cakakura ce anhu,” imwimwi muno kariro yakanaka. Mwari anomuda; uye ayena anoda kuti mugare nhengo ye mhuri yake. Ndiyo ndaa, itai zvese zvamunokwanisa kuti mupfadze Mwari. Raramai zuwa rimwe na rimwe mecirangarira zvipikirhwa zva Mwari mundangariro menyu no mu mwoyo menyu. Tendai cikomborero cenyu ce kunamata Baba enyu e kudenga, uye reremedzai kariro yenyu ye kumunamata nokusikaperi!