MUSORO WE KUFUNDA 33
Pfarai nge Makomborero Amunawo
“Zviri nani kupfadzwa ne zvinoonekwa ne madziso pano kuda zviro zvamunsingakwanisi kugara nazvo.”—MUP. 6:9.
NGOMA 111 Zvinoita kuti Tipfare
ZVATICAFUNDA *
1. Ngazvipi zvirikuizwa ne hama jinji kuti dzipase zvakanakisisa zvawo kuna Djehovha?
NYIKA ino pairikurumbwa yeciguma kumapeto, tinobasa rakawanda rekuti tiite. (Mt. 24:14; Ru. 10:2; 1Pe. 5:2) Tese isusu tinoda kuseenzera Djehovha nepatinokwanisa napo. Hama jinji dzirikuita zviro zvakawanda mu basa rekuparidzira. Amweni arikuda kuseenza hinga mapionero. Uye amweni ano cido cekuda kuseenzera ku Bheteri uye mu basa rekuwaka. Uye hama jinji dzirikupeta masimba kuti dzikwaniriswe kuti dzigare abati anoseenzera uye akuru. (1Ti. 3:1, 8) Djehovha anopfara maningi ngekuona kuti aseenzi ake akagadzirira kuti amuseenzere pese pazvinonga zvecidikanwa!—Pis. 110:3; Isa. 6:8.
2. Tingaitei kana tikasama kugumira zvinangwa zvimweni zvekunamata?
2 Nguwa dzimweni atikwanisi kugumira zvinangwa zvedu nokukasika hingana zvetaida. Ndiyo ndaa tingatsukwara. Kana kuti tingaora mwoyo nge ndaa yekuti tinonga tisisina thunga rekutambira ubaba, kana kuti nge ndaa yemugariro umweni ungatipingaidza kuti tisazvikwanise. (Zvi. 13:12) Ngo muezaniso, Melissa * waida maningi kuseenzera ku Bheteri uye kupinda Cikora ce Aziisi e Umambo, asi iyena unoti: “Inini ndakura maningi zvekuti andicina thunga rekuita mabasa aya.”
3. Matii api anodikana kugadziriswa ne hama dzisati dzatambira ubaba?
3 Kune madjaha, cineso cingaita cimweni. Amweni awo ano ungwaru, anokwanisa kuita zvisananguro zvakanaka uye ano simba rekuti aseenze. Kunyazi zvakadaro, pamweni anodikana kufundira kugara no mwoyo unononoka kutsamwa uye rureremedzo. Kana mukabatikana pakusakurira mawara anodiikanwa, ubaba ucawiya pa nguwa yamusikakariri. Onai muezaniso wa Nick. Painga ano makore 20, iyena wakatsukwara maningi ngekusama kugadzwa kuti aseenze hingana mubati anoseenzera. Iyena unoti: “Ndairangarira kuti pano ciro cakashata kandiri.” Asi Nick aazi kuhwirira sure. Iyena wakabata no nyara mbiri ubaba waainga aanawo. Nyamasi uno, iyena urikuseenza hingana nhengo ye Dare re Firiari.
4. Ticaonei mu fundo ino?
4 Makatsukwara ngekuti amusati magumira zvinangwa zvimweni zvekunamata here? Hino bvunzai Djehovha mazwire amuri kuita. (Pis. 37:5-7) Kusiya izvona, kumbirai mazano ku hama dzagara ne basa kuti muziye zvamungaita kuti mukwanise kuita zviro zvakawanda mu basa ra Djehovha. Uyewo, munodikana kupeta masimba kuti museenzese mazano amunonga mapaswa. Kana mukazviita, pamweni mucatambira ubaba kana kutogumira zvinangwa zvimweni. Asi kuita hingana Melissa wamboreketwa nge zvake, ubaba wamunoda pamweni amungaikwanisi pa nguwa ino. Kunyazi zvakadaro, mungagara kudini no mupfaro? Kuti tidaire mubvunzo uu, ticaona mu fundo ino kuti (1) cinyi cinoita kuti tipfare, (2) tingagara kudini no mupfaro, uye (3) zvinangwa zvipi zvatingagara nazvo zvingatunhudzira mupfaro wedu.
CINYI CINGAITA KUTI TIPFARE
5. Kuti tione mupfaro, tinodikana kukanda ndangariro dzedu pa cinyi? (Muparidzi 6:9)
5 Muparidzi 6:9, inopanganidza nge zve ciro cingatipasa mupfaro. (Erengai.) Munhu unogutsikana “ne zvaanoona ne madziso ake” unozvibata no nhara mbiri kana kuti unopfara ne mugariro wake. Nge dii rimweni, uya unoenda koopsvaka zviro zvinodiwa ne nyama yake, unorarama ecipsvaka zviro zvaasikakwanisi. Tinofundei? Kana tecida mupfaro, tinodikana kukanda ndangariro dzedu pa zviro zvatinazvo, ne zviro zvatinokwanisa kuita.
6. Ticafunda nge zve mufanikiso upi wakareketywa na Djesu?
6 Kodi zvinoita here kuti tipfare ne zviro zvatinazvo? Anhu akawanda anoti azvibviri nge kuti munhu wese unoda kuona zviro zvipsva. Asi zvinobvira kupfara ne zviro zvatinazvo. Hinga zvataona, atidikani kundotendera basi zviro “zvinoonekwa ne madziso” edu. Asi tinokwanisa kupfara ne mugariro wedu watinawo. Ngei tecireketa kudaro? Kuti tigumire mhinhuro yakhona, ticamboongora mufanikiso wa Djesu wakaringana ne matarento, uri pana Mateu 25:14-30. Ngatione kuti tingafundei ne mufanikiso we matarento zvakaringana nge zve kugumira uye kutunhudzira mupfaro ne mugariro wedu watinawo.
TINGAGUMIRA KUDINI MUPFARO
7. Panganidzai nge zve mufanikiso we matarento wakareketywa ndi Djesu.
7 Pa mufanikiso we matarento, Djesu akapanganidza nge zve mwanarume umweni waida kuita vhiyaji. Asati aenda, iyena wakadainza aranda ake uye wakapasa umwe na umwe matarento manganani kuti aite bhizi. * Iyena waizia kuti aranda ake, ainga asikakwanisi kuita zviro nge mishobo yakaezana, ndiyo ndaa wakapa matarento mashanu ku muranda umwe, opa matarento mairi ku muranda umweni, uye ozopa tarento rimwe ku muranda we citatu. Aranda airi ekutanga akaseenza ne simba rese kuna tenzi wawo, asi muranda wecitatu aazi kuita ciro pa mare yainga apaswa. Ndiyo ndaa tenzi wake wakamudzingira.
8. Ngei muranda wekutanga waikwanisa kupfara maningi?
8 Muranda wekutanga wakapfara maningi ngekutambira kaakaita matarento mashanu kuti akwanise kuita bhizi. Ii yainga iri mare yakawanda maningi, uye zvaipangidza kuti tenzi wake wainyasa kumugonda! Asi zvakadini ne muranda wecipiri? Iyena ungadai akaora mwoyo nge kuti aazi kutambira matarento akapaswa muranda wekutanga. Asi iyena wakaitei?
Tinofundei kubva kumuseenzi wecipiri wakareketwa mu mufanikiso wa Djesu? (1) Akatambira matarento mairi kubva kuna Tenzi wake. (2) Akaseenza ne simba kuti aone mare imweni kuna Tenzi wake. (3) Akatunhudzira tenzi wawo zvakapetwa kairi (Onai ndima 9-11)
9. Djesu aazi kureketei nge zve muranda wecipiri?(Mateu 25:22, 23)
9 Erengai Mateu 25:22, 23. Djesu aazi kureketa kuti muranda wecipiri wakatsamwa nge ndaa yekutambira kaakaita matarento mairi basi. Uyewo Djesu aazi kureketa kuti muranda waihamba ecindogurunguta eciti: ‘Ngei ndapaswa izvi basi? Inini ndinokwanisa kuseenza ne simba kuita hinga wiya watambira matarento mashanu! Ngekuti tenzi wangu aandikoshesi, pamweni zvakanaka kuti ndifushire matarento mairi aya kuti ndiite zvandinoda.’
10. Muranda wecipiri wakaitei ne matarento aakatambira?
10 Hinga muranda wekutanga, wecipiri wakabata ne nyara mbiri mutoro wainga apaswa, uye wakaseenza ne simba rese kuna tenzi wake. Pakupedzesera, iyena wakapeta kairi matarento ainga atambira. Uye iyena wakakomborerhwa ne kusenza kake ne simba. Tenzi wake aazi kupfara basi ne basa raainga aita, asi wakamugonda uye wakamupasa ubaba umwenizve wakakura!
11. Mungagara kudini ne mupfaro wakakura?
11 Kana tikaseenza ne simba rese pa basa ratinonga tatambira mu sangano ra Djehovha ticapfara maningi. Seenzai “ne simba rese” pa basa rekuparidzira, ne mu ungano. (Zvi. 18:5; Ahe. 10:24, 25) Endai ku misangano makanyasa kugadzirira kuti mupe mhinduro dzenyu. Reremedzai matii amunopaswa pa misangano ye pakati pe sumana. Kana akuru akamukumbira kuti muite basa mu ungano, garai munhu unobata nguwa uye wakarongeka. Musashore mabasa amunopaswa meciti kupedza nguwa. Khorovherai mikana iri yese kuti mutunhudzire zviya zvamunokwanisa kuita. (Zvi. 22:29) Pamunorumbwa mecipeta masimba, mucakasika kubudiririra uye mucagara ne mupfaro wakakura. (Aga. 6:4) Uye zvicamuitirawo kuti mupfare kana hama dzenyu dzikatambira ubaba wamaida.—Aro. 12:15; Aga. 5:26.
12. Melissa na Nick akaitei kuti agumire mupfaro wakakura?
12 Muciri kuedzurira Melissa, waida kusenza ku Bheteri uye kupinda Cikora ce Aziisi e Umambo? Iyena aazi kukwanisa kuita zvaaida, asi onai zvaakareketa: “Ndinonyasa kusenza ne simba mu basa rangu re upioneira. Uye ndinopetawo masimba kuti ndiparidzire ndeciseenzesa mishobo yese, izvi zvinoita kuti ndipfare maningi.” Uye Nick wakaitei paasikazi kugadzwa kuita hingana mubati anoseenzera? “Ndakakanda nzero dzangu pa ubaba wandainga ndinawo—wakaita hingana kubuda mu basa rekuparidzira, kupasawo mhinduro dzakanaka pa misangano. Uyewo ndakadzadzisa petisau ye koseenza ku Bheteri uye ndakazodainzwa mu gore rakateera.”
13. Makomborero api amucatambira kana mukaseenza ne simba pa ubaba wamunawo? (Muparidzi 2:24)
13 Kana mukaseenza ne simba rese pa ubaba wamunawo zvino, zvinoreya kuti mucatambira mitoro yakakura pane ramangwana here? Pamweni, hinga zvakaitika kuna Nick. Asi kunyazi mugariro wakaita hingana wa Melissa, mungakwanisa kupfara uye magutsikana nge zviro zvamunazvo. (Erengai Muparidzi 2:24.) Uye mupfaro wenyu mukuru, nge we kuzia kuti Tenzi wenyu Djesu Kristu, anopfara maningi nge kupeta masimba kamurikuita.
ZVINANGWA ZVINOTUNHUDZIRA MUPFARO WEDU
14. Zvakashata kuseenza ne simba kuti tigumire zvinangwa here? Panganidzai
14 Kana taakupa Djehovha zvakanakisisa zvedu, zvinoreya kuti aticadikani kupeta masimba kuti tiite zvakawanda here? Andizvopi! Tinokwanisa uye tinodikana kugara ne zvinangwa pakunamata. Izvona zvinotikhohomedzesa kuti tiseenze ne simba rese pa basa rekuparidza uye pakubetserawo hama dzedu. Asi kuti tigumire zvinangwa izvona, tinodikana kugara ne ungwaru uye tiripakati ne pakati. Pane kuti tirangarire nge zvedu basi, tinodikana kuseenzera hama dzedu.—Zvie. 11:2; Zvi. 20:35.
15. Zvinangwa zvipi zvingatunhudzira mupfaro wedu?
15 Ngazvipi zvinangwa zvamungagara nazvo? Kumbirai Djehovha kuti amubetsere kuzia zvinangwa zvipi zvamungakwanisa kugumira. (Zvie. 16:3; Tg. 1:5) Zvingaita kuti mugare mupionero we rubetso, kana we —nguwa dzese, kuseenza ku Bheteri kana mu basa rekuwaka here? Mungatunhudzira basa renyu rekuparidzira nge kufundira mureketero mupsva kunyazi kutocinja kuenda ku nyika imweni. Kuti muzie zvinobatanidza pakuita izvona erengai fundo 10 ye bhuku rinozwi, Takarongwa Kuti Tiite Zvinoda Jehovha kana kucedza ne akuru e ungano yenyu. * Pamunorumbwa mecipeta masimba kuti mugumire zvinangwa zvenyu, hama dzese dzicaona kubudirira kenyu uye mucapfara.
16. Zvinyi zvamungaita zvino, kana musikakwanisi kugumira zvinangwa zvamunonga mecida?
16 Asi zvakadini kana musikakwanisi kugumira zvinangwa zvetapera kududza? Catingaita nge cekupsvaka zvinangwa zvimweni zvatinokwanisa kugumira. Onai zvamungaita.
Tingafundei pa muranda we cipiri uri pa mufanikiso wa Djesu? (Onai mandima 17) *
17. Maererano na 1 Timoti 4:13, 15, hama inodikana kuitei kuti igare mufundisi wakanaka?
17 Erengai 1 Timoti 4:13, 15. Kana muri hama yakabhabhatidzwa, mungatunhudzira mafundisire amunoita. Ngei? Ngekuti kana mukabatikana “pakutunhudzira” mushobo wamunoerenga, maitire amunoita mharidzo, uye no mafundisire enyu, mucabetsera anomupurutana. Garai ne cinangwa cekufunda uye kuseenzesa mazano ari mu bhurushura ra Shingairira Kuverenga Nekudzidzisa. Fundai fundo imwe na imwe, uye dziroedzei muri ku nyumba. Pakutunhudzira, pamunonga meciita matii enyu petai masimba kuti museenzese zvamunonga mafunda. Kumbirai mazano ku mupi we zano we cipiri, kana ku akuru “anoseenza ne simba mukureketa uye mukufundisa.” * (1Ti. 5:17) Munodikana kugara ne cinangwa, haiwa basi cekuzwisisa mazano e bhurushura, asi kubetsera apurutani kuti atunhudzire kutenda kawo uye kuakohomedzesa kuti assenzese zviya zvamuri kufundisa. Kuita izvona kucatunhudzira mupfaro wenyu ne we aya anomupurutana.
Tingafundei pa muranda we cipiri uri pa mufanikiso wa Djesu? (Onai mandima 18) *
18. Cinyi cingatibetsera kuti titunhudzire uzii wedu pa basa rekuparidzira?
18 Tese tino mutoro wekuparidza uye kuita afundi. (Mt. 28:19, 20; Aro. 10:14) Maizoda kutunhudzira mafundisire enyu mu basa iri rinokosha here? Ndiyo ndaa fundai uye seenzesai fundo dziri mu bhurushura Kudzidzisa. Pamunoita izvona seenzesai zviro zvamunoda kuita, zvinonga zviri mu Basa Redu uye Kurarama Kedu ke CiKristu—Urongwa we Musangano ne mavidhiyo ari pakucedzesana zvakaringana ne Bhaibheri anosopangidzwa pa misangano ye pakati pe sumana. Tinopaswa mazano akanaka anotibetsera pa basa redu re kuparidzira. Edzai kuseenzesa mazano aya, uye onai kuti ngaapi angaseenza zvakanaka kamuri. Kana mukaseenzesa mazano aya, mucagara ne mupfaro usikaezaniswi.—2Ti. 4:5.
Tingafundei pa muranda we cipiri uri pa mufanikiso wa Djesu? (Onai mandima 19) *
19. Mungasakurira kudini mawara e ciKristu?
19 Musakanganwe kuti cinangwa cenyu cinokosha nge cekusakurira mawara e ciKristu. (Aga. 5:22, 23; Ako. 3:12; 2Pe. 1:5-8) Mungazviita kudini? Nge muezaniso, ngatimboti imwimwi muri kuda kugara ne kutenda kakabamba. Kana zvakadaro zvakanaka maningi kuerenga mabhuku edu ano mazano anobetsera akaringana nge zve kubambisa kutenda. Mavhidhiyo akawanda ari pa JW Broadcasting® anounzisa zvakaitika mu upenyu we hama ne hanzvadzi dzakapangidza kutenda paaisongana ne matambudziko. Kuona mavhidhiyo aya uye kuedza kuteedzera kutenda ke hama idzona zvaizomubetsera maningi.
20. Tingagara kudini ne mupfaro wakakura tisikanyanyi kutsukwara?
20 Zvezvirokwazvo tese tinoda kuita zvakawanda kuna Djehovha. Mu nyika ipsva, ticazokwanisa kumuseenzera takakwana. Pa nguwa ii yasara, ngatinyase kukhorovhera mikana yese yatinayo. Kana tikadaro ticagara ne mupfaro wakakura maningi uye kutsukwara kunoita kushoma, uye cinonyanya kukosha tinopasa mbiri uye tinokudza “Mwari wedu anopfara.” (1Ti. 1:11) Ndiyo ndaa, ngatipfare ne makomborero atinawo!
NGOMA 89 “Purutanai, Mozviita Kuti Mukomborerhwe”
^ par. 5 Isusu tinoda maningi Djehovha, uye tinoda kumupasa zvakanakisisa zvedu. Ndiyo ndaa tinopeta masimba kuti tiite zvakawanda mu basa rekuparidzira uye kuti titambire ubaba mu ungano. Asi zvakadini kana tikaedza zviri zvese asi tokonerhwa kugumira zvinangwa zvedu? Tingarumbwa kudini takabatikana mu basa ra Djehovha tisikaruzi mupfaro? Mufanikiso wa Djesu wakaringana nge zve matarento unotipasa mhinduro.
^ par. 2 Mazina amweni akacinjwa.
^ par. 7 NYASAI KUZWISISA: Tarento rimwe raienderana nemare yaitambirhwa ne musenziwo hake ke makore anokwana 20.
^ par. 15 Tinokohomedzesa hama dzakabhabhatidzwa kuti dzisakurire mawara anodikana kuti akwaniriswe kuti agare abati anoseenzera uye akuru. Kuti muzwisise zvinodikana kuti mutambire ubaba iwona, onai fundo 5 uye 6 ye bhuku Takarongwa Kuti Tiite Zvinoda Jehovha.
^ par. 17 NYASAI KUZWISISA: Mupi we zano we cipiri mukuru unopa mazano ari pawo ega, mazano akaringana ne mishobo yekufundisa uye unopa mazano ku akuru uye abati anoseenzera.
