1-2. Ticaonei mu fundo ino?

MAIZOZWA kudini kana ciro camakatumirhwa cizikazi kuguma pa nguwa ramaikarira? Maizoora mwoyo here? Pamweni mungazwa hingana zvinobhuya Zvierengo 13:12: “Kana zvirikukarirhwa zvikanonoka, mwoyo unonetseka.” Asi zvakadini kana mukazoziya kuti ciroco acizi kuguma nge ndaa yecikonzero cinozwisisika? Pamweni izvona zvingaita kuti mugadzirire kuetsera no mwoyo unononoka kutsamwa.

² Mu fundo ino, ticaedzurira mazano akawanda e Bhaibheri, acatibetsera kuti “tietsere no mwoyo unononoka kutsamwa.” (Mik. 7:7) Ticaonawo migariro miiri ye zviro inodikana kuti tietsere no mwoyo unononoka kutsamwa dakara Djehovha aita ciito. Pakupedzesera, ticaona makomborero a Djehovha aakagondesa ku aya akagadzirira kuetsera.

3. Zvierengo 13:11 inotifundisei?

³ Zvierengo 13:11 inotifundisa kuti ngei tecidikana kugara no mwoyo unononoka kutsamwa. Ipona panoti: “Upfumi unooneka nokukasika ucakasika kupera, asi upfumi we munhu unounganidza padoko no padoko ucatunhudzirika.” Tsamba ii inotifundisei? Munhu wakangwara, unoita zviro no mwoyo unononoka kutsamwa, ecizviita padoko no padoko, uye izvi zvinounzisa migumisiro yakanaka.

4. Zvierengo 4:18 inobhuya nge zve zano ripi?

⁴ Zvierengo 4:18 inoti “gwanza re anatsi rakaita hingana ciedza cemacibesi cinorumbwa cecidjeka dakara aamasikati.” Masoko  aya anocokuita no mabetsere anoita Djehovha aseenzi ake kuti azwisise cinangwa cake—Djehovha anoita izvi padoko no padoko. Asi tsamba ii, inotibetserawo kuti tizwisise kuti aKristu anoita kudini cinjo mu upenyu wawo kuti arumbwe ecikhwedera dhuze na Djehovha. Kukura pakunamata akuitiki ciriporipoco. Asi zvinotora nguwa. Kana tikagara afundi anopeta masimba kuti tirumbwe tecifunda uye toseenzesa mazano atinotambira kubva mu Bhaibheri no atinopaswa nge sangano ra Djehovha, ticakwanisa kuteedzera mawara a Kristu. Uye ticatunhudzira kuziya kedu Mwari. Ngatione mufanikiso wakaizwa ndi Djesu kuti apanganidze zvakadjeka fundo ii.

5. Djesu akapasa muezaniso upi?

⁵ Djesu akapasa muezaniso kuti apanganidze kuti masoko e Umambo anokura kudini mu mwoyo me anhu anoda zviro zvakanaka. Ayena akati: “Mbeu inomera yokura, kunyazi iyena [musimi] asikazvizii kuti zvinoitika kudini. Mavhu pacawo, anopasa zvibereko padoko no padoko. Kutanga gonje, kozoteera jonjora, uye pakupedzesera tsangu yakakora pa jonjora.” (Mk. 4:27, 28) Djesu aida kureyei? Djesu aipanganidza kuti, kuita hingana muti unokura padoko no padoko, kukura pakunamata ke munhu unotenda masoko e Umambo kunoitikawo padoko no padoko. Ngo muezaniso, mufundi we Bhaibheri paanotanga kukhwedera dhuze na Djehovha, padoko no padoko tinokwanisa kuona cinjo yaanoita mu upenyu. (Aef. 4:22-24) Asi i zvirokwazvo kuti atidikani kukanganwa kuti Djehovha ndiye anoita kuti mbeu ikure.​—1Ako. 3:7.

6-7. Tinofundei pa mushobo wakasikwa nyika ndi Djehovha?

⁶ Djehovha anoita zvese no mwoyo unononoka kutsamwa. Kuti adaro, ayena anoseenzesa nguwa yese inodikanwa, nguwa dzese ecirangarira kukudza zina rake uye kuti abetsere amweni. Ngo muezaniso, onai kuti Djehovha akagadzirira kudini nyika ku anhu padoko no padoko.

⁷ Parinopanganidza kuti Djehovha akasika kudini nyika, Bhaibheri rinobhuya kuti ayena  akakanda “medida yayo,” “peyakagadzikwa,” uye “akaimisa buwe rayo re pakhona.” (Djo. 38:5, 6) Ayena akatotora nguwa yekuti aongorore zvese zvaainga aita. (Ge. 1:10, 12) Munokwanisa kurangarira kuti ngirozi dzakazwa kudini padzaiona zvisikwa zva Djehovha zvecibudirira? Zvingaita kuti dzakapfara maningi! Zvekuti Bhaibheri rinoti, pano nguwa imweni yekuti idzona ‘dzaidaidzira dzecimukudza.’ (Djo. 38:7) Tinofundei? Djehovha akatora mamirionji e makore kuti apedzese zvese zvaainga asika, asi ayena akaita zvese padoko no padoko uye no ungwaru, zvakabetsera. Paakaima kuti aongorore zvisikwa zvake, Djehovha akaona kuti zvese zvainga “zvakanaka maningi.”​—Ge. 1:31.

8. Ticaonei zvino?

⁸ Hinga zvapangidzwa no miezaniso yadarika, mazano akawanda e mu Soko ra Mwari anotifundisa kuti ngei zvecikosha kugara no mwoyo unononoka kutsamwa. Zvino ngatione migariro miiri ye zviro yatinodikana kugara takagadzirira kuetsera kuna Djehovha.

9. Ngaipi imweni ye mugariro e zviro yatinodikana kuetsera kuna Djehovha?

⁹ Pamweni tingadikana kuetsera kuti Djehovha adaire minamato yedu. Nguwa dzimweni, tinonamata tecikumbira kuti Djehovha atipase simba kuti tikurire matambudziko kana kuti atibetsere kukurira patakarembera. Asi tingakwanisa kuzwa hingana kuti Djehovha arikunonoka. Ngei Djehovha asikadairi minamato yedu nokukasika?

10. Ngei tecidikana kugara no mwoyo unononoka kutsamwa patinoita munamato?

¹⁰ Djehovha anonyasa kupurutana patinoita munamato. (Pis. 65:2) Kuna ayena, minamato yedu ye mwoyo wese cipangidzo cekutenda kedu. (Ahe. 11:6) Patinoita minamato, Djehovha anonyasa kupurutana kuti aone kuti minamato yedu irikubva pasi pe mwoyo here, ayena anoona kuti tinopeta masimba here kuti tiite maererano no zviya zvetakumbira. (1Ju. 3:22) Hino, patinoita munamato kuna Djehovha tecikumbira kuti atibetsere kukurira muitiro wakashata uye patakarembera, pamweni tingadikana kugara no mwoyo unononoka kutsamwa uye tinodikanawo kupeta masimba kuti tiite cinjo. Djesu akaita kuti tizwisise kuti minamato imweni yainga isikazodairhwi ciriporipoco. Ayena akatikohomedzesa kuti: “Rumbwai mecikumbira, uye mucapaswa; rumbwai mecipsvaka, uye mucagumira; rumbwai mecigogodza, uye mucafunungurirhwa; ngekuti munhu wese unokumbira unopaswa, uye munhu wese unopsvaka, unogumira, uye munhu wese unogogodza ucafunugurirhwa.” (Mt. 7:7, 8) Patinotondowedza zano rekuti “rumbwai meciita munamato,” tingakwanisa kugara ne cokwadi cekuti Baba edu e kudenga acatipurutana uye acadaira minamato yedu.​—Ako. 4:2.

11. Ahebheru 4:16 ingatibetsera kudini patinoona hingana kuti minamato yedu irikunonoka kudairhwa?

¹¹ Patinorangarira kuti mhinduro ye munamato wedu irikunonoka kuuya, tinodikana kuedzurira kuti Djehovha akapikira kudaira minamato yedu “panguwa yakasisira.” (Erengai Ahebheru 4:16.) Hino kana mhinduro ikatama kuuya ngekukasika hingana zvetaida, atidikani kurangarira kuti Djehovha ashaisha. Ngo muezaniso, anhu ajinji aano makore akawanda eciita minamato kuti Umambo wa Mwari uuye uye kuti upedze migariro ye nyika ino. Djesu pacake akatifundisa kuti tinodikana kuita munamato nge zve Umambo uwona. (Mt. 6:10) Asi, unonga uri upenzi kana munhu akaruza kutenda kake muna Mwari ngekuti mugumo auzi kuuya pa nguwa yairangarirhwa no anhu! (Abha. 2:3; Mt. 24:44) Ciro cakanaka, kuetsera kuna Djehovha tecinamata no rugondo rekuti  ayena acadaira minamato yedu. Mugumo ucauya pa nguwa yakasisira uye panguwa yakanakira munhu wese ngekuti Djehovha ndiyena akatara “zuwa uye nguwa” yekuti izvi zviitike.—Mt. 24:36; 2Pe. 3:15.

12. Mugariro upi we zviro unganyanya kutishuphira kuti tigare no mwoyo unononoka kutsamwa?

¹² Pamweni tinodikana kugara no mwoyo unononoka kutsamwa uye kuetsera kuti unatsi uizwe. Mu nyika ino zvakadjairika kuti anhu abate zvakashata munhu nge ndaa ye musiyano uripo wakaringana no ganda, dzinza, tsika, nyika uye musiyano uripo pakati pe mwanarume no mwanakadzi. Anhu amweni anobatwa zvisikazi kunaka nge ndaa yedambudziko yekuremara uye yemundangariro. Apupuri a Djehovha akawanda anobatwa zvisina unatsi nge ndaa yezviro zvaanotenda zvinobva mu Bhaibheri. Patinobatana no matambudziko aya, tinodikana kuedzurira zvakareketwa na Djesu kuti: “Ucashingirira dakara ku mugumo ndiye ucaponeswa.” (Mt. 24:13) Asi munodikana kuitei kana mukaziya kuti hama imweni ye mu ungano yaiita citema cakakura? Kana akuru akaziiswa zvinonga zvaitika, imwimwi mucasiya nyaya ii mu nyara dzawo here? Mucaetsera no mwoyo unononoka kutsamwa dakara awona agadzirisa zvese nge maonero a Djehovha here? Mumigariro yakadaro, zviripo zvicaizwa no akuru. Ngatione kuti ngazvipi?

13. Djehovha anoetsera kuti akuru aitei pa nyaya ye citema cakakura?

¹³ Akuru paanoziya kuti hama imweni ye mu ungano yaita citema cakakura, awona anoita minamato ecikumbira “uzii we kudenga” kuti akwanise kuwona nyaya ii nge maonero a Djehovha. (Tg. 3:17) Cinangwa cawo kana zvikabvira, ngecekubetsera mushaishi uu kuti “acinje”. (Tg. 5:19, 20) Awona anoitawo zvese zvaanokwanisa kuti acengetedze ungano uye kuti anyaradze aya akabatwa zvisina unatsi. (2Ako. 1:3, 4) Paanoongorora nyaya dzakaringana no citema cakakura, akuru anotanga ngekukwarakwatisa zvese zvakaitika uye izvi zvingatora nguwa. Hino awona anoita munamato, uye no ungwaru wese anopasa mazano anobva mu Bhaibheri uye anopanga mushaishi maererano no “cishaishi cake.” (Dje. 30:11) I zvirokwazvo kuti akuru aadikani kunyanya kunonoka kuti aite ciito, asi awona aadikaniwo kuita zviro nokukasika. Kana akuru akabata nyaya ii nge mushobo wakanaka, ungano yese inobetsereka. Asi kunyazi akuru akabata nyaya ii ngo mushobo wakanaka, munhu uya wakakuwadzwa nge munhu wakaita cishaishi, iyena ungarumbwa ecirhwadziwa. Izvi ndizvona zvirikuitika kamuri here? Zvinyi zvingamunyaradza?

14. Muezaniso upi we mu Bhaibheri ungamubetsera kushingirira kana imwimwi makarhwadziswa no hama ye mu ungano?

¹⁴ Makambobatwa zvisina unatsi pamweni nge hama ye mu ungano  here? Bhaibheri ringakwanisa kumubetsera. Soko ra Mwari rino miezaniso yakanaka inotifundisa kuetsera kuna Djehovha kuti agadzirise zviro. Ngo muezaniso, Zuzee wakabatwa zvisina unatsi nge hama dzake kamare, asi iyena aazi kusiya kuti citema ce hama dzake ciite kuti iyena agare munhu uno hasha. Pane kudaro, Zuzee wakarumbwa ecikanda nzero dzake pakuseenzera Djehovha, iyena wakagara no mwoyo unononoka kutsamwa uye wakashingirira. Ndiyo ndaa Djehovha akamukomborera maningi. (Ge. 39:21) Nokuhamba ke nguwa Zuzee wakakwanisa kurekerera hama dzake. (Ge. 45:5) Kuita hingana Zuzee, isusu tinonyaradzwa patinokwedera dhuze na Djehovha uye patinosiya kuti ayena agadzirise kubatwa kusina unatsi pa nguwa yakasisira.​—Pis. 7:17; 73:28.

15. Cinyi cakabetsera hanzvadzi imweni kuti isiye zvakadaro kubathwa zvisina unatsi keyakaizwa?

¹⁵ I zvirokwazvo kuti kubathwa zvisina unatsi katinoizwa, akuzi kuezana no zvakaitika na Zuzee. Kunyazi zvakadaro, kubatwa zvakashata kunokuwadza mwoyo we munhu wese. Azvinei kuti tino dambudziko ne hama kana kuti no munhu usikaseenzeri Djehovha, ciro cakanaka cekuita, ngecekutondowedza mazano e mu Bhaibheri. (Afi. 2:3, 4) Onai zvakaitika no hanzvadzi imweni. iyona yakaziya kuti mudoni wayo we kubasa yaishaisha kumureketa no anhu amweni. Pane kuti iite zviro isikazi kurangarira, hanzvadzi ii yakarangarira nge zve muezaniso wa Djesu. Djesu paaitukwa ainga asikahwirinziri. (1Pe. 2:21, 23) Yecirangarira nge zve muezaniso uu, hanzvadzi ii yakasanangura kusiya zvakadaro zvainga zvaitika. Nge kuhamba ke nguwa, iyona yakaziya kuti mudoni wayo we kubasa yaisongana no dambudziko rakakura re uthongo. Hanzvadzi ii yakazoguma pakuona kuti mudoni wayo we kubasa wainga isina cinangwa cekumurhwadzisa. Hino iyona yakapfara maningi ngekugara no mwoyo unononoka kutsamwa uye yakazwa iri murunyararo.

¹⁶ Kana murikusongana no dambudziko rekubatwa zvisina unatsi kana kuti rimweniwo, edzurirai kuti Djehovha ari dhuze no aya “akaora mwoyo.” (Pis. 34:18) Garai no cokwadi cekuti Djehovha anomuda  nge ndaa yekugara kenyu no mwoyo unononoka kutsamwa uye ngekuthusira zvinetso zvenhu kaari. (Pis. 55:22) Ayena mutongi we nyika yese. Apana cinoitika ayena asikazvizii. (Erengai 1 Pedru 3:12.) Hino, kana murikusongana no dambudziko ramusikakwanisi kugadzirisa, etserai Djehovha dakara arigadzirisa.

17. Maererano na Isaya 30:18, Djehovha anotigondesei?

¹⁷ Mu nguwa iri kuuya, Baba edu ari kudenga acatikomborera eciseenzesa Umambo wawo. Isaya 30:18 inoti: “Djehovha anoetsera no mwoyo unononoka kutsamwa kuti amuzwire nyasha, uye acamuka kuti amuzwire usisi. Ngekuti Djehovha ndi Mwari we unatsi. Anopfara ese aya anoetsera kaari.” Aya acarumbwa ecietsera kuna Djehovha acatambira makomborero akawanda zvino uye mu nyika ipsva.

18. Makomborero api akatietsera?

¹⁸ Paacapinda mu nyika ipsva, aseenzi a Djehovha aazosonganizve no matambudziko aarikubatana nawo nyamasi uno. Kubathwa kese kusina unatsi, uye kurhwadziwa kese kucadarika. (Re. 21:4) Atizoetseri tecinetseka nge zve zviro zviya zvatinoda. Nyika yese icagara no zvese zvatinoda. (Pis. 72:16; Isa. 54:13) Ticakomborerhwa maningi na Djehovha!

19. Ngei Djehovha ecitigadzirisa padoko no padoko?

¹⁹ Pa nguwa ino, Djehovha paanotibetsera kuti tikurire miitiro yakashata kana kuti titunhudzire mawara edu eciKristu, zvezvirokwazvo ayena anonga ecitigadzirira kuti tirarame mu nyika ipsva. Hino musadzirhye mwoyo kana kuhwirira sure ngekuti tino ramangwana rakanaka mberiyo! Ngatirumbwe takagadzirira kuetsera no mwoyo unononoka kutsamwa kuti Djehovha apedze basa rake!